Éxodo 31
31
Tekoha apoha
(Ex 35.30; 36.1)
1Ñandejára he'i Moiséspe:
2—Judagua apytégui aiporavo Bezaleélpe. Upéva hína Urí ra'y ha Hur remineno. 3Ha amyenyhẽ chupe che pu'akágui ame'ẽvo chupe katupyry ha mba'e kuaa opa mba'e apópe, 4ojapo haguã ta'ãnga ha tembiapo óro pláta ha vrónsegui, 5oikytĩ ha omohenda haguã ita jegua, omba'apo haguã yvyra rehe ha ojapo haguã opa mba'e porã. 6Dangua apytégui aiporavo ipytyvõharã Oholiab Ahisamac ra'y, ha opa umi imba'e kuaávape ambokatupyry ojapo haguã opa mba'e ha'e vaekue ndéve. 7Tojapo Jotopa Róga, ñe'ẽ ñome'ẽ karameguã, ijurumbotyha ha opaichagua tembiporu Jotopa Róga pegua, 8mesa hembiporu kuéra reheve, mba'e rendy pyenda hembiporu kuéra reheve, altar ojehapyhápe insiénso, 9mymbahapy*f** altar hembiporu kuéra reheve, ña'ẽ ipyenda reheve, 10pa'i Aarón ao jegua ha ita'ýra kuéra ao, ipa'i rembiapo pegua, 11ñandyry oñemba'e mboyke haguã Ñandejárape guarãha insiénso Tekohápe guarã. Tojapo hikuái ha'e haguéicha ndéve.
Pytu'uha ára
(Ex 35.1-3)
12Ñandejára he'i Moiséspe:
13—Ere Israel guápe: “Pembyarete che pytu'uha ára. Upéva hína techaukaha chéve ha peẽme guarã opa ára, peikuaa haguã che poiporavo hague. 14Pytu'uha ára oñemboyke peẽme guarã ha tekotevẽ pembyarete. Omboyke'ỹva chéve pytu'uha ára, tomano. Opa umi omba'apóvape árape, toñemosẽ pende apytégui. 15Toñemba'apo 6 ára pukukue, upe 7hápe katu pepytu'u ha pemboyke chéve guarã.#Ex 20.8-11; 23.12; 34.21; 35.2; Lv 23.3; Dt 5.12-14. Oimeraẽva omba'apóva pytu'uha árape, tomano. 16Israelgua tombyarete pytu'uha ára. Upéva hína ñe'ẽ ñome'ẽ opa árape guarã. 17Chéve ha Israel guápe guarã tapéva techaukaha opa ára, ajapo hague 6 árape yvy ha yvága, 7hápe katu apytu'u hague.”#Ex 20.11.
Ñandejára ome'ẽ Moiséspe hembiapoukapy rechaukaha
18Oñe'ẽmba rire Moisés ndive Sinaí ru'ãme, Ñandejára ome'ẽ chupe mokõi ita pehẽngue ohai haguépe hembiapoukapy ipo teépe.
Currently Selected:
Éxodo 31: GPC2006
Highlight
Share
Compare
Copy
Want to have your highlights saved across all your devices? Sign up or sign in
Guarani DC Bible © Sociedad Bíblica Paraguaya, 1996.
