Colosenses 3
3
1Aipórõ, peẽme niko peñemoingove jey Cristo rupi,#Ro 6.4-11; Col 2.12. peheka umi mba'e yvága reheguáva, pe Cristo oguapyhápe Tupã akatúape.#Sal 110.1; Heb 1.3. 2Pejepy'a mongeta umi mba'e yvága peguáre, ani yvýpe guáre. 3Peẽ niko pemano vaekue ha Tupã oguereko iñongatupy peẽme guarã peikove haguã Cristo ndive. 4Cristo voi niko pe pende rekove.#Gl 2.20; Fil 1.21. Ágã ha'e oúvo, peẽ pejúta avei hendive pene renyhẽ mimbipa reheve.
Mba'épa ogueru pe Cristo ndivegua joajúgui
5Pejuka, aipórõ, opa yvy rehegua oĩva pende pype: avave ani itie'ỹ kuña ndive, ha ani ojapo mba'eve iky'áva, ani oho imba'e andu rei ha hembipota vai rapykuéri, ha ani oñembotyryryka takate'ỹre (ha'énteva avei ta'ãnga rei ñemomba'e guasu). 6Ko'ã mba'e rupi, ou Tupã ñenupã ipohýiva umi iñe'ẽ rendu'ỹva ári,#Ef 2.3. 7ha pende rekove ymave guarépe pejapo vaekue. 8Ha ko'ágã katu pehejapa ko'ã mba'e: pe pochy, pe mba'e andu rei, pe ñaña, jeja'o ha ñe'ẽ tie'ỹ. 9Ani pende japu ojupe, peipe'áma niko pende jehegui pende reko yma guare#Ef 4.22. ha umi mba'e yma pejapo vaekue, 10ha peikóta jeikove pyahúpe,#Ef 4.24. pe kuimba'e pyahu rekovépe, oñemyatyrõva ohóvo ojogua haguã Tupã, Ijapoharépe,#Gn 1.26; Ef 2.10. peikuaa porã haguã chupe. 11Nde'ise véima mba'eve ndépa Greciagua térãpa judío, ndépa rejeapi'o pyre térãpa rejeapi'o'ỹva, ndépa tetã mombyrygua, térã nde tavýpa, tembiguáipa térãpa nde rekosã'ỹ. Cristo ha'e opa mba'e ha oĩ opavavépe.
12Tupã pende rayhu ha pende poravo peẽme peiko haguã imba'évarõ. Peñemonde poriahurereko ha py'a porãme, jejapo'ỹ, teko pochy'ỹ ha ñeha'arõ kuaápe.#Ef 4.2. 13Pejogueropu'aka ha peheja rei ojupe oimérõ ipochýva ambuére. Ñandejára oheja rei haguéicha peẽme, peheja rei avei peẽ.#Ef 4.32. 14Tenondete, peñemonde mborayhúpe, mba'e oporombojoaju porãva. 15Ha Cristo py'a guapy tomyenyhẽ pende py'a, upevarãma pene renói vaekue Tupã peiko haguã peteĩ ramo. Ha peme'ẽke pende aguije.
16Pe Cristo marandu toĩ pende pype opa ára, iporãngue hetaháicha. Pejoheko mbo'e ha pejoja'o mimi arandúpe. Pende py'aite guive peme'ẽ pende aguije Tupãme ha pepurahéi salmo ha purahéi ijespíritu rekóva. 17Ha opa mba'e pejapóva térã pejéva, pejapo Ñandejára Jesucristo rérape, peme'ẽvo pende aguije Tupã ñande Túvape, ha'e rupi.#Ef 5.19-20.
Cristo reroviaha rembiaporã
18Tembireko kuéra, peiko pene ména ñe'ẽme,#Ef 5.22; 1 P 3.1. upéva hína pene rembiaporã Ñandejára rehe ojeroviáva hekópe. 19Ména kuéra, pehayhu pene rembirekópe ha ani pende pohýi hendive kuéra.#Ef 5.25; 1 P 3.7.
20Mitã nguéra, pene ñe'ẽ rendúke opa mba'épe pende rúpe, upéva ombohory Ñandejárape.#Ef 6.1. 21Túva kuéra, ani pembopochy pende ra'y kuérape, ani haguã ipy'a kangy.#Ef 6.4.
22Tembiguái kuéra, peñeñe'ẽ rendúke opa mba'épe ko yvy ári pende járape, ndaha'éi oma'ẽ aja pende rehénte, pepyta porã haguã hendive kuéra, pende py'aite guive katu, pekyhyjégui Ñandejáragui. 23Opa pejapóva pejapo vy'ápe, pejapo ramo guáicha Ñandejárape guarã, ndaha'éi yvypórape. 24Peikuaáma niko, upéva rekovia Ñandejára ome'ẽtaha peẽme hembirejakue vore, pemba'apógui peẽ Crístope guarã, pende Jára teéva. 25Pe mba'e vai apohápe katu, oñemyengoviáta pe mba'e vai ojapo vaekue.#Ef 6.5-8. Tupã oporombojovake teko jojápe.#Dt 10.17; Ef 6.9.
Currently Selected:
Colosenses 3: GPC2006
Highlight
Copy
Compare
Share
Want to have your highlights saved across all your devices? Sign up or sign in
Guarani DC Bible © Sociedad Bíblica Paraguaya, 1996.