Lucas 4

Jaꞌ Yet Jix Yakꞌlen Naj Diablo Yijbꞌan Jesús Yin Spenail

(Mateo 4:1-11; Marcos 1:2-13)

1Jaꞌ Naj Jesús, eyoc Santo Espíritu yin Naj sicꞌlebꞌil. Jix meltzotej bꞌey jaꞌ miman Jordán. Jix iꞌletoj yu Santo Espíritu tuꞌ bꞌey jun cusiltaj txꞌotxꞌ. 2Cawinaj cꞌu jix bꞌetecꞌ tituꞌ. Jix yakꞌlen naj diablo yijbꞌan Naj yin spenail. Cꞌam niꞌoj tzet jix sloꞌ yet eyecꞌ tituꞌ. Jix tit swail Naj sicꞌlebꞌil. 3Yuxan jix yal naj diablo tuꞌ tet Naj jaxca tiꞌ:

—Ta yel tol Scꞌaal jaach Dios, al tet jun chꞌen tiꞌ, tol chi oc loꞌbꞌeal,#4:3 Jaꞌ yin Griego chi yal yin pan yutol jaꞌ pan eyoc sloꞌbꞌeoj ebꞌ, jaxca chi yun cu loꞌon paat junjun cꞌal cꞌu, queytuꞌ jix yun ebꞌ yet jun tiempoal tuꞌ. ẍi naj tet Jesús.

4Jix yalon Jesús tet naj:

—Jaꞌ yul An Juun Tzꞌibꞌebꞌilcanoj chi alon jaxca tiꞌ: “Man asanne oj yu loꞌbꞌe yuxan iquis jon. Chi cu iquisbꞌi pax ecꞌ yu skꞌane Dios,” queytuꞌ yalon yul An Juun,#Deuteronomio 8:3. ẍi Jesús tet naj diablo.

5Jix lawi jun tuꞌ, catuꞌ jix iꞌletoj Jesús yu naj bꞌey jun miman wonan. Jix txꞌoxle masanil wan mimej conobꞌ yul yibꞌankꞌinal tiꞌ tet Jesús yin jun txolan yu naj. 6Catuꞌ jix yalon naj tet Jesús tuꞌ jaxca tiꞌ:

—Oj jaach waoc yaawiloj masanil wan mimej conobꞌ tiꞌ, catuꞌ oj wakꞌ ey jaach masanil sbꞌeomal. Jaꞌ masanil wan tiꞌ, eyoc yul jin kꞌabꞌ an, yuxan chi skeꞌ wakꞌon tet mac chi yal jin cꞌul. 7Ta chach ey kaan jin sattaj an, catuꞌ cha walon ja bꞌa ey jin an, oj wakꞌ masanil wan tiꞌ ey jaach, ẍi naj diablo tet Naj Jesús.

8Catuꞌ jix yalon Naj Jesús tuꞌ tet naj jaxca tiꞌ:

—Jaach Satanás, elan jin cꞌatan an. Yutol chi yal yul An Juun Tzꞌibꞌebꞌilcan jaxca tiꞌ: “Chex ey kaan sattaj Dios Kaawil. Asan Dios che yakꞌ servil, ẍi yul An Juun,”#Deuteronomio 6:13. ẍi Jesús tet naj diablo.

9Jix lawi jun tuꞌ, catuꞌ jix iꞌle pax toj Jesús yu naj diablo bꞌey conobꞌ Jerusalén. Jix yiꞌon atoj naj bꞌey ẍumuc stemplo Dios. Jix yalon naj tet Jesús jaxca tiꞌ:

—Ta yel tol Scꞌaal jaach Dios, kꞌojeytoj ja bꞌa sat txꞌotxꞌ tuꞌ. 10Yutol chi yal can yul An Juun Tzꞌibꞌebꞌilcan jaxca tiꞌ:

Oj ẍejtej ebꞌ yángel Dios yu ja steyneni.

11Oj jaach ẍaꞌ ebꞌ ja wey apnoj yetoj skꞌabꞌ, yet watxꞌ man oj yasitoj ja wajan yin chꞌen, ẍi yul An Juun tuꞌ,#Salmos 91:11, 12. ẍi naj diablo tuꞌ.

