Mateu 7
7
Haga 7
Yt Ereineꞌen Uwe Waku Uwe Yt E Hatno
Iruka 6.37-38; 6.4-42 Piat Ewy
1Miꞌi hawyi poꞌog toꞌe Iesui temiitꞌin me yityꞌok tote -Yt naku i ewehenoi iraniaꞌin etiat iraniaꞌin me Yt naku i miꞌi eꞌe hap. Maꞌato miꞌi tã neꞌi ewetunug mote Tupana toꞌe wy yt naku i en e aru ehepe. 2Katupono ti aru ewehenoi iraniaꞌin etiat yt naku i eiꞌe hap miꞌi pote ti aru Tupana iꞌewyte toꞌe ehepe yt naku i eiperia e. Katupono koran eiminug hap oktan ne ti aru Tupana tunug ehepe. 3Pyno yt naku i ti eiwehaponik ewy eha piat hu hit toineꞌen hap kape pote waku atihep teran eha piat hu hit yt ereꞌe kuap katupono ewat eha pe toineꞌen poꞌog iwato ariaꞌyp sapen iwat ewy eha piat kai. Miꞌi ewat iwato rakat ri waku etihep hawyi waku etihep ewyꞌok eha piat e. Miꞌi hap ewy ti yt naku i eweikat iraniaꞌin minug saꞌag koꞌi karãpe yt eweihep i te eiminug saꞌag. Waku saꞌawyꞌi etimohãpyk o eminug saꞌag koꞌi hawyi etipowyro kuap ewy iꞌatuminug saꞌag mohãpyk hamo. 4Kat hamo ten ereꞌe ewyꞌok pe -Atihep teran eha piat hu hit ereꞌe toineꞌen ne eha piat ariaꞌyp sapen wywo te. 5Pyno waku yt toꞌe hap ewywuatꞌi inug haria miꞌiria ti waku ihep taꞌatueha piat ariaꞌyp sapen. Taꞌatuehapytig iraniaꞌin eha piat hep kuap hamo. 6Yt ewetum neiꞌo wakuat Tupana ehay awareria ewywuaria haiwot rakaria pe iꞌatumiꞌu wo katupono ewetum mote ti aru teꞌeruwemorem naꞌyn ehekatuꞌu hamo. Iꞌewyte yt eweiporokpun neiꞌo ehewahi ikahu rakat ewywuat Tupana ehay hamuat koꞌi eꞌyian kai katupono ti aru eweiporokpun pote ti aru taꞌatuꞌakit akit hawyi taꞌatumopit pit kahato neꞌi raꞌyn. Katupono ti miꞌiria Tupana ewanikap sese tukupteꞌen mote.
Waku Ehẽtup Waku Etikat Waku Teg Teg Hamo Okenꞌypy Ete Waku Hap Puẽti Hamo
Iruka 11.9-13 Piat Ewy
7Miꞌi hawyi poꞌog tohenoi -Uiwyriaꞌin uheinytꞌin karãpe ewehẽtup kahato Tupana kape eimikyꞌesat koꞌi miꞌi hawyi tutum ehepe yne eimiẽtup koꞌi. Miꞌi tupono waku eweikat kahato aikope aikope toineꞌen imiium ehepiat wat koꞌi. Waku okenꞌypy ete teg teg eweiꞌe eimikyꞌesat ẽtup hamo hawyi aru tuweꞌokenhypꞌok taꞌyn ehewowi emikyꞌesat koꞌi ium hamo. 8Katupono uwe uwe hẽtup Tupana kape miꞌi ti tomiẽtup ipuẽti kuap Tupana kaipyi. Iꞌewyte ereineꞌen okenꞌypyhyp tote teg teg ere emikyꞌesat ẽtup hamo pote Tupana hoꞌokenhypꞌok toekenꞌypy emikyꞌesat ium hamo. 9Uhemiitꞌin karãpe ehepe eimepyt hẽtup waku rakat turan apo iꞌywot tum neꞌi -Atikyꞌesat uꞌi uiꞌywot e turan pote ewetum uꞌi tope e. Yt ewetum i eimepyt pe nu neꞌi -Atikyꞌesat kahato uꞌi mamai papai e pote ewetum naꞌyn ehaꞌyru ehakiꞌyt pe uꞌi e. 10Iꞌewyte karãpe eimepyt hẽtup pira puꞌi pote apo ewetum moĩ neꞌi eimepyt pe. 11Pyno miꞌi hap ewy ti eipe yt naku i nug haria wo wote pykai eweikuap kahato waku rakat ium eimepytꞌin piat hap maꞌato ti eiꞌywot atipy piat poꞌog poꞌog wakuat wuatꞌi mesuwarotiat miitꞌin kai miꞌi tupono miitꞌin miẽtup wakuat yn tutum kuap ehepe i Iesui.
12Pyno waku ewetunug aikotã iraniaꞌin tunug wakuap ehetiat hap ewy te waku ewetunug iraniaꞌin me aikotã mekewat Muisei woꞌonapin hap kaipywiat Tupana ehay moherep haria mienoi ewy e yityꞌok tote.
Iruka 13.24 Piat Ewy
13Pyno ti waku eiwehytꞌok kuap muap hit upi yn atipy kape maꞌato mekewat muap iwato rakat upi ti ehewyry yt niatpo hin i wen maꞌato mekewat muap ti ehereto hoꞌopot wuatꞌi eꞌat piat hap kape. Maꞌato ti typyꞌi kahato iꞌatukohyewyry mekewat muap wato upi. 14Pyno mekewat okenꞌypy atipy kapiat wyti kurin kahato miꞌi pote mekewat muap upiat ehewyry hamo niatpo kahato eheineꞌen wuatꞌi eꞌat piat puẽti hamo. Miꞌi pote ti yt iꞌatu hin i mekewat muap upiat hewyry rakaria e.
