Levitiko 5
5
O Taulaga mo le Sesē
1‘Āfai e agasala se tasi i lona fa‘alogologo i ‘upu o le tautoga, o ia lava le molimau, pe na va‘ai, pe na iloa; ‘āfai na te lē ta‘ua, o nofo sala lava ia.#Fa‘ata 29.24; Mata 26.63
2Pe ‘āfai fo‘i e pa‘i atu se tasi i se mea leaga, po o le tino mate o se manu o le vao ‘ua leaga, po o le tino mate o se manu fanua ‘ua leaga, po o le tino mate o se mea totolo ‘ua leaga, a ‘ua lilo ‘iā te ia; ‘ona leaga ai lea o ia ma ‘ua nofo sala ai.
3Pe ‘āfai e pa‘i atu i se mea o i le tagata e leaga ai, so se mea leaga e leaga ai o ia, a ‘ua lilo ‘iā te ia; a iloa e ia, ‘ona nofo sala ai lea o ia.#Levi 12.1-8; 13.1-59; 15.1-33
4A tautō fo‘i se tasi ma le tautala fa‘alēmafaufau i ona laugutu e fai se mea leaga po o se mea lelei, o mea uma ‘ua tautala fa‘alēmafaufau ai le tagata i le tautoga, ‘ua lilo fo‘i ‘iā te ia; a iloa o ia, ‘ona nofo sala ai lea o ia i se mea o ia mea.
5A o‘o ‘ina nofo sala o ia i se mea o ia mea, ia fa‘aali mai e ia ‘ua agasala o ia i lea mea. 6Na te ‘aumai fo‘i i le ALI‘I lana taulaga mo le sesē ‘ona o lana agasala ‘ua ia agasala ai, o se manu fafine mai le lafu mamoe, o se tama‘i mamoe, po o se tama‘i ‘oti, e fai ma taulaga mo le agasala; e faia fo‘i e le ositaulaga se togiola mo ia ‘ona o lana agasala.
7A lē maua e ia se tama‘i mamoe, ‘ona ‘aumai ai lea e ia i le ALI‘I ‘ona o lona sesē ‘ua ia agasala ai, o le uluga manutagi, po o tama‘i lupe e lua fua; o le tasi e fai ma taulaga mo le agasala, ma le tasi e fai ma taulaga mū.#Levi 14.21-22 8‘Ona ‘aumai ai lea i le ositaulaga, na te mua‘i avatu fo‘i le manu e fai ma taulaga mo le agasala, ‘ona gagau ‘ese ai lea o lona ua, ‘ae ‘aua ne‘i motu. 9Na te sausauina atu fo‘i nisi o le toto o le taulaga mo le agasala i le itū o le fatafaitaulaga, a o le toto ‘ua totoe, na te tatau ifo ai i lalo o le fatafaitaulaga; o le taulaga mo le agasala lea. 10A o lona lua o manu na te fai ai le taulaga mū, e tusa ma le sauniga; e faia fo‘i e le ositaulaga se togiola mo ia ‘ona o lana agasala ‘ua ia agasala ai, ‘ona fa‘amāgaloina ai lea o ia.
11A lē maua fo‘i e ia le uluga manutagi, po o tama‘i lupe e lua fua, ‘ona ‘aumai ai lea o lē ‘ua agasala o lana taulaga, o lona vaega e sefulu o le efa o falaoa lelei e fai ma taulaga mo le agasala; ‘aua ne‘i tu‘uina atu i ai ni suāu‘u, ‘aua ne‘i tu‘uina atu fo‘i i ai ni pulu lipano; auā o le taulaga mo le agasala lea.#Nume 5.15 12‘Ona ‘aumai ai lea e ia i le ositaulaga, ‘ona lulu‘u ai lea e le ositaulaga lana lu‘utaga, o lana fa‘amanatuga lea ma susunu ai i le fatafaitaulaga, e pei o taulaga e fai i le afi i le ALI‘I; o le taulaga mo le agasala lea. 13E faia fo‘i e le ositaulaga se togiola mo ia ‘ona o lana agasala ‘ua ia agasala ai i se mea o ia mea, ‘ona fa‘amāgaloina ai lea o ia; o le falaoa ‘ua toe e faia lea ma le ositaulaga e pei o le taulaga i mea e ‘ai.
O le Tauia o Taulaga Sesē
14‘Ua fetalai mai fo‘i le ALI‘I ‘iā Mose, ‘ua fa‘apea mai: 15A soli tulafono e se tasi, ‘ua agasala fo‘i ma le sesē i mea pa‘ia a le ALI‘I; ‘ona ‘aumai ai lea e ia i le ALI‘I se mamoe po‘a e sao ‘ona lelei mai le lafu mamoe ‘ona o lona sesē, i lou lava fa‘atatau i sekeli ario, e tusa ma le sekeli o le malumalu, e fai ma taulaga mo le sesē;#Eso 30.13; Levi 22.14; Esera 10.19 16na te taui atu fo‘i ‘ona o le mea ‘ua ia agasala ai i mea pa‘ia, ma fa‘aopoopo i ai e tusa ma lona vaega e lima, ma avatu ai i le ositaulaga; e faia fo‘i e le ositaulaga se togiola mo ia i le mamoe po‘a o le taulaga mo le sesē, ‘ona fa‘amāgaloina ai lea o ia.#Levi 4.26; 6.5; Nume 5.7
17‘Āfai fo‘i e agasala se tasi, ‘ua faia fo‘i se mea e lē tusa ma poloa‘iga a le ALI‘I i mea uma e lē tusa ‘ona fai; e ui lava ‘ina lē iloa, e nofo sala lava ia, e ‘iā te ia fo‘i lana agasala. 18Na te ‘aumai fo‘i i le ositaulaga se mamoe po‘a e sao ‘ona lelei mai le lafu mamoe, e tusa ma lou lava fa‘atatau, e fai ma taulaga mo le sesē; ‘ona fai ai lea e le ositaulaga se togiola mo ia ‘ona o le mea ‘ua ia sesē ai, ma na lē iloa, ‘ona fa‘amāgaloina ai lea o ia. 19O le taulaga mo le sesē lea; ‘ua ia matuā sesē lava i luma o le ALI‘I.
Currently Selected:
Levitiko 5: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.