12Jix yalon pax Jesús tet naj:

—Chi yal pax yul An Juun Tzꞌibꞌebꞌilcan tuꞌ jaxca tiꞌ: “Manche ja wakꞌlen ja wijbꞌan ja Dios, Kaawil,” ẍi yul An Juun tuꞌ,#Deuteronomio 6:16. ẍi Jesús tet naj.

13Jix lawi jun tuꞌ, cꞌamxa junojxa porobꞌal jix naꞌcha yakꞌon naj diablo tuꞌ. Yuxan jix bꞌejlecan Jesús yu naj, yin junoj tiempoal.

Jaꞌ Bꞌey Galilea Jix Ẍaꞌel Yich Yopiso Naj Jesús

(Mateo 2:12-17; Marcos 1:14-15)

14Jix lawi jun tuꞌ, catuꞌ jix paxtoj Jesús bꞌey Galilea, caw ey cꞌal oc Santo Espíritu yetoj. Eyman jix abꞌcha skꞌumal Jesús bꞌey wan lugar tuꞌ. 15Jix ecꞌ cuywal bꞌey wan snail sculto ebꞌ Israel. Masanil ebꞌ ánima jix alon Naj watxꞌil.

Yet Eyecꞌ Jesús Bꞌey Nazaret

(Mateo 13:53-58; Marcos 6:1-6)

16Jix lawi jun tuꞌ, jix too Jesús. Jix apni bꞌey Nazaret bꞌey jix chꞌibꞌi. Jaxa yet scꞌual xewilal ebꞌ Israel,* jix oc yul snail sculto ebꞌ, jaxca taꞌ sbꞌeybꞌal. Jix a linanoj yu yawten a An Juun Tzꞌibꞌebꞌilcanoj.#4:16 Jaꞌ sbꞌeybꞌal ebꞌ, tol chi a linan ebꞌ yet chi awtele An Juun Tzꞌibꞌebꞌilcanoj. 17Jix yakꞌon ebꞌ jun An Juun Tzꞌibꞌebꞌilcan tet Naj, An Tzꞌibꞌebꞌil yu jun ẍejabꞌ Dios chi yij sbꞌi Isaías. Jix xuyontoj, catuꞌ jix seyon eltej bꞌey chi yal jaxca tiꞌ:

18Eyoc Yespíritu Kaawil win an, yutol jaꞌ jix akꞌon wopiso yin walon el watxꞌ kꞌane tet ebꞌ mebꞌa. Jain jix jin chejletej yu wakꞌon smimanil scꞌul ebꞌ ey scuscꞌulal. Chi walon pax tet ebꞌ jaxca tol preso yeocoj, tzet utbꞌil chi yun scolcha ebꞌ. Chin jajon sat ebꞌ cꞌam chi skeꞌ yilwi. Jaꞌ ebꞌ eyoc yalan ebꞌ yaaw pena, chin jaj can el ebꞌ an.

19Yetoj pax oj, yu walon can eloj tol jix jul stiempoal jun colbꞌanile chi yakꞌ Dios Kaawil, ẍi yul An Juun Tzꞌibꞌebꞌilcan tiꞌ,#Isaías 61:1, 2. jix awtele a An yu Jesús.

20Jix lawi tuꞌ xin, catuꞌ jix ẍulun pax can ey An Naj. Catuꞌ jix yaon pax toj tet jun mactxequel ey yopiso bꞌey jun snail culto tuꞌ. Jix ey chotan Jesús, catuꞌ jix cuywa tet ebꞌ.#4:20 Jaꞌ sbꞌeybꞌal ebꞌ, tol chi ey chotan ebꞌ yet chi yalon el skꞌane cu Mam Dios ebꞌ. Masanil jantaj ebꞌ eyoctoj yul snail culto tuꞌ, jix oc tꞌanan ebꞌ yin Naj. 21Jaꞌ yet jix ẍaꞌon el yich yaloni, jix yalon tet ebꞌ jaxca tiꞌ:

—Jaꞌ yet jun cꞌu tiꞌ, tol lalan yunen el je sattaj tzet chi yal An Juun Tzꞌibꞌebꞌilcan tiꞌ, ẍi Jesús tet ebꞌ.

