Génesis 21
21
Itimantacari Isaac
1Ari iquenqueshiretaquero Tasorentsi Sara, imoncarataquero icantasanotaquerori. 2Ari otsomontetanaque, irosati otimantacari itomi Abrahama anteashipatanaque ini. Itimantacari, omoncarataca osarentsi icantantacariri. 3Otimantacariri Sara itomi Abrahama, ipajitaqueri Isaac. 4Ari ocarataque 8 quitaiteri irosati itoyeantantacari, imoncarataquero icantaqueriri Tasorentsi. 5Ocaratanaque meeca 100 irosarentsite Abrahama itimantacari Isaac. 6Ari oquenqueshireaca Sara, ocanti: “Meeca iquimoshiretacaaquena Tasorentsi timanaque notomi. Irotaque noshirontantacari aisati inquempejeitea maaroni quemacojeitenaneri itimaque notomi, oshequi inquimoshireventajeitena. 7¡Jaanica canterine Abrahama: ‘Ora pijina ontimeri pitomi!’ Iro cantaincha anteashipavetaca ini, meeca notimaqueri itomi.”
Itiancantajarori Abrahama Agar aisati otomi
8Ari iqueveanaque Isaac, irosati oipacaacantacari iriniro itsomi. Oipacaacantacariri, yantaque Abrahama antearoite fieshita iveshireacaajeitacari saviquimojeitiriri. 9Iro cantaincha ora Sara oneaqueri Ismael, otomi Agar, ishirontimentacari Isaac. 10Ari ocantiri ojime:
—¡Pintiancajero nonampire aanajerita otomi! Nocoacaaqueri atomi Isaac iraajero maaroni timimojeiteeri. Te noncoyeji impaaranteri otomi nonampire.
11Iquemantacarori Abrahama ocantaqueriri ijina, oshequi ocantimonentasanotanacari catsini; tempa iriovetaca itomisanori. 12Iro cantaincha icantiri Tasorentsi:
—Eiro poashiretacotaritsi pitomi aisati iriniro. Ocameetsati pintiancajero, pimoncaratero ocantaquempiri pijina Sara. Tempa aitaque nocantaquempi, nomoncarateneri irishanincajeitajeari Isaac oca nocantaquempiri. 13Aisati nonquempeteri iriori pashini pitomi, yora otomi pinampire. Nontasoncacoventeri irishequiasanojeitanaque catsini irishanincajeitajeari iriori coajicani; tempa iriotaque pitomi.
Ari iquemisantaquero Abrahama icantaqueriri Tasorentsi. 14Ari oquitaiteamanaji capichaji quitaite itinaamanaca, ipaquero Agar tanta aisati nija meshinantsiqui, irosati iquijacantacaro. Icantiro: “Eiro meeca nonampitajimpitsi. Noshinetajempi pijataje paanajeri pitomi.” Irosati ojatantaja. Iro cantaincha te ioteji jaocarica onquenanajeri, oquenashiveetanaja caaraiteriqui pajitachari Beerseba. 15Ari otsaatacotapaaca nija, tecatsi aajero. Aaquero omire aisati otomi. Irosati ojocantanacari otsititanaqueri inchatoshijaniquiqui, ojivetaca ari incamaque. 16Irosati ojatantavetaca nijanteaji, te oncoyeji oneeri incame. Osavicantavetapaacari anta, irosati iraantanaca otomi.
17Ari iquemaqueri Tasorentsi iraaca, irosati oquemantacari Inampire Tasorentsi jenoqui, icantiro:
—Agar, ¿paita oaquempiri? Eiro pitsaroitsi, iquemaqueri Tasorentsi pitomi iraaca poanaquerinta. 18Pijate pamenajanteri pintinaajanteri, eiro pojoquiritsi. Tempa iriotaque intasoncacoventeri Tasorentsi irishequiasanojeitantanaqueari irishanincajeitajeari iriori coajicani.
19Irosati yonijantacaro amotoaajati nija. Ojatanaque opeantapaaque meshinantsiqui, amacotaqueneri otomi oitapaaqueri. 20-21Ari yamitacotaqueri Tasorentsi Ismael, yantearitanaque. Irosati isavicantaca anta caaraiteriqui pajitachari Parán, aisati oshequi icovintsatanaca chacopiqui. Impoiji aacaaqueri iriniro ijina oshaninca egiptosato.
Yora AbimÉlec jeri Abrahama, icantasanotiri: “Tsame aacameetsatavacaajeitea.”
22Ari osamanitaque isavicaque Abrahama Gerariqui. Impoiji yora pincatsari AbimÉlec ijatashitaqueri inquenquetsatacayeri. Itsipatanacari Ficol, iriotaque jivatacaajeitiriri manajeitachari. Yareetantapaacariri, icantapaaqueri:
—Niotaque yamitacotimpi Tasorentsi paitapeerica pantayetiri. 23Meeca pincantasanotena aca, ariorica paacameetsajeitaquena, eiro pantanajeitanatsi. Aisati pinquempejeiteri notomipee jeri noshanincajeitajeari iriori coajicani. Tempa naacameetsataquempi avirori, tecatsi noncantajeitempi. Aisati pinquempejeiteri savicajeitantarori oca quipatsi pisavicantacari. Iotaquero Tasorentsi oca acantavacaasanojeitacari.
24Ari icantanaqueri Abrahama:
—Jee, aitaque oncanteari.
25Ari icantimentaqueri nija iquianavetacari inampirepee, yaapitsataqueriri inampirepee AbimÉlec. 26Ari yacanaqueri AbimÉlec, icantiri:
—Teyea nonquemacoteroji oca picantaquenari, te pincamantenaroji. Meeca te nioteriji nonampire aapitsataqueriri.
27Irosati yaayetantacari Abrahama irovishate jeri ivacate ipaqueri AbimÉlec, irosati yaacameetsatavacantaca. 28Impoiji yaaque aisati ovishapee icarati 7, inashitacaacari. 29Ineantacariri AbimÉlec, isampitiri:
—¿Paitaquea pinashitacantacariri yoca ovishapee caratatsiri 7?
30Ari yacanaqueri:
—Iro nonashitacantacariri yoca 7 ovishapee nompempiri, piotanteari narotaque quianatacantaquerori oca nija.
31Irotaque ipajitantacarori caaraiteri isavicantacari Abrahama Beerseba; tempa aitaque yaacameetsatavacaacari.
32Ari imataquero yaacameetsatavacaaca Beersebaqui, irosati ipiajeitantanaja AbimÉlec jeri Ficol iipatsitequi filisteopee. 33Impoiji yaaque Abrahama inchatoshijaniqui icanteetiri tamarisco, ipanquitaquero. Ari yaventacari Tasorentsi yora icantaitatiani yaneasanoti, iquenquetsatacaaqueri. 34Oshequi osarentsi isavicaque Abrahama iipatsitequi filisteopee.
Currently Selected:
Génesis 21: cni
Highlight
Share
Copy
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
