Iruka 17

Haga 17

Karania Wo Wuare Wo Watoineꞌen Aiwyriaꞌin Iꞌatuminug Saꞌag Kai

Mateu 18.6-7; Maku 9.42 Piat Ewy

1Wẽtup eꞌat pe hawyi Iesui toꞌe temiitꞌin me -Mesuwarotiat eikupteꞌen turan wyti aru ehãꞌãg haria sem putꞌok iꞌatuꞌe ehete hawyi taꞌatukyꞌesat aru ehepiat uimohey hap hep hamuat yt naku i nug hamo e. Maꞌato miꞌiria Tupana miꞌapiheg koꞌi wo tukupteꞌen wuatꞌi eꞌat pe aru are e. 2Yt waku pe hin i miꞌiria tukupteꞌen aru. Poꞌog waku aikotã yꞌy wato pe nu wato ete saity ete min Iꞌatuꞌe. Poꞌog waku miꞌi hap ewy wyti ti uimepytꞌin iãꞌãg haria teꞌeropyhuꞌat e. 3Eweꞌeg wo eimaꞌat reran haria pupi e. Karãpe wẽtup ok ehãꞌãg yt naku i nug hamo hawyi -Yt naku i mio tã watunug mehin mana waku watoꞌe eimaꞌat reran hat are maꞌato -Yt uiwepyi i mehin mana toꞌe ehepe -Pyno waure wo areineꞌen uimaꞌat hap kai waku eweiꞌe tope. 4Pyno wẽtup ok 7 wo wẽtup eꞌat pe eimaꞌat hawyi toꞌaipok ehewowi hawyi yt uiwepyi e hamo pote waku eweiꞌe. Pywo waure wo areineꞌen waku eweiꞌe 7 wo tope.

Mateu 17.20 Piat Ewy

5Miꞌi hawyi 12 ok takaria ipotmuꞌeria tõꞌẽ Iesui ewowi hawyi teꞌeroꞌe Iesui pe -Urukaꞌiwat uruimohey wen maꞌato uruikyꞌesat poꞌog urumohey mowato hamuat hap uruikyꞌesat iꞌatuꞌe. 6Miꞌi tã iꞌatuꞌe pote Iesui tiꞌatuwesat -Uiwyriaꞌin watomohey Tupana pote tutunug yne. Eimimohey yt iwato hin i Mutata pykai mekewat ariaꞌyp kape -Ewehep to yi pyi hawyi yꞌy piat pe ewekoi raꞌyn eweiꞌe pote eiꞌe hap ewy topyhuꞌat.

7Miꞌi hawyi wẽtup sehay i tohenoi -Karãpe eheropat hat taꞌaipok i eiꞌyat kape eiko kaipyi motpap hap kaipyi sio Wewato ahup poi hamo hesyꞌat pono toineꞌen wen maꞌato en yt karãpe i eweiꞌe -Pyno uheropat hat waku eraꞌapyk yparakai ete erenuk hamo yt karãpe i mio tã eweiꞌe. 8Maꞌato putꞌok eheropat hat hawyi meremo eweiꞌe tope -Ewetunug no uimiꞌu hawyi arenuk teran eweiꞌe eheropat haria pe. Miꞌi hawyi uito arenuk hawyi waku erenuk eweiꞌe eheropat haria pe. 9Yt karãpe i netap kaꞌiwat tenuk hawyi waku e temiit pe katupono temiit tomotpap hap nug hat toineꞌen tokaꞌiwat mipoꞌoro hap ewy tutunug e Iesui. 10Pyno waku kahato eweipyhuꞌat Tupana eropat kahato haria wo are. Waku Tupana mikyꞌesat ewywuat yn ewetunug are. Waku eweipotpap kahato imikyꞌesat nug hap ete aikotã netap kaꞌiwat eropat hat ewy e Iesui temiitꞌin me.

