Josua 2
2
Eene kanaanitische Fru halpt de israelitische Spionen
1Josua, Nun sien Sän, schekjt von Schittim twee Mana jeheem aus Spionen ut un säd to an: Got han, un beseet junt daut Launt goot, un besondasch de Staut Jericho! Un de Mana jinjen en de Staut nenn un kjeemen no de Hua Rahab äa Hus un jinjen doa nenn, om doa äwa Nacht to bliewen. #Mat 1,5; Heb 11,31; Jak 2,25 2Däm Kjennich von Jericho wort daut oba noch aun däm selwjen Owent jemalt: Doa sent en dise Nacht Mana von Israel nenjekomen, daut Launt uttospionen. 3Dan schekjt de Kjennich von Jericho von siene Wajchta no Rahab un leet ar sajen: Jeff de beid Mana rut, waut no die en dien Hus jekomen sent; dee sent bloos jekomen, om daut Launt uttoforschen. 4Rahab oba vestuak de beid Mana un säd: Jo, doa sent Mana bie mie nenjekomen, oba ekj wist nich, wua dee häakjeemen. 5Un aus met diesta woaren daut Stautspuat sull toojeschloten woaren, jinjen see rut, un ekj weet nich wua dee hanjegonen sent. Oba wan jie dee schwind hinjaraun joagen, dan woa jie dee noch enholen. 6See haud de Mana opp äa Dak noppgonen loten un an met daut Flausstroo unjajeschett, waut see opp äa Dak jeschett haud. 7De Wajchta juagen de Spionen opp däm Wajch nom Jordan hinjaraun bat aun däm flaken Äwagank biem Jordan. Un daut Stautspuat wort hinja an wada toojeschloten.
De Kanaanita haben dän Moot veloaren
8Oba ea de beid Spionen sikj hanläden toom schlopen, kjeem Rahab opp daut Dak nopp no an 9un säd: Ekj weet, daut de Har junt dit Launt jejäft haft, wiels aul de Enwona zetren un haben Angst fa junt, un haben aula dän Moot veloaren. #2Mo 23,27 10Wie haben daut jehieet, woo de Har daut Wota em Schelpmäa ver junt utdrieejen leet, aus jie ut Ägipten rut trocken. Un wie weeten uk, waut jie met de beid Kjennichs von de Amorita, Sihon un Og, aun jantsied Jordan jedonen haben, woo jie dee besiecht un dootjemoakt haben. #2Mo 15,14-15; 5Mo 4,39; Jos 5,1 11Un von don aus wie daut hieeden, hab wie aulen Moot veloaren. Kjeena von ons woacht sikj, jäajen junt to kjamfen, wiels de Har, jun Gott, es Gott bowen em Himmel uk unjen oppe Ieed. 12Ekj pracha junt, doot mie bie däm Harn schwieren, daut jie truhoatich un goot woaren to miene Famielje sennen, soo aus ekj junt sie truhoatich goot jewast. Un jäft mie een sechret Tieekjen, #Jos 6,23.25 13daut jie mienen Voda, miene Mutta, miene Breeda un miene Sestren un aules, waut see haben, läwen loten un vom Doot raden woaren. 14Dan säden de Mana to ar: De Har saul ons ieejnet Läwen von ons fodren, wan wie daut Vespräakjen nich hoolen un nich tru un goot to die sent, wan de Har ons dit Launt jeft, un du onse Sach nich veroden woascht.
De Spionen komen trigj
15Dan leet Rahab an aun eenen Strank derch een Fensta lenjd de Stautsmia rauf, wiels äa Hus, wua see wond, stunt aun de Stautsmia. 16Un see säd to an: Got un doot junt dree Doag manke Boaj vestäakjen, bat dee trigjekomen sent, waut junt hinjaraun juagen; un dan got june Wäaj. 17De Mana oba säden to ar: Dit Vespräakjen, waut du ons hast schwieren loten, well wie mau dan hoolen, 18wan du disen rooden Strank, wua du ons met raufjeloten hast, aun daut Fensta binjen woascht. Un dienen Voda, diene Mutta, diene Breeda un dien Frintschoft en dien Hus vesaumelt hast, wan wie en dit Launt nenn komen. 19Kjeena doaf dien Hus veloten. Wäa rut jeit un dootjemoakt woat, drajcht de Schult selfst, un wie sent nich veauntwuatlich doafäa. Bloos wan en dien Hus eena omjebrocht woat, traft ons de Schult. 20Wan du oba waut doavon veroden woascht, dan sent wie von daut Vespräakjen loos, waut wie die jeschwuaren haben. 21See säd: Soo aus jie jesajcht haben, saul daut sennen! Un neem Aufscheet von an. Un de Mana jinjen wajch. See oba bunk dän rooden Strank aum Fensta. 22De beid Mana jinjen un vestuaken sikj dree Doag manke Boaj, bat dee trigjekomen wieren, waut an sochten. Dee hauden opp aule Wäaj en de gaunze Jäajent jesocht, oba kjeenem jefungen. 23Nohäa jinjen de beid Spionen vom Boajch rauf en daut Jordantol nenn, un jinjen äwa däm Riefa un kjeemen no Josua, Nun sienen Sän, un vetalden am aules, waut see beläft hauden, 24un vesechaden am: De Har haft daut gaunze Launt en onse Henj jejäft, wiels aule Enwona em Launt haben fa ons Angst jekjräajen un dän Moot veloaren. #Jos 2,9
Currently Selected:
Josua 2: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.