4. Mose 18
18
1Un de Har säd to Aaron: Du un diene Säns un dien Staum, jie sellen de Schult droagen, wan aum Heilichtum eene Veschuldjunk begonen woat; un du un diene Säns met die toop, jie sellen de Schult droagen, wan biem Priesta Deenst een Fäla jemoakt woat. #2Mo 28,38; 3Mo 16,32-33 2Oba diene Breeda von däm Staum von dienen Staumvoda Levi doascht du metnämen, daut see bie die sent un die deenen; oba du met diene Säns toop sellen de Oabeit ver daut Zelt met dän Bewies von däm Bunt verechten. #4Mo 3,6-10 3Un see sellen die deenen un aule Deensten aun daut gaunze Zelt verechten. Oba daut Jereetschoft vom Heilichtum un däm Aultoa sellen see nich aunschieren, om daut jie nich beid stoawen, see uk jie. 4Bloos see sellen bie die sennen, daut see äaren Deenst aun daut Vesaumlungszelt verechten, aules, waut de Deenst foddat; oba kjeena, dee nich doatoo bestemt es, saul sikj biesied junt toom Deenst nodren. 5Soo verecht nu dän Deenst aum Heilichtum un dän Deenst aum Aultoa, daut mien Oaja nich mea äwa de Israeliten kjemt. #4Mo 17,11 6Horcht emol, ekj hab june Breeda, de Leviten, aus een Jeschenkj fa junt ut de Israeliten rutjenomen, daut see däm Harn aus siene äwajäft sent, om daut see dän Deenst aun daut Vesaumlungszelt verechten. #4Mo 3,12.45 7Du oba un diene Säns met die toop, jie sellen no junen Priesta Deenst oppaussen, daut jie aule Oppgowen aum Aultoa un bennen hinja de Gardien verechten, wiels junen Priesta Deenst jäw ekj junt aus Jeschenkj. Wan sikj doa een framda nodat, dee saul stoawen. #4Mo 1,51
De Priesta äa Poat aun de Opfagowen
8De Har säd to Aaron: Kjikj, dit jäw ekj die bie däm Deenst aun miene Opfagowen: Von aule heilje Gowen von de Israeliten jäw ekj die eenen Deel, die un diene Säns, aus een Poat, waut junt fa emma traft. #3Mo 2,3.10; 6,9-11.19-22; 7,6-10 9Von de besonda heilje Opfagowen jehieren junt aule Ätesopfa, Sindopfa un Schultopfa, waut de Israeliten mie brinjen, oba onen daut Poat, waut opp däm Aultoa vebrent woat. Aus eene besonda heilje Gow jäw ekj die un diene Säns daut. 10Un daut doaf bloos von de Maunslied von de Priesta Famieljes opp eene jeweide Städ jejäten woaren. Wiels daut saul die heilich sennen. #3Mo 6,9; 10,12.14 11Uk daut saul die jehieren: De heilje Aufgowen von äare Gowen, von aule Opfa, waut oppjehowen woaren von de Israeliten, jäw ekj die un diene Säns un Dajchta aus een Poat waut junt fa emma traft. Wäa rein es en diene Famielje, doaf doavon äten. 12Aulet baste von de Eelj un aulet baste vom Wien un Jeträajd, de Ieeschtlinjsgow, waut see däm Harn brinjen, hab ekj die jejäft. 13Daut ieeschte, waut see däm Harn brinjen von aules, waut en äa Launt es, saul die jehieren. Wäa rein es en diene Famielje, doaf doavon äten. #2Mo 23,19; 5Mo 18,3-4 14Aules, waut de Israeliten däm Harn faust jeweit haben, saul die jehieren. #3Mo 27,28 15Aule Ieeschtjeburten von Menschen un Tieren, waut see däm Harn brinjen, sellen die jehieren. Oba de Ieeschtjeburten von Menschen saust du looskjeepen loten, dee sellen frie jemoakt woaren. Un de Ieeschtjeburten von orreine Tieren saust du uk looskjeepen