San Lucas 14

Saꞌ li hiloba̱l cutan li Jesús quixqꞌuirtesi jun li cui̱nk sip lix tibel

1Saꞌ jun li hiloba̱l cutan li Jesús co̱ chi cuaꞌac saꞌ rochoch jun laj fariseo nim xcuanquil. Ut cuanqueb ajcuiꞌ cuib oxib laj fariseo yo̱queb chixqꞌuebal retal li Jesús. 2Aran cuan jun li cui̱nk sip xakxo chiru li Jesús. 3Ut li Jesús quixye reheb laj tzolol chakꞌrab ut reheb laj fariseo: —¿Cꞌaꞌru naxye saꞌ li chakꞌrab? ¿Ma us qꞌuirtesi̱nc saꞌ li hiloba̱l cutan? ¿Malaj ut incꞌaꞌ us? chan reheb. 4Ut eb aꞌan ti̱c ma̱cꞌaꞌ queꞌxye. Tojoꞌnak li Jesús quixchap li rukꞌ li cui̱nk ut quixqꞌuirtesi ut quixye re nak naru ta̱xic. 5Nak quixsukꞌisi rib li Jesús, quixye reheb li cuanqueb aran: —¿Ani junak e̱re la̱ex ta̱tꞌanekꞌ ta junak xbu̱r malaj ut xbo̱yx saꞌ xjulel haꞌ, ma incꞌaꞌ ta biꞌ ta̱xic saꞌ junpa̱t chirisinquil usta hiloba̱l cutan? chan reheb. 6Ut eb aꞌan chi ti̱c incꞌaꞌ queꞌxnau xsumenquil.

Li Jesús quixye nak incꞌaꞌ us li nimobresi̱nc ib

7Li Jesús quixqꞌue retal nak li bokbileb chi cuaꞌac saꞌ li cab aꞌan yo̱queb chixsicꞌbal ru li naꞌajej li nequeꞌqꞌueheꞌ cuiꞌ li cuanqueb xcuanquil. Joꞌcan nak quixye jun li jaljo̱quil ru a̱tin reheb. Quixye: 8—Nak texbokekꞌ saꞌ junak sumla̱c, mexcꞌojla saꞌ li naꞌajej li naqꞌueheꞌ reheb li cuanqueb xcuanquil. Ma̱re ta̱cuulak junak chic mas nim xcuanquil che̱ru la̱ex. 9Ut li xbokoc e̱re ta̱cha̱lk ut tixye e̱re, “Qꞌuehomak li naꞌajej aꞌin re li cui̱nk aꞌin”, chaꞌak e̱re. Yo̱k chic e̱xuta̱n nak texxic chi cꞌojla̱c saꞌ li naꞌajej li nequeꞌcꞌojla cuiꞌ li ma̱cꞌaꞌeb xcuanquil. 10Joꞌcan nak ninye e̱re nak texbokekꞌ saꞌ junak sumla̱c, chexcꞌojla̱k saꞌ li naꞌajej li nequeꞌcꞌojla cuiꞌ li ma̱cꞌaꞌeb xcuanquil. Ut li xbokoc e̱re, ta̱cha̱lk ut tixye e̱re, “Quimkex, cꞌojlankex arin saꞌ li cha̱bil naꞌajej”, chaꞌak e̱re. Chi joꞌcan ta̱qꞌuehekꞌ e̱lokꞌal chiruheb chixjunileb li cꞌojcꞌo̱queb saꞌ li me̱x e̱rochben. 11Joꞌcan nak chixjunileb li nequeꞌxnimobresi ribeb, ta̱cubsi̱k xcuanquileb. Ut chixjunileb li nequeꞌxcubsi ribeb, eb aꞌan teꞌqꞌuehekꞌ xcuanquil, chan li Jesús. 12Ut quixye ajcuiꞌ li Jesús re laj e̱chal cab: —Nak tatqꞌuehok chi tzaca̱nc, malaj ut ta̱ba̱nu junak ninkꞌe, moco caꞌaj cuiꞌ ta la̱ cuami̱g ta̱bokeb, chi moco caꞌaj cuiꞌ eb la̱ cuas ut eb la̱ cui̱tzꞌin, chi moco caꞌaj cuiꞌ la̱ cuechꞌalal, chi moco caꞌaj cuiꞌ la̱ cuech cabal li biomeb, xban nak eb aꞌan naru teꞌxba̱nu ajcuiꞌ jun ninkꞌe ut tateꞌxbok ut teꞌxqꞌue re̱kaj cha̱cuu. 13Nak ta̱ba̱nu junak li ninkꞌe, ta̱bok ajcuiꞌ eb li nebaꞌ ut eb li tokol rok rukꞌ, ut eb li ye̱k rok ut eb li mutzꞌ, 14xban nak eb aꞌan incꞌaꞌ ta̱ru̱k teꞌxqꞌue re̱kaj a̱cue. Abanan li Dios tatrosobtesi ut tixqꞌue re̱kaj a̱cue nak teꞌcuacli̱k cuiꞌchic chi yoꞌyo li ti̱queb xchꞌo̱l, chan li Jesús re.

