Matey 23

Tej tyolin Jesús kyiꞌj Parisey ex xnaqꞌtzil tiꞌj ojtxe kawbꞌil

(Mr. 12:38-40; Lc. 11:37-54; 20:45-47)

1Tbꞌajlinxiꞌ ikyjo, ok ten Jesús yolil kyukꞌaxjal ex qukꞌiy, a awoꞌy t-xnaqꞌtzbꞌin. Chiꞌ kyjaluꞌn: 2Ayetziꞌn xnaqꞌtzil tiꞌj ojtxe kawbꞌil exqetziꞌn Parisey n-ok kyqꞌoꞌn kyibꞌ, tuꞌn tel pjet, ex tuꞌn kyxnaqꞌtzin tiꞌj tkawbꞌil Moisés. 3Tuꞌnpetziꞌn, kyniminqekuy, ex kybꞌinchinkuy tkyaqiljo ktzajil kyqꞌmaꞌn kyeꞌy. Me mi kubꞌ kybꞌinchinjiꞌy a nbꞌant kyuꞌn, quꞌn xmiletzꞌqe; nkyqꞌmaꞌn tumil tzeꞌn tuꞌn toke, me junxil nkubꞌ kybꞌinchin. 4Ax txqan nukꞌbꞌil nbꞌaj xi kyqꞌoꞌn, manyor kujqex wen, ikytziꞌn tzeꞌn junjun tij iqtz, a mix aꞌl aku kyꞌisje tuꞌn.

Noq iteꞌk qꞌmalte kyexjal, tuꞌn tjaw kyiqin, me ayetzin kyetz noqittzin aku jaw kyonin chꞌin, iꞌchaqxpetla noq jun twiꞌ kyqꞌobꞌ xi aqꞌle tiꞌj. 5Tkyaqilxjo jniꞌ nbꞌant kyuꞌn, noq tuꞌn kyjawku iqin kyuꞌnxjal. Ex kyajxix tzꞌok kyqꞌoꞌn tiꞌj kyplaj mo tiꞌj kyqꞌobꞌ junjun tnej Tyol Dios tzꞌibꞌink twutz tzꞌuꞌn ma nmaq twutz,#Deu. 6:8. me noq tuꞌn kynimsin kyibꞌ kywutzxjal. Ex nbꞌaj ok kyqꞌoꞌn kyxbꞌalin manyor xqerx wen,#Num. 15:38. noq tuꞌn kyokku kaꞌyin kyuꞌnxjal.#Mt. 6:1. 6Ex kyaj tuꞌn kyok qe kyiꞌj tnejil meẍ te wabꞌl toj kyjaxjal ex kyoj muꞌẍ ja te naꞌbꞌl Dios. 7Ex kyaj tuꞌn tkubꞌ kymutxbꞌinxjal kywiꞌ kywutz, aj kyok qꞌolbꞌin noq jaꞌ toj bꞌe, ex tuꞌn kyok qꞌolbꞌin te xnaqꞌtzil.

8Me metzin kyeꞌ, mi chi tiliꞌn tuꞌn tok qꞌoꞌn kybꞌiy te xnaqꞌtzil kyuꞌnxjal te kynimsbꞌil kyibꞌa. Quꞌn junx kyokliꞌn, quꞌn junchꞌin kyMaꞌn, ex junxchꞌin Xnaqꞌtzil kyeꞌy, a ayiꞌn, a Crist. 9Ex mi tzꞌok kyqꞌoꞌn toklin jun aꞌla te manbꞌaj tzaluꞌn twutz txꞌotxꞌ, quꞌn oꞌkx te Manbꞌajjo junchꞌin at toj kyaꞌj. 10Ex mi chi tiliꞌn tuꞌn tok qꞌoꞌn kyokliꞌn te nejinel, quꞌn ayin weꞌ Crist, nejinel kywutza. 11Ex ankye teꞌ nim toklin kyxola, il tiꞌj tuꞌn tajbꞌin kye txqantl. 12Quꞌn ankye teꞌ kjawil tnimsin tibꞌ, kꞌwel mutxsin teꞌ tuꞌn Dios kywutzxjal. Me anteꞌ kꞌwel tmutxsin tibꞌ, poꞌn qꞌij jaꞌ kjawile nimsin teꞌ tuꞌn Dios.#Lc. 14:11; 18:14.

