San Lucas 15

Li jaljo̱quil ru a̱tin chirix li carner sachenak

1Nabaleb laj titzꞌol toj ut eb laj ma̱c queꞌcuulac chirabinquil li cꞌaꞌru yo̱ chixyebal li Jesús. 2Eb laj fariseo ut eb laj tzꞌi̱b yo̱queb chi cuechꞌi̱nc ut yo̱queb chixyebal: —Li cui̱nk aꞌin naxcꞌam rib saꞌ usilal riqꞌuineb laj ma̱c ut nacuaꞌac rochbeneb, chanqueb. 3Li Jesús quixye reheb li jaljo̱quil ru a̱tin aꞌin: 4—¿Ma cuan junak cui̱nk saꞌ e̱ya̱nk cua̱nk ta oꞌcꞌa̱lak (100) xcarner, cui ta̱sachk junak saꞌ xya̱nkeb aꞌan, ma incꞌaꞌ raj tixcanab li bele̱laju roꞌcꞌa̱l (99) saꞌ cꞌaleba̱l ut ta̱xic chixsicꞌbal li quisach toj retal tixtau chak? chan. 5Ut nak tixtau, ta̱sahokꞌ saꞌ xchꞌo̱l ut tixqꞌue saꞌ xbe̱n xtel, 6ut ta̱xic saꞌ rochoch. Tixchꞌutubeb li rami̱g ut li rech cabal ut tixye reheb: —Chisahokꞌ saꞌ kachꞌo̱l cuochbenex xban nak xintau lin carner li quisach, chaꞌak reheb. 7La̱in tinye e̱re nak joꞌcan ajcuiꞌ saꞌ choxa. Ta̱cua̱nk nimla sahil chꞌo̱lej nak junak aj ma̱c tixyotꞌ xchꞌo̱l tixjal xcꞌaꞌux chiruheb bele̱laju roꞌcꞌa̱l chi cristian li ac xeꞌpa̱ban ut ti̱queb chic xchꞌo̱leb.

Li jaljo̱quil ru a̱tin chirix li tumin sachenak

8Ut quixye ajcuiꞌ reheb: —Kayehak nak junak ixk cuan laje̱bak xtumin. Cui ta̱sachk junak lix tumin, ¿ma incꞌaꞌ raj tixloch li xam ut ta̱oc chixmesunquil li cab ut tixsiqꞌui toj retal tixtau? 9Ut nak tixtau, tixchꞌutubeb li rami̱g ut eb li rech cabal ut tixye reheb: “Chisahokꞌ saꞌ kachꞌo̱l cuochbenex xban nak xintau lin tumin li quisach chicuu,” chaꞌak. 10La̱in ninye e̱re nak joꞌcan ajcuiꞌ eb lix ángel li Dios teꞌsahokꞌ saꞌ xchꞌo̱leb nak junak aj ma̱c ta̱yotꞌekꞌ xchꞌo̱l ut tixjal xcꞌaꞌux.—

