Levitiko 3
3
O Sauniga o Taulaga Fa‘afetai
1‘Ae ‘āfai o se taulaga fa‘afetai lana taulaga, ‘āfai ‘ua fai taulaga ai o ia a‘i le lafu povi; po o se po‘a, po o se manu fafine, ‘ia fai taulaga ai o ia i luma o le ALI‘I i se manu e sao ‘ona lelei.#Levi 7.11-21, 29-34; 17.5; 22.21 2Na te fa‘ae‘e fo‘i lona lima i le ulu o lana taulaga, ma fasi ai i le faitoto‘a o le fale fetāfa‘i o le fa‘apotopotoga ‘ona sausauina atu ai lea o le toto e atali‘i o Arona o ositaulaga, e so‘o ai i luga o le fatafaitaulaga. 3‘Ona avatu ai lea e ia se taulaga fa‘afetai, o le taulaga e fai i le afi i le ALI‘I; o le ga‘o alo ma ga‘o uma lava o i ai, 4o fatuga‘o fo‘i e lua ma ga‘o o i ai o lo‘o i luga o lāgotua; a o le ga‘o punipū o i luga o le finagalo, ma fatuga‘o, na te ‘ave‘eseina ai. 5‘Ona susunuina ai lea e atali‘i o Arona i le fatafaitaulaga i luga o le taulaga mū i luga o fafie ‘ua i luga o le afi; o le taulaga lea e fai i le afi, o le mea manogi lelei i le ALI‘I.#Levi 6.12
6‘Āfai fo‘i mai le lafu mamoe lana taulaga, e fai ma taulaga fa‘afetai i le ALI‘I; po o se po‘a po o se manu fafine, ‘ia avatua se manu e sao ‘ona lelei. 7‘Āfai e avatu e ia se tama‘i mamoe māna taulaga, ‘ia avatua lava i luma o le ALI‘I. 8Na te fa‘ae‘e lona lima i le ulu o lana taulaga, ma fasi ai i luma o le fale fetāfa‘i o le fa‘apotopotoga; ‘ona sausauina atu ai lea o lona toto e atali‘i o Arona i luga o le fatafaitaulaga e so‘o ai. 9‘Ona avatu ai lea e ia o le taulaga fa‘afetai, o le taulaga e fai i le afi i le ALI‘I; o lona ga‘o, ma le i‘u ‘ato‘atoa, na te vavae‘eseina fo‘i lea i le mea aupito ane i le ivitū; o le ga‘o alo, ma ga‘o uma o i ai, 10o fatuga‘o fo‘i e lua, ma ga‘o o i ai, o lo‘o i luga o lāgotua; a o le ga‘o punipū o i luga o le finagalo, ma fatuga‘o, na te ‘ave‘eseina ai. 11‘Ona susunuina ai lea e le ositaulaga i le fatafaitaulaga; o le mea e ‘ai lea o le taulaga e fai i le afi i le ALI‘I.#Levi 21.6, 8; Nume 28.2; Eseki 44.7; Mala 1.7, 12
12‘Āfai fo‘i o se ‘oti lana taulaga, ‘ia avatua lava i luma o le ALI‘I. 13Na te fa‘ae‘e fo‘i lona lima i lona ulu, ma fasi ai i luma o le fale fetāfa‘i o le fa‘apotopotoga; ‘ona sausauina atu ai lea o lona toto e atali‘i o Arona i luga o le fatafaitaulaga e so‘o ai. 14Na te avatua ai lana taulaga, o le taulaga e fai i le afi i le ALI‘I; o le ga‘o alo ma ga‘o uma o i ai, 15o fatuga‘o fo‘i e lua, ma ga‘o o i ai, o lo‘o i luga o lāgotua; a o le ga‘o punipū o lo‘o i luga o le finagalo, ma fatu ga‘o, na te ‘ave‘eseina ai. 16‘Ona susunuina ai lea o le ositaulaga i le fatafaitaulaga; o le mea e ‘ai lea, o le taulaga e fai i le afi, o le mea manogi lelei lea; e i le ALI‘I ga‘o uma.#Levi 7.23-25; 1 Samu 2.15 17O le tulafono e fa‘avavau ‘iā ‘outou tupulaga amulī i mea uma tou te nonofo ai, ‘aua tou te ‘a‘ai ni ga‘o po o le toto.
Currently Selected:
Levitiko 3: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.