Levitiko 25
25
‘Ua Faia le Fitu o Tausaga ma Sapati e Mapu ai le Lau‘ele‘ele
(Teu 15.1-11)
1‘Ua fetalai mai fo‘i le ALI‘I ‘iā Mose i le mauga o Sinai, ‘ua fa‘apea mai:#Eso 23.10-11 2Fai atu ia i le fānauga a Isaraelu, ia fa‘apea atu ‘iā i latou: A ‘outou o‘o i le nu‘u ‘ou te avatu ai ‘iā te ‘outou, ‘ona fai ai lea se sapati e mapu ai le lau‘ele‘ele i le ALI‘I. 3E ono tausaga ‘e te lūlū ai saito i lou fanua, e ono tausaga ‘e te teuteu ai lou tōvine, ma fa‘aputu ai ona fua. 4A o le fitu o tausaga e fai ma sapati lea e mapu ai le lau‘ele‘ele, o le sapati i le ALI‘I; ‘aua ‘e te lūlū ai ni saito i lou fanua, ‘aua fo‘i ‘e te teuteu ai lou tōvine. 5O mea e tutupu fua nai lau seleselegāsaito, ‘aua ‘e te seleseleina ‘aua fo‘i ‘e te tau ni fua o lou vine ‘ua lē teua; o le tausaga lea o mapu ai le lau‘ele‘ele. 6O le sapati o le lau‘ele‘ele e fai lea ma mea e ‘ai ma ‘outou, o oe ma lau ‘au‘auna tane, ma lau ‘au‘auna fafine, ma lē ‘ua fai lau galuega i le totogi, ‘atoa ma le tagata ‘ese o lo‘o āumau ‘iā te oe; 7ma au manu fanua ‘atoa ma manu o le vao o i lou nu‘u, e fai ma mea o ‘ai o mea uma e tutupu ai.
O le Tausaga o le Iupelī
8‘Ia e faitauina tausaga fa‘asapati e fitu, e fitu ni fitu o tausaga; o le ‘ato‘atoa fo‘i o tausaga fa‘asapati e fitu, e fagafulu ma le iva ia tausaga. 9‘Ona ili ai lea o le pū ma le leo tele i le aso e sefulu o le fituga masina, i le aso o le togiola, ‘ia ‘outou ili ai le pū i lo ‘outou nu‘u uma lava.#Levi 23.27; Nume 10.10 10‘Ia ‘outou fa‘asāina le tausaga e limagafulu, ma tala‘i ai le sa‘olotoga i lo ‘outou nu‘u i ē nonofo ai uma lava; e fai lea ma iupelī ‘iā te ‘outou, ma ‘ia ‘outou toe fo‘i atu ta‘ito‘atasi i lona lava fanua, ‘ia ‘outou toe fo‘i atu fo‘i ta‘ito‘atasi i lona lava ‘āiga. 11O le tausaga e limagafulu e fai lea ma iupelī ‘iā te ‘outou; ‘aua tou te lūlū ai ni saito, pe selesele ai mea e tutupu fua, pe tau ai ni fua o lou vine ‘ua lē teua. 12Auā o le iupelī lea; e pa‘ia lava ‘iā te ‘outou; o mea e tutupu ai i le fanua ‘ia ‘outou ‘a‘ai ai.#Levi 25.6-7
13O le tausaga fo‘i o lea iupelī e toe fo‘i atu ai ‘outou e ta‘ito‘atasi i lona lava fanua. 14‘Āfai fo‘i ‘e te fa‘atau atu se mea i lē lua te tuā‘oi, pe fa‘atau mai se mea ai le lima o lē lua te tuā‘oi, ‘aua tou te fa‘asauā le tasi i le tasi. 15E tusa ma le faitau o tausaga talu le iupelī ‘ia e fa‘atau mai ai i lē lua te tuā‘oi, e tusa fo‘i ma le faitau o tausaga e fua mai ai, ‘ia fa‘atau mai ai o ia ‘iā te oe; 16e tusa ma le tele o tausaga ‘ia e fa‘atele ai lona tau, e tusa fo‘i ma le itiiti o tausaga ‘ia e fa‘aitiiti ai lona tau; auā e tusa ma le faitau o fuata e fa‘atau mai e ia ‘iā te oe. 17‘Aua lava tou te fa‘asauā le tasi i le tasi; a ‘ia e mata‘u i lou Atua; auā o a‘u o le ALI‘I lo ‘outou Atua.#Levi 19.14
O Fa‘afitauli o le Fitu Tausaga
18‘Ia ‘outou faia fo‘i a‘u tulafono, ma tausiusi i a‘u fa‘amasinoga, ma fai ai; tou te nonofo ai i le nu‘u ma le filemū. 19E fua mai fo‘i le fanua i ona fua, tou te ‘a‘ai ai, ma mā‘o‘ona ai, ma nonofo ai ma le filemū.