13Bꞌisbꞌajilxla kyeꞌy, ayiꞌy xnaqꞌtzil tiꞌj ojtxe kawbꞌil exqetziꞌn Parisey xmiletzꞌ. Quꞌn n-ok kyjpunjiꞌy kynabꞌljo xjal, tuꞌn mi chi okxa tojjo Tkawbꞌil Dios toj kyaꞌj, ex ayeku kyeꞌ mi chi okxa. Ex mi nkytziyiꞌn tuꞌn kyokxjo ayeꞌ kyaj tuꞌn kyokx.

14Bꞌisbꞌajilxla kyeꞌy, ayiꞌy xnaqꞌtzil tiꞌj ojtxe kawbꞌil exqetziꞌn Parisey xmiletzꞌ. Quꞌn n-el kyinjiꞌy kyja tal qya, a o kyim kychmil, ex noq tuꞌn kyjaw niminkuy kyuꞌnxjal, nchi naꞌnnaja Dios kyiꞌj nimxix tqan, tuꞌn tmojin ex tuꞌn tkolin kyiꞌj, ex otaq tzꞌel kyiꞌn tal kyja. Tuꞌn ikyjo nimxix tkawbꞌil Dios kꞌwel kyibꞌaja kujxix wen.#23:14Nya toj tkyaqil Tuꞌjil Tyol qMan jaꞌ taꞌye v. 14.

15Bꞌisbꞌajilxla kyeꞌy, ayiꞌy xnaqꞌtzil tiꞌj ojtxe kawbꞌil exqetziꞌn Parisey xmiletzꞌ. Quꞌn nchi bꞌaj bꞌetjiꞌy tkyaqil twutz txꞌotxꞌ xmoxil kyexjal tuꞌn kynimin kyukꞌiy tiꞌjjo kynimbꞌila. Ex ajtzin tkubꞌ jun xjal kyuꞌn, ma txi kyqꞌoꞌn toj il, tuꞌn t-xiꞌ toj qꞌaqꞌ te jun majx tzeꞌnku kyeꞌ.

16Bꞌisbꞌajilxla kyeꞌy, ayiꞌy xkol moẍ. Quꞌn nkyqꞌmaꞌn qa at jun xjal xkubꞌ tqꞌmaꞌn jun tyol, exsin ma kubꞌ tqꞌmaꞌn tbꞌi tnejil ja te naꞌbꞌl Dios tiꞌj, nyaxix il tiꞌj tuꞌn tjapin bꞌaj tyol tzeꞌnkux tqꞌma. Me qa ma kubꞌ tqꞌmaꞌn jun tyol, exsin xkubꞌ tqꞌmaꞌn tbꞌi qꞌanpwaq toj tnejil ja te naꞌbꞌl Dios tiꞌj, ilxixpen teꞌ tiꞌj tuꞌn tjapin bꞌaj, chi chijiꞌy. 17¡Ntiꞌ kynabꞌla, ex moẍqiꞌy! ¿Ankyeꞌ nimxixtl toklin? ¿Apela qꞌanpwaq, mo qa a tnejil ja te naꞌbꞌl Dios, a s-ok qꞌonte toklin pwaq te xjanxix toj taqꞌin Dios? 18Ex nkyqꞌmaꞌn, qa ma kubꞌ tqꞌmaꞌn jun tyol, exsin ma kubꞌ tqꞌmaꞌn tbꞌi t-altar Dios toj tnejil ja te naꞌbꞌl Dios tiꞌj, nyaxix il tiꞌj tuꞌn tjapin tyol. Me qa at jun kubꞌ tqꞌmaꞌn jun tyol, exsin xkubꞌ tqꞌmaꞌn tbꞌi oyaj, a tkubꞌ tibꞌaj t-altar Dios tiꞌj, axixpente yoljo, il tiꞌj tuꞌn tjapin, chi chijiꞌy. 19¡Ntiꞌ kynabꞌla, ex moẍqiꞌy! ¿Ankyeꞌ nimxixtl toklin? ¿Ma apela oyaj, mo qa a t-altar Dios, a s-ok qꞌonte oyaj te xjanxix twutz? Kxel nqꞌmaꞌn qa junx kyoklin kykabꞌil. 20Quꞌn alkye ma kubꞌ tqꞌmaꞌn tbꞌi t-altar Dios toj tnejil ja te naꞌbꞌl Dios tiꞌj tyol, nya noq tiꞌj tbꞌi t-altar ma kubꞌe tqꞌmaꞌne tyol, qalaꞌ majx tiꞌj tkyaqiljo tkubꞌ tibꞌaj. 21Ex ankyeꞌ kꞌwel tqꞌmaꞌn tbꞌi tnejil ja te naꞌbꞌl Dios tiꞌj tyol, nya noq tiꞌjjo tnejil ja te naꞌbꞌl Dios ma kubꞌe tqꞌmaꞌne, qalaꞌ majx tiꞌj Dios, a najle toj. 22Ex alkye ma kubꞌ tqꞌmaꞌn jun tyol tiꞌj kyaꞌj, nya noq tiꞌj kyaꞌj ma kubꞌe tqꞌmaꞌne, qalaꞌ majx tiꞌj tkyaqil tqꞌuqbꞌil Dios, ex tiꞌjku Dios, a qꞌuqle toj.#Is. 66:1; Mt. 5:34.

