Génesis 22
22
Ineantacari Tasorentsi Abrahama iquemisantasanotiririca
1Ari avisayetanaque ocapee, irosati ineantantacari Tasorentsi Abrahama, iriotanteari ishiretasanotaririca. Icantaqueri:
—¡Abrahama!
Yacanaqueri iriori:
—Jaa, jeraacana.
2Icantiri:
—Timatsi nocoacaimpiri, pijate anta quipatsiqui pajitachari Moríah, paanaqueri pitomi Isaac papintite pinintasanotiri. Nocoaque poyenari anta, pintayenari. Ari nonijaaquempiro toncaari pintaanteariri.
Ari iquemisantaquero Abrahama icantaqueriri Tasorentsi. 3Ari oquitaiteamanaji capichaji quitaite itinaamanaca. Yovetsicaqueri iraashinote aisati ipesayetaque inchajempequipee intayeneri Tasorentsi itomi. Ijatanaque icantaquerinta Tasorentsi, itsipatanacari itomi Isaac jeri apite inampire. 4Ari ocarataque mava quitaiteri yamenacotapaaquero toncaari icantaqueriri Tasorentsi. Tequera irareetearo, areejitatsi oni. 5Ari icantiri apiitero inampire:
—Pisavicajeitavaquetsita aca, pamenenari aashino. Nojataiteta nainti anta. Nontsipatanaqueari notomica, nompincatsataiterita Tasorentsi. Coraquetajana nompiajeitaje.
6Irosati iquijacantacari itomi inchajempequi aisati iriori yaanaque paamari jero iotsirote. 7Ari nianqui avotsiqui isampitiri Isaac iriri, icantiri:
—¡Apa!
Yacanaqueri:
—¿Paita notomi?
Icantiri:
—Pamene, jero inchajempequica aisati paamari. ¿Jaocampa meeca ayeriri ovishajaniqui antayeneriri Tasorentsi?
8Yacanajiri:
—Notomi, irio Tasorentsi peeneri ovishajaniqui antayeneriri.
Aiquero ijatantaro yaniijeiti avotsiqui. 9Irosati yareetantacaro toncaari icantaqueriri Tasorentsi. Ari yovetsicapaaque altar. Impoiji yoanquetaquero inchajempequi. Irosati yaantacari itomi yoisotaqueri, yoanquetaqueri inchajempequiqui iriori intaantearimeri. 10-11Irosati yaantavetacaro iotsirote irisatantearimeri. Iro cantaincha intsipaite iquemaqueri Inampire Tasorentsi jenoqui, antearojenca icantaqueri:
—¡Abrahama!
Ari yacanaqueri:
—¿Paita, Novincatsarite? Jeraacana.
12Icantiri:
—¡Eiro poiritsi pitomi! Meeca niotaque queario piquemisantasanotaqueri Tasorentsi aisati pipincatsatasanotaqueri. Tempa irovetaincha poyenerime papintite pitomi pinintasanotiri.
13Ari yamenanaque Abrahama tojasheriqui, ineatiiri aparoni ovisha oisotaqueri inchashimpo itseequiqui. Irosati ijatashitantacari yaaqueri, yamapaaqueri yoaqueri. Iriotaque itaaqueneriri Tasorentsi ipinaajiriri itomi. 14Impoiji ipajitaquero Abrahama toncaari: “Ipaquenari Tasorentsi coiteimotanari.” Irosati ocanta meeca icantiro atiripee. “Anta toncaariqui aitaque impaquee Tasorentsi coiteimoteeri.”
15Ari yapiitajiri Inampire Tasorentsi Jenoquiniri icajemajiri Abrahama. 16-17Icantiri:
—Icanti Tasorentsi: ‘Piquemisantasanotaquena, te pintsaneapitsatenari pitomi papintite, poyenarime. Meeca noncantasanotempi: Nontasoncacoventasanotempi catsini. Queario nocantasanotimpi; tempa narotaque Tasorentsi. Noshequiacaasanojeiteri pishanincajeitajeari coajicani. Oshequi catsini irinajeitanaque, inquempeteari impoquiropee aisati inquempetearo impanequi. Aisati incanteani iranaacojeiteri quisajeiterineri. 18Nontasoncacoventajeiteri pishanincajeitajeari, irosati nontasoncacoventajeitanteariri maaroni atiripee quipatsiquiniri. Tempa piquemisantasanotaquena.’
19Irosati ipiantanaja Abrahama yoisavicanaquerinta inampirepee, ijajeitanaji Beersebaqui isavicajeitaquenta.
Itimaque itomipee Nahor
20Impoiji iquemacotaqueri Abrahama irirenti Nahor, timanaque itomipee iriori; itimacaaquerori ijina Milcá. 21Jero oca ivajiropee timayetaintsiri: Yora Us irio ijivatatsiri itimi impoiji itimanaque Buz jeri Quemuel. Yora Quemuel iriotaque iriri Aram. 22Impoiji itimayetanaji pashinipee: QuÉsed, Hazó, Pildás, Idlaf jeri Betuel. 23Yora Betuel iriotaque iri Rebeca. Yora Nahor, iriotaque irirenti Abrahama icarajeitaque 8 itomipee itimacaaquerori Milcá.
24Ari itimacaaquero otomipee iroori inampire pajitachari Reúma icarajeiti 4. Jero oca ivajiropee iriori: Teba, Gáham, Tahas jeri Maacá.
Currently Selected:
Génesis 22: cni
Highlight
Share
Copy
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
