HAGONEGAHANI 18
18
Ka Sara ki page apara na kare mane
1Na Araha ki vora tanga o Abarahamo hagarangigi na apinige apuna iana o Mamere. Igê na ritovagana o Abarahamo ki oga so i maana na ruma na gahu iana. 2Ngaia ki sira râ, ma ki bâsira râ na mane gi oru ga rêra. Pusinama i bâsira, ngaia ki gaha râ i pasita. Ngaia ki bêrusu so ki puru ano ma ki vi: 3“Bamane, siana kamu ritare. Mu mamaro noga i pasiku. 4Naka be tia na ve ni tanani uga tangagamu. Mu oga mamaru i ruguhana na apinige ikê. 5Naka be torea me nikâ na kere ngêra tangagamu, hanana mu gatagata ni râha. Igamu kamu pe masesi tenia na ruma iaku. Tahema ve bâsurigamu.” Ngaira ka arami, ka vi: “Hoita. I koro ma!”
6Hoi, o Abarahamo ki gaha banu igê na ruma na gahu ma ki vi tanga ka Sara, ki vi: “Garigari! Gu tavoa na palaua na ani koro ngavê ma ku pigania ko hahahi re na bereti.” 7Ma hemuri ngaia ki tango râ tangara na togoha ma ki atea na karena na puruka, na ani i marumu ma ki binibinikaga. Ngaia ki vatea na kariana, ki hata ni hagamakoa. 8Matena i mako na ngêra, ngaia ki tora râ na ganiani henigi na bata ma na miliki tangara na mane. Ngaia ki ura renira ka ngêngê igê na mamarugana na apinige.
9Ngaira ka hagatea, ka vi: “I he ka Sara kaniamu?” Ngaia ki aramira, ki vi: “Ngaia i ruma na gahu.” 10Na hitangita na mane ki vi: “Igê na harisi i muri i na matena manga i ngekê inê kê page aporo me, ma ka Sara kaniamu ki bani apara na kare mane.”
O Abarahamo ki ura i metara. Ka Sara ki ura i murina banu purupuru na maani ruma ma ki karinga. 11O Abarahamo ma ka Sara karu gemêa ngavê, ma ka Sara ki hato vige apara kare. 12Vikê ka Sara ki mamanamui ma ki tako ki vi: “E, ma inê kê gemêa ngavê ma ki herungurungu na apeku. Tanu hega gê vagevagesia mênga na mêruha henia na mane? Ma nikâ o vaniaku ki gemêa ngavê nogana.”
13Tahema na Araha ki hagatea o Abarahamo, ki vi: “Tanu hega ka Sara ki mamana? Tanu hega ki pe tongesuria, vi ngaia ki girara i apara kare, henaka i gemêa ngavê? 14Mareha ta na marâ vige bara tanga na Araha. Manga gê bani visia, vi igê na harisi i muri igê na matena manga i ngekê inê kê page aporo me, ma ka Sara ki bani apara na kare mane.”
15Ka Sara ki magu. Tahema i hagaiga, ki vi: “Inê kê pe mamana.” Ma ngaia ki arami, ki vi: “Mako! Igo ko mamana.”
O Abarahamo ki tamasi pusia i Sotome
16Ma hemuri na mane ka râ ma ka tagere i na agua ga girara ga rigia igê i Sotome. O Abarahamo ki râ vê henira ma ki kasira ka râ. 17Ma na Araha ki tako ki vi: “Siana be pinihia tenia o Abarahamo na katoha iaku. 18Na raraha iana ka page voravora na hakuta raha ninuni ga raramohaga ma ki rongo raha na atata, ma na ara ni hakuta ninuni hato getera ka page avarasiê, kê korokoro tangara manga gê koro tanga o Abarahamo. 19Inê kê atea, hanana vi ngaia ki hagaotora o karena ma na raraha iana, hanana ga têtê viteaku ma ka katogi na tarani, ga korokoro ma ka ototo. Manga ga katokato vikana, inê kê page hagamonaria na suruheri iaku tanga.”