23Bꞌisbꞌajilxla kyeꞌy, ayiꞌy xnaqꞌtzil tiꞌj ojtxe kawbꞌil exqetziꞌn Parisey xmiletzꞌ. Quꞌn nxi kyqꞌoꞌn twutz tlajajin tnej menta, anís, ex kominis, tzeꞌnkuꞌ ntqꞌmaꞌn toj ojtxe kawbꞌil.#Lv. 27:30. Me mi n-ok kybꞌinjiꞌy xnaqꞌtzbꞌil, a nimxixtl toklin toj kawbꞌil: A tuꞌn kynajaꞌn tzꞌaqle, ex tuꞌn tten tqꞌaqꞌbꞌil kykꞌuꞌja kyiꞌj txqantl, ex tuꞌn tten kynimbꞌila tiꞌj Dios. Atzin tuꞌn tkubꞌ kybꞌinchinjiꞌy, ex tuꞌn mi kyij kytzaqpinjiꞌy txqantl. 24Ayiꞌy xkol moẍ, quꞌn ikytzin nbꞌantjo kyuꞌn tzeꞌnku tuꞌn tel xkꞌamit jun tal netzꞌ us toj kꞌwabꞌj, me mi nkynaꞌn aj t-xi kykꞌulpinjiꞌy jun ma tij chej. Quꞌn kyaja tuꞌn tjapiꞌn tal netzꞌ tnukꞌbꞌil kawbꞌil kyuꞌn, me atzin a nimxixtl toklin toj kawbꞌil, mi nkubꞌ kybꞌinchiꞌn.

25Bꞌisbꞌajilxla kyeꞌy, ayiꞌy xnaqꞌtzil tiꞌj ojtxe kawbꞌil exqetziꞌn Parisey xmiletzꞌ. Quꞌn ikyqetzinjiꞌy tzeꞌnku jun tkꞌwel kꞌwabꞌj ex jun laq, a chebꞌe txjoꞌn tiꞌj, me atzin tojxi, manyor tzꞌil: Nojnin tukꞌa jniꞌ kyelaqꞌa ex tukꞌa jniꞌ kyachbꞌila. 26Ayiꞌy Parisey moẍqiꞌy, kytxjonktzjiꞌy tojxi tkꞌwel kꞌwabꞌj nej ex tojxi laq. Quꞌn ikytzin kyjela saqixjo tiꞌjxi.

27Bꞌisbꞌajilxla kyeꞌy, ayiꞌy xnaqꞌtzil tiꞌj ojtxe kawbꞌil exqetziꞌn Parisey xmiletzꞌ. Quꞌn ikyqejiꞌy tzeꞌnku jun tja kyimnin tbꞌanilx tkaꞌyajtzjo tiꞌjxi, me atziꞌn tojxi nojnin tukꞌa tbꞌaqil kyimnin ex manyor tzuꞌjx. 28Ikyqetzinjiꞌy, quꞌn tbꞌanilx nbꞌant kyuꞌn kywutzxjal, me toj kyanmiꞌn, nojnin taꞌye tukꞌa ttzꞌilil ex tkyaqil wiq il.

