Marcos 15

So Jesús qaỹataxanot so Pilato

(Mateo 27.1-2, 11-14; Lucas 23.1-5; Juan 18.28-38)

1Qaq co'ollaq mashe yo'oxoñi, nache dataỹa't som lataxala'pi na ntaxaỹaxanaxanecpi, qataq so nqueroxonecpi maye lataxala' na judiopi qataq som dapaxaguenataxaatapeguec na nqataxacpi maye chegoqo'ot so Moisés, qataq 'enauac som nta'alpi maye loicnatac na lataxaguesat. Nache somayepi ỹauec So Jesús, qaicoñetta'a't naua lhua'q, nache ỹauegueua'a so Pilato.

2Nache so Pilato inattac So Jesús, 'eeta':

–¿Ỹataqta 'eesa peta'a da 'am lta'a na judiopi?

Nache So Jesús 'enapeco':

–Aja', nachera dam qonapec.

3Ime, nache som lataxala'pi na ntaxaỹaxanaxanecpi ỹaneuo na qalota lasouaxashet naqa'en So Jesús. 4Qaq ỹoqo'oye so Pilato qaltaq ỹe'eguelaxalec da inattac Somaye, 'eeta':

–Ñaq 'aula'a nam qalota 'am qaỹasaxalec 'arasouaxashetpi. ¿Saisheto' peta'a da 'auataỹa'aguet namayepi?

5Qalaxaye So Jesús saishet da ỹasat. Nache so nta'a Pilato ỹataqta huo'o da la'aalaxa.

So Jesús qoỹaneguet da nalaataguec

(Mateo 27.15-31; Lucas 23.13-25; Juan 18.38–19.16)

6Qaq huo'o naxa da lataxac so Pilato da ivireugalo se'esoua na'axa'te naponaxaqui' maye le'enaxat da Lapascua, da isouec cam lcoñeteguishec maye iỹaxaneua'a na shiỹaxauapi. 7Qaq se'eso na'a'q huo'o so 'oonolec ỹale cachaxaic le'enaxat da Barrabás. Somaye ỹalectaigui co'ollaxa so laỹepi da huo'o na ỹalauat, co'ollaq huaigui so na'a'q da qaỹataỹa'aguet so nta'a ye Roma.

8Nache se'eso shiỹaxauapi maye hueta'a ye Jerusalén nqo'oneua'a so Pilato da yaqto' iỹaxanot da isouec so 'oonolec ncoñeteguishec, da ipaqueelec da maiche lataxac. 9-10Qalaxaye so Pilato ỹaỹaten da som lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna da choche nquiỹa So Jesús, ỹoqo'oye ỹaneuo, nache somaye inattaco' so shiỹaxauapi, 'eeta':

–¿Qami' qansheetaique peta'a da sesouec dam lta'a na judiopi?

11Qalaxaye nam lataxala'pi na ntaxaỹaxanaxanecpi, namayepi ỹayena'a na shiỹaxauapi, da yaqto' iỹaxanaua'a da qaisouec so Barrabás.

12Nache so Pilato qaltaq inat somayepi, 'eeta':

–¿Negue't ca qansheetaique da so'otec dam ỹale maye qoñiitega lta'a na judiopi?

13Nache somayepi nmasheguem, 'eeta':

–¡Qomye qaiuaxaneguet cam npe'enaxaqui!

14Nache so Pilato inattaco' somayepi, 'eeta':

–Aỹem qaua'aqtaxañim ¿negue't ca qauem ỹo'ot de'era ỹale?

Qalaxaye so qalota shiỹaxauapi qaltaq na'axannec da la'alaxac, 'eeta':

–¡'Auaxaneguet ca npe'enaxaqui!

15Qaq so Pilato ye huotaique da qaica camachaqca na shiỹaxauapi, nache isouec so Barrabás. Ime, nache damaxasoxoolec da qaỹalaqan So Jesús qaira'a ca nalaqnaxanaxat. Ime, nache qaiuaxaneguet so npe'enaxaqui.

'Enauac da qane'eetapigui So Jesús

16Nache so huataxanaqpi maye nalleppi na Roma le'ecpi ỹauec So Jesús, ỹauegueuga ca nqasoxoc aso lo'onataxanaxaqui late'erai so Pilato, nache huaña da iỹaxaneua'a so laỹepi huataxanaqpi. 17Ime, nache somayepi ỹanaxanaxaangui So Jesús so npo' maye naueralec da ltogaxa,#15.17 Npo' maye naueralec da ltogaxa: De'era, nache lo'oxoỹaxac na lapo' na nta'alpi se'eso na'a'q maye huetaigui So Jesús. ime, nache ỹanagui na lqaic aso mpaqta ỹaxat. 18Nache ỹachegoxotchiguiña da ỹe'eetac Somaye qataq ỹa'alaqtalec 'eeta': «¡La', 'am maye 'am lta'a na judiopi!»