20‘Āfai fo‘i tou te fai mai, O a mea matou te ‘a‘ai ai i le tausaga e fitu? fa‘auta, matou te lūlūina ni saito, pe fa‘aputu ai ni a matou mea e tutupu.#Levi 25.4-5 21‘Ou te pule atu le manuia ‘iā te ‘outou i le ono o tausaga, ‘ona fua mai ai lea o ona fua e tatau ma tausaga e tolu. 22Tou te lūlūina saito i lona valu o tausaga, ma ‘a‘ai pea lava i mea tuai se‘ia o‘o lava i lona iva o tausaga; se‘ia matua ni ona fua tou te ‘a‘ai pea lava i mea tuai.
O Tulafono o Fanua
23E lē fa‘atauina le fanua, ‘ia fa‘atō; auā e o‘u lava le fanua; auā o tagata ‘ese ‘outou ma e āumau ‘iā te a‘u.#Teu 32.43; 1 No 29.15; 2 No 7.20; Sala 39.12; 85.1; Hose 9.3; Ioe 2.18; 3.2; Epe 11.13; 1 Pete 2.11
24O le nu‘u uma e fai mo ‘outou, ‘ia ‘outou tu‘u atu ‘ia toe fa‘atauina le fanua. 25‘Āfai ‘ua o‘o ‘ina mativa lou uso, ma ‘ua fa‘atauina atu e ia sona fasi fanua, ‘āfai fo‘i ‘ua alu ane se tasi o lona ‘āiga e toe fa‘atau mai ai, ‘ona toe fa‘atauina mai ai lea o ia le mea na fa‘atauina atu e lona uso. 26‘Āfai ‘ua lē o ‘iā te ia se tasi e toe fa‘atauina mai, a ‘ua maua e ia lava ni mea e tusa ma le toe fa‘atau mai o le fanua; 27‘ona faitau lea o ia o tausaga o lana fa‘atau, ma toe avane ai o mea o totoe i le tagata na ia fa‘atau atu ai; ‘ona fo‘i atu lea o ia i lona fanua. 28‘Ae ‘āfai ‘ua lē maua ni mea e lava ai ‘ia toe fa‘afo‘i mai ‘iā te ia, ‘ona tumau pea ai lea o le mea sa fa‘atauina i le tagata na fa‘atau mai ai, ‘ina se‘ia o‘o i le tausaga o le iupelī; ‘ona tu‘uina atu ai lea pe a o‘o i le iupelī, ‘ona toe fo‘i atu ai lea o ia i lona lava tofi.#Levi 25.13
29‘Āfai fo‘i ‘ua fa‘atauina atu se tasi se fale o i le ‘a‘ai ‘ua i le loto ‘olo, e mafaia lava ‘iā te ia ‘ona toe fa‘atau mai ai i lea tausaga ‘atoa na ia fa‘atauina atu ai; na te mafaia lava ‘ona toe fa‘atau mai ai manū o le‘i ‘atoa le tausaga. 30‘Āfai fo‘i ‘ua lē toe fa‘atauina mai ai ‘ina o le‘i ‘atoa le tausaga, ‘ona tumau pea ai lea o le fale o i le ‘a‘ai ‘ua i le loto ‘olo i le tagata na fa‘atauina mai ai e au tupulaga; e lē tu‘uina atu lea pe a o‘o i le iupelī. 31A o fale o i faoa ‘a‘ai ‘ua lē si‘omia i se ‘olo, e ta‘ua ia e pei o fanua i tua; e mafai ‘ona toe fa‘atau mai ai, e tu‘uina atu fo‘i ia pe a o‘o i le iupelī. 32‘Ae peita‘i ane o ‘a‘ai o sa Levī, o fale o i ‘a‘ai i le latou fanua, e mafaia lava ‘ona toe fa‘atau mai e sa Levī i aso uma.#Nume 35.2; Iosu 21.2-40 33A fa‘atau ai fo‘i e se tasi se mea a sa Levī, ‘ona tu‘uina atu ai lea pe a o‘o i le iupelī o le fale sa fa‘atauina, o le ‘a‘ai fo‘i ‘ua fai māna; auā o fale i ‘a‘ai a sa Levī o latou lava ia i le fānauga a Isaraelu. 34A o fanua i tuāpā o a latou ‘a‘ai e lē mafa‘atauina ia; auā o lo latou lava lea e fa‘avavau.
