Lucas 16

Qaỹaloqnaxana som ilotague' so nma' maye sa nqalat

1So Jesús nataqa'en 'enapegalo soua lapaxaguenataqa, 'eeta':

«Huo'o so ỹale ỹataqta sallaxanec. Qaq somaye huo'o so ipataxaguet da ilo'ogue naqa'en so lma'. Nache qaỹa'aqtaxaneua'a somaye da se'eso ilotague' naqa'en so lma', choche ỹa'ashaxan de'era lsallaxa. 2Nache se'eso na'aco' iỹaxaneuga somaye, nache 'enapega, 'eeta': ‹¿Chaq hua'ague ca 'eetec da aỹem qana'axateua'a, souaxat 'am? Ña 'analoqna't qome da 'aro'onataxanaxac. Ime, qaq aỹem 'andoua'a. Cha'aye saishet qome da queta da 'am 'aulotague' ye ima'.›

3Nache se'eso ilotague' so nma' deuennataxaatac, 'eeta': ‹¿Chaq hua'agom ca sheetec nagui, cha'aye ñi ña'aco' saishet da ỹauo'o ca ỹo'onatac? Ye aỹem qaica ca ỹa'añaxac da so'onataxan na 'alhua, qataq ỹataqta huo'o da icoxo da choche sashelaxaatac. 4Aja', sanata nagui da sheetec, da yaqto' huo'o qome ca aỹem ỹaconeguet da saua'a ca lma', qom ivita da qaica ca ỹo'onatac.›

5Nache iỹaxaatauga ñi 'oonolec som neto'ot aso lavigaxaiste som na'aco'. Nache som la'auaxanec inat, 'eeta': ‹¿Negue't aca neto'ot 'aravigaxaiste so ña'aco'?› 6Nache somaye 'enapeco': ‹Qomye cien aso laỹe' na lli'i ana oliiva aso ỹavigaxaiste.› Nache som ilotague' so nma', 'eeta': ‹'Ana ana 'aravigaxaiste lmalate; 'auỹalapegue' qome da 'anso'ooñi, ime qaq 'anquigaxaañi, 'iyiñi aca cincuenta.› 7Ime, qataq inat so lỹa, 'eeta': ‹Qaq 'am, ¿negue't aca 'aravigaxaiste?› Nache somaye, 'eeta': ‹Qomye cien aso naloqnaxaqui na trigo.› Nache som ilotague' so nma', 'eeta': ‹'Ana ana 'aravigaxaiste lmalate; 'anquigaxaañi, 'iyiñi qome aca ochenta.›

8Huaña, nache so 'aco' saishet da iqoleguet da se'eso lhuataxanaxanec maye qauem, somaye ỹataqta sa nqalat da huo'o ca ỹo'ot. Qaq 'era da 'eetec nam ỹauotec nam huetalec ana 'alhua, namayepi ỹataqta sa nqalat da huo'o ca ỹo'otec ca lỹa, qaq saq 'ena'am nam huetaigui na yo'oqchiguiñi.

9Qaq ỹoqo'oye qami' seqatalo da qauo'onataxañiỹa ana alom na shiỹaxauapi maye ỹachegoxotaigui da latenataxanaxac, da yaqto' huo'o ca qanauochaxauai, yaqto' qom ivita da imeuo ana anom, nache Ñim Lo'onatac 'Enauacna qami' ỹaconegueta da piguem.

10Cam 'onaxaic da na'aqtaguec, souaxat cam saq 'amaqtaq maye ilotague', qaq nache 'ena'am no'on da na'aqtaguec da ilo'ogue ca qalota; qaq cam qauem da na'aqtaguec da ilotague' cam saq 'amaqtaq, qaq nache 'ena'am qauem da na'aqtaguec da ilo'ogue ca qalota. 11Qaq qami' da saishet da qauaỹachiñi da qauloỹeegue cam saq 'amaqtaq qataq qaica ca naigui, 'eeta'am aca anom maye qaỹachegoxotaigui da natenataxanaxac, qaq ¿negue'to' ca ishet da qami' pi'iỹa'alo da qami' ipataxaleguete cam ỹataqta huo'o ca naigui? 12Qataq da huo'otaq qauem da qana'aqtaguiqui da qauloitague' cam saishet da qaralamaxache, qaq ¿ca 'eeteco' da Ñim Lo'onatac 'Enauacna da qami' ipataxaleguete da qauloỹeegue cam iqataxaatapigui' Ñimaye da qaralamaxache qome?

