Kenese 8
8
‘Ua Mavae le Lolo
1‘Ua manatua e le Atua Noa ma mea ola uma ma manu vaefā uma sa i le va‘a ma ia. ‘Ua fa‘aagi atu e le Atua le matagi i le lalolagi; ona māui ai lea o le vai.#Kene 19.29; 30.22; Eso 2.24; Sala 104.7 2‘Ua punitia fo‘i punāvai o le moana ma pupuni o le lagi; ‘ua tāofia fo‘i uaga mai le lagi. 3‘Ua māui atu le vai ai le lalolagi, ‘ua saga māuiui lava; ‘ua mavae aso e selau ma le limagafulu ona fa‘aitiiti lea o le vai. 4O le fitu o masina ma lona aso e sefulu ma le fitu, ‘ua to‘a ai le va‘a i luga o mauga o Ararata. 5‘Ua saga māuiui pea le vai ‘ua o‘o i le masina e sefulu; ‘ua o‘o i le masina e sefulu, o le aso muamua o lea masina, ‘ua mānu#8.5 mānu: po o ‘ea a‘e po o ‘ua iloa atu ai. ai tumutumu o mauga.
6‘Ua o‘o ‘ina ‘atoa o aso e fagafulu, ‘ona tatala lea e Noa le fa‘amalama o le va‘a na ia faia. 7‘Ua ia tu‘u atu ai le oreva; ‘ua lele atu ia, ma fefo‘ifo‘ia‘i ‘ua o‘o ‘ina mate#8.7 mate: po o pē po o le papa‘u o le vai a‘i i le lau‘ele‘ele. 8‘Ua ia tu‘uina atu fo‘i le lupe nai ‘iā te ia, ‘ia iloa ai po o ‘ua papa‘u le vai i le fogā‘ele‘ele. 9A ‘ua lē maua e le lupe se mea e mapu ai ona vae, ‘ona toe fo‘i mai lea o le lupe ‘iā te ia i le va‘a; auā sa i ai le vai i le fogā‘ele‘ele uma. ‘Ona ‘a‘apa atu lea o lona lima ma tago i ai ma ‘aumai ‘iā te ia i le va‘a. 10‘Ona toe fa‘atalitali lea o ia i nisi aso e fitu, ‘ona toe tu‘uina atu lea e ia o le lupe a‘i le va‘a. 11‘Ua toe fo‘i mai ‘iā te ia o le lupe i le afiafi; fa‘auta fo‘i, o i lona gutu le lau olive mata, ‘ona iloa ai lea e Noa ‘ua papa‘u le vai i le lalolagi. 12‘Ona toe fa‘atalitali lea o ia i nisi aso e fitu, ‘ona tu‘uina atu lea e ia o le lupe; a ‘ua lē toe fo‘i mai lava le lupe ‘iā te ia.
13‘Ua o‘o i le tausaga e ono selau ma le tasi, o le ulua‘i masina, o le ulua‘i aso o le masina, ‘ua mate ai le vai i le lau‘ele‘ele; ‘ona tō ‘ese lea e Noa o le ufi o le va‘a, ma ‘ua va‘ai atu fa‘auta fo‘i, ‘ua matūtū le fogā‘ele‘ele. 14O le masina e lua ma le aso e luafulu ma le fitu o lea masina na matūtū ai le ‘ele‘ele.
15‘Ua fetalai atu le Atua ‘iā Noa, o lo‘o fa‘apea atu, 16“‘Inā ulufafo ia i le va‘a, o oe, ma lau avā ma ou atali‘i ma avā a ou atali‘i, fa‘atasi ma oe.#Kene 7.13 17‘Inā ‘aumaia i fafo fa‘atasi ma oe o manu uma o ‘iā te oe, i mea ola uma, o manu felelei ma manu vaefā, ‘atoa ma mea fetolofi uma e fetolofi i le ‘ele‘ele; ma ‘ia latou tutupu tele lava i le lalolagi, ‘ia fanafānau ma ‘ia uluola i le lalolagi.” 18‘Ona ulufafo lea o Noa ma ona atali‘i ma lana avā ma avā a ona atali‘i fa‘atasi ma ia. 19‘Ona ulufafo lea i le va‘a, o manu vaefā uma, o mea fetolofi uma ma manu felelei uma, ‘atoa ma mea uma e feoa‘i i le lau‘ele‘ele e ta‘itasi ma lona uiga.
O le Taulaga a Noa
20‘Ona faia lea e Noa o le fatafaitaulaga i le ALI‘I; ‘ua ‘avea fo‘i e ia nisi manu i manu vaefā uma e mamā ma manu felelei uma e mamā, ‘ua ia fai a‘i le taulaga mū i le fata. 21‘Ua lagona fo‘i e le ALI‘I le manogi lelei, ‘ona fa‘apea ifo lea o le ALI‘I i lona finagalo, “E ui lava ‘ina leaga o manatu o loto o tagata e āfua mai ‘ina o tama iti, ‘ou te lē toe fa‘ao‘o le malaia i le lau‘ele‘ele ‘ona o tagata; ‘ou te lē toe taia mea ola uma e pei ‘ona ‘ou faia.#Kene 3.17; 6.5; Eso 29.18; Levi 1.9; Isai 54.9; Eseki 20.41; Roma 3.23; Efe 5.2; Fili 4.18
22O aso uma o le lalolagi e lē toe utuvā ai,
o tausaga e lūlū ai ma tausaga e selesele ai,
o le ma‘alili fo‘i ma le vevela,
o le vaito‘elau ma le vaipalolo,
o le ao fo‘i ma le pō.”#8.22 o le ma‘alili fo‘i ma le vevela, o le vaito‘elau ma le vaipalolo, o le ao fo‘i ma le po: po o o le vaitau malūlū ma le taimi vevela, o le taimi mafanafana ma le tau malūlū, le ao ma le pō. #Iere 5.24; 33.20, 25
Currently Selected:
Kenese 8: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
