San Lucas 11

Jusiñamuimo Jesús jɨɨa rafue

(Mt 6.9-15; 7.7-11)

1Jɨaɨruido ie Moo dɨga Jesús ñaɨa, ie llofueganomona damɨe naimɨemo llote:

—Nama, jɨɨana caɨna llofue, ie llofueoicaiganona Juan Bautista mɨcorɨ llofuia isoi.

2Jesús uai ote:

—Omoɨ jɨɨia, iese omoɨ jɨɨ:

Ore Moo, comɨnɨ ori iobidesa.

O illaɨmana jira, nana comɨnɨna o anamo raɨre itata.

O jaɨenisaɨ o jitaillacɨnona fɨnua isoi, comɨnɨna o jitaillacɨnona fɨnota.

3Nagarui guille caɨmo itata.

4Caɨna jeare jɨaɨno fɨnoia, iena caɨmona feilla isoi, caɨ jeacɨnona omona feilla jira, caɨ jeacɨnona oni dota.

Caɨna ramo bu faɨa, caɨna cano, iena caɨ ɨɨnoñellena.

5Iena naimacɨna nia llofuellena, Jesús jɨaɨe rafuena llote:

—Naɨona mona moto llomenicona jɨcallena, o nabai dɨne o jaia, ado lloitɨo: “Nabai, daje amani llomenicona jitaidɨcue. 6Jɨaɨe nabai cue jofomo como ride. Jaca cuemo buedɨ iñede, naimɨena cue ecallena”. 7Ie jofo jeraimona o nabai faɨrioite: “Cuena uaidoñeno. Cue nasedɨ jai cue ɨbaicasa. Cue uruiaɨ jai ɨnɨdɨmacɨ. Jɨaɨ ɨnɨdɨcue. Llomenicona omo fecallena casiacaiñedɨcue”. 8Ja muidomo casillano, omo iena fecaite. Ie nabaina o illa jira, fecañeite; iadedɨ o eo jitailla jira, o jitaille rana fecaite. 9-10Daje ra omoɨ faɨfia, iena jenodomoɨ. Raise jenoia, iena baitomoɨ. Damɨena omoɨ jenoia, naimɨe illanomo jaidomoɨ. Nainomo naimɨena baillamona, omoɨna feiñoite. Ie isoide. Buena omoɨ jitaia, Jusiñamuimo jɨca. Iena omoɨ jɨcaja jira, iena naimɨe cacajamona, omoɨmo iite.

11’Ero, omoɨmona ie moomo llomenicona ie jito jɨcaia, nofɨcɨna fecañede. Llɨcɨaɨna jɨcaia, jaiona fecañede. 12Jɨgɨna jɨcaia, acaidona fecañede. 13Jeacɨnona fɨnocabidomoɨ; iadedɨ omoɨ uruiaɨmo mare rana fecacabillana uiñotomoɨ. Caɨ Moo Jusiñamui jaca mareuidɨmɨe. Caɨ baɨfemo naimɨe faɨte. Ie muidomo naimacɨna canollena, naimɨemo jɨcadɨnomo ie Joreñona itataite.

Comɨnɨ Jesúna jeare ñaɨa rafue

(Mt 12.22-30; Mr 3.19-27)

14Jɨaɨruido Janaba anamo illamɨemona Jesús Janabana oni orede. Janabana nia oretañenia, Janaba anamo naimɨe illamona, naie ɨima ñaɨnide. Janaba oni jailla mei, naimɨe ñaɨte. Ie jira comɨnɨ raijicaidɨmacɨ; 15iadedɨ dajerie raitɨmacɨ:

—Beelzebú anamo bimɨe illamona, Beelzebú uaido jananɨaɨna oni orede —raitɨmacɨ. Beelzebúdɨ Janaba comɨnɨ.

16Jɨaɨno naimɨena facacɨiacasɨte. Raitɨmacɨ:

—Siño uai omo ia, Jusiñamuina siño rafuena fɨnota.

