Luka 9
9
Yesu atuma vandongisi likumi na vavali
(Mateo 10:5-15; Mako 6:7-13)
1Yesu wasanene vandongisi likumi na vavali vaije kuli ikeye, co wavanene nzili na moko yakutundisa minzinzime yakujwala yoshe nakukangwisa mishongo. 2Co wavatumine kuya nakwambulula Vumwene vwa Njambi nakukangwisa vaka-kuvinja, 3#Luk 10:4-11; Vil 13:51 wavalekele ngwendi, “Kesi mwambate cuma cimo a vungenzi vweni, nambe mulamu, nambe lipakumuna, nambe vyakulya, nambe vimbongo, nambe vikoveyo vivali. 4Kwoshe kuje kuvakamitambula mwamuvwa, tumbameni ku njuvo ije vene noo mukatunda mu nganda ije, 5kwoshe kuje vakavyana kumitambula, co tundeni mu nganda ije, co totomoneni likungu ku myanja yeni ngeci cipwe cuma cakuvanangula.”
6Co vandongisi vaile vendanganene mu membo oshe nakwambulula Vin̄anda Vyavivwa nakukangwisa vanu kwoshe-ikwoshe.
Citanga ca Helonde
(Mateo 14:1-12; Mako 6:14-29)
7 #
Mat 16:14; Mak 8:28; Luk 9:19 Omo Helonde, muka-kushwana mu Ngalileya, wazivile vyuma vyoshe vije vyalingiwile, co wakele na citanga, omwo vanu vamo vakele nakwendeka ngwavo, “Yowano Muka-kumbwitika nasanguka ku vatsi.” 8Co vamo ngwavo, “Elinja nasholoka,” vamo ngwavo, “Umo wa vaka-kwimanena wa ku san̄ulu nasanguka lalo.” 9Co Helonde wendekele ngwendi, “Yowano njamutapele mutwe, oloni iyajo ou munalume injilinakuziva vyendi?” Co washakele manene kumona Yesu.
Yesu alisa vanalume vakupwa 5,000
(Mateo 14:13-21; Mako 6:30-44; Yowano 6:1-14)
10Miluwa va Yesu velukile vamulekele vyoshe vije vivalingile. Co waile amo navo wavatwalele kwavo lika ku nganda ivatumbwile Mbetesainda. 11Omo mbunga vazivile evi, co vamukavele. Wavatambwile nakuvambulwila vya Vumwene vwa Njambi nakukangwisa vaje vakele nakuvinja.
12Omo kwapwile cingwezi, vandongisi vaje likumi na vavali vezile kuli ikeye vendekele ngwavo, “Shandola vimbunga evi ngeci vaye ku membo na ku mahya awa amuyehi vakaliwaneneko vyakulya vakevo vavenya noku kwakulala, omwo muno munapu mu mambo yangoco.”
13Oloni Yesu wendekele kuli vakevo ngwendi, “Yeni vene vaaneni vyakulya ngeci valye.”
Co vamukumbulwile ngwavo, “Kutwesi na vyakulya vyeka kuvanga mikasha ya makende itanu na visi vavali. Kuma yove ushaka tuye nakulanda vyakulya vya mbunga yoshe eyi ndi?” 14(Kwakele vanalume vakupwa 5,000 kuje.)
Yesu wendekele kuli vandongisi vendi ngwendi, “Lekeni vanu vatumbame asi mu vimunga mu munga na munga mukale vanalume makumi atanu.”
15Omo vandongisi valingile ngacije, 16Yesu watambwile ije mikasha ya makende itanu na visi vavali, wakengele mwilu, co wakandelelele kuli Njambi, co wavipazwile, wavyanene kuli vandongisi vendi ngeci vavipangezelele vimbunga vya vanu. 17Voshe valile, vakutile, co vandongisi vakungulwile vimbazuvwila vije vyasaleleo vashulisile mitonga likumi na ivali.
Petulu atava ngeci Yesu ikeye Kilistu Wakuvwavesa
(Mateo 16:13-19; Mako 8:27-29)
18Litangwa limo omo Yesu wakele nakulombela kwendi lika, vandongisi vendi vezile kuli ikeye. Co wavehwile ngwendi, “Vanu valinakunjitumbula ngwavo yange iya?”
19 #
Mat 14:1-2; Mak 6:14-15; Luk 9:7-8 Vamukumbulwile ngwavo, “Vamo valinakwendeka ngwavo yove Yowano Muka-kumbwitika, veka lalo ngwavo yove Elinja, vakwavo lalo ngwavo yove umo wa vaka-kwimanena valaja uje nasanguka.”
20 #
Yow 6:68-69
Co Yesu wavehwile ngwendi, “Yeni oni munjitumbula ngweni yange iya?”
