Lucas 18

Hua'jeopi Cui'ne Yo'oyere Ca Tëjiquë

1Si'anë Maija'quëre se̱jë pa'iye pa'iji, yo'o jujaye peoye caquë Jesús pa̱i yo'oye ayena ti̱ña caquë ñeje, ye'yapi. 2Ye'yaquë capi:

“Pa'iji, pa̱i daripë pa̱i yo'oye ñaquë, Maija'quëre ca'rama'quëpi, cui'ne yecohua'ireje̱ oima'quëpi. 3Cui'ne ja̱re ja̱ daripëre paco'ë, hua'jeo. Ja̱opi pa̱i yo'oye ñaquëna, i̱ote sa̱ñope yo'oquëni quëaona ca de'huacaija̱quë caco si'anëpi saco'ë. 4Ja̱je saio yo'ocona, pa̱i yo'oye ñaquëpi coepi. Coesiquëta'a jeteyo'je cuasapi: ‘Maija'quëre ca'rama'quëje̱ cui'ne pa̱ireje̱ oima'quëpi. 5Co̱casi'i hua'jeore, jo̱sa si'anë daio yë'ë yequere cuasaquëna, cama'o pa'ija̱'core,’ cuasapi.”

6Ja̱je capi, iquë pa̱i yo'oye ñaquë co'aquë. Ja̱je pa'ito Jesús capi: 7“¿Maija'quëre mu'señapi cui'ne ñamiñapi se̱cohua'ire i̱ jo'ya nesicohua'ire co̱caiye pa̱ja'quë aë? ¿Tsoe utejë̱'ë, caquë aë? 8Pa̱ni. Ja̱je pa'ina, cayë, ti tsoe nëiñe peoye co̱caija̱'quë api, Maija'quë. Ja̱je pa'iquëta'are ¿yë'ë iye yejana dai maca, de'hue yë'ëre necaiquë api cuasacohua'i pa'ijëna, ti̱'aja'quë a'ni?”

Fariseo Cui'ne Pa'i Do'ire Se̱quë Ayere Quëaye

9Pa̱i yo'oyeje̱ pa'ye neni Jesús quëapi, de'ocohua'i a'ë cuasajë yecohua'ire co'acohua'i a'ë cajë coecohua'ire. 10Quëa huëoquë capi:

“Caya ë̱mëohua'i Maija'quëre se̱ huë'ena saë'ë, se̱ñu'u cajë. Te'i ja̱ohua'i aquëpi fariseo pa'iji, cui'ne yequëpi pa'i do'i curiquë se̱quë paji'i, pa̱i ëjaëre necaiquë. 11Pa'ina, fariseopi coa nëcaquë se̱ji'i, ñeje: ‘I̱na, ja'quë më'ëre sihuayë, yë'ëre cato ja̱ohua'i co'amaña ñacohua'i, cui'ne co'acohua'i cui'ne nomiohua'ire coa yo'ocohua'ije̱ pa'i peoyë. Cui'ne ja̱ë pa'i do'i se̱quëje̱ pa'i ti peoyë. 12Cui'ne te'e semanare cayaye a̱o a̱ima'quëpi se̱i cui'ne yë'ë yo'oquë curiquë neñeje Maija'quë huë'ena diez pa'ye neni te'ore i̱siquë a'ë, de'hue.’ 13Ja̱je se̱ina, pa'i do'ire se̱quëpi so'o macana pëani ñaco ca̱ mañaje ma'tëmona se mëani ñama'ë coa ai jerepa coti saihuëna të'caquë ñeje caquë se̱ji'i: ‘I̱na, yë'ë Ja'quë yë'ëre oijë̱'ë, yë'ë maca ai co'aquë a'ë.’ 14Ja̱je pa'ina, cayë, mësarute. Iquë pa'i do'ire curiquë se̱quë cato Maija'quëna i̱ co'aquë pa'iye quëa to̱ni Maija'quë ja̱'re pa'i sihuaquë co'ipi. Ja̱je co'iquëta'are fariseo cato ti sihuama'ë paji'i. Ja̱je pa'ina, co'ye yë'ë jerepa pa'i a'ë cuasacohua'ire cato coa ai jerepa meñe neñe pa'iji. Ja̱je pa'iquëta'are yë'ë teaye pa'i a'ë cuasaquëni ai jerepa pa'ire neñe pa'iji.”

Jesús Tsi̱re De'oyerepa Cacaiye

(Mt 19.13-15; Mr 10.13-16)

15Jesús quë'rona tsi̱re dahuë, papija̱quë cajë. Ja̱je yo'ojëna, i̱ ye'yacohua'ipi ñani i̱ti tsi̱re dacohua'ire yo'oma'pë pa'ijë̱'ë ca huëohuë. 16Ja̱je cajëna, Jesús ja̱ohua'ire soini capi:

“Coa ñajë'ë, ë̱sema'pë tsi̱re, i̱ohua'ise'e daija̱jë yë'ë quë'rona. Maija'quë quë'ro ja̱ohua'ije̱ pa'iohua'ise'e cacaye pa'iji. 17Ja̱je pa'ina, nuñerepa cayë, mësarute. Tsi̱ de'oji cajë yëyeje̱ pa'ye yo'oma'cohua'i pani ti cacaye peoji, Maija'quë cua̱ñe hue̱'ña.”

