San Lucas 23

Jesús Pilato jovai

(Mt 27.1-2, 11-14; Mr 15.1-5; Jn 18.28-38)

1Jayave opaete jae reta upũa jare güɨraa Jesús Pilato pe. 2Jare umbɨpɨ reta uñeapo Jesús re. Jei reta:

—Cua cuimbae umɨmbeu tenta guasu pegua reta pe uyapo vaerã icavi mbae vae. Echa'ã jei chupe reta agüɨye vaerã umbɨepɨ corepoti César peguarã. Jare jei jae co mburuvicha guasu Cristo jee vae —jei reta.

3Jayave Pilato upɨrandu Jesús pe:

—¿Nde pa co jae judío reta juvicha guasu?

—Nde ndere rami jae co che —jei Jesús chupe.

4Jayave Pilato jei sacerdote reta itenondegua reta jare tenta guasu pegua reta pe:

—Avãe'ã teco cua cuimbae re. 5Jayave jae reta jeiete jei:

—Omboepochɨ tenta guasu pegua reta. Oporomboe opaete Judea rupi. Umbɨpɨ Galilea pe jare añave ou uvãe cua pe oporomboe oĩ —jei reta.

Jesús Herodes jovai

6Pilato uyandu yave jei reta vae, upɨrandu penti Galilea pegua ra jocua cuimbae. 7Jayave umɨmbeu reta Pilato pe Galilea pegua co Jesús. Jayave Pilato güɨraaca Jesús Herodes pe. Echa'ã Herodes co jae Galilea pegua reta juvicha guasu. Jare jocua ara reta pe Herodes opou oĩ Jerusalén pe. 8Jare Herodes uecha Jesús yave, uyerovia ete, ɨma ma uipota uecha ramo. Echa'ã uyandu ma jeta Jesús regua, jare uipota uecha Jesús uyapo penti mɨacañɨ. 9Jayave Herodes upɨrandu Jesús pe jeta mbaembae re, ẽrei Jesús jei'ã mbae ave chupe. 10Jare sacerdote reta itenondegua reta jare mboroyocui re oporomboe vae reta uyemboɨ Herodes jovai jare iñeeãta reve uñeapo Jesús re. 11Jare Herodes jare isundaro reta güɨrɨ̃ro jare oyoyai Jesús. Jayave omondeca chupe temimonde ipõra vae. Jayave Herodes güɨraaca ye Pilato pe. 12Jare jocua ara etei Pilato jare Herodes uyeyapɨcatu ye. Echa'ã tenonde yave uñemɨtarẽɨ.

Pilato jei Jesús umanota co

(Mt 27.15-26; Mr 15.6-15; Jn 18.39–19.6)

13Jayave Pilato umbatɨca sacerdote reta itenondegua reta jare tenta guasu pegua reta itenondegua reta ndive. 14Jare jei chupe reta:

—Pe reta peru cua cuimbae cheve jare pere cheve omboepochɨ co tenta guasu pegua reta. Mase, che apɨrandu chupe jocua re perovaque, jare avãe'ã etei teco jocua pe reta piñeapo cheve jese vae re —jei—. 15Jae ramiño vi Herodes uvãe'ã teco cua cuimbae re. Echa'ã che pomondo Herodes pe. Mase, mbaetɨ mbae teco uyapo umano vaerã —jei Pilato chupe reta—. 16Jáeramo ainupacañota jare ayoraca yeta —jei.

17Echa'ã opa año tenta guasu pegua reta uyerure chupe oyoraca vaerã penti pereso pascua ara rupi, jare Pilato oyoracañoi penti pereso. 18Jayave opaete vae iñeeãta reve jei:

—Iyucaca cua cuimbae. Iyoraca oreve Barrabás —jei reta.

19(Tenonde yave Barrabás upuruyuca Jerusalén pe, mburuvicha reta ndive uñerãro yave. Jáeramo umɨingue peresorɨru pe.)