20Memuri na Araha ki vi tanga o Abarahamo, ki vi: “Inê kê rongoa na rongoha i era ngavê renirerua i Sotome me Gomora. Ngaira ka bagaparongata ngavê. 21Inê be so nga, hanana ve tarahua, vi i monari vari na rongoha se mareha.”
22Memuri na mane gi rua karu râ tanga i Sotome, ma na Araha ki oga so henia o Abarahamo. 23O Abarahamo ki ura râ i pasina na Araha, ma ki hagatea, ki vi: “Go vi monari, vi igo ko mutera na enoni koro henira na enoni ga erataga? 24Manga vi i ngekana ma ka gâga igê na enoni koro tangahuru gi rima, ki hega, go ruhuruhua vari na hinua hagenani? Go pe ruhuruhua vari, hanana go hagatahira na enoni koro tangahuru gi rima? 25I pe arari, vigu mutera na enoni koro henira na ani ga erataga. I pe arari ngavê. Siana! Manga go katokato vikana, na hagaitangiha ki page tarahura tagenata na enoni ga koro ma na ani ga erataga. Ma ki pe oto ngavê. Igo na ani go suria na maveta hagenani, ki tuguhigo, go katoa na suriha i oto.”
26Na Araha ki arami, ki vi: “Manga vi inê ma kê tarahua, vi i Sotome ka gâga igê na enoni koro tangahuru gi rima, i ngekana inê ki asa be ruhuruhua na hinua hagenani.”
27O Abarahamo ki tamasi nikâ, ki vi: “Araha, siana ko mangariaga tangê, suria gê ama ni megotamasi bâraha nga. Inê ki pe arariê. Inê na enoni purua ma. I pe oto tangê. 28Ma ki manga viga gâga ma igê na tangahuru ge he matara gi rima na enoni ga koro, mareha vi tangahuru gi rima, ki hega, go ruhuruhua vari na hinua hagenani, suria gi rima ki mareha?”
Na Araha ki arami, ki vi: “Inê ki asa be ruhuruhua na hinua, manga vi inê ma kê tarahua, vi i ngekana ka oga igê na tangahuru ge he matara gi rima na enoni ga koro.”
29O Abarahamo ki tamasi nikâ, ki vi: “Ma ki manga vi na tangahuru ge he ma, ki hega?”
Na Araha ki arami, ki vi: “Inê ki asa be ruhuruhua na hinua, manga vi i ngekana ka oga igê na tangahuru ge he.”
30O Abarahamo ki vi: “Araha, siana ko mangariaga tangê. Inê kê megotamasi nikâ. Ma ki manga vi na tangahuru ge oru ma, ki hega?” Na Araha ki arami, ki vi: “Inê ki asa be ruhuruhua, manga vigê tarahua na tangahuru gi oru i ngekana.”
31O Abarahamo ki vi: “Araha, siana ko mangariaga tangê, suria gê ama ni megotamasi nga. Manga vi i ngekana ma ko tarahua igê na tangahuru girua, ki hega?”
Na Araha ki arami, ki vi: “Inê ki asa be ruhuruhua na hinua, manga vigê tarahua igê na tangahuru gi rua.”
32O Abarahamo ki vi: “Araha, siana ko mangariaga tangê. Inê kê tamasi râ hagetage ma nikâ ma ki kahu hatohato. Manga vigo tarahua igê na tangahuru gi tage ma, ki hega?”
Na Araha ki arami, ki vi: “Inê ki asa be ruhuruhua na hinua, manga viga oga na tangahuru gi tage igê.”
33Matena na Araha ki metamasi hato o Abarahamo, ngaia ki râ vê, ma o Abarahamo ki aporo i pasina.
Currently Selected:
HAGONEGAHANI 18: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