loten. #2Mo 13,2; 34,19-20 16Du saust daut looskjeepen loten, wan daut eene Moonat oolt es, un du saust daut no de Ordnunk looskjeepen loten, waut die jejäft es, fa fief Selwastekja no daut Jewicht vom Heilichtum, Selwastekja von 20 Graum. #3Mo 27,6.27 17Oba de Ieeschtjeburten von Rinda, Schop ooda Kosen saust du nich looskjeepen loten; dee sent heilich. Äa Bloot saust du aun dän Aultoa jeeten, un äa Fat saust du en Ruak oppgonen loten aus een Fiaopfa fa dän Harn to een scheenet Jeroch. 18Oba äa Fleesch saul die jehieren, soo aus uk de Brost von daut Opfa, waut oppjehowen woat, un de rajchte Schinkjen, die jehieren. 19Aule heilje Opfagowen, waut de Israeliten däm Harn brinjen, hab ekj die met diene Säns un Dajchta toop aus een Poat jejäft, waut junt fa emma traft. Daut saul een Soltbunt sennen ver däm Harn fa emma, fa die met diene Nokomen toop. #3Mo 2,13; 2Chr 13,5
De Priesta äa Rajcht opp dän Tieenden
20Un de Har säd to Aaron: Du saust en äa Launt kjeen Oafgoot haben, uk kjeenen Aundeel aun een Gruntstekj haben, wiels ekj sie dien Aundeel un Oafgoot medden mank de Israeliten. #5Mo 10,9; 12,12; Jos 13,14.33; Psa 16,5; 73,26; Hes 44,28 21Levi siene Säns hab ekj dän Tieenden von de Arnt en Israel toom Oafgoot jejäft fa äaren Deenst, dän see aun daut Vesaumlungszelt verechten. #3Mo 27,30 22Nu wieda sellen de Israeliten sikj nich daut Vesaumlungszelt nodren, om daut see sikj nich veschuldjen un stoawen, 23wiels de Leviten sellen dän Deenst aun daut Vesaumlungszelt verechten, un see sellen de Schult fa äare Fäla droagen. Dit es uk eene Ordnunk fa aule Tieden fa june Nokomen. Un see sellen mank de Israeliten uk kjeen Oafgoot haben, 24wiels dän Tieenden von de Israeliten äare Ennom, waut see däm Harn aus Opfagow jäwen, hab ekj de Leviten aus Oafgoot bestemt; doawäajen hab ekj jesajcht, daut see mank de Israeliten kjeen Oafgoot ieejnen sellen.
25De Har räd met Moses un säd: 26Saj to de Leviten: Wan jie dän Tieenden nämen von de Israeliten, dän ekj von an fa junt bestemt hab aus jun Oafgoot, dan sell jie doavon eene heilje Aufgow däm Harn jäwen, emma dän Tieenden vom Tieenden. 27Un dise heilje Aufgow saul junt soo aunjeräakjent woaren, aus wan jie Jeträajd vom Draschplauz un Wien ut däm Kjala jäwen. 28Soo sell jie uk de heilje Aufgowen däm Harn jäwen von aul dän Tieenden, waut jie von de Israeliten nämen, un sellen dise heilje Aufgowen fa dän Harn däm Priesta Aaron jäwen. 29Von aules, waut junt jejäft woat, sell jie däm Harn de heilje Aufgowen jäwen, von aul daut baste de jefoddade heilje Gowen. 30Un saj to an: Wan jie daut baste doavon aus heilje Aufgow jeopfat haben, dan saul de Leviten daut äwaje aunjeräakjent woaren aus Ennom vom Draschplauz un Ennom vom Wienkjala. 31Un jie un june Kjinja derwen daut opp aule Städen äten, wiels daut es jun Loon fa dän Deenst aun daut Vesaumlungszelt. 32Jie woaren junt doamet nich vesindjen, wan jie daut baste doavon nämen, un woaren de Israeliten äare heilje Gowen nich veonieren daut jie stoawen motten.
Currently Selected:
4. Mose 18: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.