10 Ok Hepihi Pihi Rakaria Iesui Tiꞌatumoehãite Raꞌyn

11Miꞌi hawyi Iesui toto hãpyk kahato yi Karireia yi Samaria sakpo tawa wato Ierusarẽi kape. 12Miꞌi hawyi muap upi Iesui toto wẽtup tawa hit kapiat turan 10 ok takaria hepihi pihi rakaria tõꞌẽ howawi. Taꞌatuꞌahuu pote yt tukupteꞌen kuap i iraniaꞌin wywo. 13Teꞌerehaꞌat Iesui kape hawyi teꞌeruwẽpowat haty wo -Urukaꞌiwat erahaꞌat ro uruewawi hawyi uruehakyeraꞌat iꞌatuꞌe. 14Miꞌi hawyi Iesui taꞌakasa iꞌatuewowiat hawyi toikuap iꞌatuehay hawyi toꞌe iꞌatuepe -Eweiwat ro paꞌi koꞌi kape eipiit moherep iꞌatuepiat hamo ehehãite hap moherep hamo e iꞌatuepe. Tohenoi hawyi hepihi pihi rakaria tuwat raꞌyn paꞌi koꞌi kape yt taꞌatuehãite hin mywo i te tuwat maꞌato muap upiat tuwat hap tote iꞌatuehãite raꞌyn taꞌatuehepihi kãꞌã raꞌyn iꞌatupe kahuria raꞌyn. 15Miꞌi hawyi wẽtup ok taꞌaipok Iesui kape hawyi toꞌe tehay pirik wo -Waku kahato Tupana e katupono mesup taꞌyn uimoehãite i raꞌyn e. 16Tuwepỹꞌãtutuk Iesui ewowi hawyi ihay -Waku kahato uhete etunug Uikaꞌiwat e. Uimoehãite raꞌyn En e Iesui pe. Miꞌi miit aipok hat yt Iesui ywania kaipywiat hat i maꞌato yi Samaria ywania kaipywiat suut hat. Samaria ywania yt taꞌatukyꞌe hin i Iesui ywania pykai topyhuꞌat Iesui mimoehãite hamuat. Iesui Iuteu kaipywiat hat toineꞌen. 17Miꞌi hawyi Iesui apo e imimoehãite rakat pe -Pyno 10 ok takaria atiꞌatumoehãite mesup maꞌato en yn eraꞌaipok uhowowi waku e hamo e. Aikope som iraniaꞌin 9 ok takaria apo e. 18-Pyno en yn wẽtup ywania kaipywiat hat taꞌaipok waku e hamo. Iraniaꞌin yt teꞌeraꞌaipok hin i Tupana kapiat waku e hamo imotypot hamuat e Iesui. 19Miꞌi hawyi toꞌe -Waku eraꞌaipok eꞌyat kape mehin e. Mesup waku pe ereineꞌen i raꞌyn katupono uimohey hawyi emoehãite hap toineꞌen mesup e Iesui tomimohãite pe.

20Miꞌi hawyi tõꞌẽ miitꞌin Iesui maꞌat reran hanuaria meimuẽwat Tupana ehay miwan etiat kuap kahato rakaria. Miꞌi hawyi -Mehin iꞌatuꞌe uruikuap teran karãpe aru putꞌok e mesuwat yi tote Tupana Aiporekuat nuat hap iꞌatuꞌe. Aikope aru pyno tuwemoherep Aipotypotno Tupana iꞌatuꞌe. Miꞌi hawyi Iesui tiꞌatuwesat -Pywo ti rat yt heremo i hap ewy Tupana topyhuꞌat yi Porekuatno tuwemoherep mesuwarotiaria pe e. 21Yt uwe i ikuap are e. Yt naku i eweiꞌe -Meiẽ Tupana toineꞌen aiporekuat nuat. Yt naku i eweiꞌe -Eweiꞌakasa ro iuẽpe toineꞌen naꞌyn Tupana aiporekuat nuat yt naku i mio tã eweiꞌe. Yt heremo i katupono eipyꞌa piat pe eiporekuat nuat toineꞌen e iꞌatuepe.

