3. Mose 4
4
Aunwiesungen fa daut Sindopfa
1De Har räd met Moses un säd: 2Räd met de Israeliten un saj: Wan sikj wäa derch eenen Vefäl jäajen irjent een Jeboot vom Harn vegonen deit, waut hee nich doonen sull, dan sell jie no dise Räajlen haundlen: 3Wan de jesaulwda Priesta eenen Fäla moakt, un doaderch eene Schult opp daut gaunze Volkj brinjt, dan saul hee fa sienen Fäla, waut hee jemoakt haft, däm Harn eenen jungen fälaloosen Boll aus Sindopfa brinjen. 4Un hee saul däm Boll no däm Engank von daut Vesaumlungszelt ver däm Harn brinjen un siene Haunt opp dän Boll sienen Kopp lajen un däm doa ver däm Harn schlachten. 5Un de Priesta, waut jesaulft es, saul von däm Boll sien Bloot fa däm Harn en daut Vesaumlungszelt brinjen 6un saul sienen Finja en daut Bloot enducken un doamet, ver däm Harn, säwen mol aun de Gardien ver daut Aulaheilichste spretzen. #3Mo 9,9 7Un saul waut von daut Bloot ver däm Harn aun de Hieena von däm Ruakopfa Aultoa strikjen, waut en daut Vesaumlungszelt steit, un daut äwaje Bloot saul hee unjen aun dän Brauntopfa Aultoa jeeten, waut ver däm Engank von daut Vesaumlungszelt steit. #2Mo 30,1.6; 40,6 8Un aulet Fat von däm Boll fa daut Sindopfa saul hee loostranen, daut Fat, waut daut Enjeweide bedakjt, un aul daut Fat aun daut Enjeweide, 9de beid Nieren met daut Fat, waut doaraun es, daut waut aun de Hinjaschinkjes es, un dän Fatlaupen äwa de Läwa, bie de Nieren loosjetrant, 10krakjt soo aus daut bie een Rint biem Dankopfa jemoakt woat, un saul daut opp däm Brauntopfa Aultoa en Ruak oppgonen loten. 11Oba daut Lada von daut Tia, un aul daut Fleesch, dän Kopp, de Been un daut Enjeweide met Mest toop, #(11 un 12) 3Mo 8,17 12daut saul hee aula ut daut Loaga rutdroagen no eene reine Städ, wua eena Ausch hanschedden deit, un saul daut doa opp eenen Holtklompen vebrennen. #3Mo 6,4
13Wan de gaunze Jemeent von Israel sikj derch eenen Vefäl veschulcht, un daut nich enwoaren, daut see jäajen eent von däm Harn siene Jebooten jehaundelt haben, waut see nich doonen sullen, un sikj doaderch veschulcht haben, #(13-21) 4Mo 15,22-26 14un äare Sind nohäa enwoaren, waut see jedonen haben, dan sellen see eenen jungen Boll aus Sindopfa brinjen. Un daut Opfatia saul ver däm Engank von daut Vesaumlungszelt jebrocht, 15un de leidende Mana von de Jemeent sellen äare Henj ver däm Harn opp dän Boll sienen Kopp lajen, un däm doa ver däm Harn schlachten. 16Un de jesaulwda Priesta saul waut von daut Bloot von däm Boll en daut Vesaumlungszelt brinjen, 17un sienen Finja en daut Bloot enducken un säwen mol ver däm Harn jäajen de Gardien spretzen. 18Un hee saul waut von daut Bloot aun de Hieena vom Aultoa strikjen, waut ver däm Harn en daut Vesaumlungszelt steit, un daut äwaje Bloot unjen aun dän Brauntopfa Aultoa jeeten, waut ver däm Engank von daut Vesaumlungszelt steit. 19Aul daut Fat saul hee loostranen un opp däm Aultoa en Ruak oppgonen loten. 20Un hee saul daut met däm Boll soo doonen, aus hee daut met däm Boll fa daut Sindopfa jedonen haft. Soo saul de Priesta de Veseenunk fa an derchfieren, un de Har vejeft de gaunze Jemeent äare Schult. 21Un hee saul däm Boll bat buta daut Loaga droagen un doa vebrennen, soo aus hee dän väajen Boll vebrent haft. Daut es daut Sindopfa fa de Jemeent. #3Mo 4,11.12
22Wan sikj een Staumleida derch eenen Vefäl jäajen een Jeboot vom Harn, sienen Gott, vegonen deit un doaderch Schult opp sikj lot, 23un sitt dän Fäla en, waut hee jedonen haft, dan saul hee eenen fälaloosen Kosenbock aus Opfa brinjen. 24Un saul siene Haunt opp dän Kosenbock sienen Kopp lajen un däm aus Sindopfa ver däm Harn schlachten, opp de Städ wua de Tieren toom Brauntopfa jeschlacht woaren. 25Dan saul de Priesta met sienen Finja waut von daut Bloot von daut Sindopfa nämen un daut aun de Hieena von däm Brauntopfa Aultoa strikjen un daut äwaje Bloot unjen aun dän Brauntopfa Aultoa jeeten. 26Un aul daut Fat saul hee opp däm Aultoa en Ruak oppgonen loten, krakjt soo aus daut Fat vom Dankopfa. Soo saul de Priesta de Veseenunk fa däm Staumleida derchfieren, un am woat de Schult vejäft woaren.
27Wan sikj irjent wäa von daut Volkj derch eenen Vefäl veschulcht un jäajen eent von däm Harn siene Jebooten haundelt, waut hee nich doonen sull, un doaderch Schult opp sikj lot, #(27 un 28) 4Mo 15,27-28 28un siene Veschuldjunk enwoat, waut hee jedonen haft, dan saul hee fa sienen Fäla, waut hee jemoakt haft, eene fälaloose Kos toom Opfa brinjen. 29Hee saul siene Haunt opp dän Kopp von daut Opfatia lajen un daut opp de Städ schlachten, wua de Tieren fa daut Brauntopfa jeschlacht woaren. 30Un de Priesta saul met sienen Finja waut von daut Bloot nämen un aun de Hieena von däm Brauntopfa Aultoa strikjen un daut äwaje Bloot unjen aun dän Aultoa jeeten. 31Aul daut Fat saul hee loostranen, soo aus daut Fat vom Dankopfa loosjetrant woat, un saul daut opp däm Aultoa en Ruak oppgonen loten, to een scheenet Jeroch fa dän Harn. Soo saul de Priesta de Veseenunk fa am derchfieren, un am woat siene Schult vejäft woaren. #3Mo 3,14-15 32Well hee een Schop aus Sindopfa brinjen, dan saul hee een weiblichet Tia brinjen, waut onen Fäla es, 33un siene Haunt opp dän Kopp von daut Opfatia lajen un daut Sindopfa opp de Städ schlachten, wua de Brauntopfa jeschlacht woaren. 34Un de Priesta saul met sienen Finja waut von daut Bloot nämen un aun de Hieena von däm Brauntopfa Aultoa strikjen un daut äwaje Bloot unjen aun dän Aultoa jeeten. 35Oba aul daut Fat saul hee loostranen, soo aus daut Fat vom Schop biem Dankopfa loosjetrant woat, un saul daut opp däm Aultoa en Ruak oppgonen loten aus een Fiaopfa fa dän Harn. Soo saul de Priesta de Veseenunk derchfieren fa siene Sind, waut hee jedonen haft, un am woat de Schult vejäft woaren.
Currently Selected:
3. Mose 4: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.