Iruka 18

Haga 18

1Miꞌi hawyi poꞌog Iesui henoi tehay iãꞌãkap wuo -Uiwyriaꞌin e waku ahehay kahato Tupana kape e. Waku yt aipohep hin i Tupana wywo eiwoꞌoehay hamo e. Pyno ahenoi teran uhehay hãꞌãkap wuo aikotã waku wahenoi Tupana kapiat koꞌi hap etiat e. 2Pyno saꞌawyꞌi so wẽtup tawa piat pe toineꞌen wẽtup ok uwe waku uwe yt e hamuat. Miꞌi miit maꞌato ti yt Tupana mohey hin i hat iꞌewyte yt toiꞌatukyꞌe hin i miitꞌin iꞌatuꞌe so e. 3Iꞌewyte hiwu toineꞌen wy mekewat tawa tote. Miꞌi ti putꞌok e mekewat miit aikotã waku e hat kape. Toikyꞌesat kahato topowyro hap. Waku uimaꞌat haria emiꞌapiheg haria wo teꞌeropyhuꞌat e tope. 4Maꞌato so mekewat uwe waku uwe yt e hat yt tuwanetup hin hiwu kape. Maꞌato yt ipohep hin I hẽtup hamo. Aat kaꞌap tohẽtup tope ipowyro hamuat hap. Yt ipowyro teran hin I pykai wẽtup eꞌat pe toꞌe tuwepe. -Are paĩ e yt arekenꞌẽ i Tupana pupi e. Iꞌewyte iraniaꞌin mupi yt arekenꞌẽ hin i maꞌato mesuwat hiwu uimosero kahato raꞌyn e. 5Taꞌi uimosero kahato rat mekewat haryporia hiwu yt ipohep i ẽtup hamuat e so. Miꞌi pote atipowyro hawyi yt tuut i e so tuwepe. 6-Pyno eiwewanetup to mekewat hiwu miẽtup uhehay iãꞌãkap Miꞌi hawyi Iesui toꞌe -Eiwewanetup to mekewat uwe waku uwe waku ehay kape e. 7Pywo ti rat Tupana yt mekewat miit saꞌag ewy hin i katupono Tupana tikyꞌe kahato temiitꞌin pote toiꞌatupowyro teran kahato yne niatpo hap mowaku hamo. Taꞌi Tupana niatpo hap toimohãpyk aru iraniaꞌin minug saꞌag ehetiat koꞌi wahẽtup hawyi e temiitꞌin me. 8Taꞌi areineꞌen Eheykeꞌet Uito miꞌi pote uhuut hap eꞌat turan atiꞌatuꞌapiheg kahato iraniaꞌin minug saꞌag uimohey haria etiat e. Mekewat eꞌat pe atikat kahato uimohey sese hanuaria sio toĩ sio yt hap e Iesui temiitꞌin me.

