2. Mose 4

Entschuldjungen un Tieekjens

1Moses säd: Ei wan see mie nich jleewen, un nich no mie horchen? Ei wan see sajen: Du hast goanich däm Harn jeseenen. 2Un de Har säd: Waut hast du en diene Haunt? Un Moses säd: Eenen Stock. 3Un de Har säd: Schmiet däm oppe Ieed. Moses schmeet däm oppe Ieed, un doa wia de Stock eene Schlang. Un Moses rand von de Schlang wajch. #2Mo 7,10 4De Har säd to Moses: Strakj diene Haunt ut un jriep dee biem Zoagel. Un hee strakjt dee ut un foot dee faust aun. Doamet haud hee sienen Stock enne Haunt. 5Un de Har säd: Dit es, daut see uk secha weeten woaren, daut de Gott aun dän äare Vodasch jleewden, Abraham, Isaak, un Jakob äa Gott, sikj die jewäsen haft. 6Un de Har säd to am: Stakj diene Haunt hinja dien Mauntel. Un Moses deed daut, un aus hee dee trigj rutneem, wia siene Haunt schneeich voll Lepra Krankheit. 7Un hee säd: Stopp dee noch eemol doa nenn. Un hee stopt dee wada en sien Mauntel. Aus hee dee rut neem, wia de Haunt soo jesunt aus siene äwaje Hut. 8Un Gott säd: Wan see daut ieeschte Tieekjen nich jleewen un nich no die horchen, dan woaren see veleicht no daut tweede. 9Un wan see dee beid nich jleewen, un nich no die horchen, dan nemm waut Wota vom Niel, un jeet daut oppe Ieed. Un daut Wota von en däm Riefa woat oppe Ieed Bloot sennen. #2Mo 7,17-21

10Un Moses säd to däm Harn: Oba mien Har! Ekj sie nich eena dee goot räden kaun, un sie uk noch nienich jewast. Un uk nu, daut du to dienen Deena rätst, es daut nich bäta jeworden. Ekj kaun bloos nich goot räden, ooda mie kloa utspräakjen. #2Mo 3,11; 6,12.30 11Un de Har säd to am: Wäa haft däm Mensch daut räden jejäft? Un wäa moakt een Mensch stomm ooda doof, ooda daut hee seenen kaun ooda nich? Ekj, de Har, doo daut doch. #Psa 94,9 12Nu go! Ekj selfst woa die räden halpen, un die unjarechten waut du sajen saust. #5Mo 18,18; Mat 10,19 13Moses säd: Mien Har, hool dit nich jäajen mie, oba schekj eenen aundren, krakjt soonen aus du west. 14Dan wort de Har kort met Moses un säd: Hast du nich een Brooda Aaron, eena von däm Staum Levi? Ekj weet, dee kaun goot räden. Un weetst uk waut, dee kjemt die besieekjen, un wan dee die sitt, woat hee sikj sea freien. 15Du woascht to am räden un am de Wieed jäwen, dee hee räden saul, un ekj woa junt beid räden halpen, un junt wiesen waut jie doonen sellen. 16Hee woat fa die to daut Volkj räden, un daut woat soo sennen, aus wan hee daut Mul fa die es, un du aus een Gott fa am. #2Mo 7,1-2 17Oba nemm disen Stock met, daut du met däm kaust de Wunda doonen, dee ekj die jeef.

18Dan jinkj Moses wada no sienen Schwieevoda, Jitro, un säd däm: Lot mie trigj no miene Lied en Ägipten gonen, un seenen auf dee noch aum Läwen sent. Jitro säd to Moses: Go, ekj wensch die eene goode Reis. #2Mo 3,1 19Un de Har säd to Moses en Midian: Go trigj no Ägipten. Dee, dee die no daut Läwen stunden, sent aula jestorwen. 20Dan neem Moses siene Fru un Junges un leet dee opp eenen Äsel rieden, un see jinjen aula auf trigj no Ägipten. En siene Haunt haud hee dän Stock von Gott. #2Mo 18,3-4 21De Har säd to Moses: Wan du ieescht trigj no Ägipten kjemst, dan wies däm Kjennich aul de Wunda, woone ekj fa die mäajlich jemoakt hab. Oba ekj woa am soo hoat jäajen junt enstalen, daut hee daut Volkj nich woat gonen loten. #2Mo 7,3.13; 5Mo 29,3; Jes 6,10; Reema 9,18 22Du woascht däm Kjennich sajen: Soo haft de Har jesajcht: Israel es mien ieeschtjebuarna Sän, #5Mo 32,6 23un ekj saj die: Lot mienen Sän gonen, daut hee mie deenen kaun. Wan du daut nich loten woascht, dan paus opp, dan woa ekj dienen ieeschtjebuarnen daut Läwen nämen. #2Mo 11,5; 12,29

24Aus Moses un siene Famielje hinjawäajes wieren, neem sikj daut soo rom, aus see äwa Nacht bleewen, daut de Har no Moses kjeem, un wull am daut Läwen nämen. #(24-26) 1Mo 17,14; 32,25 25Dan neem Zippora eenen schoapen Steen un beschneet äaren Sän, un schieed met de aufjeschnädne Hut, Moses siene Feet aun. Un see säd: Du best doch een Blootbriegaum to mie. #Jos 5,2 26Doamet schoond de Har Moses. See säd Blootbriegaum, wiels aus Moses siene Fru, deed see dän Sän en Moses siene Städ beschnieden.

27Nu säd de Har to Aaron: Go emol no de Wiltnis, daut du Moses trafen kaust. Un hee jinkj un troff am bie däm Gottesboajch, un hee kust am. 28Moses vetald Aaron, aules waut de Har am oppjelajcht haud, un uk aul de Tieekjens, dee hee doonen sull. 29Moses un Aaron jinjen no Ägipten, un doa vesaumelden see aule Leida von Israel. 30Un Aaron säd an aules, waut de Har Moses jesajcht haud, un Moses wees an de Tieekjens. 31Un daut Volkj jleewd. Aus see hieeden, daut de Har om Israel besorcht wia, un daut hee jeseenen haud, woo see jekjwält worden, kjneeden see sikj aula un bäden aun. #2Mo 3,16

Currently Selected:

2. Mose 4: PB

Highlight

Compare

Copy