19Nache so huataxanaqpi iuaxaatapigui na lqaic Somaye, irotega na 'epaq qataq nqaigoqto'ot qataq ỹa'atto'oto naua nllecte da 'eeta'am naqa'en ca huo'o naq 'enec. 20Qaq co'ollaq mashe nasamiisop da ỹe'eetac Somaye, nache nqat so lapo' maye naueralec da ltogaxa, nache ỹanaxanaxaanguilo soua maiche alogo. Nache ỹauec So Jesús da iuaxaneguet so npe'enaxaqui.

Da 'eetec So Jesús co'ollaq qaiuaxaneguet so npe'enaxaqui

(Mateo 27.32-44; Lucas 23.26-43; Juan 19.17-27)

21Nache so huataxanaqpi nnaicapegue' So Jesús, qaq co'ollaq huangui so nqa'aic, nache qanatena'aguet so ỹale le'enaxat Simón, somaye lma' co'ollaxa ye Cirene. So Simón, nache llalqa so Alejandro qataq so Rufo, somaye chegoqtauga na no'onaxa, nache so huataxanaqpi 'enapega da ỹache so npe'enaxala' So Jesús.

22Nache so huataxanaqpi ỹauegueuga So Jesús so 'alhuolec, le'enaxat Gólgota. De'era na'aqtac naigui da «nqaic lpi'inec lma'.» 23Nache huaña yemaye, nache qoỹaateguem da nỹomgui so lataxa maye qaỹalecneguet na qo'oipaq lcha'q le'enaxat mirra, da yaqto' ỹa'axaneguet da nqui'ic, qalaxaye So Jesús saishet da nỹomgui.

24Qaq co'ollaq ime da qaiuaxaneuo, nache qanallichiguilo soua alogo da yaqto' qaỹaỹaten da negue't ca taleguete soomaye. 25Qaq co'ollaq qaiuaxaneuo Somaye nache mashe qaỹatasheguemgue aso nala'. 26Qaq som qoỹettalec da lasouaxashet somaye huetalec da 'eeta': «'Ena na lta'a na judiopi.» 27Nataqa'en nache l-llatcheyishegue'm da qaiuaxaareuo soua dos cachaxaiqa, so 'oonolec soomaye, neta'ague qanqa'en na aloic, qaq so lỹa neta'ague na ne'emaq. 28[Qaq 'era da 'eetec da ipacchiguilo naua neregui'she la'aqtaqa Ñim Lo'onatac 'Enauacna maye, 'eeta': Camaye ỹalegoigui qome ca 'etaxaloxoicpi.]

29Nache nam shiỹaxauapi maye quetague' se'eso nqa'aic maye saqaỹapeque ye hueta'a Somaye, namayepi isheueetac So Jesús qataq ỹe'eetac qataq iconnaxaatac na lqaic. Nache 'eetega Somaye, 'eeta':

«¡'Ah! 'Am maye qonapec da ishet da 'aulaxachigui añi no'onaxanaxaqui late'erai, qaq da 'ano'oxoosheguem, nache tres caua na'axa'te, nache qaltaq 'aumat. 30¡Da huo'o ca lta'araic 'ara'añaxac, nache maiche 'anca'alaxaala't nagui! ¡'Aunoteeguesop na 'anpe'enaxaqui!»

31Qaq nataqa'en na lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq nam dapaxaguenataxaatapeguec na namaxasoxonaxacpi ỹe'eetac Somaye, qataq maiche detaqtega't, 'eeta': «Ñimaye ishet da nca'alaxatec ca lỹa, qalaxaye saishet da ỹañoxot da maiche nca'alaxaala't. 32Ñimaye 'eetega da Lca'aguishec Ñim Lo'onatac 'Enauacna qataq lta'a na Israel le'ecpi. ¡Da sauanaqchigui da huenoteeguesop ñi npe'enaxaqui, nache ishet da sa'amaqtenaq Ñimaye!»

Nataqa'en soua cachaxaiqa maye qaiuaxaatrauo, huaqta'ato So Jesús, isheueetrac Somaye.

Da l-leuaxa So Jesús

(Mateo 27.45-56; Lucas 23.44-49; Juan 19.28-30)

33Qaq co'ollaq mashe na'a'q laiñi, nache huo'o so napalaxa, ima'a't 'enauac ana 'alhua. Choche ivitta'a da dasheuec añi nala'. 34Nache huetoigui da So Jesús ỹa'alaq, ỹataqta na'axannec da la'alaxac, 'eeta':

¡Eloí, Eloí!, ¿lemá sabactani? De'era na'aqtac naigui da 'eeta': «'Am maye 'Aro'onatac 'Enauacna. 'Am maye 'am ỹauotaxat, ¿ta'ainco' da Aỹem 'aualat?»

