HAGONEGAHANI 8
8
Na maganuha ki vato
1God ki takusira o Noa ma na marâ hato ga mauri i rarona na haka. Tahema ngaia ki katoa ki roga ma na maganuha ki haganega ki vato.
2Ka bono hato na ara ni ve i ruguhana na maveta ma i basina na vavearo. Ki arito. 3Na maganuha ki ama ni vato nga surigi na tangiani tangarê gi tage matara na tangahuru gi rima. 4Igê na tangahuruta matare pi na tangiana igê na pita na hageha na haka ki guru igê na hungani i Ararata. 5Na maganuha ki ama ni vato nga, ma igê na tangiana hagenago igê na tangahuruta na hageha ka riki akê na barani.
6I murini na tangiani tangahuru ge he o Noa ki tangahia na mabaha, 7ma ki kasia hura na manu masuri. Ma na manu ngekana ki râ ngavê. Ngaia ki gagaha rârâ ma mataro me na maveta ki riki akê aporo. 8Ma i nago tarana ngekana o Noa ki kasia hura na kuvê, hanana i girara vi na maveta ki riki akê aporo se mareha. 9Suria na maganuha ki anuigi mênga na ara ni agua, na kuvê ki pe tarahua na agua, hanana vige tagetage igê.
Tahema ngaia ki gaha aporo me tanga na haka. O Noa ki tagarahura ma ki têa banu me. 10Ngaia ki nanê surigi na tangiani gi pi nikâ ma ki kasia hura nikâ ta na kuvê. 11Ngaia ki gerea na bâgona na apinge ni olive ma ki megaha aporo me. Vikê o Noa ki girara, vi na maveta ki riki akê aporo. 12Ma ngaia ki nanê nikâ surigi na tangiani gi pi ma ki kasia hura nikâ ta na kuvê. Ma ngaia ki pe aporo me.
13Matena o Noa ki tonga na harisi 601 iana, igê na tangiana na haganegahana na hageha hagenago, na maveta ki riki akê ngavê. O Noa ki tasia na gerina na haka, ki bâ rârâ, ma ki rigia vi na mako ki haganega ki riki. 14Igê na tangahuruta gi rua matare pi na tangiana igê na ruata na hageha na ano ki aha ngavê.
15God ki vi tanga o Noa, ki vi: 16“Gu merahura kaniamu, o karemu ma na gete iata hegitigi tenia na haka. 17Gu merahura nikâ na manu hato ma na ara ni marâ ga mauri, hanana ngaira ka apapara ma ka gahuia na maveta.” 18Vikê o Noa ki merahura kaniana, o karena ma na gete iata hegitigi. 19Ga huhura tatage na manu hato, na ara ni marâ hato ga mauri ma ka vasiga, na togoha hato, ma ara ni marâ hato ga angoango i ano.
O Noa ki vogasia na Araha
20O Noa ki tagarahia na bea na panga ni vogasiha tanga na Araha. Ngaia ki torera na ara ni hitangita na manu ma na marâ ga mauri ga arari ni vogasiha ma ki sungira hagenani igê na bea na panga ni vogasiha. 21Na vanuhana na vogasiha ki hagakoro obana na Araha. Ma na Araha ki tako ki vi: “I hato nikâ vi ve hagaitangia na maveta renigi na bagatauhata na enoni. Inê bani girara, vi ngaira ka mevora na eraha. I hato nikâ vi ve mutera vikana na ara ni marâ ga mauri.
22Matena na maveta ki gâga, ka gâga nikâ na mateni ni hasinga ma ni opaha, na mateni ni anumaganiha ma ni mahananiha, ni arito ru ma ni rogaroga ahuru, ma na tangiani ma na bungiani.”
Currently Selected:
HAGONEGAHANI 8: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific
