Mateu 20
20
Haga 20
Iesui Henoi Uwa Ypia Apykok Hamuat Etiat
1Miꞌi hawyi Iesui toꞌe temiitꞌin me wẽtup te hãꞌãkap wo -Koitywy ahenoi teran ehepe aikotã Tupana topyhuꞌat wuatꞌi miitꞌin porekuatno mesuwe iꞌewyte atipy pe hap ewy ete e. Saꞌawyꞌi so toto wẽtup ok hunete toꞌyat pyi miitꞌin puẽti hamo motpap nug haria toko piat Uwa ypia etiat iꞌatupotpap hamo e. 2Miitꞌin toipuẽti hawyi toꞌe iꞌatuepe -Eipotpap aat pote ti aru atum wẽtup eꞌat saꞌup ehepe e. Miꞌi pote -Hẽ iꞌatuꞌe. Miꞌi hawyi toiꞌatupoꞌoro tomikoi ypia kape. 3Meiũran ihatꞌok poꞌog hawyi toto aikope miitꞌin tikyiꞌat wuatꞌi hap kape. Miꞌi turan itote toiꞌatupuẽti yt kat nug i haria motpap ekatup eharia. 4Miꞌiria pe toꞌe -Eweiwat ro uiko kape hawyi mono meiũran wãtymꞌi turan aru atum haꞌup wakuat ehepe e. 5Miꞌi hawyi tuwat raꞌyn iko kape. Miꞌi hawyi atposake turan iꞌewyte atposake tokosap hap hawyi toiꞌatupuẽti poꞌog miitꞌin muap upi hawyi iꞌewyte toiꞌatupoꞌoro toko kape saꞌawyꞌi wuaria ewy toiꞌatupoꞌoro. 6Miꞌi hawyi porap wãtymꞌi turan poꞌog toiꞌatupuẽti toto hap upi yt ipotpap i rakaria. Miꞌi hawyi miꞌiria pe -Kat poteĩ yt eipotpap hin i e. Yt kat i apo eiminug wuat motpap e. 7Miꞌi hawyi taꞌatuwesat -Yt uwe i rat urupoꞌoro motpap nug hamo iꞌatuꞌe tope. 8Miꞌi hawyi wãtym naꞌyn hawyi ipotpap takaria toiꞌatunug naꞌyn tuwewowi iꞌatupotpap saꞌup nug hamo. Miꞌi hawyi temiitꞌin akag pe toꞌe -Pyno koitywy waku etum iꞌatupotpap saꞌup e. Saꞌawyꞌi waku etum watꞌypmuat ipotpap takaria pe miꞌi rakirẽ etum saꞌup ipotpap aat rakaria pe e. 9Miꞌi hawyi hemiit tikay kay tuwewowi watꞌypmuat ipotpap takaria. Iꞌatupotpap porap yn wen maꞌato tutum wẽtup eꞌat saꞌup iꞌatuepe e. 10Meiũran putꞌok iꞌatuꞌe yian miat ipotpap takaria. Miꞌiria teꞌeruwanetup teꞌeruwepe -Ahepe ti aru poꞌog tutum katupono aito poꞌog aipotpap aat pote iꞌatuꞌe. Maꞌato tutum saꞌup aikotã iraniaꞌin me tutum hap oktan ne neꞌi. 11Miꞌi pote ipotpap aat rakaria iꞌatuehay saꞌag neꞌi raꞌyn mekewat Uwa ypia kaꞌiwat pe. 12-Meimuẽwat pe etum uruwat saꞌup oktan ne neꞌi wẽtup ora hap ewy iꞌatupotpap pykai iꞌatuꞌe. Uruto kue aat hakup we kahato mesuwe urupotpap aat kaꞌap iꞌatuꞌe. 13Miꞌi pote go kaꞌiwat toꞌe mio tã e hat pe -Pyno yt kat i ti atunug saꞌag ehepe e. Yt atiꞌaparap hin i ti ehepe. Katupono saꞌawyꞌi mio tã are -Atum aru ehepe wẽtup eꞌat saꞌup are e. Miꞌi hap ewy ti atum naꞌyn ehepe. 14Eipo pe raꞌyn eheꞌat saꞌup e. Koitywy ti waku raꞌyn eweiꞌaipok eiꞌyat kape. Katupono eheꞌat saꞌup toineꞌen eipo pe uiꞌe hap ewy atum e. Atum naꞌyn watꞌyp koꞌi motpap haria wat ewy wẽtup eꞌat saꞌup e. 15Waku uhekat wywo atunug uimikyꞌesat ewy uhegyiꞌat hap oktan e. Ehaꞌywyi uhegyiꞌat uhekat wywo pote e ipotpap aat rakaria pe e. 16Miꞌi hap ewy ti aru Tupana tum temiitꞌin me saꞌup watꞌypmuaria pe tutum yianmiaria pe iꞌewyte te. Maꞌato aru yian miaria pe tutum watꞌypmo hap ewy e Iesui hãꞌãkap wuo temiitꞌin me.