Petulu wamukumbulwile ngwendi, “Yove Wakuvwavesa wa Njambi.”
Yesu endeka a tuyando twendi na a kutsa kwendi
(Mateo 16:20-28; Mako 8:30—9:1)
21Asinoni Yesu wavasin̄ikile ngwendi kesi valekeko munu umo cuma eci. 22Co wendekele lalo kuli vakevo ngwendi, “Muna Munu napande kuyanda manene, co vakulunu vakamuvyana na vakulunu va vaka-kukombelela, na valongisi va majwi a Lishiko. Co vakamutwala ku kutsa, oloni munima ya matangwa atatu akasanguka.”
23 #
Mat 10:38; Luk 14:27 Co wendekele kuli vakevo lalo ngwendi, “Nga munu ashaka kunjikava, napande kulivyana ikeye vavenya, ambate cilindakano cendi a litangwa na litangwa, co anjikavangeye. 24#Mat 10:39; Luk 17:33; Yow 12:25 Omwo munu woshe ashaka kunyunga mwonyo wendi auzimbalesa, oloni munu uje azimbalesa mwonyo wendi omwo lizina lyange akauwana. 25Omwo nga munu afuka kaye koshe, oloni azimbalesa mwonyo wendi nambe kumufungulula vika awanao? Mwa vushunga vene nacimo cai! 26Nga munu anjizivila shwamwa na vilongesa vyange, co na Muna Munu lalo nendi akamuzivila shwamwa omo akaija mu vumpau vwendi na mu vumpau vwa Ishe na mu vumpau vwa tungelo vakujela. 27Mwa vushunga njimileka ngwange, kuli vamo kuno, kuvakatsi kuvanga vanamono Vumwene vwa Njambi.”
Kulimuka kwa Yesu
(Mateo 17:1-8; Mako 9:2-8)
28 #
2 Pet 1:17-18
Munima ya matangwa atanu na avali omo wendekele vyuma evi, Yesu waile amo na Petulu, na Yowano, na Yakomba ku munkinda nakulombela. 29Simbu wakele nakulombela, cihanga cendi cemukile, co vuzalo vwendi vwatokele too ngwe ceke. 30Vwasi-vwasi vanalume vavali vakele nakwendeka nendi. Vakevo vapwile Mosesa na Elinja, 31vaje vasholokele mu vumpau vwa mwilu vakele nakwendeka na Yesu a ngila ije yakushulisilamo vwasi vutumbe vwa Njambi a kutsa kwendi mu Yelusalema. 32Petulu na vaje vaakele navo vakele mu tulo, oloni omo vendukile vamwene vumpau vwa Yesu na vanalume vavali vaje vemanene navo. 33Omo vaje vanalume vasezele Yesu, co Petulu wendekele kuli ikeye ngwendi, “Shukulu, mwamuvwa kuli yetu nga tukala kuno! Tutunga mambalanda atatu, limo lyove, limo lya Mosesa, limo lya Elinja.” (Kazivukile vije vyakele nakwendeka.)
34Simbu Petulu wakele nakwendeka, lishelwa lyezile nakuvafwika, co vandongisi vazivile lyova omo lishelwa lyavafwikile. 35#Isa 42:1; Mat 3:17; 12:18; Mak 1:11; Luk 3:22 Co lijwi lyatundile mu lishelwa lyendekele kuli vakevo ngwalyo, “Ou ikeye Munange injinaangula, mutolilileni!”
36Omo lijwi lyolokele, Yesu wakele endi lika. Co vandongisi volokele kuluu a vyuma vyoshe evi, co a simbu ije kuvalekeleko munu umo vyuma vije vivamwene.
Yesu akangwisa mukwenje uje wakele na munzinzime wakujwala
(Mateo 17:14-18; Mako 9:14-27)
37Alikaki Yesu na vandongisi vendi vatatu vashelumukile ku munkinda, mbunga yakama valiwanene na Yesu. 38Munalume umo watundile aje a mbunga watambekele ngwendi, “Mulongisi! Njikulambelela, Kenga munange, munange umolika! 39Omo munzinzime wakujwala umuwana, co atambeka nakushinya, co atutumuna lifulu ku kanwa, umuvetwesa manene, co kuumwecela vwasi. 40Njalambelelele vandongisi vove ngwange vamutundiseye, oloni kuvasele.”
41Co Yesu wakumbulwile ngwendi, “Yeni vaka-kujeneka kukulaela na vanu vaka-vuvi! Visimbu vingaijo njikakala neni? Visimbu vingaijo njinapande kuyanda omwo yeni?” Asinoni wendekele kuli uje munalume ngwendi, “Nena kuno munove.”