17Naimacɨ comecɨaɨna Jesús uiñua jira, naimacɨmo llote:

—Daje isoi comecɨaɨna lloillamo daje naɨraɨ facañenia, danomo maɨjɨnidɨmacɨ. Oni jaidɨmacɨ. Daje isoi comecɨaɨna lloillamo daje jofomo itɨno facañenia, danomo jaɨnaɨaɨnidɨmacɨ. Oni jaidɨmacɨ. 18Ie isoide. Beelzebú uaido jananɨaɨna, omoɨ llua isoi, cue oretaia, Janaba ie dɨbeimo itɨno dɨga jai nabairiñede. Iemona naimɨe comɨnɨ danomo iñeitɨmacɨ. 19Omoɨ comɨnɨ jananɨaɨna oni oretacabitɨmacɨ; iadedɨ naimacɨ fɨnoca rafuena uaitañedomoɨ. Naimacɨmo jɨcano, bie isoide rafuena omoɨ raise uiñollena. Iemei cue fɨnoca rafuena uaitañeitomoɨ.

20-22’Jɨaɨe rafuedo iena lloitɨcue. Ero, ie rana raise rɨiduamona, maɨridɨmɨe ie rana raise enoite. Ie jofomo ie ra illanona, iena raise sedaite. Jamai bue isoidɨmɨe ie rana fɨɨnide; iadedɨ naimɨe baɨfemo maɨridɨmɨe bia, naimɨena emodofillamona, ie rana fɨɨrede. Ie isoide. Janaba anamona comɨnɨna jillotacabitɨcue. Naimɨe afemo nano cue iñenia, comɨnɨna jillotanidɨcue. Naimɨe afemo cue illa jira, iena fɨnoredɨcue. Jusiñamui uaido jananɨaɨna cue oretaia, Jusiñamui rafuena cue lluana uiñotomoɨ.

23’Cue dɨbeimo iñedɨmɨe cuena enoide. Cue dɨbeimo comɨnɨna itatañedɨmɨedɨ naie comɨnɨna cuena ɨɨnotañede.

Janaba anamo illamɨe rafue

(Mt 12.43-45)

24Jesús naimacɨmo nia llote:

—Birui bene ite maraiñede comɨnɨdɨ Janaba anamo illamɨe isoidɨmacɨ. Naimɨemona Janaba oni jaia, jɨaɨe illanona baillena, jofue iñenanomo jaide; iade baiñede. Baiñena jira, naimɨe comecɨna facade: “Navui cue anamo illamɨe dɨne abɨdo jaitɨcue”. 25Abɨdo naimɨe bia, naie ɨima comecɨ namanidena naimɨe baite. 26Iemei oni jaillanona, jɨaɨe siete jananɨaɨna naimɨe dɨga atɨde, naimacɨ anamo naie ɨima illena. Naie siete jananɨaɨ naimɨe baɨfemo maraiñedɨmacɨ. Iemona naie ɨima eo fodo jaide. Ie isoide birui ite maraiñede comɨnɨ. Cue rafue naimacɨ ɨɨnoñenia, eo fodo jaitɨmacɨ.

Daje rɨño Jesús eina marena ñaɨa rafue

27Comɨnɨmo Jesús llotemo, comɨnɨ motomona dañaiño Jesúmo llote:

—O ei caɨmare illesa. Naiñaiñomona comuidɨo. Naiñaiño monoɨ jirodɨo. Naiñaiño caɨmare illesa.

28Jesús uai ote:

—Marena llotɨo; ia Jusiñamui uaina naimacɨ cacajamona, iena ɨɨnuamona, jɨaɨno eo caɨmare iitɨmacɨ.

Dajerie Jesús siño rafuena fɨnuana jitailla rafue

(Mt 12.38-42; Mr 8.12)

29Ie facaise dɨga comɨnɨ Jesús dɨne biñoidɨmacɨ. Naimacɨmo llote:

