GENESA 32
32
Ta Yakobo loko a hlangana ni tintsumi; a rhumela eka Esawu.
1Yakobo a famba hi ndlela ya yena: kutani tintsumi ta Xikwembu ti hlangana na yena. 2Kuteloko Yakobo a ti vona, a ku: “I nxaxa wa Xikwembu!” Kutani a thya xivandla lexi, vito ra Mahanayimi (mixaxa mimbirhi).
3Kavaloko Yakobo a rhangisa tintsumi emahlweni, ti ya eka Esawu, makwavo, etikweni ra Seyira, ebanyini ra Edomu, 4a va lerisa mhaka leyi, a ku: “Mi ta byerisisa swinene hosi ya mina Esawu, mi ku: ‘Yakobo, nandza wa wena, a ku: Ndzi tshamile nkarhi eka Labani, ndzi tshame eka yena ku fikela sweswi; 5ndzi ni tihomu ni timbhongolo, ni swifuwana, ni malandza ya vavanuna ni ya vavasati, ndzi tivisa sweswo hosi ya mina, ndzi ta tiva ku kuma tintswalo emahlweni ka wena.’ ”
6Kutani tintsumi ti vuya eka Yakobo ti ku: “Hi yile eka makwenu, eka Esawu, kambe na yena wa ta ku ta hlangana na wena, u ni vanhu va mune wa madzana.” 7Kutani Yakobo a chava ngopfungopfu, a hlomuriwa mbilu; kutani a pambula vanhu lava ngi a ri na vona, ni swifuwana, ni swifuwo, ni tikamela, a endla mitlhambi mimbirhi; 8a ku: “Kungakuloko Esawu a ta tlhava ntlhambi wun'wana, wun'wana ntlhambi lowu nga ta siyiwa, wu ta kuma ku pona.”
9Kutani Yakobo a ku: “Oho! Xikwembu xa tatana Abrahama, ni Xikwembu xa tatana Isaka, wena Yehovha, loyi u nga te eka mina: ‘Tlhelela eka rikwenu ni le tikweni ra vatata wa wena, ndzi ta ku endla swinene,’ 10a ndzi ringani tintswalo ta wena hinkwato, ni ku tshembeka hinkwako loku u ku humeseleke nandza wa wena; kasi ndzi pele Yordani loyi, ndzi ri ni nhonga ya mina ntsena, kasi sweswi, ndzi hundzuke mixaxa mimbirhi. 11Ndza ku khongela, ndzi ponise evokweni ra hosi ya mina, evokweni ra Esawu, hikuva ndza n'wi chava, a nga ta ta a ta ndzi ba, a dlaya vana ni mana wa vona. 12Hikuva wena u te: ‘Hakunene ndzi ta ku katekisa, ndzi endla leswaku vatukulu va wena va kotisa sava ra lwandle, leri nga hlayekiki hi ku tala ka rona.’ ”
13Yakobo a xwa kona vusiku byebyo; kutani a hlawula exikarhi ka leswi ngi a ri na swona emavokweni, a ta rhumela Esawu nhlengo, 14ti ri timbuti ta madzana mambirhi, ni makume mambirhi ya swiphongo, ni madzana mambirhi ya tinyimpfu, ni makume mambirhi ya makhuna, 15ni makume manharhu ya tikamela leti an'wisaka ni swikamelana swa tona, ni tihomu ta matswele ta mune wa makume, ni tinkunzi ta khume; ni timbhongolo ta matswele ta makume mambirhi, ni leta xinuna ta khume. 16A swi veka emavokweni ya malandza ya yena, ntlhambi wun'wana ni wun'wana ha tlhelo, a ku eka malandza ya yena: “Ndzi rhangeleni emahlweni, mi siya mpfhuka exikarhi ka ntlhambi wun'wana ni wun'wana.” 17Kutani a lerisa lowo rhanga, a ku: “Kutakuloko hosi ya mina Esawu a hlangana na wena, a ku vutisa, a ku: ‘U wa mani? U ya kwihi? Leswi nga emahlweni ka wena, i swa mani?’ 18mi ta ku: ‘I swa nandza wa wena Yakobo; i nhlengo lowu a wu rhumelaka hosi yanga Esawu; kambe na yena hi loyi, a taka endzhaku ka hina.’ ” 19A lerisisa sweswo lowa vumbirhi, ni lowa vunharhu, ni hinkwavo lava landzelaka mitlhambi, a ku eka vona: “Mi ta vulavula sweswo loko mi hlangana na Esawu, 20mi ku eka yena: ‘Waswivo, nandza wa wena, Yakobo, wa ta na yena endzhaku ka hina.’ ” Hikuva a ku: “Ndzi ta rhulisa mbilu ya yena hi nhlengo lowu ndzi rhangelaka emahlweni, ndzhaku ndzi ta tiva ku vonana na yena; 21kumbe xana a nga ndzi amukela.” Kavaloko nhlengo wu rhangela emahlweni ka yena, kambe yena a xwa enxaxeni hi vusiku byebyo.
22Kutani a pfuka vusiku byebyo, a teka vasati va yena lavambirhi, ni malandza ya yena lamambirhi, ni vana va yena va khume na un'we, a pela hlaluko ra Yaboko. 23Kutani a va teka, a va perisa nambu, a perisa ni leswi ngi a ri na swona.
Ta ku lwa ka Yakobo na Xikwembu.
24Yakobo a sala a le swakwe; kutani munhu a lwa na yena, a kamana na yena byi ko byi xa. 25Kuteloko a vonile leswaku a a tsandzeka ku n'wi hlula, a ba nyonga ya Yakobo, nyonga ya Yakobo yi suleka loko va ri karhi va kamana. 26Kutani yeloyi a ku: “Ndzi tshike ndzi famba, hikuva byi lava ku xa.”
Kambe Yakobo a ku: “Ndzi nga ka ndzi nga ku tshiki u famba, u nga si ndzi katekisa.”
27Loyi a ku eka yena: “Vito ra wena u mani?”
Yena a ku: “Yakobo.”
28Loyi a ku: “Vito ra ku a ri nga ha vuriwi Yakobo, kambe u ta va Israele (la hluleke Xikwembu); hikuva u kamane na Xikwembu, u lwile ni vanhu, kutani u va hlurile.”
29Yakobo a n'wi vutisa, a ku: “Ndzi byele vito ra wena”; kambe loyi a ku: “U ndzi vutisela yini vito ra mina?” Kutani a n'wi katekisa kona.
30Yakobo a thya xivandla xexo vito ra Penuwele (mombo wa Xikwembu); hikuva a a ku: “Ndzi vone Xikwembu emombyeni, kambe vutomi bya mina byi hlayisekile.” 31Kutani dyambu ri n'wi tsuvukela loko a ri karhi a khaluta Penuwele; kambe a khwita hi nyonga. 32Hikwalaho, ninamuntlha, vana va Israele a va dyi nsiha wa nyonga lowu nga enyenyeni, hikuva Yakobo a khumbiwile ensiheni wa nyonga.
Currently Selected:
GENESA 32: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
