4. Mose 13
13
Daut Launt Kanaan woat unjasocht
1De Har räd met Moses un säd: 2Schekj Mana rut, dee daut Launt Kanaan, waut ekj de Israeliten jäwen woa, goot unjasieekjen. Nemm von jieda Staum von äare Vodasch eenen Maun von de Leida. 3Dan schekjt Moses ut de Paran Wiltnis no däm Harn siene Aunordnunk soone Mana, waut Leida mank de Israeliten wieren. 4Un daut wieren: Schamua, Sakur sien Sän, vom Staum Ruben. 5Schafat, Hori sien Sän, vom Staum Simeon. 6Kaleb, Jefune sien Sän, vom Staum Juda. #Jos 14,7 7Jigal, Josef sien Sän, vom Staum Isachar. 8Hoschea, Nun sien Sän, vom Staum Efraim. #4Mo 13,16 9Palti, Rafu sien Sän, vom Staum Benjamin. 10Gadiel, Sodi sien Sän, vom Staum Sebulon. 11Gadi, Susi sien Sän, vom Staum Josef, von Manasse. 12Amiel, Gemali sien Sän, vom Staum Dan. 13Setur, Michael sien Sän, vom Staum Asser. 14Nachbi, Wofsi sien Sän, vom Staum Naftali. 15Geuel, Machi sien Sän, vom Staum Gad. 16Daut sent de Nomes von de Mana, dee Moses rutschekjt, om daut Launt to unjasieekjen. Oba Hoschea, Nun sienen Sän, nand Moses Josua. #4Mo 11,28; 1Chr 7,27
17Aus Moses an rutschekjt, daut Launt Kanaan to unjasieekjen, säd hee to an: Got loos doa en daut Siedlaunt nenn un got oppe Boaj 18un bekjikjt junt daut Launt, woo daut es, un daut Volkj, waut doabennen wont, auf daut stoakj ooda schwak, weinich ooda väl es. 19Un beoobacht daut, waut en daut Launt es, wua see bennen wonen, auf daut goot ooda schlajcht es; un waut daut fa Städa haft, en dee see wonen, auf dee en Zelt Darpa ooda en fauste Städa wonen; 20un woo de Grunt es, auf fruchtboa ooda schwak, un auf doa Beem sent ooda nich. Blieft mootich un brinjt Frucht met von daut Launt. Daut wia krakjt en dee Tiet em Joa, aus de ieeschte Wiendruwen riep worden.
21See jinjen loos un unjasochten daut Launt von de Zin Wiltnis bat Rehob, bie Hamat. 22See jinjen ieescht derch daut Siedlaunt un kjeemen bat Hebron; doa läwden Ahiman, Scheschai un Talmai, Anak siene Säns. Hebron wia säwen Joa ver Zoan en Ägipten oppjebut worden. 23Un see kjeemen bat aun de Schälran Eschkol un schneeden dort eene Rank auf met eenen Pungel Wiendruwen un druagen däm äara twee opp eene Stang. Uk Granatapel un Fiejen neemen see met. 24Daut Tol kjrieech nohäa dän Nomen Eschkol (Wiendruwen Tol) wäajen dän Pungel Druwen, waut de Israeliten dort aufjeschnäden hauden.
De jeschekjte Mana berechten
25No 40 Doag, aus see daut Launt unjasocht hauden, wongen see om 26un jinjen trigj un kjeemen no Moses un Aaron un no de gaunze Vesaumlunk von de Israeliten en de Paran Wiltnis no Kadesch. Un see vetalden an un de gaunze Vesaumlunk, woo daut doa wia, un weesen an de Frucht, waut see von daut Launt metjebrocht hauden. #1Mo 16,14; 20,1; 4Mo 20,1; 5Mo 1,19.46; Jos 14,6-7 27Un see vetalden an un säden: Wie sent derch daut Launt jereist, wua jie ons hanjeschekjt hauden; un doabennen rant werkjlich Malkj un Honnich, un dit es de Frucht von doa. #2Mo 3,8.17 28Oba daut Volkj es stoakj, waut doabennen wont, un de Städa sent vesechat un sea groot; un wie sagen dort uk Anak siene Säns. 29En daut Siedlaunt wonen de Amalekita. De Hetita, Jebusita un Amorita wonen opp daut Boajlaunt, de Kanaanita wonen aum Mäa un aum Jordan. 30Kaleb beschwicht daut Volkj, waut ontofräd wia jäajen Moses, un säd: Lot ons loosgonen un daut Launt ennämen, wie kjennen daut besiejen. #4Mo 14,6 31Oba de Mana, waut met am toop doahan jegonen wieren, säden: Wie sent nich stoakj jenuach jäajen dit Volkj to gonen, wiels daut es too stoakj fa ons! 32Un see vebreeden schrakjelje Sachen mank de Israeliten äwa daut Launt, waut see unjasocht hauden, un säden: Daut Launt, wua wie derchjegonen sent, om daut to unjasieekjen, frat siene Enwona, un aul daut Volkj, waut wie doabennen sagen, sent sea groote Menschen. 33Wie sagen dort uk Riesen, Anak siene Säns, dee von de Riesen staumen. Wie kjeemen ons an jäajenäwa aus Graushoppa väa, un soo kjlien mott wie an uk mau väajekomen sennen! #5Mo 1,28; 9,2
Currently Selected:
4. Mose 13: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.