35Qaq huo'o na hueta'a yi'iye na hua'aqchigui, nache namayepi, 'eeta': «Ña qana'axaỹaxañiỹa Ñimaye iỹaxaataique so la'aqtaxanaxanec Ñim Lo'onatac 'Enauacna le'enaxat Elías.»

36Nache huo'o so 'oonolec somayepi da nqalgoqtaique aso auol, nache ỹapapiaxat ỹauota'a na lataxa 'euaxaic. Ime, nache icoñera'aguet na lsheenec aso coqta, nache nquigaxateua'a So Jesús da yaqto' nỹomaxangui, nache 'enapeco': «Ña semetenaq Ñimaye saiuena'a da anac ca Elías da nqaañi da nqateeguesop na npe'enaxaqui.»

37Nache So Jesús ỹataqta na'axannec da la'alaxac, ime, nache ileu.

38Huaña, nache so hualoxolaỹi maye pa'auo aso no'onaxanaxaqui late'erai, som nacchiguingui na laiñi, somaye colaqchiguingui na laiñi, ỹataqta ivirañi se'eso lcolaxa.

39Nache som huataxanaq lta'a maye nachattañi, datato'ot so npe'enaxala' So Jesús, somaye co'ollaq hua'aqchigui da la'alaxac, qataq da 'eetec co'ollaq ileu, nache somaye 'enapeco':

–Ỹoqta 'eesa da ñi'iñi ỹale, Ñimaye Llalec Ñim Lo'onatac 'Enauacna.

40Nataqa'en huo'o so qalota 'alpi ilotaua'a Somaye qaỹoqteuga. Qaq asomayepi ỹalectaigui aso María maye lma' ye Magdala, qataq aso Salomé qataq aso María maye late'e so José qataq Santiago som na'asa. 41Soomaye, nache ca'attegueto qataq itauaata'ape So Jesús co'ollaq hueta'a ye 'alhua Galilea. Nataqa'en hueta'a yi'iye so qalota 'alpi maye nnaictague' So Jesús co'ollaq naỹa ye nỹecpi ye Jerusalén.

Qailareñi So Jesús

(Mateo 27.57-61; Lucas 23.50-56; Juan 19.38-42)

42Qaq co'ollaq mashe avit se'eso na'a'q maye aỹamaxataxaqui#15.42 Na'a'q maye aỹamaxataxaqui: Da inoxootañi añi nala' se'eso na'a'q maye pa'aiguet so na'a'q mataxaqui, nache na judiopi nmateeguesop 'enauac na lo'onatacpi. maye pa'aiguet so na'a'q mataxaqui maye saishetapec na judiopi. 43Nache huo'o so ỹale le'enaxat da José maye lma' ye nỹecpiolec le'enaxat Arimatea. Somaye ỹataqta saq ñi'iỹa so Pilato da dequiguiỹaua'a so lo'ocỹaxac So Jesús. So José somaye ỹalectaigui so 'amaqtaqaicpi maye nmit da huo'o ye nasouaxashet. Nataqa'en somaye nqouagaxaueetac naxa da yaqto' da lo'onataxanaxac Ñim Lo'onatac 'Enauacna saqaỹaloq da yo'oq.

44Nache so Pilato ỹataqta ỹe'elaqchet co'ollaq ỹaỹaten da mashe ileu So Jesús. Nache iỹaxaneuga som huataxanaq lta'a, nache inattac da 'eesa de'era qataq ỹamaq da ichemaxata da chaq laỹe co'ollaxa. 45Nache som huataxanaq lta'a co'ollaq nviraxateuo da la'axaỹaxac somaye, nache so Pilato ỹan da la'aqtac da qoỹanem so José so lo'ocỹaxac So Jesús.

46Nache so José desheenaxana so nacanec maye no'on qataq late'erai añi lasheue. Nache nqaañi So Jesús nqateeguesop so npe'enaxaqui, nache lpataxangui so nacanec. Ime, nache ỹache so lo'ocỹaxac So Jesús irouga aso huachiqui maye naigui so coma' lta'araic, asom ñaq cheta'ague co'ollaxa da so José damaxasoxoolec da qaỹo'ot. Ime, nache ỹapogui so ñegueuo dapoxona so lta'araic coma'. 47Nache aso María maye lma' ye Magdala, qataq aso lỹa María maye late'e so José, soomaye ilotaguilo yem qaỹachaña so lo'ocỹaxac So Jesús.

Currently Selected:

Marcos 15: LÑLE13

Highlight

Copy