22Miꞌi hawyi Iesui toꞌe topotmuꞌeria pe tomohey haria pe -Uiwyriaꞌin e mesup taꞌyn Tupana Eiporekuat nuat toineꞌen eipyꞌasetpe wen maꞌato yt motꞌi areineꞌen e. Pywo meiũran eweihaꞌat teran kahato uhewowi maꞌato yt heremo i areineꞌen e Iesui. 23Miꞌi hap eꞌat pe aru iraniaꞌin teꞌeroꞌe ehepe eimaꞌat hamo -Pywo ti rat taꞌaipok taꞌyn Aheykeꞌet Aikywyt kuepe raꞌyn toineꞌen i raꞌyn iꞌatueso ehepe. -Pyno toꞌiro Aheykeꞌet Aikywyt ewowi iꞌatuꞌe aru ehepe iraniaꞌin eimaꞌat hamo maꞌato yt eweiwat reiꞌo miꞌiria upi. 24Katupono Uito Miitꞌin Eꞌykeꞌet uut hap eꞌat pe turan merep e hap ewy ariot atipy kaipyi are e. Heremo sese hap ewy ariot atipy kaipyi are e. Wuatꞌi mikuap ewy uhẽtyhot kahato puo ariot e. 25Maꞌato koitywy mesuwarotiaria yt uimohey haria i tukupteꞌen e. Pywo ti rat koran te ti mesuwarotiaria iraniaꞌin uipun haria teꞌeropyhuꞌat are e. Ahoꞌopot kahato irane taꞌatumikyryꞌi hap upi e. 26Pyno areto hawyi araꞌaipok i mesuwe i raꞌyn e. Saꞌawyꞌi sese te mekewat iꞌaman aat kaꞌap 40 eꞌat piat hap turanuat mekewat ahaꞌaseꞌi pot Nuꞌe toineꞌen hap eꞌat piat turanuat yt uwe i ahaꞌaseꞌi pot Nuꞌe mohey hat toineꞌen e. Miꞌi hap ewy kahato ti aru miitꞌin tukupteꞌen wyti aru Eheykeꞌet uut hap eꞌat pe wyti aru are e. 27Nuꞌe ieineꞌen hap eꞌat turan teꞌerenuk hap koꞌi kape yn taꞌatuwanetup mesuwat yi tote are e. Mahy u hap kape yn teꞌeruwewanetup aat kaꞌap e. Taꞌi iꞌatuwary wary kahato itote e. Woꞌowaire waire hap kape yn taꞌatuwanetup e. Yt teꞌeruwanetup hin i mekewat Tupana ehay Nuꞌe mimoherep kape iꞌaman koro tuut irane e hap kape yt teꞌeruwanetup teran hin i saꞌawyꞌi e. Miꞌi hawyi Nuꞌe teke raꞌyn mekewat yara wato sese pe toꞌyat piaria wywo hawyi iꞌaman koro kahato raꞌyn Tupana e hap ewy raꞌyn hawyi yꞌy wato taꞌam kahato yi tote hawyi yꞌy koro hap ewy yn toineꞌen yi tote hawyi yt imohey i haria yꞌy koro tiꞌatuꞌatuꞌuka kahato torannia mesuwat yi totiaria e miwan me e. Miꞌiria ewywuat aru tukupteꞌen miitꞌin uhuut hap eꞌat pe e Iesui. 