29Bꞌisbꞌajilxla kyeꞌy, ayiꞌy xnaqꞌtzil tiꞌj ojtxe kawbꞌil exqetziꞌn Parisey xmiletzꞌ. Quꞌn chebꞌe njaw kybꞌinchiꞌn kyja qtzan yolil Tyol Dios, ayeꞌ i kꞌmonte Tyol ojtxe, ex nbꞌaj kubꞌ kytxoliꞌn t-xmakil kꞌul tiꞌjile kyjulil qtzan wen xjal. 30Ex nkyqꞌmaꞌn: Noqit otaq qo itzꞌje tojjo kyqꞌijil qtzan qchman ojtxe, nyajinqotla xqo mojin tuꞌn kybꞌyetjo yolil Tyol Dios. 31Antza aku tzꞌele kynikyꞌa kye qa antza tzajnin kyyajila kyiꞌjjo ayeꞌ ẍi kubꞌ bꞌyonkye yolil Tyol Dios ojtxe, quꞌn ayexa nchi qꞌmante. 32Ex qa kykyꞌeꞌy tuꞌn kyok lipeꞌy wiꞌja, in tjapin bꞌaj kyuꞌn, tzeꞌnkuxjo kyij yekꞌin kyeꞌy kyuꞌn qtzan kychmaꞌn ojtxe, aye bꞌyol xjal. Me bꞌiꞌnku kyuꞌn qa japin jun qꞌij, tuꞌn tul kawbꞌil kyibꞌaja kujxix wen tiꞌj tkyaqiljo lo.

33¡Maꞌ kan, ex maꞌ tyajil qꞌantinqiꞌy!#Mt. 3:7; Lc. 3:7. ¿Tzeꞌntzin tten tuꞌn kyel oqa twutzjo kawbꞌil tzul, a qꞌaqꞌ, a tzunx njulinx wen? 34Tuꞌnpetziꞌn, kchi tzajil nsmaꞌn weꞌ yolil Tyol Dios, exqetziꞌn aj nabꞌl, ex xnaqꞌtzil. Me kchi kꞌwel kybꞌyoꞌn junjun, ex kchi jawil kypejkꞌiꞌn junjuntl twutz cruz tuꞌn kykyim, ex kchi bꞌajil kybꞌyoꞌn junjuntl toj ja te naꞌbꞌl Dios, exsin kchi okil teꞌn lajolkye tojile junjun tnam. 35Me ktzajil tkawbꞌil Dios kyibꞌaja kujxix wen, noq tuꞌn tpaj kychkyꞌeljo qtzan xjal tzꞌaqleqe, ayeꞌ i kubꞌ bꞌyoꞌn atxix tiꞌj Abel, a tzꞌaqle,#Gen. 4:8. ex Zakariy, a tkꞌwal Berequías, a kubꞌ kybꞌyoꞌn, ayiꞌy Judiy, tojx tnejil ja te naꞌbꞌl Dios ex twutz t-altar qMan.#2Cr. 24:20-21. 36Twutzxix kxel nqꞌmaꞌn kyeꞌy, noq tuꞌn tpaj tkyaqiljo lo, kꞌwel tzꞌaq tkawbꞌil Dios kujxix wen kyibꞌajjo xjal jaꞌlin.

Tej tjaw oqꞌ Jesús tiꞌj Jerusalén

(Lc. 13:34-35)

37Ex chi Jesúsjo kyjaluꞌn kyeꞌ xjal te Jerusalén: ¡Ay! Jerusalén, Jerusalén, ay bꞌiyil kyiꞌj yolil Tyol Dios, ex nchi ok kyxoꞌnjiꞌy tsan qMan tukꞌa abꞌj; jteꞌlixla majxla ẍin bꞌaj labꞌtiꞌy kyiꞌja, tuꞌn kytzaj laqꞌeꞌy nkꞌatza, tzeꞌnku jun ttxu ekyꞌ nchi kubꞌ tpaqin tal tal tjaqꞌ t-xikyꞌ, me mi xkytziyiy ikyjo. 38Kykaꞌyinktzinjiꞌy kynajbꞌila kyjel naj te jun majx.

39Twutzxix kxel nqꞌmaꞌn kyeꞌy, texjo qꞌij jaꞌlin, mixla chin kylaꞌbꞌilxa jun majla, qa nya ajxi tpon tqꞌijil aj kyqꞌmantiꞌy: Kyꞌiwlinxix teꞌ, a tzul toj tbꞌi qAjaw.#Sal. 118:26.

Currently Selected:

Matey 23: mamC

Highlight

Copy