42Omo mukwenje wakele nakwija, co munzinzime wakujwala wamuwisilile asi nakumushinyisa manene. Co Yesu washikile uje munzinzime wakujwala, uje mukwenje wakangukile, co wamwanene kuli ishe. 43Co vanu voshe valikomokelele a nzili yakama ya Njambi.
Yesu endeka lalo a kutsa kwendi
(Mateo 17:22-23; Mako 9:30-32)
Vanu vacikele nakulikomokela a vyuma vyoshe vije vyalingile Yesu, omo wendekele kuli vandongisi vendi ngwendi, 44“Kesi mwivale evi vinjimileka! Muna Munu ololo vamwana ku nzili ya vanu.” 45Oloni vandongisi kuvazivukile mucalumbunukilile cuma eci. Vavashwekeleleco ngeci kesi vacizivuke, co vazivile lyova lyakumwihula cuma eci.
Uje napu wakama kutuvakana
(Mateo 18:1-5; Mako 9:33-37)
46 #
Luk 22:24
Kwakatukile vimata akati ka vandongisi ngeci iyajo wakama akati kavo. 47Yesu wazivukile viyongola vya mu vimbunge vyavo, ngecivene, wasanene mwanike wamundondo, wamwimikile ku mati yendi, 48#Mat 10:40; Luk 10:16; Yow 13:20 co wendekele kuli vakevo ngwendi, “Woshe atambula mwanike ou mu lizina lyange, co natambula yange vene, woshe uje anjitambula, natambula lalo uje wanjitumine. Omwo woshe uje napu wamundondo akati keni muvavoshe, ikeye napu wakama.”
Woshe uje kamilwisa ikeye ali amo neni
(Mako 9:38-40)
49Yowano wendekele ngwendi, “Shukulu, twamwene munalume umo wakele nakutundisa minzinzime yakujwala mu lizina lyove, co twamulekele ngeci alikele, omwo ikeye kesi wa mu munga yetu embwe.”
50Yesu wamulekele nakuleka lalo vandongisi vakwavo ngwendi, “Kesi mweseke kumuvindika embwe, omwo woshe uje kamilwisa ikeye ali amo neni.”
Yesu vamuvyana kumutambula mu limbo limo lya mu Samaliya
51Omo matangwa ashwenyele kuyehi ngeci Yesu vamutwale mwilu, watengulwile viyongola vyendi, co waile ku Yelusalema. 52Watumine miluwa kulutwe lwendi, co vaile nakukovela mu limbo lya mu Samaliya ngeci vakamuvwaesele cimweja vyuma vyoshe. 53Oloni vanu vakele kuje kuvamutambwile, omwo casholokele ngeci vungenzi vwendi vwapwile vwakuya ku Yelusalema. 54#2 Vim 1:9-16 Omo vandongisi vendi Yakomba na Yowano vamwene evi, vendekele ngwavo, “Mwene, kuushaka ngeci tusane tuhya twa mwilu twije nakuvanyongesa ndi?”#9:54 MWENE,...TUHYA TWA MWILU TWIJE NAKUVANYONGESA NDI?: Kunungulula kumo vanawezelelako majwi awa ngwavo, ngeci mwalingile Elinja ndi?
55Yesu watengulukililile kuli vakevo wavavindikile ngwendi,#9:55 WAVAVINDIKILE NGWENDI: Kunungulula kumo majwi awa anaatako aimo. “Kumuzivuka Munzinzime uka uje umulinawo, omwo Muna Munu kezile nakunyongesa myonyo ya vanu, oloni wezile ngeci avovole.” 56Asinoni Yesu na vandongisi vendi vaile ku limbo likwavo.
Vaje vashaka kukavangeya Yesu
(Mateo 8:18-22)
57Omo vakele nakuya mu ngila, munalume umo wendekele kuli Yesu ngwendi, “Njikakukava kwoshe kuuya.”
58Yesu wendekele kuli ikeye ngwendi, “Vimbanje vali na mena, co tuzila lalo vali na mashwa, oloni Muna Munu kesi naa akusatela mutwe wendi.”
59Co Yesu wendekele kuli munalume mukwavo ngwendi, “Njikave.”
Oloni uje munalume wendekele ngwendi, “Shukulu, akulivanga njitave njiiluke njikatsinde tai tate.”
60Yesu wamukumbulwile ngwendi, “Seza vatsi valitsinde vakevo vavenya. Yove ya nakwambulula vya Vumwene vwa Njambi.”
61 #
1 Vim 19:20
Munalume mukwavo wendekele ngwendi, “Njikakukava Shukulu, oloni akulivanga njitave njiye njikasaleseo tai vavushoko vwange.”
62Yesu wendeklele kuli ikeye ngwendi, “Naumo wai uje nashangumuka kulima na vingombe, co akenga-kenga kunima apwa wa seo mu Vumwene vwa Njambi.”
Currently Selected:
Luka 9: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