22Masanil ebꞌ yaman tituꞌ jix al-le Naj watxꞌil yu ebꞌ. Jix qꞌueya scꞌul ebꞌ sicꞌlebꞌil, yutol caw watxꞌ wan tzet jix yal tet ebꞌ. Ey pax ebꞌ jix alon jaxca tiꞌ:

—Ilaꞌ tol scꞌaal José jun winaj tiꞌ, ¿bꞌeyla tuꞌ chi yiꞌoc sjelanil? ẍi ebꞌ yin Jesús.

23Yuxan jix yal Jesús tet ebꞌ jaxca tiꞌ:

—Wotaj tol oj je yal jun qꞌuetxan kꞌane tiꞌ ey jin an, “Jaach anwam, ante can ja bꞌa yin sbꞌabꞌelal kil jon,” tejan je chi. Tejan oj je yal pax jaxca tiꞌ: “Chi kabꞌ jon tol miman tzet jix el ja wunen bꞌey Capernaúm, ute pax bꞌey cu conobꞌ tiꞌ kil jon,” je chi ey jin an.

24Caw yel chi wal ey jex, cꞌam junoj ẍejabꞌ Dios ey yeloc apnoj yul sat ebꞌ yet conobꞌ. 25Che naꞌtej skꞌaneal naj Elías yet peyxa, tzet utbꞌil jix yun tuꞌ. Nan scan abꞌil ma yakꞌ nabꞌ. Jix jul jun miman wail yibꞌan masanil ánima. Jaꞌ yet jun tiempoal tuꞌ, ecꞌal ebꞌ ix ket Israelal camnajxa yichamil. 26Manaj pax tet ebꞌ ix jix chejletoj naj Elías colwaoj. Asan tet jun ix man Israeloj, jun ix a Sarepta scawilal conobꞌ Sidón, jaꞌ tet ix tuꞌ jix julecꞌ colwaoj. 27Naꞌwej pax tej skꞌaneal junxa ẍejabꞌ Dios chi yij sbꞌi Eliseo. Ecꞌal ebꞌ ket Israelal jix michꞌcha oc yu jun yaꞌbꞌil chi kꞌaꞌtoj ánima yu, jun chi yij sbꞌi lepra.* Cꞌam pax junoj ebꞌ jix waꞌxi can scꞌul yu naj Eliseo tuꞌ. Asan jun naj man Israeloj, Naamán sbꞌi, a Siria naj, asan jun tuꞌ jix waꞌxi can scꞌul yu naj Eliseo tuꞌ, ẍi Jesús tet ebꞌ.

28Jaꞌ yet jix yabꞌen ebꞌ eyoctoj yul snail culto tuꞌ wan tiꞌ, caw jix tit sjowal ebꞌ yin Naj. 29Yuxan jix a linan ebꞌ, jix iꞌletoj Naj yu ebꞌ bꞌey stiꞌ conobꞌ tuꞌ. Jix apni ebꞌ bꞌey sjolom jun wonan spacꞌanil conobꞌ tuꞌ, catuꞌ jix yochen ebꞌ jix stentoj sat pacꞌan tuꞌ. 30Jal pax Naj Jesús jix elcan mocꞌna xol ebꞌ, catuꞌ jix toi.

Jun Winaj Jix Elcan Jun Pena Espíritu Yin Yu Jesús

(Marcos 1:21-28)

31Jix too Jesús bꞌey conobꞌ Capernaúm, yul yet Galilea. Jix cꞌoli scuyle ebꞌ ánima yet scꞌual xewilal ebꞌ Israel* yu Naj. 32Jix qꞌueya scꞌul ebꞌ yabꞌen wan cuybꞌanile tuꞌ, yutol jaꞌ yet lalan skꞌanabꞌi, jix txeclo eloj, tol akꞌbꞌil yopiso Naj yu Dios.

33Ey jun winaj eyecꞌ bꞌey snail sculto ebꞌ tuꞌ. Eyoc jun pena espíritu yin. Jix a yaw jun pena espíritu tuꞌ yin ipal, jix yalon jaxca tiꞌ:

34—Jesús a Nazaret, elan cu cꞌatan, ¿tzet ja walon ja wet kin? ¿Jam yu jon ja wakꞌon lawoj eloj yuxan chach juli? Wotaj mac jaach txequel. Jaach tiꞌ, sicꞌbꞌil jaach el yu Dios, ẍi jun pena espíritu tet Jesús.

