Génesis 8
8
Yet Jix Tantoj Jaꞌ Jaꞌ
1Jix lawi tuꞌ, jix naꞌletej naj Noé yu Jehová, cꞌal yetoj masanil noꞌ noꞌ eyoctoj yetoj yul teꞌ barco tuꞌ, catuꞌ jix aletej jun miman kaꞌeꞌ yu Jehová yibꞌan jaꞌ, yet watxꞌ chi tantoj jaꞌ jaꞌ tuꞌ. 2Jix maji jaꞌ snukꞌ jaꞌ jix aol yul-laj txꞌotxꞌ, cꞌal jantaj jaꞌ mimej jaꞌ jix eytej seclabꞌoj satcan, catuꞌ jix oc tucan yakꞌon nabꞌ. 3Niẍtejal cꞌal tuꞌ xin, jix tantoj jaꞌ yin joebꞌ xꞌaaw. 4Jujlajonebꞌxa cꞌu yet sjuj xꞌaaw, catuꞌ jix can bꞌatxan teꞌ barco bꞌey sjolom wonan Ararat. 5Jaꞌ yet bꞌabꞌel cꞌual yet slaonebꞌ xꞌaaw txequel xacꞌal sjolomlaj mimej wonan naat eyaoj, yutol lalan xacꞌal stantoj jaꞌ jaꞌ tuꞌ.
6Yin xa scawinaj cꞌu jix sjajon swentanail teꞌ barco waꞌnebꞌil yu naj Noé tuꞌ, 7catuꞌ jix sjajon eltej jun noꞌ joo naj, jix ecꞌ cꞌal jenenoj noꞌ yibꞌan jaꞌ yin yechbꞌanen noꞌ yet chi tantoj jaꞌ jaꞌ sat txꞌotxꞌ txꞌotxꞌ tiꞌ. 8Jix sjajon pax eltoj jun noꞌ uch naj Noé tuꞌ, yet chi yilon noꞌ ta tajin xa sat txꞌotxꞌ. 9Jaꞌ noꞌ tuꞌ jix meltzo junelxa bꞌey teꞌ barco tuꞌ, yutol cꞌamto bꞌey chi skeꞌ yoc pajan noꞌ. Caw nonaj tocꞌal el sat txꞌotxꞌ txꞌotxꞌ tiꞌ yu jaꞌ jaꞌ tuꞌ. Jix yaon eltej skꞌabꞌ naj Noé tuꞌ yet chi ẍaꞌon octoj noꞌ tzꞌiquin naj yul teꞌ barco tuꞌ.
10Jujebꞌ to cꞌu jix yechbꞌane Noé tuꞌ, catuꞌ jix yaon eltej noꞌ uch tuꞌ junelxa. 11Lalanxa wal skꞌejbꞌi ey yet jix meltzo noꞌ junelxa, nacꞌbꞌilxa oc jun xaj teꞌ olivo yu noꞌ. Jaxca tuꞌ jix yun snaꞌcha el yu naj Noé, tol lalanxa stajtoj txꞌotxꞌ txꞌotxꞌ tiꞌ. 12Jujebꞌ to cꞌu jix yechbꞌane naj, catuꞌ jix sjajon eltej noꞌ uch tuꞌ naj junelxa, jaꞌ yet tuꞌ ma xa meltzo noꞌ.
13Jaꞌ naj Noé ey 601 abꞌil skꞌinal, yet jix can txꞌotxꞌ txꞌotxꞌ tiꞌ yin tajinal. Yet bꞌabꞌel cꞌu yul bꞌabꞌel xꞌaaw, jix yiꞌon el smajil yibꞌan teꞌ barco tuꞌ naj Noé, catuꞌ jix yilon naj tol tajin xa txꞌotxꞌ txꞌotxꞌ tiꞌ. 14Jaꞌ yet 27 xa yeoc yet scaabꞌ xꞌaaw, caw tajin xa txꞌotxꞌ txꞌotxꞌ tiꞌ sicꞌlebꞌil. 15Jix yalon Jehová tet naj Noé jaxca tiꞌ: 16Elantej yul teꞌ barco tiꞌ yetoj ja wistil, yetoj ebꞌ ja cꞌaal cꞌal ebꞌ ix ja walibꞌ. 17Catuꞌ cha wiꞌon eltej masanil junjun tujan noꞌ noꞌ eyoctoj ja wetoj: Noꞌ tzꞌiquin, noꞌ jobꞌbꞌeal noꞌ, noꞌ xol-laj teꞌal noꞌ, noꞌ chi sjutx scꞌul. Uneꞌwoj ojabꞌ noꞌ, yakꞌ ojabꞌ noel sat txꞌotxꞌ txꞌotxꞌ tiꞌ noꞌ, ẍi Jehová.
18Jix lawi tuꞌ xin, jix eltej naj Noé yetoj yistil, yetoj cꞌal ebꞌ scꞌaal cꞌal ebꞌ yalibꞌ yul teꞌ barco tuꞌ. 19Catuꞌ jix eltej masanil noꞌ noꞌ, jatacꞌalaꞌ junjun tujan yinatil noꞌ. 20Jix lawi tuꞌ, jix waꞌnele a jun yet xaambꞌal sattaj Jehová yu naj Noé, catuꞌ jix iꞌletej noꞌ noꞌ tol watxꞌ yoc yin xaambꞌal yu naj, noꞌ tzꞌiquin, cꞌal noꞌ tol chi oc cꞌaltaꞌ yin xaambꞌalil. Junjun cꞌal tujan noꞌ jix yiꞌel Noé tuꞌ, jix yakꞌon tzꞌaꞌ yibꞌan yet xaambꞌal sattaj Jehová. 21Caw sukꞌukꞌi yoc sabꞌ jun xaambꞌal tuꞌ jix yabꞌ Jehová. Jix snaꞌon jaxca tiꞌ: Manxa oj watoj sjowal jin cꞌul yibꞌan txꞌotxꞌ txꞌotxꞌ tiꞌ syaꞌiloj spenail ebꞌ ánima tiꞌ, yutol yet tax cꞌal unin ánima ebꞌ, asan cꞌal spenail chi yoche ebꞌ chi yunne; man yu oj tuꞌ oj to wakꞌ cam masanil tzet iquis, jaxca jix wute yet junel tiꞌ.
22Yajbꞌan eyecꞌ jun yul yibꞌankꞌinal tiꞌ, ey tzet oj awle oj, oj syambꞌa sat yawo ebꞌ; ey stiempoal kꞌakꞌ, ey stiempoal siic; ey nabꞌilkꞌinal, ey waresma, ey cꞌualil, ey pax akꞌbꞌalil, ẍi Jehová yin snaꞌbꞌal.
Currently Selected:
Génesis 8: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
