3. Mose 14
14
Väaschreften fa de Leprakranke äare Reinjunk
1De Har räd met Moses un säd: 2Dit es daut Jesaz äwa dän Leprakranken, wan hee fa rein erkjläat woaren saul. Dee saul nom Priesta komen, #Mat 8,4 3un de Priesta saul ut daut Loaga rutgonen un fauststalen, auf de kranke Städ aun däm Leprakranken heel jeworden es. 4Un hee saul aunordnen, daut fa däm, dee jereinicht woaren saul, twee reine läwendje Väajel jenomen woaren, un Zeedaholt un scharlachfoawje Woll un Iessopp. #3Mo 11,3-20; 4Mo 19,6 5Un saul aunordnen, daut eene Voagel bowa een ieednet Dinkj met freschet Wota to schlachten. 6Un hee saul daut läwendje Voagel nämen, daut Zeedaholt, de scharlachfoawje Woll un däm Iessopp, un daut en daut met Wota vemischte Bloot von daut jeschlachte Voagel ducken, 7un däm säwen mol bespretzen, dee von Lepra to reinjen es, un däm dan fa rein erkjläaren, un daut läwendje Voagel oppe friee Stap flieejen loten. #3Mo 16,22 8Dee waut sikj reinjen lat, saul siene Kjleeda wauschen un siene Hoa aula aufschäaren un sikj met Wota aufwauschen, dan es hee rein. No dit doaf hee en daut Loaga komen, saul oba noch säwen Doag buta sien Zelt bliewen. #4Mo 8,7 9Un aum säwenden Dach saul hee noch een mol aul siene Hoa aufschäaren, opp sienen Kopp, aum Boat, de Uagbronen un aule äwaje Hoa aum Kjarpa, un saul siene Kjleeda wauschen un sienen Kjarpa met Wota aufwauschen. Dan es hee gaunz rein.
10Un aum achten Dach saul hee twee Lama nämen, fälaloose menliche Tieren, un een eenjoaschet Schop onen Fäla, un toom Ätesopfa dree tieendel Efa wittet Mäl met Eelj toopjerieet, un een Kuffel Olieweneelj. 11Un de Priesta saul däm, waut sikj reinicht, met siene Opfagowen ver däm Engank von daut Vesaumlungszelt ver däm Harn stalen. 12Un de Priesta saul daut eene Laum nämen un daut aus Schultopfa brinjen, un uk daut Kuffel Eelj, un saul beides ver däm Harn aus een Opfa, waut oppjehowen woat, opphäwen. 13Un dan daut Laum doa schlachten, wua daut Sindopfa un Brauntopfa jeschlacht woaren, opp eene jeweide Städ. Soo aus daut Sindopfa, soo jehieet uk daut Brauntopfa däm Priesta, wiels daut es eene heilje Gow. #3Mo 7,7 14Un de Priesta saul von daut Bloot vom Schultopfa nämen un däm waut sikj reinicht, doavon aun sienen rajchten Uabommel, opp dän Dumen aun siene rajchte Haunt un opp de groote Tee aun sienen rajchten Foot schmäaren. #2Mo 29,20; 3Mo 8,23 15Un dan saul hee daut Kuffel Eelj nämen un doavon waut en siene linkje Haunt jeeten 16un sienen rajchten Wiesfinja en de Eelj ducken, waut en siene linkje Haunt es, un säwen mol waut von de Eelj met sienen Finja aun dän Aultoa spretzen. #3Mo 4,6.17 17Un von de äwaje Eelj, waut en siene Haunt es, saul hee däm waut sikj reinjen lat, opp daut Bloot von daut Schultopfa, waut aun sienen rajchten Uabommel, un opp sienen rajchten Dumen un opp de groote Tee aun sienen rajchten Foot es, schmäaren. 18De äwaje Eelj en siene Haunt saul hee däm opp sienen Kopp schmäaren, waut sikj reinjen lat, un am ver däm Harn veseenen. 19Un dan saul de Priesta daut Sindopfa reedmoaken un däm, waut sikj reinjen lat, von siene Onreinheit frie moaken. Un no däm saul hee daut Brauntopfa schlachten, 20un de Priesta saul daut met daut Ätesopfa toop opp däm Aultoa vebrennen. Soo nemt de Priesta de Onreinheit von däm jesunt jewordnen wajch, un hee es wada rein.