Tupana Ehay Moherep Hat Hawyi Paa E Rakat Iꞌatuehay Tupana Kape

Iruka 16.15 Piat Ewy

9Miꞌi hawyi wẽtup sehay iãꞌãkap wuo Iesui henoi miitꞌin me katupono tukupteꞌen itote -Uruto poꞌog wakuaria torannia kai e haria yt iraniaꞌin atukyꞌe hin i haria. 10Miꞌi haria pe Iesui henoi -Pyno typy ihainiaꞌin so tuwat raꞌyn Tupana motypot hap yat kape taꞌatuehay Tupana wywuat hamo e. Wẽtup ok Tupana ehay moherep hat. Miꞌi ti -Poꞌog uito iraniaꞌin kai e tuwepe hat e. Miꞌi hawyi so wẽtup ok yt naku i kahato rakat katupono ipotpap ehewanikaptia porekuat emiitno ehekareꞌen poreraꞌat hamuat wuatꞌi muap upi hanuat miꞌi e. 11Miꞌi hawyi so mekewat uito poꞌog iraniaꞌin kai e hat toꞌe -Uito waku sese kahato atunug e so uito poꞌog waku iraniaꞌin kai e so tuwepe tuwanetup hawe e. Arehum ewowi uiwaku hap upi e so. Uito yt iraniaꞌin ewy hin i iꞌatuminug saꞌag hap ete e so. Are paĩ e uito ti yt miitꞌin maꞌat hat ewy hin i e. Uito yt areineꞌen i wuatꞌi haryporia wywo ehat i e. Waku kahato uito paĩ e so. Pyno arehum kahato ewowi Tupana katupono uito yt mekewat yt naku i rakat ewy i. Miꞌi ti miitꞌin poreraꞌat hatno toineꞌen e so tuwepe Tupana motypot yat pe e. 12Taꞌi waku kahato atunug yne ete e. Pywo ti rat typy eꞌat 7 eꞌat turan yt kat i hin i atuꞌu miꞌu emotypot hamuat haype e so. Waku kahato atunug katupono uhegyiꞌat kahato katupono uiko kaipyi uhekat kaipyi atimoꞌẽ 10 kaipyi wẽtup aterut ewowi Tupana hawyi 9 yn atioto uiꞌyat kape e. Mio tã e Tupana wywo ihay turan. 13Miꞌi hawyi mekewat yt naku i nug hat mekewat miitꞌin ekareꞌen pyhyp hat pya kahato iraniaꞌin waku nug haria kai toineꞌen. Yt tehaꞌat hin i atipy kape Tupana ewowi tehay hamo maꞌato yi kape yn tehaꞌat hawyi tuweꞌahyk ahyk tuwemoti Tupana wywo tehay hamuat haype. -Yt uiꞌapiheg neiꞌo uiminug saꞌag upi e. Atikuap taꞌyn uito yt naku i kahato rakatno areineꞌen wen maꞌato waku ehegyiꞌat hap kaipyi uhehakyeraꞌat hatno ereineꞌen Tupana e paa toꞌe haype e so e Iesui. 14Pywo pe areꞌe ehepe mekewat paa e hat tominug saꞌag koꞌi ete yn taꞌaipok toꞌyat kape waku pe Tupana wanetup hawe katupono Tupana tiwaure yne iminug saꞌag koꞌi pote maꞌato mekewat -Uito poꞌog iraniaꞌin kai e hat yt toipuẽti hin i waku e hap Tupana wanetup hawe. Pywo miitꞌin mekewat paa e hat ewywuaria Tupana mimowato haria wo topyhuꞌat. Maꞌato mekewaria uito poꞌog iraniaꞌin kai e haria Tupana mimohit haria wo teꞌeropyhuꞌat e Iesui wuatꞌi miitꞌin me.

Iesui Tiꞌatupoityro Hirokaria

Mateu 19.13-25; Maku 10.13-16 Piat Ewy

15Miꞌi hawyi wẽtup eꞌat pe miitꞌin terut taꞌatumepytꞌin Iesui ewowi katupono taꞌatukyꞌesat kahato taꞌatumepytꞌin poityro hap Iesui po kaipywiat hap. Taꞌatukyꞌesat iꞌatuewaku Iesui piat hap. Maꞌato Iesui emiitꞌin waĩꞌiꞌatuꞌe hirokaria erut haria pe. 16Maꞌato Iesui tikay kay temiitꞌin tuwewowi hawyi toꞌe iꞌatuepe -Yt waĩ eweiꞌe i kat pote Yt eweiꞌatupyhyp teiꞌo hirokaria katupono hirokaria timohey kahato Tupana are e. Taꞌi hirokaria tuwehytꞌok teran kahato Tupana etama pe e. Miitꞌin hirokaria ewywuaria tukupteꞌen kuap aikope Tupana tukupteꞌen morekuatno hap tote. 17Pywo pe ti eweiwat teran aikope Tupana toineꞌen morekuatno hap kape pote waku hirokaria mohey hap ewywuat eweiwat o are e. Maꞌato yt pote yt eweihytꞌok kuap i e.

