Lucas 17
17
Co'ayena Yo'oyena Ta̱iñe
(Mt 18.6-7, 21-22; Mr 9.42)
1Jesupi capi, I̱ ye'yacohua'ire:
“Pa̱i co'aye neñe caraja̱iñe peoja̱'coa. Ja̱je pa'iquëta'are co'ayere pa'iquëpi yecohua'ire se ye'yaquëna, co'aye ne do'ire teayerepa pa'ija̱'quë api. 2Ja̱je pa'ina, tsi̱re co'aye ye'yama'në, ja̱je pa'ire ñaje tëcana quë̱na pëpi sëani jairana je̱o dëoto ai jerepa de'o'ñe pa'io. 3De'hua ñajë'ë. Më'ë yo'jeipi më'ëre co'aye yo'osiquë pa'ito yo'oma'ë quëajë̱'ë cui'ne ja̱'rë yo'ose'ere je̱oni po̱nëna i̱ yo'ose'ere sa̱i de'huacaijë̱'ë. 4Cui'ne më'ëni te'e mu'sere siete pa'ye co'aye yo'osiquë pani, cui'ne siete pa'ye dai caye pa'iji: ‘Ti̱jupë co'aye yo'oye pa̱si'i.’ Ja̱je caquëna, i̱ co'aye yo'ose'ere sa̱i de'huacaiye pa'iji.”
Nuñerepa Neñe Pa'iji Cuasayepi Tutu Quë'i
5I̱te ye'yecohua'ipi cahuë, Ëjaëre: I̱sijë̱'ë yëquëre ai nuñerepa neñe pa'iji cuasayere.
6Cajëna, Ëjaëpi sehuopi ja̱ohua'ire:
“Mësarupi neñe pa'iji cuasayere a'ri maña mostaza ca̱je pa'ye pacohua'i pani cayë, iye so̱quëre iye macapi etani jaira jopore pare sa nëcajë̱'ë. Ca maca asani sati̱'ñe pa'io.
Necaiquëpi Yo'oye Pa'iji
7Mësarupi co'amaña necaiquëre pacohua'ini tsio co'amaña ne tëjini pa̱nita'a hue̱quëre ña tëjini co'iquëna, ¿cacohua'i a'ni, ‘da sani ja'rujë̱'ë, a̱i a̱ija'quë?’ 8Ja̱je cama'pë coa ai jerepa cayë: ‘A̲ore cua'cojë̱'ë, neato a̱i ja̱'ñere, yë'ë a̱o a̱i huëosi maca de'oye a̱o ja̱'ñere cui'ñajë'ë, yë'ë a̱ni tëjisi jeteyo'je më'ëje a̱i cui'ne u̱cuja̱'quë.’ 9Ja̱je cua̱ñese'ere yo'oquëna, necaire pahuë de'oji cajë pëpaye peoji jo'yaëpi cua̱ñese'ere necaito. ¿Me de'oji caye'ni, jo'yaëpi cua̱ñese'ere neto? 10Ja̱je cui'ne pa'iji, mësaruje̱. Ja̱je pa'ina, Maija'quë cua̱ñese'ere si'aye nesicohua'i pani: ‘Co'a jo'ya maña'ë, më'ë nejë'ë casi mañase'e nehuë,’ caye pa'iji.”
Diez Ja̱'ju Dahuë Ju̱'icohua'ire Ne Co'yaye
11Jesús ja̱ yë'ta'a Jerusalénna sai Samaria cui'ne Galilea yejaña tëto saji'i. 12Saiquëpi a'ri daripëna ti̱'aquëna, diez ë̱mëohua'i ja̱'ju dahuë ju̱'icohua'ipi sa̱ñope ti̱'ahuë. Ti̱'ajëta'a so'ona nëcaja̱ni, 13cuihuë:
“¡Jesús, Ye'yaquë, yëquë mañare oijë̱'ë!”
14Ja̱ maca Jesupi ñani ja̱ohua'ire capi:
“Sani Maija'quë huë'e ñacaicohua'i ëjaohua'ina i̱ñojaijë'ë.”
Ja̱je caëna, ja̱ saijë i̱ohua'i ju̱'i dahuë peocohua'i to̱me huesëhuë. 15Ja̱ maca te'i ja̱ohua'i aquëpi ju̱'i dahuë peo hue̱'ña to̱mesiquë pa'i ña jujani Maija'quëni tutu yë'opi caquë sihuaquë co'ipi. 16Co'ini do're ja'rupi Jesús ña hue̱'ñana cui'ne i̱ tsiapi yejare pana në meni Maija'quëre de'oji caquë sihuapi. Iquë ë̱më i̱ti sihuasiquë Samaria yeja aquë paji'i. 17Ja̱ maca Jesupi capi, i̱te:
“¿Mësaru diez pa'iohua'i pa'ima'pë pate, i̱ti ju̱'icohua'i? ¿Yecohua'i nueve jerore pa'iye'ni? 18¿Iquë yequë yeja aquëse'e Maija'quëre sihuasi'i caquë co'isiquë pa'iquë?”
