Éxodo 33

Ñandejára he'i ojeho haguã Sinaígui

1Ñandejára he'i Moiséspe:

—Tereho ko'águi ne retãgua ndive, renohẽ vaekue Egíptogui. Tapeho upe yvýpe ha'e vaekue Abraham,#Gn 12.7. Isaac#Gn 26.3. ha Jacóbpe,#Gn 28.13. ame'ẽtaha iñemoñare kuérape. 2Amondóta che remimbou*f** ne renonderã ha amosẽta cananéo, amorréo, hitíta, ferezéo, hevéo ha jebuséo kuérape. 3Tapeho yvy osyryhápe ýicha kamby ha eíra. Che katu ndaha mo'ãi pene ndive ani pohundi mba'e tapére, peẽ niko peikose pene akã rehénte voi.

4Israelgua ndovy'avéi ete ohendúvo ko'ã ñe'ẽ pochy ha ndaipóri avave omondéva ijeguaka. 5Ñandejára he'i ra'e Moiséspe:

—Ere Israel guápe: “Peẽ pene akã rehénte voi peikose. Aime ramo pende apytépe, sapy'amínte jepe, pohundíne katuete. Ko'ágã peipe'a pende jehegui pende jeguaka, tahecha mba'épa ajapo pende hegui.”

6Upévare ojeho rire yvyty Horébgui Israelgua ndoiporuvéi ijeguaka.

Jotopa Róga

7Moisés ogueraha omohenda Tekoha mombyry ojeikohágui, ha ombohéra Jotopa Róga. Oporanduséva peteĩ mba'e Ñandejárape, osẽ hógagui oho haguã Jotopa Rógape. 8Moisés oho ramo Jotopa Rógape, opavave oñembo'y hóga rokẽme ha oma'ẽ hese oike peve. 9Moisés oike rire, oguejy arai ñembo'y ha oñemoĩ hokẽme, Ñandejára oñe'ẽ aja Moisés ndive. 10Ohechávo arai ñembo'y opytaha Jotopa Róga rokẽme, maymáva oñesũ hóga rokẽme omomba'e guasúvo Ñandejárape. 11Ñandejára oñe'ẽvo Moisés ndive oĩ henondépe ha oñe'ẽ hendive ñañe'ẽháicha ñane irũ tee ndive. Upéi Moisés ou jeýva tekohápe ha ipytyvõhára Josué, Nun ra'y, opytáva Jotopa Róga rye pýpe.

Moisés oñembo'e

12Moisés he'i Ñandejárape:

—Nde niko ere chéve aisãmbyhy haguã ko tetã guápe ha ndeeréi mávapepa remboúta che ndive, ere ramo jepe rejeroviaha che rehe ha chéne irũha. 13Ne irũ ramo che, ehechaukána chéve nde rape ikatu haguã che roikuaa ha aiko añetehápe ne irũ ramo, ha che retãgua niko ne retãgua voi avei.

14Ñandejára he'i chupe:

—Che voi aháta ne ndive ha romombytu'úta.

15He'i chupe Moisés:

—Nderejúi ramo ndete voi, toroho'ỹnte ko'águi.

16Mba'éicha piko ojekuaáta che ha ne retãgua neirũha, nderejúi ramo ore ndive? Upéicha mante niko ojehecháta che ha ne retãgua ndaha'eiha tetã ambuegua kuéraicha.

17Ñandejára he'i Moiséspe:

—Ajapóta avei ko rejeruréva. Nde hína che irũ ha ajerovia nde rehe.

Moisés ohechase Ñandejárape

18Upérõ he'i chupe Moisés:

—Ehechaukána chéve nde reko mimbipa.

19Ñandejára he'i chupe:

—Ambohasáta nde resa renonde rupi che reko marangatu ha amombe'úta ndéve che réra.#Tupã omombe'utaha héra Moiséspe he'ise oikuaaukataha chupe mba'éicha guápa ha'e. Che hína aiporiahurereko aiporiahurerekosévape ha ahayhu ahayhusévape.#Ro 9.15.

20Ha he'ive:

—Che rova katu nderehecha mo'ãi, avave ndaikatúigui che recha omano'ỹre.

21Upéi he'i Ñandejára:

—Ápe che ykére oĩ repyta haguã. Eñembo'y ita ári. 22Ohasávo che reko mimbipa romoingéta peteĩ itakua pa'ũme ha rojaho'íta che pópe ahasa peve. 23Upéi aipe'áta che po rehecha haguã che atukupe. Che rova katu nderehecha mo'ãi.

Currently Selected:

Éxodo 33: GPC2006

Highlight

Compare

Copy