Kurum Iwasu Hekat Rakat

Mateu 19.16-26; Maku 10.17-27 Piat Ewy

18Miꞌi hawyi wẽtup ok Iuteuria ywania akag hekat kahato rakat apo e Iesui pe -Uimuꞌe hat wakuat e kat som waku atunug uheineꞌen wuatꞌi eꞌat piat hap puẽti hamo e. 19Miꞌi hawyi Iesui toꞌe -Kat poteĩ Wakuat En ereꞌe uhepiat pe e. Tupana yn ni wakuat sese watikuap e. 20Pyno etikuap apo Tupana piat ainapin hap koꞌi e. Aikotã Tupana ainapin Muisei miwan miat apo. Mio tã e -Yt naku i wẽtup ok wywo wẽtup ok wywo eharyꞌi eꞌaito e miwan me e. Yt naku i etiꞌauka miit e miwan me e. Yt naku i seroꞌok ere e miwan me e. Yt naku i eso e. Etimotypot ro eꞌywot ety e miwan me e. Mio tã e hap koꞌi etikuap apo e mekewat hekat rakat pe. 21Miꞌi hawyi toiwesat -Taꞌi atiꞌatukuap yne mekewat Tupana piat ainapin hap koꞌi mehin e. Taꞌi uihire pyi te ti atunug yne mio tã e hap koꞌi e Iesui pe. 22Miꞌi hawyi Iesui toꞌe tope -Waku mehin wen maꞌato wẽtup mo yt etunug i te e. Miꞌi hap etunug hawyi waku pe ereineꞌen Tupana wanetup hawe e. Pyno ereto ro eꞌyat kape hawyi waku yne ekat etiweneru hawyi waku saꞌup etiꞌatumoꞌẽ yne yt hekat i rakaria pe miitꞌin hakyꞌeꞌi rakaria pe satek takaria pe e. Miꞌi tã etunug mote taꞌi etipuẽti ekareꞌen sese wuatꞌi eꞌat piat atipy piat pe e. Mio tã hap ewy etunug hawyi eriot ereto uhupi e Iesui hekat rakaria pe. 23Maꞌato Iesui e hap toikuap hawyi paa e kahato rakat toineꞌen katupono hekareꞌen iwato kahato toineꞌen. Niatpo kahato toipuẽti hekareꞌen weneru hamo katupono toikyꞌe kahato tekat poꞌog Iesui wywuat hap kai. 24Miꞌi hawyi Iesui tehaꞌat kahato mekewat hekat kyꞌe kahato hat ewowi hawyi toikuap taꞌyn paa e kahato hap hawyi toikyꞌe kahato hawyi toꞌe itotiaria pe -Are paĩ e niatpo kahato ti rat wekareꞌen kyꞌe kahato haria tuwehytꞌok aikope Tupana toineꞌen Morekuatno hawe are e Iesui. 25Taꞌi niatpo kahato yt hegyiꞌat i rakat teke atipy pe e. Niatpo kahato miitꞌin tuwehytꞌok atipy pe iꞌatuhekat iwato pote e. Niatpo kahato aikotã aihũ iwato kahato rakat mekewat Kameru e hap het rakat teke awi ehapo kaꞌa puo maꞌato sakpo niatpo sese ewy wekat iwato kahato kyꞌe kahato rakaria teke atipy pe e. 26Miꞌi hawyi apo iꞌatuꞌe Iesui pe -Mio tã pote uwe teke kuap atipy pe Tupana morekuatno ieineꞌen hap tote apo iꞌatuꞌe. 27Miꞌi hawyi Iesui tiꞌatuwesat -Pywo miitꞌin yt uwe i teke kuap atipy pe e maꞌato Tupana yn tiꞌatuehakyeraꞌat kuap miitꞌin e. Tupana yn miitꞌin ehakyeraꞌat kuap e. Yt kat i niatpo Tupana wanetup hawe e. Miitꞌin yt minug kuap koꞌi i yt niatpo hin i Tupana pe e. Tupana tiehakyeraꞌat kuap miitꞌin hekat rakaria pykai e. 28Miꞌi hawyi Peteru toꞌe -Urumuꞌe hat uruto ti uruiꞌatoiat yne raꞌyn eupiat tuwat hamo ehay moherep hamo e. 29Miꞌi hawyi Iesui toꞌe -Pywo ti eꞌe hap Peteru e. Worohoꞌokuap kahato eipe e. Pywo ti rat uwe uwe eipe ewy uikyꞌe poꞌog poꞌog toꞌyat kai toty kai teharyꞌi kai toꞌywytꞌin kai tomepytꞌin kai topotpap kai hawyi toto uhehay Tupana piat Aiporekuat nuat e hap moherep hamo miꞌi hat eipe ewywuaria wyti aru waku pe tukupteꞌen wuatꞌi eꞌat pe atipy pe e Iesui. 30Uwe uwe totiat yne uhehay sytpok hamo wuatꞌi ywania enoi hamuat miꞌi koꞌi eimiꞌatoiat koꞌi atum aru ehewowi i raꞌyn mesuwe poꞌog eimiꞌatoiat saꞌawyꞌi wuat koꞌi kai e. Iꞌewyte eheineꞌen hap Tupana wywo wuatꞌi eꞌat piat hap ikahu kahato hap atum ehepe e Iesui topotpoꞌororia pe.