19Ja̱je cani i̱te capi:
“Huëni saijë̱'ë. Jujuquë api, më'ë cuasani yo'o do'ipi co'yasiquë sëte.”
Maija'quë Cua̱ñe Te̱'te Pa'i Ti̱'añe
(Mt 24.23-28, 36-41)
20Fariseo pa̱ipi Jesure se̱i'ë: ¿Je yëhua Maija'quë te̱'te ayepi ti̱'aja'coa'ni? Ja̱je se̱jëna, i̱pi sehuopi:
“Maija'quë cua̱ñe te̱'te ayere ti̱ñarepa ñañe peoji, co'amaña ñañeje pa'ye. 21‘I̱ñore tsoe pa'iji’ pa̱nita'a ‘jetore pa'iji’ caye peoji. Ja̱je pa'ina, tsoe Maija'quë cua̱ñe te̱'te ayere mësaru joponi pa'iji, yure.”
22Ja̱je pa'ina, i̱re ye'yecohua'ire capi:
“Ti̱'aja'coa, co'a mu'seña Pa̱i Mamaquë yo'oquëna, ña ëa mu'seña. Ja̱je ña ëaquëta'are ñañe pa̱ja'cohua'i a'ë. 23Ja̱je ña ëaquëna, pa'ijëna, caja̱'cohua'i a'ë: ‘I̱ñore pa'iji’ pa̱nita'a ‘jetore pa'iji’. Ja̱je catoje̱ saima'pë, cui'ne tuima'pë pa'ijë̱'ë. 24Ma'tëmopi mujuë ye'hueyeje̱ pa'ye pasipi. Pa̱i Mamaquë ti̱ta mu'se cato asa tayoye peoja̱'coa. 25Ja̱je pa'iquëta'are du'ru macarepa ai ai yo'oye pa'iji. Yure pa'iji, yure pa'i pa̱ipi yë'ëre coejëna. 26Noé pa'i mu'seña yo'ojë pa'ise'eje̱ pa'ye cui'ne pa'ija̱'coa, Pa̱i Mamaquë daija̱'a mu'señaje. 27Ja̱ mu'seña je̱'quë a̱o a̱ijë cui'ne u̱cujë, huejajë cui'ne mamajëre huejojë yo'ohuë. Ja̱je yo'ojëna, Noé jai yohuëna cacapi. Cacasi maca, jai co'je ti̱'aëna, ja̱ohua'i si'aohua'i co'je ju̱juhuë. 28Ja̱je cui'ne Lot pa'i mu'señaje yo'ohuë: A̲o a̱ijë cui'ne co̱no u̱cujë huerojë cui'ne yecohua'ina se i̱sijë, co'amaña ta̱jë cui'ne huë̱'ña nejë paë'ë. 29Ja̱je yo'ojë pa'ijëna, Lot Sodomapi etani saji'i. Saisi maca ma'tëmopi oco to̱meñeje pa'ye toapi to̱mequë si'aohua'ire huani je̱api, Sodoma pa̱ire. 30Ja̱je cui'ne pa'ye pasipi, Pa̱i Mamaquë ñaija'a mu'señaje.
31Ja̱ co'a mu'seña ti̱'aëna, huë'e hue'sere pa'ijëna, co'amañapi huë'e sa̱'nahuëre pa'ito i̱jañu'u cajë yo'oma'pë pa'ijë̱'ë. Cui'ne yecohua'ipi tsiore pa'icohua'i pani co'ima'pë pa'ijë̱'ë, huë'ena. 32De'hua cuasajë̱'ë, Lot nëjo yo'ose'ere. 33Ja̱je pa'ina, co'ye i̱ pa'iyere ai cuasaquë cato si'aye ne huesëye pa'iji.
34Ja̱je pa'ina, cayë. Ja̱ ñami ca̱i saihuëna cayahua'i ca̱icohua'i pa'ito te'ire saquë yequëni je̱o saiye pa'ija̱'coa. 35Cui'ne caya nomiohua'i te'e toacohua'ini te'ore saquë cui'ne yeconi je̱o saiye pa'ija̱'coa. 36Ja̱je cui'ne caya ë̱mëohua'i tsiore pa'ijëna, te'ire saquëna, cui'ne te'i je̱o saisiquë pa'ija̱'quë api.”
37Ja̱je caquëna, iyere asani se̱teña:
“¿Jerona iye yo'o ja̱'ñe a'ni, Ëjaë?”
Cajëna, i̱pi capi:
“Ju̱'isiquë u̱i hue̱'ña pë'përi tsi'siyeje̱ pa'ye tsi'sija̱'cohua'i a'ë.”
Currently Selected:
Lucas 17: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