35Jix tzuwa Naj yin jun pena espíritu tuꞌ:

—Tzꞌin ja chi. Elan yin jun winaj tiꞌ, ẍi Jesús tet jun pena espíritu tuꞌ.

Eyman jix kꞌojle ey naj sat txꞌotxꞌ yu jun pena espíritu tuꞌ, catuꞌ jix el yin naj. Cꞌam niꞌoj tzet jix ion naj. 36Jix qꞌueya scꞌul masanil ebꞌ jix iloni. Catuꞌ jix yalon ebꞌ jaxca tiꞌ:

—¿Tzet la ye wan kꞌane jix yal tiꞌ? Jaꞌ jun winaj tiꞌ caw ey yopiso, caw ey yip ẍejon el ebꞌ pena espíritu. Ilaꞌla, tol chi el yu Naj, ẍi ebꞌ.

37Eyman jix abꞌcha a skꞌumal Jesús xol ebꞌ ánima bꞌey wan lugar scawilal tuꞌ.

Jaꞌ Ix Sniꞌ Simón Pedro Jix Waꞌxi Can Scꞌul Yu Jesús

(Mateo 8:14-15; Marcos 1:29-31)

38Catuꞌ jix eltej Jesús yul snail sculto ebꞌ tuꞌ, catuꞌ jix too bꞌey sna naj Simón. Caw yaꞌey ix sniꞌ naj Simón tuꞌ yu kꞌakꞌal yaꞌbꞌil. Yuxan jix yal ebꞌ cꞌal yoc tean ebꞌ tet Jesús yu ix. 39Catuꞌ jix oc linan Jesús tuꞌ scꞌatan ix. Jix stenon oc tucan jun kꞌakꞌal yaꞌbꞌil tuꞌ. Eyman jix sicbꞌi scꞌul ix. Catuꞌ jix a linan ix tuꞌ, jix akꞌle servil ebꞌ yu ix.

Ecꞌal Ebꞌ Yaꞌey Jix Waꞌxi Can Scꞌul Yu Jesús

(Mateo 8:16-17; Marcos 1:32-34)

40Jaxa yet yeycꞌualil xin, masanil ebꞌ mactxequel ey syaꞌey yu yal cꞌal tzet yaꞌbꞌilal jix yiꞌtej ebꞌ scꞌatan Jesús. Jix sbꞌatxbꞌatoj skꞌabꞌ Naj yibꞌan junjun ebꞌ. Catuꞌ jix waꞌxi can scꞌul ebꞌ. 41Ecꞌal mac jix iꞌle can el pena espíritu yin yu Naj. Chi a yaw ebꞌ pena espíritu tuꞌ, chi yalon ebꞌ jaxca tiꞌ:

—Jaach tiꞌ, Scꞌaal jaach Dios, ẍi ebꞌ tet Jesús.

Jix tenchanele ebꞌ yu Jesús. Ma chaꞌle kꞌanabꞌ ebꞌ, yutol yotaj ebꞌ tol jaꞌton Cristo.*

Jix Ecꞌ Jesús Yalel Skꞌane Dios Yul-laj Yet Galilea

(Marcos 1:35-39)

42Jaxa yet jix sajbꞌi el xin, jix too Jesús tuꞌ xaamlaj conobꞌ bꞌey cꞌam ánima. Jix too pax ebꞌ ánima seyon ecꞌoj. Jix apni oc ebꞌ bꞌey eyecꞌ Naj tuꞌ, jix cꞌoli yoc tean ebꞌ yin Naj tol cꞌam chi too Naj. 43Jix yalon Naj tet ebꞌ jaxca tiꞌ:

—Sowalil chin ecꞌ wal can el watxꞌ kꞌane bꞌey wanxa conobꞌ, yet watxꞌ chi yabꞌ can oc ebꞌ tzet utbꞌil oj yun yoc Dios yin Yaawiloj. Jaꞌton yu jun tiꞌ yuxan chejbꞌil jintej an, ẍi Naj tet ebꞌ.

44Yuxan jix ecꞌ cꞌal Jesús yal can el skꞌane bꞌey junjun snail sculto ebꞌ yet Israelal bꞌey yul-laj yet Galilea tuꞌ.

Currently Selected:

Lucas 4: knj

Highlight

Copy