Mateu 20.17-19; Maku 10.32-34 Piat Ewy

31Miꞌi hawyi temiitꞌin Iesui terepoꞌok miitꞌin typyꞌi rakaria tokpyi enoi tepiat hamo. -Uhekatuwyria watuwat mesup tawa wato Ierusarẽi kape e. Itote ti aru uiꞌauka irane aikotã saꞌawyꞌi te wuat Tupana ehay moherep haria miwan miat e hap ewywuat topyhuꞌat itote e. 32Itote Miitꞌin Saꞌyru ewanikaptia ywania esuraraꞌin po pe raꞌyn ipag iꞌauka hamo itote irane e Iesui. Yt naku i taꞌatunug hete e. Miꞌiria teꞌeruweukaꞌi kahato taꞌatumikyryꞌi hawyi kuitu kuitu iꞌatuꞌe Miitꞌin saꞌyru epiit ete imohit haype irane itote e. 33Ipak pak kahato itote hawyi aru iꞌauka saꞌag neꞌi aru maꞌato miꞌi pykai myẽꞌym eꞌat hawyi tuwẽtem aru ikuꞌuro sese hap pyi e. Iꞌasyp pykai tuwẽtem i raꞌyn aru iꞌasyp hap kaipyi e. 34Tuwetiat tohenoi maꞌato hemiitꞌin yt ikuap hin i imienoi koꞌi. Yt hotꞌokꞌe i pote yt taꞌatukuap kuap i iꞌe hap.

Maku 10.52 Piat Ewy

35Miꞌi hawyi Iesui toto temiitꞌin wywo tawa wato Ierusarẽi kape. Miꞌi hawyi putꞌok iꞌatuꞌe tawa Ieriko ete. Miꞌi tote toineꞌen apyk pe muap ẽpeke ete yt iha pytig i rakat muap tote. Itote pyi tohẽtup kahato miitꞌin miium koꞌi teko ewy. 36Miitꞌin typyꞌi rakaria õꞌẽ hap toikuap hawyi tohẽtup taꞌyn -Kat hamo som miitꞌin typyꞌi rakaria tõꞌẽ e apo e muap upiaria pe yt iha pytig i hat. 37Miꞌi hawyi taꞌatuwesat -Taꞌi Mekewat Miit tawa Nasare kaipywiat wyti tuut meikowo mekewat Iesui e hap het rakat iꞌatuꞌe taꞌatuhenoi yt iha rakat i pe. 38Miꞌi mekewat yt iha rakat i tikuap hawyi tuwẽpowat Iesui kape tehay pirik wo -Uipowyro ro uipowyro ro Morekuat Tawi Emiariru uhehakyeraꞌat ro En e. 39Maꞌato iraniaꞌin muap upiaria -Waĩ neiꞌo iꞌatuꞌe. Yt naku i ehay pirik hap iꞌatuꞌe. Epoꞌinik to iꞌatuꞌe wen maꞌato poꞌog neꞌi tuwẽpowat haty wo kahato hamo -Morekuat Tawi Emiariru uhehakyeraꞌat En e. 40Miꞌi hawyi Iesui topyhuꞌat itote muap tote hawyi toꞌe -Eweterut ro uhowowi iwẽpapꞌi kahato hat e muap upiaria pe. Miꞌi hawyi taꞌatuerut mekewat sẽtupꞌe hat. 41Putꞌok e Iesui yatype hawyi apo e Iesui -Kat e hap etikyꞌesat uipo pyi mehin apo e tope. Mio tã e pote -Mehin e uimoehapytig i hap epiat hap atikyꞌesat kahato paĩ e Iesui pe. 42-Pyno waku raꞌyn emikyꞌesat ewy atunug e Iesui. Eraꞌakasa raꞌyn katupono uimohey kahato hap emoehãite hap topyhuꞌat e Iesui yt iha pytig i rakat pe. 43Mio tã toꞌe Iesui hawyi meremo iha i raꞌyn. Meremo waku i raꞌyn iha ete. Taꞌakasa kuap i raꞌyn hawyi -Waku kahato En Tupana waku kahato En e. Miꞌi hawyi toto Iesui wywo imotypot hamuat tehay pirik wo. Iꞌewyte yne Iesui upiaria taꞌatumotypot kahato Iesui yt iha pytig I rakat toimoehãite hawyi. Iꞌatuwepiit kahato raꞌyn.

Currently Selected:

Iruka 18: mav

Highlight

Copy