O ‘Aitalafu a Tagata Matitiva
35‘Āfai fo‘i ‘ua o‘o ‘ina mativa lou uso, ‘ua na lē toe lavā se mea; ‘ona o fesoasoani ai lea ‘iā te ia, e ui lava o ia o le tagata ‘ese ma le āumau; ‘ina ‘ia nofo lava o ia fa‘atasi ma oe.#Teu 15.7-8 36‘Aua ‘e te talia mai ‘iā te ia se totogi, po o se mea o fa‘asili; a ‘ia e mata‘u i lou Atua ‘ina ‘ia nofo lava lou uso fa‘atasi ma oe. 37‘Aua ‘e te avatu ‘iā te ia au tupe e maua ai ni ‘ona tupu; ‘aua fo‘i ‘e te avatu ‘iā te ia au mea e ‘ai ‘ina ‘ia toe maua mai se mea e fa‘asili.#Eso 22.25; Teu 23.19-20 38O a‘u o le ALI‘I lo ‘outou Atua, o lē na ‘aumai ‘iā te ‘outou nai le nu‘u o Aikupito e foa‘i atu ai ‘iā te ‘outou le nu‘u o Kanana; ‘ina ‘ia fai a‘u mo ‘outou Atua.
O le Fa‘asa‘olotoga o Pologa
39‘Āfai fo‘i ‘ua o‘o ‘ina mativa lou uso o lo‘o nofo fa‘atasi ma oe, ‘ua na fa‘atauina o ia e ia ‘iā te oe, ‘aua ‘e te fa‘apologa ‘iā te ia e fai le galuega a le pologa.#Eso 21.2-6; Teu 15.12-18 40A ‘ia i ai o ia ‘iā te oe, e pei o lē ‘ua galue i le totogi, po o sē āumau, e ‘au‘auna atu fo‘i o ia ‘iā te oe, se‘ia o‘o i le tausaga o le iupelī; 41‘ona alu ‘ese ai lea o ia ‘iā te oe, o ia ‘atoa ma ana fānau fa‘atasi ma ia, e fo‘i atu fo‘i o ia i lona lava ‘āiga, ma le fanua o ona tamā e fo‘i atu ai lava o ia.#Eso 21.3; Levi 25.13 42Auā o a‘u ‘au‘auna i latou na ‘ou ‘aumaia nai le nu‘u o Aikupito; e lē fa‘atauina i latou e fai ma pologa. 43‘Aua ‘e te pule ‘iā te ia ma fa‘asauā, a ‘ia e mata‘u i lou Atua. 44O ou pologa tane ma ou pologa fafine, mai nu‘u ‘ese lava ia, o ē vagavagai ‘iā te ‘outou, tou te fa‘atau mai i latou, o pologa tane, ma pologa fafine. 45O fānau fo‘i a tagata ‘ese, o ē ‘ua āumau ‘iā te ‘outou, tou te fa‘atau mai ai ni o latou, ‘atoa ma ni o latou ‘āiga o ‘iā te ‘outou o ē na fānanau mai i lo ‘outou nu‘u; e fai fo‘i i latou mo ‘outou.#Levi 25.17; Efe 6.9; Kolo 4.1 46Tou te tofia fo‘i i latou ‘iā ‘outou fānau pe a mavae atu ‘outou e fai mo latou tofi; e fai i latou ma pologa ‘iā te ‘outou e fa‘avavau; ‘ae peita‘i o ‘outou uso o le fānauga a Isaraelu, ‘aua tou te pule fa‘asauā le tasi i le tasi.
