Mateu 6

Haga 6

Wakuat Etunug Tupana Motypot Hamo

1Miꞌi hawyi poꞌog Iesui toꞌe miitꞌin sem me yityꞌok tote -Uiwyriaꞌin e pyno yt naku i kahato eiwemotypot Tupana potpap ewetunug turan e. Yt naku i kahato miitꞌin ehamo miitꞌin miat eimotypot hamo neꞌi ewetunug Tupana potpap e. Maꞌato eimotypot miitꞌin kaipywiat hap yn eweikat pote yt kat i eimotypot hap sese eweipuẽti Aiꞌywot atipy piat kaipywiat e. 2Miꞌi pote karãpe hatek takat putꞌok e ehete turan waku eweipowyro kahato maꞌato yt miitꞌin piat eimotypot yt hamo i. Yt naku i eiwanetup hawe -Atipowyro miꞌi miit wuatꞌi ehamo pote mio uimotypot kahato miitꞌin mesuwe yt naku i eweiꞌe. Yt naku i ehehay eiwanetup hawe eimowato wuatꞌi ehamo eiminug wakuap koꞌi wo e. Kat pote miꞌiria ti Tupana motypot yat pe tuwehytꞌok kahato Tupana motypot haria ewy teꞌeruwaꞌatunug wen maꞌato yt pywo pe i. Taꞌi miꞌiria wyti getap upi oken upi Tupana motypot hap taꞌatunug wen miitꞌin ehamo maꞌato yt pywo pe e. Miꞌi hap ewy ewetunug mote wyti aru yt kat i ti aru Tupana kaipywiat eimotypot hap atipy pe e.

3Miꞌi hawyi poꞌog Iesui toꞌe itotiaria pe -Uiwyriaꞌin waku kahato eweipowyro ihakyꞌeꞌi rakaria migꞌi wo yt uwe mikuap mo i. Waku ti yt ehenoi i eimiium miitꞌin powyro hap wuatꞌi pe eimotypot hap pupi. 4Yt naku i ewyriaꞌin sese pykai ikuap. Pywo waku ewetum migꞌi wo emiium koꞌi. Maꞌato waku Tupana yn ikuap eminug koꞌi katupono ti aru tupana hum ehepe hãipe piat koꞌi katupono ekaꞌiwat aiꞌywot atipy piat taꞌakasa yne eiminug koꞌi. Miꞌi pote tuwehum ehewowi hap yn eweipuẽti.

Iesui Henoi Aikotã Waku Ehehay Hamuat Tupana Kape

5-Uiwyriaꞌin karãpe ehehay Tupana kapiat turan -Uito poꞌog uhehay se eiꞌe hap wywo iraniaꞌin ewy yt naku i katupono irania ti iꞌam myi ihay Tupana kape Tupana motypot yat pe. Iꞌewyte iꞌatuehay muap koꞌi upi oken koꞌi upi iꞌatuehay se. Iraniaꞌin mono teꞌerehaꞌat hawyi urumotypot taꞌatuehaype. Maꞌato miitꞌin mikuap wo iꞌatuehaype Tupana kape wen maꞌato yt pywo pe i. Maꞌato miitꞌin piat eimotypot hap neꞌi eweikyꞌesat pote topyhuꞌat miꞌi yn ehaꞌup wo. Yt kat i Tupana kaipywiat wehum ehetiat hap. 6Pyno karãpe ehehay teran Tupana wywo pote waku ereke eꞌokaꞌapype aikope miitꞌin yt ehamo i migꞌi wo hawyi ereꞌapyhik miꞌi hawyi eiꞌywot yn ikuap ehehay migꞌi wuat eipyꞌa pywiat pote Tupana tuwehum kahato ehewowi hawyi tutum ehepe eimiẽtup koꞌi. 7Uiwyriaꞌin karãpe miitꞌin pyꞌasetpiat ehehay Tupana kapiat turan yt naku i ehehay hupi te i hupi te i neꞌi ehehay miitꞌin mimotypot ereineꞌen teran pote. Katupono Tupana tikuap aru ahehay iꞌywop pote yn iꞌatuꞌe. Miitꞌin tikuap taꞌatuehay ikahu kahato rakat hap kyewi. Miꞌi haria tikyꞌesat kahato iraniaꞌin piat taꞌatumotypot hap haype.

Iruka 11.2-4 Piat Ewy

8Waku ahehay Tupana wywo wen maꞌato ti yt naku i hupi te i hupi te i wahuꞌat wahuꞌat sehay Tupana kape are katupono mio tã ehehay Tupana wywo pote iraniaꞌin yt uimohey i haria ewywuat eweikupteꞌen e. Pywo pe ti Aiꞌywot atipy piat tikuap kahato aimiẽtup tewowiat wahẽtup hap eꞌyian mete toikuap taꞌyn kat koꞌi kat koꞌi aimiẽtup koꞌi toikuap. Toikuap sakpo aimikyꞌesat sese koꞌi katupono hewaure kaꞌa kahato ahehay kape aiwanetup hap yt wahẽtup i te pykai e.

9Uimohey haria worohoꞌomuꞌe teran ehehay hap ete. Pyno waku watoꞌe -Uruꞌywot atipy piat uruikyꞌe kahato En e. Eset ri poꞌog ikahu torannia kai uruipuẽti e. 10Papai uruikyꞌesat kahato ereineꞌen wuatꞌi miitꞌin Akag Koro wo mesuwat yi tote aikotã ereineꞌen Wuatꞌi Potypotno atipy pe hap ewy e. 11Urupoi o En mesup eꞌat pe urumiꞌu wo urueꞌuꞌi wo e. 12Tupana waure wo ereineꞌen uruminug yne yt naku i hap koꞌi kai aikotã uruto urutukupteꞌen waure wo miitꞌin yt naku i nug uruetiat hap kai hap ewy 13Yt uruwaure teiꞌo En uruiꞌiãꞌãg hap tet pupi maꞌato urukawiatno to En yt naku i hap kaipyi. Katupono En wyti uruporekuat koro. Ewat esaika hap wyti wuatꞌi eꞌat piatnuat waku. 14Karãpe eipe waure wo eweikupteꞌen eimaꞌat iraniaꞌin piat hap koꞌi kai iꞌewyte ti aru aiꞌywot atipy piat waure wo ehepiat tomaꞌat hap kai toineꞌen. 15Maꞌato yt karãpe i eweiwaure iraniaꞌin minug eimaꞌat hap koꞌi pote iꞌewyte aiꞌywot atipy piat iꞌewy te yt iwaure kuap eiminug saꞌag koꞌi. 16Pyno karãpe eiwemosyꞌat ehehay Tupana wywuat hamuat turan yt naku i ehemoꞌarotꞌi miitꞌin piat ikuap hamo iraniaꞌin uito poꞌog e haria ewy katupono miꞌiria ti inug teꞌeremosyꞌat turan iꞌatuꞌarotꞌi torannia miitꞌin mono ikuap uruwemosyꞌat hap taꞌatuꞌe haype. Maꞌato pywo pe areꞌe ehepe miꞌi haria ti aru ipuẽti miitꞌin piat taꞌatumotypot hap yn. 17Maꞌato poꞌog waku eiwemosyꞌat hamo eiweposei hawyi eiwaꞌapin yn. 18Miꞌi pote yn iraniaꞌin yt ikuap eiwemosyꞌat hap maꞌato waku eiꞌywot atipy piat yn ikuap migꞌi wuat eiwemosyꞌat hap katupono miꞌi yt iraniaꞌin yt ewywuat i pote tutum ehepe emiẽtup koꞌi wuatꞌi ehamo e Iesui.

Waku Atipy Pe Etunug Ehekat

19Uimohey haria yt naku i mesuwat yi totiat yn ahekareꞌen atunug hap kape yn watuwewanetup aat kaꞌap. Maꞌato mesuwat rotiat yn ahekareꞌen pote iytyt tuꞌu yne neꞌi. Iꞌewyte sereꞌok eharia miereꞌok wo neꞌi toineꞌen e. Yt naku i ahekat mo wato hap kape yn watuwanetup aat kaꞌap e. 20Maꞌato uito areꞌe tuweupi pywo ti poꞌog waku watiꞌatunug ahekat atipy pe iheg me kahato wuatꞌi eꞌat piat rote. Itote ti yt kat i iꞌu kuap haria. Yt kat i nupiꞌa itote. Sereꞌok eharia yt uwe i itote. Iꞌewyte iꞌytyk hap yt tuꞌu kuap itote. 21Ahekareꞌen watopag yne atipy pe Tupana po pe pote ti aipyꞌa piat aiwanetup hap iꞌewyte toineꞌen aru aat kaꞌap Tupana wywo atipy pe e. Maꞌato mesuwarote yn ahekat watiꞌatunug pote iꞌewyte aipyꞌa piat aiwanetup hap mesuwarote yn aru topyhuꞌat aat kaꞌap e Iesui tomimuꞌeria pe mekewat yityꞌok totiaria pe.

Iruka 11.34-35 Piat Ewy

22Uhekatuwyria eheha pytig hap ti aikiotã ariãty ewy eipiit ete heremo kahato. Katupono ehapytig pote ti ehepe waku kahato eipiit moẽtyhot muap upi hamo. 23Maꞌato yt ehehapytig i pote ti yt heremo kahato i kat koꞌi kat koꞌi eiꞌakasa hap koꞌi e. Miꞌi pote yne eipiit pe iꞌypyryp sese puo yn ehewyry hap ewy e. Yt eweimohey i pote aikotã iꞌypyryp wato sese puo yn ehewyry hap ewy eweipyhuꞌat eiwanetup hawe e.