13Qaica ca namaxashec da ishet da do'onataxanoto caua dos na'aco'ye, cha'aye ishet da 'oonolec ca ỹauotec saq 'ena'am ca lỹa. Qataq ishet da ỹalaxaguet ca 'oonolec qaq ca lỹa qalaq saishet da ỹalaxaguet. Qaq nache 'eetec nataqa'en, da saishet da qaỹo'onataxanot Ñim Lo'onatac 'Enauacna qataq da nsallaxa.»

14Nache hua'aqtega 'enauac de'era nam fariseopi maye ỹataqta lqopitaxat da nsallaxa, nache ỹe'eetac So Jesús. 15Nache So Jesús 'enapeco':

«Qami' maye nacheqami' choche qanachaxañiitega 'enauac na shiỹaxauapi da qami' no'o'n, qalaxaye Ñim Lo'onatac 'Enauacna ỹauatto'n naua qarquiyaqchilli'. Cha'aye cam ỹamata'ac nam shiỹaxauapi da 'eetega 'amaqtaqaic, qaq nacheca cam ỹataqta ỹaỹemec Ñim Lo'onatac 'Enauacna.

Nam namaxasoxonaxacpi qataq da lo'onataxanaxac Ñim Lo'onatac 'Enauacna

16Choche ivitta'a co'ollaq nvi' so Juan da na shiỹaxauapi, iuen da ỹalaxaguet na namaxasoxonaxacpi maye chegoqo'ot so Moisés qataq nam lapaxaguenataxanaxacpi som la'aqtaxanaxanecpi Ñim Lo'onatac 'Enauacna. Qalaxaye nagui, nache qaỹa'axat da no'on na'axaỹaxac maye ỹa'axat da lo'onataxanaxac Ñim Lo'onatac 'Enauacna, qaq 'enauac na shiỹaxauapi ỹataqta lta'araic da na'añaxataxac da huotaique inoxoneua'a damaye.

17Qalaxaye ỹactec da saqalaq da ishet da nlaguiñi na piguem, qataq ana 'alhua, qaq saq 'ena'am na namaxasoxonaxacpi, cha'aye qaica ca saq ipacchigui cam ỹa'axat ñim 'oonolec namayepi.

So Jesús ỹa'axat da lataxac ca nalate' aca lhua

(Mateo 19.1-12; Marcos 10.1-12)

18Ca ỹale da huo'otaq nalate' aca lhua, ime, qaltaq huaroneguet aca lỹa 'alo, nache camaye huo'o da lasouaxashet. Qataq cam huaroneguet aca 'alo maye nalate' ca lhua, nataqa'en camaye huo'o da lasouaxashet.»

So Lázaro qataq so ỹale sallaxanec

So Jesús nataqa'en 'enapeco':

19Huo'o co'ollaxa so ỹale ỹataqta sallaxanec, somaye ỹaatrañi naua no'oñi anogo, qataq qaica ca 'ena'ama. Qaq somaye ỹo'ottac 'enauaque naua na'axa'te da lta'araic lquia'axac. 20Qalaxaye so nasom somaye, hueta'a so ỹale maye choxoraq le'enaxat da Lázaro. Somaye ỹataqta imoota na lo'oc na lli'i na lquesaxa, qaq huo'o som ndoua'acnaxa da hueta'a yemaye, 21qaq anac naxa na pioxoppi, da napitac na lli'i na lo'oc somaye. Qaq se'eso choxoraq, ỹataqta ỹaguec na lqouaxa, ỹoqo'oye nshetaique da chec na lsoche na nallec maye naañi se'eso lquia'axala' som sallaxanec.

