1. Mose 49

Jakob siene latste Wieed aun siene Säns

1Un Jakob kroagd siene Säns toop un säd: Komt emol aula toop, soo daut ekj junt sajen kaun, waut junt noch woaren saul.

2Komt toop un horcht, miene Säns,

horcht no junen Voda, Israel.

3Ruben, mien ieeschtjebuarna,

du best miene Krauft,

de ieeschta Bewies von miene Macht;

du hast de jratste Iea un jratste Krauft. #1Mo 29,32; 5Mo 21,17

4Du deist äwaschelpsen soo aus Wota;

doch woascht nich daut jratste sennen,

wiels du en dien Voda sien Bad jinjst,

un doa hast Schaund jedräwen. #1Mo 35,22

5Simeon un Levi sent een Poa,

dee gonen met Jewault omhäa. #(5-7) 1Mo 34,25

6Ekj woa nich met an toop plonen,

un woa nich met an toop gonen.

Em Oaja brinjen see wäm om,

un kjwälen de Bolles em Spos.

7Lot Trubbel opp an komen,

wäajen äaren grausomen Oaja

un uk äare ommenschelje Wutt.

Ekj woa junt derch daut gaunze Israel vespreeden. #Jos 19,1-9; 21,1-42

8Die, Juda, woaren diene Breeda lowen;

du woascht diene Fiend biem Jenekj hoolen,

dien Voda siene Säns woaren sikj ver die kjneeen. #4Mo 10,14; Rech 1,1-2

9Juda, du best soo aus een junga Leiw,

dee emma met waut von de Jacht kjemt;

Du lajchst die bie dien Raup dol,

un kjeena woacht sikj dicht bie. #4Mo 23,24; Hes 19,2; Opb 5,5

10De Kjennichstock woat nich von Juda jenomen,

sien Rejierungs Stock woat nich veschwinjen,

bat de Rajchtschuldja kjemt.

Däm woaren de Velkja ieren. #4Mo 24,17; 1Chr 5,2; 28,4; Hes 21,32; Heb 7,14

11Hee binjt sienen Äsel aun de Wienrank,

un sienen jungen Äsel aun de baste Rank;

hee wauscht siene Kjleeda en Wien

un sienen Rock en Wiendruwensauft,

soo aus Bloot. #Joel 4,18

12Siene Uagen sent dunkla aus Wien

un siene Tänen witta aus Malkj.

13Sebulon woat biem Mäa wonen;

hee woat een Howen fa Schäp sennen;

sien Launt rieekjt bat Sidon. #Jos 19,10-16

14Isachar es een stoakja Äsel,

dee tweschen twee Schop Hocks licht.

15Hee sach daut et eene scheene Städ wia,

un daut doa goot to reiwen wia.

Du jefst die unjare schwoare Oabeit,

un motst aus een Sklow deenen.

16Dan woat siene Menschen rechten,

aus eena von de Stam von Israel. #Rech 13,2.24-25

17Dan woat eene Schlang biesied däm Wajch sennen,

eene jeftje Schlang biesied däm Stich,

dee de Pieed enne Haken bitt,

soo daut de Ritta äwarigj jeschmäten woat.

18Ekj wacht, Har, daut du halpen woascht. #Psa 119,166; Hab 2,3

19Gad woat von Reiba Baunden beplindat woaren,

un hee woat an beplindren.

20Asser sien Launt woat goot droagen,

un Äten fa däm Kjennich jäwen. #Jos 19,24-31

21Naftali es aus eene loosjelotne Reekoo,

un haft schmocke Junge. #Rech 4,6-10

22Josef es een fruchtboara Aust,

dee bie eene Wotakjwal waust

un siene Asta äwa de Mia strakjt.

23Dee waut met Boages un Feilen scheeten,

saden am en Jefoa;

dee schooten ut Oaja no am.

24Oba sien Boagen jeef nich no,

un siene Oarms bleewen stoakj

met de Help von Jakob sienen stoakjen Gott,

met de Help von däm Hoad,

dee Israel Schutz jeft. #5Mo 32,18

25Dien Voda sien Gott woat die halpen,

dee waut aule Macht haft woat die säajnen,

met Säajnungen vom Himmel bowa die,

met Säajnungen von deep enne Ieed,

met Säajnungen von jesunde Kjinja. #(25 un 26) 5Mo 28,3-6; 33,13

26Dien Voda siene Säajnungen

sent jrata aus de Frucht von de eewje Boaj,

un aus de Säajnungen von de sea oole Boaj.

Dee woaren opp Josef sienen Kopp sennen,

un oppem Stiern von däm,

dee oppoat jesat wia von siene Breeda.

27Benjamin es een rietenda Wulf,

dee em Morjen sien Raup frat,

un em Owent daut Äwabliefsel wieda jeft. #Rech 20,25; 1Sam 9,1-2

28Dit sent de twalw Stam en Israel, un dit es de Säajen met woonen äa Voda eenen jiedren sienen besondren Säajen jeef.

Jakob stoaft un woat begroft

29Un Jakob bestald aun an: Wan ekj nu stoawen woa, dan begroft mie met miene Vodasch en de Heel opp de Stap, dee von däm Hetita, Efron, jekoft wia; #(29-32) 1Mo 23,13-20 30en de Heel opp daut Flekj bie Machpela, oosten von Mamre, en Kanaan. Daut haft je Abraham aula toop von däm Hetita, Efron, jekoft, aus een Graufhoff. 31Doa haben see Abraham un siene Fru Sara begroft; un doa haben see Isaak un siene Fru Rebecka begroft; un doa begrowd ekj Lea. #1Mo 25,9; 35,29 32Dee Stap un de Heel waut doa es, wieren von de Hetita jekoft. 33Aus Jakob utjerät haud, läd hee sikj dol, un storf. Soo wia daut aus hee no siene Väavodasch jinkj.

Currently Selected:

1. Mose 49: PB

Highlight

Compare

Copy