Yt Etimotypot Kuap I Tupana Iꞌewyte Ehekat

Iruka 16.13 Piat Ewy

24Pyno yt aikotã kuap i semiit tipotpap nug tekaraiwa typy ok takat toꞌotupuo Maꞌato typy ok toineꞌen hawyi wẽtup ok watikyꞌe poꞌog hawyi wẽtup ok yt watikyꞌe hin i sio wẽtup ok mikyꞌesat ewy watunug neran pote wẽtup ok mikyꞌesat ewy yt watunug kuap i. Pyno yt ewetunug neiꞌo miꞌi hap ewy neꞌi sio Tupana eiwemotypot turan pykai iꞌewyte ehekat eiwemotypot pote yt karãpe i Tupana sese eweikuap.

Yt Erewanetup Teiꞌo Eheineꞌen Hap Etiat

Iruka 12.22-24 Piat Ewy

25Miꞌi tupono yt naku i eweiwanetup koꞌi koꞌi -Aikope pyi aru aimiꞌu aheꞌuꞌi ahesokpe ahesapo hy eweiꞌe hap kape. Aikope pyi aru aheineꞌen hap eiꞌe hap kape yn yt naku i. Katupono ti eiwepiit hap sese eheineꞌen hap sese yt tuut i eimiꞌu wato hap kaipyi. Taꞌi eiwepiit hap sese yt tuut i eheꞌuꞌi kahato hap kaipyi ehesokpe kahu kahato hap kaipyi e. 26Pyno apo aipiit apo poꞌog waku ehesokpe koꞌi kai. Eiwehaꞌat ro weitaria ewowi. Miꞌiria ti yt karãpe i koi iꞌatuꞌe. Miꞌi pote yt taꞌatupirik kuap taꞌatumiꞌu taꞌatuko kaipyi. Yt kat i iꞌatuꞌyat iꞌatumiꞌu eiam maꞌato Tupana miꞌatupoi tukupteꞌen. Pywo pe ti uiwyriaꞌin eiperia ti poꞌog Tupana wanetup hawe weitaria kai. Miꞌi tupono ti ehewowi poꞌog aiꞌywot atipy piat tuwanetup weitaria ewowiat hap kai. 27Pyno eiperia ti yt wẽtup ok i iꞌywoporo kuap eheineꞌen motꞌi hap. 28Miꞌi tupono yt kat hamo i eiwanetup koꞌi koꞌi aikope pyi aru atipuẽti uhesokpe eweiꞌe hap ete. Yt kat hamo i eweiꞌe -Aikope som uhesokpe atipuẽti aru eiꞌe hap kape yn eiwewanetup koꞌi koꞌi e. Pyno eiwehaꞌat ro ipohyt koꞌi kape aikotã teꞌeruwepainug hap kape. Katupono mohyt koꞌi yt teꞌeruwanetup koꞌi koꞌi hin i aikopepyi aru uhesokpe e hap kape. Iꞌewyte ipohyt yt tuwesokpe piꞌig aat kaꞌap hin i teꞌeruwepainug hamo. 29Pywo pe ti areꞌe ehepe saꞌawyꞌi aiporekuat pot Sarumau hekat kahato rakat hesokpe ikahuria kahato wen maꞌato hesokpe yt putꞌok e hin i mesuwarotiat ipohyt koꞌi ikahu hap ete e. 30Miꞌi hawyi mekewat yahig upiat gaꞌakyt koran pohyt wap iꞌatuꞌe hawyi mukiꞌite igag naꞌyn hawyi ahemyyp aria wo yn naꞌyn waku. Taꞌi Tupana tiꞌatupainug kahato gaꞌapy koꞌi. Miꞌi hap ewy ti Tupana eipainug kuap kahato hat toineꞌen. Katupono miꞌi hap Tupana mohey ehepiat hap kurin kahato pote. 31Pyno yt naku i eheineꞌen hap ete eiwanetup koꞌi koꞌi. Aikope pyi aru ahesokpe watipuẽti eweiꞌe. Aikope pyi aru aimiꞌu watipuẽti eweiꞌe. Aikope aru ahesapo hy watipuẽti eweiꞌe. Yt naku i miꞌi hap kape yn eiwanetup. 32Katupono iraniaꞌin yt Tupana mohey i haria ti miꞌi koꞌi kape yn teꞌeruwanetup. Pyno yt naku i miꞌiria ewywuaria eweikupteꞌen katupono ti Aiꞌywot atipy piat tikuap kahato yne kat koꞌi kat koꞌi eipo pe yt kat i eimikyꞌesat koꞌi. Eikawiatno hat eipowyro hatno toineꞌen e. 33Waku poꞌog ni eweiwanetup eipyꞌa pe aat kaꞌap aikotã aru ewetunug Tupana uiporekuatno e hap kape yn. Waku ewetunug imikyꞌesat ewy pote yn eheineꞌen kuap hamuat Tupana tum ehepe. 34Pyno yt naku i eiwanetup mukiꞌite wuat niatpo aru eiꞌe hap kape neꞌi maꞌato waku eiwanetup koityꞌi wuat raꞌyn niatpo hap kape yn waku. Katupono yt naku i watuwanetup mukiꞌite wuat niatpo hap kape koityꞌi.

Currently Selected:

Mateu 6: mav

Highlight

Copy