3. Mose 8
8
Aaron un siene Säns woaren aus Priesta enjesat
(2Mo 29,1-37)
1De Har räd met Moses un säd: 2Nemm Aaron un siene Säns, de Kjleeda, de Saulweelj, dän jungen Boll toom Sindopfa, de beid Schopsbakj un dän Korf met daut onjesuade Broot, #(2-5) 2Mo 28,39-43 3un vesaumel de gaunze Jemeent ver däm Engank von daut Vesaumlungszelt. 4Un Moses deed, waut de Har am jesajcht haud, un vesaumeld de Jemeent ver däm Engank von daut Vesaumlungszelt 5un säd to an: Dit es daut, waut de Har väajesajcht haft to doonen. 6Un Moses leet Aaron un siene Säns väakomen un wosch an met Wota 7un trock Aaron daut Priesta Hamd aun un bunk am de Binj om un trock am dän Äwarock aun un bunk am dän Efod om. Hee bunk am daut Schalduak om met daut jewowne Strämel, waut doatoo wia. 8Dan muak hee am de Brosttausch aun un läd de Lessa “Urim un Tummim” en de Tausch #2Mo 28,30 9un bunk am de Koppbinj om un muak doa väaren daut goldne Schilt naun, daut heilje Schmuckstekj, krakjt soo aus de Har am daut väajesajcht haud. #2Mo 28,36-38; 39,30 10Un Moses neem de Saulweelj un saulwd daut Heilichtum un aules, waut doabennen wia, un weid daut en. #2Mo 30,25-26 11Hee sprezt von de Eelj säwen mol aun de Waunt vom Aultoa un saulwd dän Aultoa un aul daut Jereetschoft un daut Wotadinkj met Jestal toop, daut aules enjeweit wia. 12Un hee goot Aaron von de Saulweelj opp sienen Kopp un saulwd am, daut hee jeweit wort. 13Un hee leet Aaron siene Säns väakomen un trock an daut Priesta Hamd aun, un bunk an de Binj om un rold an de Koppbinj opp däm Kopp toop to eene huage Metz, soo aus de Har am daut väajesajcht haud.
14Dan leet Moses dän Boll toom Sindopfa doahan brinjen. Un Aaron un siene Säns läden äare Henj opp dän Boll sienen Kopp. #3Mo 4,1-12 15Un Moses schlacht däm un neem daut Bloot un strikjt daut met sienen Finja runtom aun de Hieena von däm Aultoa, toom dän enweien; daut äwaje Bloot goot hee unjen aun dän Aultoa. Soo weid hee däm Aultoa un veschauft Veseenunk fa däm von de Veorreinjunk derch menschliche Vefälungen. 16Un hee neem aul daut Fat von daut Enjeweide, dän Laupen aun de Läwa, un de beid Nieren met daut Fat doaraun, un leet daut opp däm Aultoa en Ruak oppgonen. 17Oba daut äwaje von däm Boll, daut Lada, daut Fleesch un daut Aufgank, vebrend hee buta daut Loaga met Fia, soo aus de Har daut väajesajcht haud. 18Dan leet hee dän Schopsbock fa daut Brauntopfa doahan brinjen. Un Aaron un siene Säns läden äare Henj opp däm sien Kopp. #3Mo 1,10-13 19Un Moses schlacht däm un sprezt daut Bloot runtom aun dän Aultoa. 20Dan veschneet hee dän Bock en Stekja un vebrend de Stekja met däm Kopp un daut Fat toop opp däm Aultoa. 21Daut Enjeweide, un de unjaschte Been Enja wosch hee met Wota rein un soo leet Moses dän gaunzen Bock opp däm Aultoa en Ruak oppgonen. Daut wia een Brauntopfa to een scheenet Jeroch, een Fiaopfa fa dän Harn, soo aus de Har am daut aunjeordnet haud. 22Hee leet uk dän aundren Schopsbock brinjen toom Ensatungsopfa. Un Aaron un siene Säns läden äare Henj opp däm sien Kopp, 23un Moses schlacht däm un neem waut von daut Bloot un deed Aaron doa waut von aun sienen rajchten Uabommel un opp dän Dumen aun siene rajchte Haunt un opp de groote Tee aun sienen rajchten Foot. 24Dan leet hee Aaron siene Säns väakomen un muak an uk von daut Bloot aun dän rajchten Uabommel, aun dän rajchten Dumen un aun de groote Tee aum rajchten Foot. Un daut äwaje Bloot sprezt hee runtom aun dän Aultoa. #3Mo 17,11 25Dan neem hee daut Fat, daut Fatsträmel von dicht biem Zoagel, un aul daut Fat vom Enjeweide un dän Laupen aun de Läwa, de beid Nieren met daut Fat doaraun un dän rajchten Schinkjen. 26Un von däm Korf met onjesuadet Broot, waut ver däm Harn stunt, neem hee eene Kuak, waut onen Suadieech wia, un eene Brootkuak met Eelj un eene Pankuak. Un läd daut opp daut Fat un dän rajchten Schinkjen. 27Un hee jeef Aaron un siene Säns daut aula en äare Henj. Un dee hoowen daut opp aus een Opfa, waut oppjehowen woat ver däm Harn. 28Dan neem Moses wada aules ut äare Henj un leet daut opp Däm Aultoa en Ruak oppgonen, bowen opp daut Brauntopfa. Daut wia een Ensatungsopfa to een scheenet Jeroch, een Fiaopfa fa dän Harn. 29Un Moses neem de Brost un hoof dee opp aus een Opfa, waut oppjehowen wort ver däm Harn; un dee hilt Moses aus sien Poat von däm Bock vom Ensatungsopfa, soo aus de Har am daut väajesajcht haud. 30Dan neem Moses von de Saulweelj un waut von daut Bloot opp dän Aultoa un sprezt von beides opp Aaron un siene Kjleeda, un opp siene Säns un äare Kjleeda; soo weid hee Aaron un siene Kjleeda, un siene Säns un äare Kjleeda.
31Dan säd Moses to Aaron un siene Säns: Koakt daut Fleesch ver däm Engank von daut Vesaumlungszelt! Un doa sell jie daut uk äten, uk daut Broot ut däm Korf von daut Ensatungsopfa. Soo haft de Har daut väajesajcht, daut Aaron un siene Säns daut äten sellen. 32Waut äwablift von daut Fleesch un Broot, daut sell jie met Fia vebrennen. 33Un jie sellen säwen Doag lank nich von däm Engank von daut Vesaumlungszelt wajchgonen, bat de Doag von jun Ensatungsfast äwa sent. June Henj sellen säwen Doag enjeweit woaren. 34Soo aus jie daut aun däm vondoagschen Dach jedonen haben, haft de Har väajesajcht, daut wieda to doonen, om junt to veseenen. 35Jie sellen säwen Doag un säwen Nacht ver däm Engank von daut Vesaumlungszelt bliewen un däm Harn siene Aunordnunk jehorchen, sest mott jie stoawen. Soo haft de Har mie daut väajesajcht. 36Un Aaron un siene Säns deeden aules, waut de Har derch Moses aunjeordnet haud.
Currently Selected:
3. Mose 8: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.