20Ẽrei Pilato uipota tẽi oyoraca Jesús. Jáeramo jei ye chupe reta. 21Ẽrei iñeeãta reve jei reta:

—Icutuca curusu re. Icutuca curusu re.

22Jayave Pilato upɨrandu ye chupe reta:

—¿Mbae pa uyapo? Avãe'ã mbae icavi mbae vae jese umano vaerã. Jáeramo ainupacañota jare ayoraca yeta —jei.

23Ẽrei jeiete iñeeãta reve jei reta uicutuca vaerã Jesús curusu re. Jare sacerdote reta itenondegua reta jare ĩru joco pe ñugüɨnoi vae reta iñee umɨquɨrẽɨ Pilato. 24Jayave Pilato jei uyeyapo vaerã Jesús pe jae reta uipota vae. 25Jayave oyoraca chupe reta tenonde yave mburuvicha reta ndive uñerãro yave upuruyuca ramo peresorɨru pe umɨingue vae, jae reta uipota rami. Ẽrei umee Jesús chupe reta uyeyapo vaerã chupe jae reta uipota vae.

Jesús uyecutuca curusu re

(Mt 27.32-44; Mr 15.21-32; Jn 19.17-27)

26Jayave güɨraa reta Jesús joco güi. Jare penti cuimbae Simón jee vae tenta guasu Cirene pegua, ou uvãe tenta guasu cotɨ. Jocoropi uasa oĩ yave, sundaro reta uipɨsɨ Simón jare güɨraaca chupe Jesús icurusu. Jayave Simón güɨraa curusu Jesús jaɨcue. 27Jare yugüɨraa vi Jesús jaɨcue jeta vae. Jare jae reta ipɨte pe yugüɨraa cuña reta. Jae reta uapĩro yugüɨraa Jesús. 28Ẽrei Jesús uyerova umae jese reta jare jei chupe reta:

—Jerusalén pegua cuña reta, agüɨye piyao cheré. Piyao piyee jare pemembɨ reta re —jei—. 29Mase, outa uvãe ara reta jei reta vaerã: ‘Uyerovia co imembɨ mbae vae. Uyerovia co umɨcambu mbae etei vae’ —jeita, jei—. 30Jayave umbɨpɨta tẽi jei ɨvɨtu guasu pe: ‘Piyapara oreárambo. Oreasoi’ —jeita, jei—. 31Uyapo reta icavi mbae vae cheve yave, ¿mbae ra uyapota peve? —jei.

32Jare sundaro reta güɨraa vi Jesús ndive mocui cuimbae icavi mbae vae uyapo vae uyuca vaerã. 33Jare yugüɨraa uvãe Ãcacüerenda jee vae pe. Jayave joco pe sundaro reta uicutu curusu re Jesús jare cuimbae reta icavi mbae vae uyapo vae. Oñono reta penti Jesús iyacata cotɨ jare ĩru iyaso cotɨ. 34Jayave Jesús jei:

—CheRu, embɨasa chupe reta. Uicuaa'ã mbae uyapo ñugüɨnoi vae —jei.

Jayave sundaro reta uyuguari Jesús jemimonde re, uicuaa vaerã mbae nunga penti penti güɨraa iyupe vaerã. 35Jare tenta guasu pegua reta uyemboɨ ñugüɨnoi jocoropi umae Jesús re. Jare tenta guasu pegua reta itenondegua joco pe ñugüɨnoi vae reta oyoyai Jesús. Jei reta:

—Jae uepɨ ĩru vae reta. Añave tuyerepɨ, jae co Cristo yave, jae co Tumpa uiparavo vae yave —jei reta.

36Jare sundaro reta vi oyoyai Jesús. Oya reta jese jare umee vinagre chupe. 37Jare jei reta:

—Nde co jae judío reta juvicha guasu yave, iyerepɨ.