Uimohey Haria Eweikuap Iꞌatuminug Hap Kaipyi
15Miꞌi hawyi toꞌe Iesui itotiaria pe -Uimimuꞌeria e eiweꞌeg wo o mekewat Tupana ehay moherep yt pywuat piat i haria wywo e. -Uruimohey kahato Tupana iꞌatuꞌe pykai yt Tupana ehay ewy i taꞌatumoherep -Uruto ti Tupana hũria eiꞌewywuaria te iꞌatuꞌe pykai eimaꞌat teran haype neꞌi uimohey ehepiat hap moma teran haype i aikotã awahuru koꞌi tuꞌu teran aihũria hap ewywuaria neꞌi tukupteꞌen eipyꞌasetpe eimuꞌe hamo e. 16Iꞌatuminug saꞌag koꞌi ete ti aru miꞌiria eweikuap e. Aikotã mekewat hu yp kaipyi yt tuwẽtem kuap Uwa he rakat hap ewy tukupteꞌen. Iꞌewyte yt karãpe i eweipuẽti kuap mekewat hyri ãpo Wiku Uwa he rakat. 17Pyno torannia mikoi yp waku rakaria kaipyi tuwẽtem haat waku rakaria ti raꞌyn maꞌato mikoi yp yt naku i kaipyi ti tuwẽtem haat yt naku i rakaria ti raꞌyn. 18Pyno ti mikoi yp wakuat sat wyti yt karãpe i iywa saꞌag neꞌi. Iꞌewyte mikoi yp saꞌag kaipyi ti yt aikotã kuap i tuwẽtem iywa waku rakat. 19Maꞌato meimewat torannia mikoi yp yt haat kahato i rakaria ti waku miterek sok wuk wo yn naꞌyn waku e. 20Taꞌi eweikuap kahato ti aru Tupana ehay enoi yt pywo pe i haria aikotã iꞌatuminug koꞌi ete eimaꞌat teran hap koꞌi.
Iruka 13.25-27 Piat Ewy
21Katupono ti aru yt torannia i uhet suat haria uikaꞌiwat kahato En uikaꞌiwat kahato En e haria tuwehytꞌok aikope Tupana toineꞌen morekuatno hap tote. 22Mekewat wehytꞌok hap eꞌat pe ti aru typyꞌi kahato miitꞌin teꞌeroꞌe uhepe -Uikaꞌiwat waku kahato En miꞌi pote esaikap wywo neke uruhenoi henoi kahato ehay miitꞌin me Tupana iꞌatuꞌe aru. Iꞌewyte teꞌeroꞌe aru eset no neke uruisopo maꞌãu saꞌag miitꞌin piit pyi iꞌatuꞌe. Iꞌewyte urutunug kahato neke yt uwe minug kuap i ewywuat koꞌi iꞌatuꞌe aru. 23Maꞌato ti aru miꞌiria pe areꞌe -Uhyt mana yt karãpe hin i ti worohoꞌokuap eipe areꞌe ti aru. Eweiwat ro meiũpepyi pya uiꞌyatypepyi are ti aru miꞌiria pe katupono yt nakuap i nug haria ti eipe are ti aru yt uiꞌe hap nug i haria pe e Iesui.
Etunug No Eieineꞌen Hap Nu Totiat
Iruka 6.47-49 Piat Ewy
24Uiwyriaꞌin pywo ti rat uwe uwe ikuap uiꞌe hap hawyi topyhuꞌat uiꞌe hap nug hat miꞌi Tupana mimoweꞌeg kahato wo topyhuꞌat e Iesui. Pywo ti rat uwe uwe uhehay nug hat miꞌi hat topyhuꞌat aikotã getap nug kuap kahato hat -Pyno sig waku atunug uiꞌyat meiũpe yi heg me nu totiat e hat ewy kahato toineꞌen. 25Miꞌi hawyi putꞌok e iꞌaman popit kahato hap hawyi yꞌy mutꞌe kahato iꞌewyte ywytu uato hawyi ihyeput haty wo iꞌyat kape pykai yt taꞌat i hin i. Iheg me toineꞌen nu totiat pote. 26Maꞌato uwe uwe uhehay ikuap wen maꞌato yt tutunug i uiꞌe ewy miꞌi hat wyti aikotã wẽtup ok miit wanetup hap yt putꞌok e i tuweꞌyat nug yikyt rotiat neꞌi hamo. 27Miꞌi turan iꞌaman popit raꞌyn hawyi yꞌy mutꞌe raꞌyn hawyi ywyt uato raꞌyn mekewat netap meremo iꞌypyputꞌe raꞌyn hawyi iꞌaporokꞌe raꞌyn e Iesui miitꞌin sem me yityꞌok totiaria pe. 28Miꞌi hawyi karãpe Iesui ihay kahu raꞌyn itote hawyi miitꞌin sem teꞌeroꞌe -Kat poteĩ meiẽwat miit ainapin yt iraniaꞌin woꞌonapin hap ewy hin i iꞌatuꞌe. 29Miꞌi ti aimuꞌe meimewat woꞌomuꞌe koro haria piat ainapin hap yt ewy hin i iꞌatuꞌe maꞌato tuweupi kahato aimuꞌe kuap kahato ihay hãpyk iꞌatuꞌe.
Currently Selected:
Mateu 7: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