Li Jesús quixchꞌolob xya̱lal chirixeb li nequeꞌtzꞌekta̱nan re li rusilal li Dios

15Jun reheb li chunchu̱queb saꞌ li me̱x quirabi li cꞌaꞌru quixye li Jesús ut quixye re: —Us xak re li ani ta̱tzꞌako̱nk chi cuaꞌac saꞌ li ninkꞌe saꞌ lix nimajcual cuanquilal li Dios, chan. 16Nak quichakꞌoc, li Jesús quixye jun li jaljo̱quil ru a̱tin re: Quicuan jun li cui̱nk quixcꞌu̱b jun nimla ninkꞌe ut nabaleb li quixbokeb chi cuaꞌac. 17Nak quicuulac xkꞌehil li ninkꞌe, quixtakla lix mo̱s chixyebal reheb li bokbileb nak teꞌcha̱lk chi cuaꞌac xban nak ac xya̱loꞌ li tzacae̱mk. 18Abanan chixjunileb queꞌoc xpatzꞌbal xcuybaleb. Jun quiyehoc: —Xinlokꞌ jun inchꞌochꞌ. Tento nak tinxic chirilbal. Tintzꞌa̱ma cha̱cuu nak ta̱cuy inma̱c xban nak incꞌaꞌ tinxic, chan. 19Ut li jun chic quixye: —Xinlokꞌ o̱b sumal inbo̱yx. Xic cue chirilbaleb. Nintzꞌa̱ma cha̱cuu nak ta̱cuy inma̱c, chan. 20Ut li jun chic quixye: —Tojeꞌ xinsumla ut incꞌaꞌ chic naru tinxic, chan. 21Li mo̱s quisukꞌi riqꞌuin lix patrón ut quixye re li cꞌaꞌru queꞌxye li bokbileb. Quichal xjoskꞌil li patrón ut quixye re lix mo̱s: —Ayu saꞌ cꞌayil ut saꞌ eb li be ut ta̱bokeb li nebaꞌ, eb li tokol rok rukꞌeb, eb li ye̱k rokeb ut eb li mutzꞌ ut ta̱cꞌameb chak arin, chan. 22Co̱ li mo̱s ut quixba̱nu joꞌ quiyeheꞌ re. Nak quisukꞌi chak quixye re lix patrón: —Ka̱cuaꞌ, xinba̱nu joꞌ xaye cue ut toj cuan nabal li naꞌajej, chan. 23Li patrón quixye re lix mo̱s: —Tatxic chire li tenamit ut saꞌ cꞌaleba̱l ut ta̱cuelaji chak ruheb chi cha̱lc saꞌ li ninkꞌe re nak ta̱nujak li cuochoch, chan. 24La̱in ninye e̱re nak ma̱ jun reheb li bokbileb xbe̱n cua teꞌtzꞌako̱nk riqꞌuin li ninkꞌe li xinba̱nu, chan li patrón.

Cuan chꞌaꞌajquilal riqꞌuin xpa̱banquil li Cristo

25Nak yo̱ chi xic li Jesús nabaleb li tenamit yo̱queb chi ta̱ke̱nc re. Quixsukꞌisi rib li Jesús ut quixye reheb: 26—Li ani ta̱raj ta̱ke̱nc cue, tento nak tinixra chi tzꞌakal la̱in chiruheb lix naꞌ xyucuaꞌ, li rixakil ut eb lix cocꞌal, ut eb li rechꞌalal joꞌ ajcuiꞌ lix yuꞌam. Cui incꞌaꞌ tinixra chi tzꞌakal, li jun aꞌan moco us ta chokꞌ intzolom. 27Li ani ta̱raj oc chokꞌ intzolom, tento nak tinixta̱ke ut tixcuy xnumsinquil li raylal usta ta̱camsi̱k saꞌ incꞌabaꞌ. 28Cui cuan junak e̱re naraj tixyi̱b junak cab najt xteram, ¿ma incꞌaꞌ ta biꞌ ta̱cꞌojla̱k xbe̱n cua chixbirbal rix ma cuan tzꞌakal lix tumin re tixchoy xyi̱banquil li cab? 29Cui tixqꞌue lix cimiento li cab ut incꞌaꞌ chic ta̱ru̱k xchoybal, chixjunileb li teꞌilok re teꞌxtiquib xseꞌenquil. 30Ut teꞌxye, —Li cui̱nk aꞌin quixtiquib cablac ut incꞌaꞌ naru xchoybal, chaꞌkeb. 31¿Ma cuan ta biꞌ junak rey ta̱xic chi pletic riqꞌuin junak chic rey cui incꞌaꞌ ta̱cꞌojla̱k xbe̱n cua chixcꞌoxlanquil ma tixcuy pletic rochbeneb laje̱bak mil chi cui̱nk riqꞌuin li rey jun chic, li yo̱ chi cha̱lc chi pletic rochbeneb junmay mil chi cui̱nk? 32Ut cui naxcꞌoxla nak incꞌaꞌ ta̱ru̱k, tixtaklaheb lix takl nak toj cua̱nkeb chi najt chixtzꞌa̱manquil chiru li rey jun chic re nak teꞌcana̱k saꞌ usilal chi ribileb rib. 33Joꞌcan ajcuiꞌ la̱ex. Tento te̱cꞌoxla chi us cꞌaꞌru te̱ba̱nu xban nak li ani incꞌaꞌ naraj xcanabanquil li cꞌaꞌru cuan re, li jun aꞌan moco us ta ta̱oc chokꞌ intzolom.

Li ani incꞌaꞌ chic naxcuy xpa̱banquil li Jesús, aꞌan chanchan li atzꞌam li incꞌaꞌ chic quiꞌ

34Li atzꞌam, aꞌan cha̱bil. Abanan cui incꞌaꞌ chic quiꞌ, ma̱cꞌaꞌ chic ta̱oc cuiꞌ. 35Incꞌaꞌ chic ta̱usa̱k chokꞌ re li chꞌochꞌ, chi moco chokꞌ re li mul. Yal re tzꞌekecꞌ aj chic. Li ani ta̱raj rabinquil li cua̱tin, chixqꞌuehak retal li yo̱quin chixyebal.

Currently Selected:

San Lucas 14: kek

Highlight

Copy