Li jaljo̱quil ru a̱tin chirix li yucuaꞌbej li quixcuy xma̱c li ralal

11Ut quixye ajcuiꞌ reheb li jaljo̱quil ru a̱tin aꞌin: Jun li cui̱nk quicuan cuib li ralal. 12Li i̱tzꞌinbej quixye re lix yucuaꞌ: —At inyucuaꞌ, qꞌue cue anakcuan la̱ jun cablal li joꞌ qꞌuial li tintzꞌak la̱in, chan. Tojoꞌnak li yucuaꞌbej quixjeqꞌui lix jun cablal reheb li ralal cuib. 13Ut ma̱jiꞌ ajcuiꞌ najterak nak li i̱tzꞌinbej quixchꞌutub chixjunil li cꞌaꞌru cuan re, ut co̱ chi najt saꞌ jalanil tenamit. Aran quixsach li cꞌaꞌru re nak yo̱ chixkꞌaxbal li cutan chi joꞌ ma̱joꞌ. 14Ut nak ac xsach chixjunil li cꞌaꞌru cuan re, quicuan jun nimla cueꞌej saꞌ li tenamit aꞌan. Ut li al yo̱ chixcuybal xtzꞌocajic. 15Joꞌcan nak co̱ riqꞌuin jun li cui̱nk cuan saꞌ li tenamit aꞌan chixpatzꞌbal xtrabaj. Ut li cui̱nk aꞌan quixtakla saꞌ cꞌaleba̱l chi iloc a̱k. 16Quiraj raj xcuaꞌbal xcuaheb li a̱k xban nak ta̱tzꞌoca̱k. Abanan incꞌaꞌ queꞌxqꞌue caꞌchꞌinak re. 17Quijulticoꞌ re chanru nak quicuan saꞌ rochoch lix yucuaꞌ ut quixye saꞌ xchꞌo̱l: —Nabaleb aj cꞌanjel cuanqueb saꞌ rochoch lin yucuaꞌ ut numtajenak xcuaheb. Ut la̱in arin osocꞌ cue xban tzꞌoca̱c. 18Tinxic cuiꞌchic saꞌ rochoch lin yucuaꞌ ut tinye re, “At inyucuaꞌ, xinma̱cob chiru li Dios joꞌ ajcuiꞌ cha̱cuu la̱at. 19Ma̱cuaꞌ chic incꞌulub nak tincꞌabaꞌin a̱cualal. China̱cꞌul ban joꞌ junak a̱mo̱s,” chaꞌakin re, chan saꞌ xchꞌo̱l. 20Saꞌ junpa̱t quicuacli ut quisukꞌi saꞌ rochoch lix yucuaꞌ. Toj cuan ajcuiꞌ chak chi najt nak qui-ileꞌ xban lix yucuaꞌ. Ut li yucuaꞌbej quiril xtokꞌoba̱l ru. Co̱ saꞌ a̱nil chixcꞌulbal li ralal. Quixkꞌalu ut quirutzꞌ ru. 21Ut li ralal quixye re: —At inyucuaꞌ, xinma̱cob chiru li Dios joꞌ ajcuiꞌ cha̱cuu la̱at. Ma̱cuaꞌ chic incꞌulub nak tincꞌabaꞌin a̱cualal, chan re lix yucuaꞌ. 22Aꞌut li yucuaꞌbej quixye reheb lix mo̱s: —Sicꞌomak chak saꞌ junpa̱t li cha̱bil tꞌicr ut qꞌuehomak chirix. Qꞌuehomak xmatkꞌab chi ruꞌuj rukꞌ ut qꞌuehomak xxa̱b chi rok. 23Ut cꞌamomak chak li chꞌina cuacax, li chꞌolaninbil chi us. Camsihomak ut toninkꞌei̱k, 24xban nak li cualal aꞌin chanchan camenak nak xcuan chak. Aꞌut anakcuan xsukꞌi cuiꞌchic chi yoꞌyo. Sachenak nak xcuan ut xtauman cuiꞌchic, chan. Ut queꞌoc chi ninkꞌei̱c. 25Ut li asbej cuan chak saꞌ cꞌaleba̱l. Nak yo̱ chi cuulac saꞌ cab, quirabi li son ut li xajoc. 26Quixbok jun li mo̱s ut quixpatzꞌ re cꞌaꞌru yo̱queb saꞌ cab. 27Li mo̱s quixye re: —Xsukꞌi chak la̱ cui̱tzꞌin ut la̱ yucuaꞌ xtakla xcamsinquil li ral li cuacax li chꞌolaninbil chi us, xban nak la̱ cui̱tzꞌin xsukꞌi cuiꞌchic chi cau ut chi sa saꞌ xchꞌo̱l, chan. 28Nak li asbej quirabi li cꞌaꞌru quixye li mo̱s, quichal xjoskꞌil, ut incꞌaꞌ quiraj oc saꞌ li rochoch. Ut li yucuaꞌbej qui-el chirix cab ut quixtzꞌa̱ma chiru nak ta̱oc. 29Li asbej quichakꞌoc ut quixye re lix yucuaꞌ: —At inyucuaꞌ, la̱at nacanau nak nabal chihab xincꞌanjelac cha̱cuu ut ma̱ jun sut xinkꞌet la̱ cua̱tin. Ut ma̱ jun cua xaqꞌue junak inchꞌina chiba̱t re nak tinninkꞌei̱k cuochbeneb li cuami̱g. 30Abanan anakcuan xcꞌulun la̱ cualal aꞌin li quisachoc re la̱ jun cablal riqꞌuineb li ixk li nequeꞌxcꞌayi rib ut la̱at xatakla xcamsinquil chokꞌ re li chꞌina cuacax li chꞌolaninbil chi us, chan li asbej. 31Li yucuaꞌbej quixye re: —At cualal, la̱at junelic cuancat cuiqꞌuin ut chixjunil li cꞌaꞌru cuan cue, aꞌan a̱cue ajcuiꞌ la̱at. 32Abanan tento nak toninkꞌei̱k anakcuan ut ta̱sahokꞌ saꞌ kachꞌo̱l xban nak la̱ cui̱tzꞌin chanchan camenak nak xcuan; abanan xsukꞌi cuiꞌchic chi yoꞌyo. Quisach ut xtauman cuiꞌchic, chan li yucuaꞌbej.

Currently Selected:

San Lucas 15: kek

Highlight

Copy