28Taꞌi iꞌewyte aseꞌi Iro eꞌat pe ewy toineꞌen uhuut hap eꞌat pe turan. Mekewat eꞌat woꞌokyiꞌat haria wo Iꞌatuekareꞌen weneru haria wo iꞌatuko nug haria wo teꞌeropyhuꞌat maꞌato yt taꞌatuwanetup hin i Tupana e hap kape. 29Maꞌato mekewat eꞌat pe karãpe Iroꞌin tuwẽtem naꞌyn tawa saꞌag Sutuma pyi hawyi aria hewo hewo raꞌyn atipy kaipyi nukara ewywuat koꞌi Tupana minug. Miꞌi haria tawa Sutuma piaria Tupana ehay pun haria aria miꞌu wo yn tukupteꞌen e. 30Miꞌi hap ewy kahato ti aru miitꞌin tukupteꞌen Eheykeꞌet uut hap eꞌat pe hamuat turan are e. 31Mekewat uhuut hap eꞌat pe turan yt ereineꞌen i eꞌyat pe pote yt eraꞌaipok i eꞌyat kape ekareꞌen sat hamo are. Iꞌewyte eko pe ereineꞌen mekewat eꞌat pe uhuut hap teran yt eraꞌaipok i eꞌyat kape ekareꞌen sat hamo are. 32Aseꞌi Iro eharyꞌi taꞌaipok teran tawa Sutuma kape hawyi tehaꞌat tawa Sutuma kape taꞌaipok teran haype hawyi nu ukyt kawiat mana Iro eharyꞌi topyhuꞌat itote e. Pyno yt eweiꞌaipok teiꞌo eꞌyat kape. Yt ewetunug i Iro eharyꞌi nug hap ewy e. 33Pyno eheineꞌen hap mesuwarotiat eweikyꞌe kahato eweiꞌapykok kahato pote yt putꞌok eweiꞌe i eheineꞌen hap ehehakyeraꞌat wuatꞌi eꞌat piat hamo are e. Maꞌato yt eweikyꞌe kahato i eheineꞌen hap mesuwarotiat pote maꞌato Tupana mikyꞌesat ewywuat hap upiat eweiwanetup hawyi pywo pe ti eweipuẽti wyti aru eheineꞌen hap sese ehehakyeraꞌat hap hamuat e Iesui iꞌatuepe. 34Mekewat wãtym me Eheykeꞌet Eikywyt uut hap eꞌat pe turan tukupteꞌen aru typy ok teꞌeroket neꞌi wyti aru wẽtup getap wiat pe e. Miꞌi hawyi wẽtup ok yt uwe i raꞌyn Tupana tioto hawyi maꞌato wẽtup yt uimohey hat i pote Tupana toiat raꞌyn itote e. 35Mekewat eꞌat pe turan uhuut hap eꞌat typy haryporia wemiꞌu tok haria tukupteꞌen irane hawyi wẽtup haryporia yt uwe i wyti aru Tupana tioto hawyi maꞌato wẽtup ok totiat raꞌyn itote yt uimohey hat i pote e. 36Iꞌewyte wyti aru typy ihainia taꞌatuko tote tukupteꞌen wẽtup ok wyti aru yt uwe i raꞌyn Tupana tioto hawyi maꞌato wẽtup ok totiat itote mekewat eꞌat pe e. Yt uimohey hat i wyti aru totiat e Iesui iꞌatuepe. 37Miꞌi hawyi iwyriaꞌin apo iꞌatuꞌe Iesui pe -Uruporekuat iꞌatuꞌe aikope aru eriot eꞌuut hap eꞌat pe iꞌatuꞌe. Miꞌi hawyi toiꞌatuwesat -Pyno mekewat uhuut hap eꞌat pe putꞌok e hawyi meremo eweikuap uhuut hap are. Taꞌi karãpe eweiꞌakasa uruwu koꞌi teꞌerepopy hawyi meremo eweikuap iꞌokpuk takat toineꞌen itote iꞌatumiꞌu wo teꞌeruwaꞌatunug kahato itote pote e Iesui topotmuꞌeria pe.

Currently Selected:

Iruka 17: mav

Highlight

Copy