1. Mose 15

Gott moakt eenen Bunt met Abram

1Eene jewesse Tiet lota kjeem de Har no Abram en eene Erfoarunk un säd: Hab nich Angst Abram. Ekj woa die Schutz jäwen; die woat noch väl goodet tookomen. #4Mo 24,4.16; Psa 3,4 2Un Abram säd: Gott mien Har, waut west du mie tookomen loten? Ekj hab kjeen Kjint, un mien Oafgoot woat no mien Kjnajcht Elieser von Damaskus gonen. 3Un Abram säd: Du hast mie kjeen Kjint tookomen loten, un miene Oaw es mien Kjnajcht, dee von kjlien aun en miene Wirtschoft jewast es. 4Nu horcht. Dan hieed Abram däm Harn sajen: Nä! De Kjnajcht woat nich diene Oaw sennen. Dien ieejna Sän woat diene Oaw sennen. 5De Har jinkj ver am rut un säd: Kjikj emol no de Stierns, un proow dee to talen, soo goot aus du kaust. Soo väl Nokomen woascht du haben. #1Mo 22,17; 2Mo 32,13; 5Mo 1,10; Heb 11,12 6Abram sad sien vetruen opp däm Harn sien Vespräakjen, un de Har tald am doaderch jerajcht. #Reema 4,3-5; Jak 2,23

7Un de Har säd to Abram: Ekj sie de Har, dee die von Ur, de Chaldäa äare Staut, häajebrocht hab, soo daut ekj die dit Launt jäwen kunn, daut et dient kunn sennen. #1Mo 11,31; 2Mo 3,14; Jes 45,5; Joh 8,24-29 8Un Abram säd: Gott mien Har, woo kaun ekj daut foten, daut dit saul mient sennen? 9Un de Har säd: Brinj emol een dreejoaschet Hoklinkj, eene dreejoasche Kos, eenen dreejoaschen Bock, un twee Duwen. 10Abram brocht dee, un schneet dee delenjd de Medd opp. Dan läd hee dee enne Rieej, emma eene halft jäajenäwa von de aundre. De Väajel schneet hee nich enne halft. #Jer 34,18-19 11Doa kjeemen dan waut Oshakasch rauf opp daut Fleesch, un Abram juach dee doa emma wajch.

12Aus de Sonn dan unjajinkj, kjeem doa een deepa Schlop opp Abram; daut wort sea diesta un eene groote Forcht kjeem äwa am. #1Mo 2,21; 1Sam 26,12; Jes 29,10 13Dan säd de Har: Opp verieescht woaren diene Nokomen framde sennen en een Launt, woont nich äat es. Doa woaren see Sklowen sennen, un see woaren schlajcht behaundelt woaren. Dit woat 400 Joa sennen. #2Mo 1,13; 12,40; Apost 7,6 14Ekj woa daut Launt, wua see deenen woaren, bestrofen, un dan woaren see ut daut Launt, met väle wieetvolle Sachen rut komen. #2Mo 3,21-22; Apost 7,7 15Du selfst, woascht sea oolt woaren, un ruich no diene Väavodasch gonen, un begroft woaren. #1Mo 25,7-8 16No vea Jennerazionen woaren see trigj hiahan komen. De Amorita, dee hia nu wonen, woaren ieescht de Mot met äare Sinden voll moaken ea ekj an strofen woa. #Apost 7,7

17Aus de Sonn ieescht unjajinkj un daut diesta wort, trocken doa twee Dinja tweschen de twee halften von daut Fleesch derch. Eent wia een Fiatopp, dee goot kwaulemd, daut aundre wia een Fiastock, dee doa kloa brend. #2Mo 19,18 18Dän Dach muak de Har eenen Bunt met Abram un säd: Ekj woa diene Nokomen dit Launt jäwen, vom Ägiptischen Riefa bat dän grooten Eufrat Riefa, #1Mo 12,7; 1Kjen 8,65; 5,1 19de gaunze Jäajent wua nu de Kenita, Kenasita, Kadmonita, 20de Hetita, Perisita, Refaita, 21de Amorita, Kanaanita, Girgasita un de Jebusita wonen.

Currently Selected:

1. Mose 15: PB

Highlight

Copy