22Qaq huo'o so na'a'q, nache se'eso ỹale maye choxoraq ileu. Nache anac na lamaxashecpi Ñim Lo'onatac 'Enauacna da ỹauega ca ndaqa' maye ỹataqta ỹo'oxoraq, cam hueta'a nataqa'en so Abraham maye chegoxoguet somaye. Qaq co'ollaq qaỹata'ague, nache nataqa'en ileu so ỹale maye sallaxanec. Nache co'ollaq qailareñi, 23nache taỹa ca nhuaxanaqa' na 'etaxaloxoicpi, huaña, nache ỹataqta ỹaguec da nque'eenaxac. Qaq huaña yemaye, nache ila'a so Abraham ỹataqta sa qaỹoqotcheguema, qataq so Lázaro nso'ootañi huaqta'ai' somaye.

24Nache so sallaxanec iỹaxana so Abraham, 'eeta': «'Am ita'a Abraham, aỹem 'auchoxoren. 'Anamaq na Lázaro, da yaqto' ipet na llaxaata lsheenec ca 'etaxat da yaqto' ipet na ỹachaxat. Ten ỹapactec da ñeque'eenaxac da sootangui ne'ena norec.» 25Qalaxaye so Abraham ỹasategueto' somaye, 'eeta': «'Am ỹalec, 'auennate co'ollaq ña qanca'alliitauec, qaq 'am 'auaỹamaqchiguiñi, qaq ñi Lázaro qalaq qauem da llecỹaxac. Qaq ñimaye nagui hueta'a ne'ena qalaq huo'o da lamaicỹaxac, qaq 'am qalaq 'anmeneguet da huo'o da 'anque'eenaxac. 26Qaq saishet da nachaqrata de'era, cha'aye huo'o nam ỹataqta sa qaỹoqchiguiñi tocot lta'araic maye npaxatta'agueta qami' nataqa'en qomi'. Qaq ỹoqo'oye saishet da huo'o ca chegoqchegueena'a da tañecna, qataq saishet da huo'o ca chegaqañecna da nasheguema ne'ena souaqta'a.» 27Nache som sallaxanec 'enapeco': «Abraham, 'am ñachoxonnot nagui da 'auamaq ñi Lázaro da nqo'ona ye qarma', 28da yaqto' da'aqtaxanema caua cinco ỹaqaỹa't, da caamaye da saishet da ỹaxaare'c da ỹo'ottrac da qauem, nache ishet nataqa'en da nvilda'a ne'ena que'eenaqa'.» 29Qalaxaye so Abraham ỹasateguet somaye, 'eeta': «Caua 'arqaỹa't mashe hueto'oto ana nere maye huetalec na la'aqtacpi Ñim Lo'onatac 'Enauacna. Qalaq ¿ta'ainco' da saishet da itaxaỹaxa'n? Qataq ¿ta'ainco' da saishet da ỹalaxagueta?» 30Nache som ỹale sallaxanec ỹasat, 'eeta': «Aja' 'am ito'olec Abraham, ¡Qalaxaye damaye saishet da nachaqrata lataxac! Cha'aye da huo'o ca qaltaq nca'aleeguesop nam leuaxaicpi da nqo'onalo caamaye, nache ỹoqta 'eesa ñaqa'en da caamaye ishe't da ỹe'eguelaqoto Ñim Lo'onatac 'Enauacna.» 31Qalaxaye so Abraham 'enapeco': «Da saishet da ỹalaxaguet so Moisés qataq som la'aqtaxanaxanecpi Ñim Lo'onatac 'Enauacna, qaq ¡hua'aguectoxo' da ishet da ỹalaxaguet da huo'o ca qaltaq nca'aleeguesop na leuaxaicpi!

Currently Selected:

Lucas 16: LÑLE13

Highlight

Copy