47‘Āfai fo‘i e o‘o ‘ina mau‘oa se tagata ‘ese, po o sē āumau o lo‘o nofo fa‘atasi ma oe, a o lou uso o lo‘o nofo fa‘atasi ma ia, ‘ua o‘o ‘ina mativa, ‘ua na fa‘atauina atu fo‘i o ia e ia i le tagata ‘ese, po o lē āumau o lo‘o nofo fa‘atasi ma oe, po so le fānau a le ‘āiga o le tagata ‘ese; 48a uma ‘ona fa‘atauina o ia e mafai ‘ona toe fa‘atauina mai; e mafai sona uso ‘ona toe fa‘atauina mai o ia; 49e mafai lava e le uso o lona tamā, po o le atali‘i o le uso o lona tamā ‘ona toe fa‘atauina mai o ia; e mafai fo‘i e se tasi o lona lava ‘āiga ‘ona toe fa‘atauina mai o ia; o ia fo‘i lava pe a mafai ‘iā te ia, ia toe fa‘atau o ia ‘iā te ia.#Levi 25.26 50La te faitau fo‘i ma lē na fa‘atau ‘iā te ia talu le tausaga na fa‘atauina ai o ia ‘iā te ia e o‘o lava i le tausaga o le iupelī; o tupe fo‘i o lana fa‘atau ‘ia fa‘atatauina i le faitau o tausaga, e pei o tausaga o lē ‘ua galue i le totogi e fa‘apea lava ‘ona fai ‘iā te ia. 51A ‘ua tele tausaga o totoe, ‘ia fa‘atatau i ai le tau o lona toe fa‘atauina mai e toe avane ai tupe na fa‘atauina ai o ia. 52‘Āfai fo‘i ‘ua totoe na o nai tausaga itiiti ‘ina se‘ia o‘o i le tausaga o le iupelī, ‘ona la faitau ai lea ma ia, e fa‘atatau i ona tausaga e toe avane ai e ia le tau o lona fa‘atauina mai. 53E ‘iā te ia o ia e pei o sē ‘ua galue i le totogi i lea tausaga ma lea tausaga; ‘aua le pule o ia ‘iā te ia ma le fa‘asauā i ou luma. 54‘Āfai fo‘i ‘ua lē toe fa‘atauina mai o ia i nei tausaga ‘ona alu ‘ese ai lea o ia i le tausaga o le iupelī, o ia ‘atoa ma ana fānau fa‘atasi ma ia.#Levi 25.41 55Auā o a‘u ‘au‘auna le fānauga a Isaraelu, o a‘u ‘au‘auna lava i latou na ‘ou ‘aumaia mai le nu‘u o Aikupito: O a‘u o le ALI‘I lo ‘outou Atua.
Currently Selected:
Levitiko 25: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.