Génesis 15
15
Icantasanotiriri Tasorentsi Abrama
1Impoiji avisanaque oca, ari iquenquetsatacaajiri Tasorentsi Abrama, oquempetaca imishitaca, iro cantaincha te irimayeji, icantiri:
—Abrama, eiro pitsaroitsi, narotaque jocaacoventimpiri. Queario nontasoncacoventasanotempi.
2-3Ari icantanaqueri Abrama,
—Novincatsarite Tasorentsi, ¿jaoca noncanteari pintasoncacoventaquenarica, te intimeji notomipee? Irioricampa aajeroneri timimotanari nonampire EliÉzer damascosati.
4Icantanajiri iriori Tasorentsi:
—Eiro yairotsi pashinisati. Yora pintomintasanoteari avirori, iriotaque aajeroneri timimotimpiniri.
5Icantiri aisati:
—Pijate saiteriqui, pameneri impoquiropee. Oshequi catsini inajeiti, eiro pimatiritsi piojeiteri jaocarica icarajeitiri. Aitaque inquempejeiteari pishanincajeitajeari, oshequi catsini irinajeitanaque iriori.
6Ari ishiretacaro Abrama oca icantaqueriri Tasorentsi, irotaque ineacameetsatantacariri, iquempetacantaqueri te iranteroji caari cameetsatatsi. 7Aisati icantiri:
—Narotaque Tasorentsisanori amaquempiri aca, pisavicantaveitaniri nampitsi Ur Caldeaquiniri. Nompaquempiro oca quipatsi pashiteari pisavicanteari.
8Icantanajiri iriori Abrama,
—Novincatsarite, ¿jaoca noncanteari niotasanotanteari queariorica nashitearo oca quipatsi?
9Icantanajiri Tasorentsi iriori:
—Piotasanotanteari, pamaquena vacajaniqui, chiivo jeri ovisha moncarataquerori mava irosarentsitepee aisati aparoni sampaquiti jeri irijani paroma.
10Irosati yaantayetacari ivirapee icantaqueriri. Itoyetaqueri nianqui, irintiquea apitetatsiri sampaquiti te intoteriji. Impoiji yoveshintsaayetaqueri, imonteyetaqueri itsipapee ocaaratsapatanaque nianqui. 11Impoiji yarajeivetapaaca tisonipee iroajeitearime yoayetaqueri Abrama. Iro cantaincha ishancacoventapinitaqueri. 12Ari otsitenijencaiteanaji omapocaqueri Abrama imaasanotanaque catsini. Irosati ineamainetantacaro otsimoirotasanotanaque. Itsaroasanotanaque catsini. 13Irosati iquemantajari Tasorentsi icantiri:
—Jeroca noncamantempiri piotanteari. Coajicani irisavicajeite pishanincajeiteari anta iipatsitequi pashinisatipee atiri oncarate 400 osarentsi. Oshequi anta iroashinoncaapiniyeeteri, imperanatapiniyeeteari. 14Iro cantaincha noasanquetaajeiteri iriori maaroni oashinoncaajeiterineri. Impoiji irishinejeitajeri yora pishanincajeitajeari impiajeitaje aca piipatsitequica. Impajeitavaqueri maaroni irovaararopee ontimanteari, irashitaarantea iriori. 15Iro cantaincha eiro pineirotsi avirori oca nocantaquempiri, aitaque camanaquempi panteashipatanaquerica. Tecatsi pinquenqueshireanaje. 16Ariorica irishequiajeitanaque pishanincajeiteari coajicani jeri intomintajeitajeari iriori aisati incharinentajeitajeari, impiajeitajero aca piipatsitequica. Tempa yora amorreopee savicajeitatsiri meeca, tequeratsita omoncarateaji noasanquetaimentajeiteri caari cameetsatatsi yantajeitiri.
17Ari otsitenitasanotanaji itinaanaja Abrama, irosati ineantacaro paamaritatsiri ocachaajencataque jero tsiorontsi morecasanotatsiri. Osaviincapaaque ishaaviji, avisapinitapaaqueri nianqui virantsipee yoveshintsaayetaqueri. 18Irosati icaratantacari Tasorentsi Abrama, icantasanotaqueri:
—Oca quipatsi irotaque nompajeiteriri pishanincajeitajeari coajicani irisavicajeitantajeari. Antearoite oni, oponeanaca nijateniqui Egiptoquiniri irosati anta antearojatatsiriqui nija pajitachari Éufrates. 19-21Oca quipatsi, irotaque meeca isavicajeitantari quenitapee, ceneopee, quenezeopee, cadmoneopee, hititapee, ferezeopee, refaítapee, amorreopee, cananeopee, gergeseopee jeri jebuseopee.
Irotaque icantaqueriri Tasorentsi Abrama.
Currently Selected:
Génesis 15: cni
Highlight
Share
Copy
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