21Es wäa too oam toom sooväl aus Opfa jäwen, dan saul dee een menlichet Laum nämen toom Schultopfa aus een Opfa waut oppjehowen woat fa siene Veseenunk un een tieendel Efa wittet Mäl, met Eelj toopjerieet, toom Ätesopfa un een Kuffel Eelj, 22un twee Turtelduwen ooda twee aundre Duwen, waut hee oppbrinjen kaun, de eene toom Sindopfa, un de aundre toom Brauntopfa. #3Mo 5,7 23Un hee saul daut aum achten Dach von siene Reinjunk nom Priesta brinjen, aun däm Engank von daut Vesaumlungszelt ver däm Harn. 24Doa saul de Priesta daut Laum fa daut Schultopfa un daut Kuffel Eelj nämen un daut ver däm Harn opphäwen. 25Un hee saul daut Laum toom Schultopfa schlachten, un de Priesta saul waut von daut Bloot vom Schultopfa nämen un däm, dee sikj reinjen lat, waut doavon aun sienen rajchten Uabommel un aun dän Dumen aun siene rajchte Haunt un opp de groote Tee aun sienen rajchten Foot schmäaren. 26Un dan saul de Priesta von de Eelj en siene linkje Haunt jeeten 27un met sienen rajchten Wiesfinja von de Eelj, waut en siene linkje Haunt es, säwen mol ver däm Harn spretzen. 28Un de Priesta saul waut von de Eelj, waut en siene Haunt es, däm doavon, waut sikj reinjen lat, äwa daut Bloot von daut Schultopfa aun sienen rajchten Uabommel un aun sienen rajchten Dumen un opp de groote Tee aun sienen rajchten Foot schmäaren. 29De äwaje Eelj en siene Haunt saul hee däm, waut sikj reinjen lat, opp dän Kopp schmäaren, om am ver däm Harn to veseenen. 30Un no däm saul hee eene Turtelduw ooda eene aundre Duw, waut hee haft oppbrinjen kunt, 31toom Sindopfa, un de aundre toom Brauntopfa reedmoaken met daut Ätesopfa toop. Soo saul de Priesta däm, waut sikj reinjen lat, ver däm Harn veseenen. 32Dit es daut Jesaz fa däm Leprakranken, dee nich daut jefoddade fa siene Reinjunk oppbrinjen kaun. #3Mo 13,47-59
Väaschreften äwa Hiesa, waut met Lepra befollen sent
33De Har räd met Moses un Aaron un säd: 34Wan jie en daut Launt Kanaan komen, waut ekj junt aus Oafgoot jäw, un ekj lot aun irjent een Hus en jun Launt eene Leprakranke Städ oppkomen, 35dan saul dee, wäm daut Hus jehieet, nom Priesta gonen un daut malden: Aun mien Hus es waut, waut no Lepra sitt. #3Mo 13,2 36Dan saul de Priesta aunordnen daut Hus uttoriemen, ea hee doa nenjeit, de Städ to beseenen, om daut nich aules orrein woat, waut en daut Hus es. Un dan saul de Priesta nengonen, om sikj daut Hus to beseenen. 37Un wan hee sikj de Krankheit bekjikjt un daut soo finjt, daut aun de Waunt von daut Hus jrennelje ooda roddelje Plaken sent, waut holl en de Waunt nenn sent, #3Mo 13,3 38dan saul de Priesta ut daut Hus rut no de Däa gonen, un dee fa säwen Doag veschluten. 39Un wan hee aum säwenden Dach wadakjemt un sitt, daut sikj de Plaken aun de Waunt wiedajefräten haben, 40dan saul hee de Steena rutbräakjen loten, wua de Plaken aun sent, un dee Butakaunt Staut opp eene orreine Städ hanschmieten. 41Un daut Hus saul von bennen runtom utjekleift woaren, un dän rutjekleiwden Leem sellen see uk buta de Staut opp eene orreine Städ hanschedden, 42un dan aundre Steena doa nenn mieren un daut Hus met freschen Leem utschmäaren.
43Wan de Plaken dan noch wada äwadäl komen aun daut Hus, wan de Steena aul rutjebroaken un daut Hus fresch utjeschmäat es, 44dan saul de Priesta komen. Un wan dee sitt, daut sikj de Plaken aum Hus wiedajefräten haben, dan es daut secha daut daut frätenda Lepra es, un daut Hus es orrein. 45Soon Hus saul doljebroaken woaren, un de Steena, daut Holt un dän Leem ut de Staut rut no eene orreine Städ jebrocht woaren. 46Un wäa en daut Hus nenjeit, soolang aus daut veschloten es, dee es orrein bat aum Owent. #3Mo 11,24 47Un wäa doabennen schlapt ooda at, woat orrein un mott siene Kjleeda wauschen.
48Wan de Priesta nenjeit un sitt, daut doa kjeene Plaken aum Hus äwadäl jekomen sent, no däm daut daut fresch veschmäat es, dan saul hee daut Hus fa rein erkjläaren; dan es de Lepra oppjeriemt. 49Un om daut Hus rein to erkjläaren, saul hee twee Väajel, Zeedaholt, scharlachfoawje Woll un Iessopp nämen, 50un daut eene Voagel bowa eene ieedne Komm met freschet Wota schlachten. #(50-53) 3Mo 14,7 51Un dan saul hee daut Zeedaholt, de scharlachfoawje Woll, dän Iessopp un daut läwendje Voagel nämen, un daut en daut met Wota vemischte Bloot von daut jeschlachte Voagel enducken, un doamet daut Hus säwen mol bespretzen. 52Soo saul hee daut Hus reinjen met daut Bloot von daut Voagel un daut fresche Wota, met daut läwendje Voagel, met daut Zeedaholt, met däm Iessopp un de scharlachfoawje Woll. 53Un daut läwendje Voagel saul hee buten ver de Staut oppe friee Stap flieejen loten. Soo nemt hee de Onreinheit von daut Hus, un daut es wada rein.
54Dit es daut Jesaz äwa aule Sorten von Lepra un oppfalje Plaken, 55äwa de Lepra aun Kjleeda un Hiesa, 56äwa Schwolst, Utschlach un witte Plaken, 57om daut eena Kloarheit haft, wan waut orrein ooda rein es. Daut es daut Jesaz äwa de Lepra.
Currently Selected:
3. Mose 14: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.