38Jare oñono reta curusu re Jesús iñãca iárambo uyecuatía jesegua vae: “Cua co jae judío reta juvicha guasu.” Uyecuatía oĩ griego iñee pe jare latín pe jare hebreo iñee pe.

39Jare penti cuimbae icavi mbae vae uyapo vae uyecutuca vae uñeengata Jesús pe.

—Nde co jae Cristo, Tumpa ombou vae yave, iyerepɨ jare orerepɨ vi —jei.

40Ẽrei ĩru cuimbae uñeengata chupe.

—¿Ndequɨye'ã pa Tumpa güi? Echa'ã nde vi nemano neĩ cua ĩru vae rami —jei—. 41Jare jupi co yande ñamano vaerã. Echa'ã yande ñamanota ñaĩ icavi mbae vae yayapo vae jeco pegua. Ẽrei cua cuimbae uyapo'ã mbae icavi mbae vae —jei.

42Jayave jei Jesús pe:

—Jesús, nemandúa cheré ndeporoyocuia pe neĩ yave.

43Jayave Jesús jei chupe:

—Añete che jae ndeve, cua ara neĩta che ndive ara pe —jei.

Jesús umano

(Mt 27.45-56; Mr 15.33-41; Jn 19.18-30)

44Jare guarasɨ ara mbɨte güive mbapɨ ora rupi uñemɨpɨ̃tumimbi opaete ɨvɨ pe. 45Guarasɨ jembipe'ã etei. Jayave Tumpa jo umbɨyao vae osoro mbɨte rupi. 46Jayave Jesús tanta usapɨcai. Jayave jei:

—CheRu, amee ndeve cherecove.

Jare cua jei ma yave, umano.

47Jare cien sundaro vae juvicha joco pe oĩ vae uecha mbae uyeyapo vae. Jayave umbɨadora Tumpa jare jei:

—Añetete co, cua cuimbae co jae jupi vae.

48Jare opaete joco pe yatɨ vae reta vi uecha mbae uyeyapo vae jare ocua iyee ipɨtía re. Jayave opaete vae yugüɨraa ye jenta jenta pe. 49Jare opaete Jesús uicuaa vae reta jare cuña Jesús ndive Galilea güi yugüeru vae reta uyemboɨ ñugüɨnoi mbɨrɨ curusu güi. Umae ñugüɨnoi mbae uyeyapo vae re.

José oñono Jesús jetecue teõgüerɨru pe

(Mt 27.57-61; Mr 15.42-47; Jn 19.38-42)

50Jare joco pe oĩ vi penti cuimbae José jee vae. Jae co penti mburuvicha. Ipɨacavi jare jupi. 51(Jae uipota'ã tẽi ĩru mburuvicha reta uyapo vaerã icavi mbae vae Jesús pe.) Jae co tenta guasu Arimatea pegua. (Arimatea Judea pegua co.) José vi uãro ico Tumpa iporoyocuia. 52Cua cuimbae oo Pilato pe, jare uyerure chupe Jesús jetecue re. 53Jayave umbɨgüeyɨ Jesús jetecue, jare oñoma nieso pe. Jayave oñono penti teõgüerɨru itape uyeyoo vae pe, ndei quía uñeñono pɨpe vae pe. 54Jocua ara opaete judío reta uyeyapɨcatu ñugüɨnoi pɨareve peguarã. Echa'ã pɨareve pe co mbutuu ara.

55Jare cuña Jesús ndive Galilea güi yugüeru vae reta, yugüɨraa José jaɨcue jare uecha teõgüerɨru jare quirãi José oñono pɨpe Jesús jetecue vae. 56Jayave yugüɨraa ye jenta jenta pe jare uyapɨcatu mbaembae ipiche cavi vae. Jayave uputuu reta mbutuu ara pe. Echa'ã jucuarãi uyecuatía oĩ mboroyocui pe.

Currently Selected:

San Lucas 23: gwn

Highlight

Copy