—Birui ite comɨnɨdomoɨ maraiñedomoɨ. Siño rafuena cue fɨnuana cɨoacadomoɨ; iadedɨ iena omoɨ jamai cɨoillena, siño rafuena fɨnoñeitɨcue. Ero, Jonás mɨcorɨ jaie ite rafuena uiñotomoɨ. Naiemo omoɨ comecɨaɨna omoɨ faca. 30Naimɨemo suide rafuemona Nínive railla naɨraɨdɨ Jusiñamui naimɨena oretajana jaie uiñotɨmacɨ. Ie isoide. Fiodaillamona cue jilluamona birui ite comɨnɨdɨ Jusiñamui cuena oretajana uiñoitɨmacɨ. 31Ero, Saba railla naɨraɨ ie illaɨño mɨcorɨdɨ Salomón mɨcorɨ dɨne jaie aarena jaide. Naimɨe mɨcorɨ uiñuacɨnona naiñaiño mɨcorɨ cacareillena, aarena jaide. Salomón mɨcorɨ baɨfemo birui uaidɨcue; iadedɨ cuena ɨɨnoñedomoɨ. Omoɨ comecɨaɨ icɨnuaɨna birui omoɨ meidoñena jira, Jusiñamui uicomo nana comɨnɨ ille facaiseconi naiñaiño mɨcorɨ omoɨna ɨco ñaɨte: “Naimɨedɨ siño rafue fɨnuana cɨodomoɨ. ¿Bue ñellena naimɨena ɨɨnoñedomoɨ?” omoɨna ɨco ñaɨte. 32Llɨcɨaɨ jeraimona naimɨe jillua mei, Nínive railla naɨraɨ dɨne Jonás mɨcorɨ jaide. Nainomo Jusiñamui rafuena llote. Naie comɨnɨ iena cacajano, naimacɨ comecɨaɨ icɨnuaɨna meidotɨmacɨ. Cue rafuena omoɨ cacajamona, omoɨ comecɨaɨ icɨnuaɨna birui omoɨ meidoñena jira, Jusiñamui uicomo ɨco nana comɨnɨ ille facaiseconi: “Cue comɨnɨdomoɨ” omoɨna raiñeitɨcue. Jonás mɨcorɨ baɨfemo birui uaidɨcue; iadedɨ cuena ɨɨnoñedomoɨ.

Jesús comɨnɨ illa rafue

(Mt 5.15; 6.22-23)

33Jesús llote:

—Lamparín bu unia mei, jofo anamo bainino raɨnañega. Cɨrɨgaɨ anamo raɨnañega. Ie raɨranomo raɨnaca, comɨnɨ nainomo bia, jofo jerai llɨgaiñollena. 34Omoɨ uisɨ dɨga rana cɨodomoɨ. Omoɨ uisɨ maraiñenia, rana raise cɨoiñedomoɨ. Ie isoide. Omoɨ comecɨ maraiñenia, maraiñedɨcɨnona fɨnocana jaidomoɨ. Jusiñamuina uiñoñedomoɨ. Ie rafuena jɨaɨ uiñoñedomoɨ. 35Ie jira omoɨ comecɨaɨna raise fɨno, cue rafuena omoɨ raise ɨɨnollena. 36Nana omoɨ comecɨaɨ marena ia, cue rafuena ɨɨnocana jaitomoɨ. Iena raise uiñoitomoɨ. Jofomo lamparín raise llɨgaiñua isoi, cue rafuena raise uiñoitomoɨ.

Jesúdɨ judíuaɨ illaɨcomɨnɨna ñaɨa rafue

(Mt 23.1-36; Mr 12.38-40; Lc 20.45-47)

37Comɨnɨna Jesús llofuia mei, daje fariseo imɨe naimɨe dɨne bite. Raite:

—Cue dɨga cue jofomo mai guisaɨbi. —Jesús faɨriua mei, naimɨe dɨga guisaide. 38Naimɨe nia guiñenia, naimacɨ einamacɨ llogacɨnodo naimɨe jaiñenamona, Jesús ie onollɨna jocoñede. Ie jira naie fariseo imɨe raijicaide. Ie comecɨna facade: “Naimɨe eo mare llofueraɨma. ¿Nɨese caɨ einamacɨ llogacɨnodo jaiñede?” 39Jesús naimɨemo llote:

—Da platos jɨnafo, da pocillos jɨnafo jocodɨno isoidomoɨ. Da platos jerai, da pocillos jerai jocoñedɨno isoidomoɨ. Omoɨ abɨna fɨnodomoɨ; iadedɨ omoɨ comecɨaɨna fɨnoñedomoɨ. Rana eo nɨcɨdotomoɨ. Omoɨ comecɨaɨ jearede. 40Abɨ uiñoñedomoɨ. Jusiñamui omoɨ abɨaɨna omoɨ comecɨaɨ dɨga fɨnode. Omoɨ fɨnoca rafuena uiñote. Omoɨ comecɨaɨna facajacɨnona jɨaɨ uiñote. 41Omoɨ comecɨaɨ marena ia, jɨaɨe comɨnɨna canodomoɨ. Iemona Jusiñamuimona omoɨ abɨ jɨaɨ mare. 42Fariseuaɨ, omoɨmo rafuena lloitɨcue. Nana omoɨ illɨmo ite ramona Jusiñamuimo janore jisa feca-fecacabidomoɨ; iadedɨ jɨaɨe comɨnɨmo mare rafuena raise fɨnoñedomoɨ. Jusiñamuina jɨaɨ raise isiruiñedomoɨ. Nana naie isoide rafuena omoɨ jɨaɨ fɨnua. 43Comɨnɨ omoɨri acarillena, ofiracomo uicomo raɨacadomoɨ. Nɨne omoɨ macaria: “Jamai bue isoiñedɨcaɨ” omoɨ comecɨaɨna facajamona, jɨaɨe comɨnɨ omoɨna uaiduana gaɨdomoɨ. Iese omoɨ jailla jira, Jusiñamui omoɨna duere fɨnoite. 44“Bainino ite raɨafo emodomo comɨnɨ uiñoñeno macarillamona, naimacɨ abɨ jai jearede” raitomoɨ. Bainino ite raɨafo isoidomoɨ. Omoɨ dɨga jɨaɨe comɨnɨdɨ omoɨmo ite jeacɨnona uiñoñeno nabairillamona, jeacɨnona jɨaɨ fɨnodɨmacɨ. Iese omoɨ fɨnocana jaia, Jusiñamui omoɨna duere fɨnoite.

45Naie facaise Moisés llogacɨnuaɨna llofueraɨnɨmona damɨe Jesúmo llote:

—Iese o lloia: “Jeacɨno fɨnodomoɨ” caɨna jɨaɨ llotɨo.

46Jesús uai ote:

—Jusiñamuimona jɨaɨ duere sefuitomoɨ. Omoɨ einamacɨ llogacɨnuaɨdo raise naimacɨ jaillena, dɨga rafue comɨnɨ fɨnuana jitaidomoɨ; iadedɨ iedo naimacɨ raise jaillena, naimacɨna jaca canoñedomoɨ. “Jusiñamuina eo raise sedadɨcaɨ” comecɨna facadomoɨ. 47Omoɨ jaiagaɨdɨ Jusiñamui facaina lloraɨnɨna meinetɨmacɨ. Naie lloraɨnɨ mɨcorɨaɨ raɨafuaɨ birui marena fɨnodomoɨ; 48iadedɨ naimacɨ mɨcorɨaɨ llogacɨnuaɨdo omoɨ birui jɨaɨ jaiñena jira, omoɨ jaiagaɨ fɨnoca radɨ: “Mare” raitomoɨ. Jusiñamui rafuedo birui omoɨ raise jaiñena jira, omoɨ jaiagaɨ isoi itomoɨ. Iese omoɨ jailla jira, Jusiñamui omoɨna duere fɨnoite. 49Omoɨna Jusiñamui abɨ uiñuamona jai llote: “Cue rafuena llollena, naimacɨ dɨne cue facaina lloraɨnɨna oretaitɨcue. Cue rafuena eo uiñotɨnona jɨaɨ oretaitɨcue. Dajeriena meineitɨmacɨ. Jɨaɨnona duere fɨnoitɨmacɨ”. 50Enɨrue fɨnua facaisemona ailluena Jusiñamui facaina lloraɨnɨna meinetɨmacɨ. Omoɨmona Jusiñamui ɨba oite. 51Abel mɨcorɨ jaie ite. Ie ama naimɨena meinete. Naimɨe facaisemona omoɨ jaiagaɨdɨ dɨga lloraɨnɨna meinetɨmacɨ. Zacaríana jɨaɨ meinetɨmacɨ. Jusiñamui jofomo Jusiñamuimo toɨca ocaina jobaisoillano motomo naimɨena meinetɨmacɨ. Omoɨmona Jusiñamui birui ɨba oite. 52Omoɨ llofuiamona comɨnɨ Jusiñamui rafuena uiñoñedɨmacɨ. Jusiñamui rafuena raise uiñoñedomoɨ. Jɨaɨno iena raise uiñuana jitaiñedomoɨ. Iese omoɨ jailla jira, Jusiñamui omoɨna duere fɨnoite.

53Fariseo jofomona Jesús jailla mei, fariseuaɨ comɨnɨ icɨrillamona, Jesúmo dɨga rafuena jɨcanotɨmacɨ, naimɨe uaina uaitallena. Moisés mɨcorɨ llogacɨno llofueraɨnɨ daje isoi uai uaitatɨmacɨ. 54Naimɨe raise uai oñedena, naimɨena duere fɨnoacadɨmacɨ.

Currently Selected:

San Lucas 11: huu

Highlight

Copy