Maku 10.32-34; Iruka 18.31-34 Piat Ewy
17Miꞌi hawyi Iesui toto i raꞌyn tawa wato Ierusarẽi kape muap wato upi. Tuwat turan toiꞌatukay kay topotmuꞌeria muap ẽpe kape miitꞌin tok pyi iꞌatuwatꞌi te hawyi tohenoi aikotã wyti aru hetiat hap etiat 18Iꞌatuweran turan hawyi toꞌe -Eiwanetup to uhehay kape e. Koitywy watuwat raꞌyn tawa Ierusarẽi kape mehinꞌin e. Putꞌok watoꞌe itote hawyi ti aru Miitꞌin ykeꞌet taꞌatupag paꞌi kororia waĩꞌe hap enoi haria po pe raꞌyn uiꞌauka hamo e. 19Miꞌi hawyi ti aru uhum wẽtup ywania wanikaptia po pe iꞌatumikyryꞌi uhetiat hamo uiꞌahyk ahyk hamo e. Miꞌi hawyi ti aru uiꞌauka raꞌyn itotiaria ariaꞌyp posak ete e. Miꞌi hawyi uikuꞌuro sese aru itote e. Myẽꞌym eꞌat aru uisyp hawe uipiit topyhuꞌat. Maꞌato miꞌi hawyi ti aru areineꞌen ne i raꞌyn guꞌuro pyi e.
Sepetiꞌin Ety Putꞌok Iesui Ete Tomepytꞌin Typy Ok Takaria Iꞌatumowato Hamo
Maku 10.35-45 Piat Ewy
20Miꞌi turan putꞌok e wẽtup ok haryporia Sepeteu eharyꞌi typyꞌok tomepytꞌin wywo Iesui ewowi. Pyno miꞌiria imepytꞌin Iesui potmuꞌeria sese. Miꞌi mana tuwepỹꞌãtutuk hawyi toꞌe -Mimi e ahẽtup teran epe uimikyꞌesat kahato e. 21Kan etikyꞌesat mana e hawyi toiwesat -Karãpe morekuatno erepyhuꞌat turan atikyꞌesat uimepytꞌin epo sese kai epo ran kai hap atikyꞌesat kahato e. 22Miꞌi pote -Mana e yt etikuap i kahato kat som emiẽtup uhepiat e. Miꞌi hawyi toꞌe imepytꞌin Iuwãu Tiaku pe -Are paĩ eiweꞌyꞌu irane uhekuiꞌa pyi sapo hy wo e. -Taꞌi uruteꞌyꞌu kuap ekuiꞌa pyi urukaꞌiwat iꞌatuꞌe. 23Miꞌi hawyi -Pywo ti uhemiitꞌin eiweꞌyꞌu aru uhekuiꞌa pyi sapo hy wo e. Uhatek hap ewywuat ewehãꞌãg aru e. Maꞌato morekuaria ewy uipo sese kai uiporan kai hamuat yt atum kuap i ehepe. Katupono Tupana yn ikuap uwe uiꞌyatypiat apyk hanuaria e Iesui Iuwãu Tiaku pe. 24Mio tã taꞌatuẽtup pote iraniaꞌin hemiitꞌin iꞌatupyꞌahak typyꞌok taꞌatuwyriaꞌin ete. 25Miꞌi turan Iesui tiꞌatukay kay i raꞌyn tuwewowi -Uiwyriaꞌin e mesuwarote morekuaria teꞌeruwemiitꞌin poꞌoro kahato haty wo e. -Uruto ti poꞌog iwatoꞌin nakaria wuatꞌi kai iꞌatuꞌe kahato e. 26Maꞌato yt atikyꞌesat i eipe mesuwarotiat morekuaria ewywuaria eweikupteꞌen eiwoꞌope e. Miꞌi pote uwe uwe topyhuꞌat teran akag wo eipyꞌasetpe miꞌi hat waku tuwenug semiit yne miitꞌin eropat hatno e. 27Uimohey haria wuatꞌi eropat kahato haria yn ni waku akag wo tukupteꞌen Tupana wanetup hawe e. 28Uito Eheykeꞌet wuatꞌi miitꞌin eropat hat kahato areineꞌen wuatꞌi miitꞌin powyro hat e. Uito Eiporekuat koro areineꞌen wen maꞌato yt iraniaꞌin morekuaria ewywuat i. Iꞌewyte atum irane uheineꞌen hap saꞌup miitꞌin kyiꞌat Tupana watnuat hamo e Iesui topotmuꞌeria pe. 29Miꞌi hawyi tuwat raꞌyn tawa Ieriko pyi. Miꞌi turan miitꞌin sem kahato tuwat itote pyi Iesui upi. 30Tuwat porapꞌi turan typy ok yt ihapytig i rakaria tukupteꞌen muap ẽpe upi apyk pe. Miꞌiria tikuap taꞌyn Iesui uut hap hawyi teꞌeruwẽpowat -Urukaꞌiwat Tawi saipepiat. Erehaꞌat ro uruewowi ehegyiꞌat hap wywo. 31Mio tã iꞌatuꞌe pote meimuẽwat miitꞌin sem -Waĩ ehehay pirik poityꞌi iꞌatuꞌe. Eiwẽpohep to iꞌatuꞌe maꞌato yt iꞌatuwẽpohep hin i. Poꞌog neꞌi teꞌeruwẽpowat -Uruehakyeraꞌat En urukaꞌiwat Tawi Saꞌyru iꞌatuꞌe. 32Miꞌi hawyi Iesui topyhuꞌat itote hawyi tuwẽpowat -Eweĩꞌẽ ro pyno meikowo uhewowi uhytꞌiꞌin e. Mio tã e pote tokokaꞌat raꞌyn hewowi hawyi toꞌe -Kat som waku atunug eimikyꞌesat ehepe e. 33Miꞌi hawyi taꞌatuwesat -Uruꞌakasa pakup i hap nug hap ti uruikyꞌesat etunug Mehin iꞌatuꞌe. 34Miꞌi hawyi Iesui tiꞌatukyꞌe kahato hawyi tuweponug naꞌyn iꞌatueha ete hawyi meremo iꞌatuehapytig teꞌeraꞌakasa pakup i iraꞌyn. Miꞌi hawyi tuwat raꞌyn Iesui upi.
Currently Selected:
Mateu 20: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