Po̱sëpi Jaiye Co'amaña Paquëpi Jesure Case'e

(Mt 19.16-30; Mr 10.17-31)

18Pa̱i ëjaohua'i aquëpi se̱ji'i, Jesure:

“De'o ye'yaquë, ¿me yo'oni ti pani huesëye ti̱'aja'quë a'ni?”

19Jesupi i̱te capi:

“¿Me yo'oquë yë'ëre de'oquë caquë'ni? Peoji, te'ije̱ de'oquë. Coa te'i Maija'quëse'e de'oquë pa'iji. 20Asaquë a'ë, Maija'quë cua̱ñese'e: ‘Nomiore yo'oma'ë nëjore peoni, pa̱ire huani je̱oma'ë, co'amaña ñama'ë, coa cosoma'ë, cui'ne ëjaohua'ire ñajë oijë̱'ë, më ja'quëre cui'ne më ja'core.’ Ja̱re më'ëpi asaë.”

21Ja̱je caquëna, i̱ti se̱siquëpi capi, i̱te:

“Si'anë iye tsihua'ë pa'inëpi de'oye sehuoquë a'ë.”

22Ja̱je caquëna, Jesupi asani i̱te capi:

“Ja̱ yë'ta'a te'o carapi, më'ëre. Si'aye më'ë payere i̱sijë̱'ë, peocohua'ini. Ja̱je më'ë yo'onita'a Ma'tëmore co'amaña paye pa'iji. Ja̱ jeteyo'je dani tuijë̱'ë, yë'ëre.”

23Ja̱je caquëna, iyere asani ai oi, jaiye co'amaña paquë sëte. 24Ja̱je oina, ñani Jesús capi:

“Airepa jëaye pa'iji, jaiye co'amaña pacohua'ipi Maija'quë cua̱ñe te̱'tena cacaye. 25Camellore miu ñaca cojeja̱'a etoja̱iñe ti peoji. Ja̱ jëaye se̱ña maca jëaji, co'amaña pacohua'ipi Maija'quë te̱'tena cacaye.”

26Ja̱je caquëna, i̱ti asasicohua'ipi cahuë:

“Ja̱je pa'ito ¿nepi huasosicohua'i pa'ija̱'cohua'i a'ni?”

27Cajëna, Jesupi capi, ja̱ohua'ire:

“Ja̱je pa'ina, pa̱i ne ti̱'añe peoyere, Maija'quëse'e ne ti̱'añe pa'iji.”

28Caquëna, Pedropi capi:

“Ëjaë, yëquë pase'e si'aye je̱ohuë, më'ëni tuñu'u cajë.”

29Caquëna i̱pi sehuopi:

“Nuñerepa cayë. Pa̱ipi Maija'quë te̱'te do'ire i̱ huë'e, ja'quëohua'ire, a'yëohua'ire, nëjore, mamajëre je̱osiquë pani, 30yequë yejana pa'iye huëo maca ti pa'iyere ti̱'aja'quë api.”

Jesús I̱ Ju̱'i Ja̱'ñere Quëaye

(Mt 20.17-19; Mr 10.32-34)

31Jesús pa̱i peo hue̱'ñana i̱ ye'yacohua'ire soini, capi:

“Yure sañu'u, Jerusalénna. Ja̱rona si'aye ti̱'aja'coa, Pa̱i Mamaquëre yo'o ja̱'ñere Maija'quëre quëacaicohua'i toyajë pa'ise'e. 32Ja̱rona yë'ëre i̱sija̱'cohua'i a'ë, judío pa̱i peocohua'ina. I̱sirena, cue'cuejë yo'oja̱'cohua'i a'ë yë'ëre co'aye cajë, cui'ne copi tse'seja̱'cohua'i a'ë. 33Të'ca tëjini huani je̱oja'cohua'i a'ë. Ja̱je yo'osicohua'ita'are toaso̱ mu'seña pa'i maca huëija̱'quë a'ë.”

34Ja̱je caquëna, ja̱ohua'i coa huesë asahuë, i̱quere caquë'ni cuasajë. I̱pi ti̱ña asaye ë̱sequëna.

Jesús Ñama'quëre Jujuse'e

(Mt 20.29-34; Mr 10.46-52)

35Jesupi Jericó daripë quë̱no macare pa'ina, te'i ñama'quëpi ma'a yë'quë macare ñu'i curiquë da saicohua'ire se̱ji'i. 36Se̱quëpi jai pa̱i saijë cajëna, asani se̱ji'i, i̱quere ja̱je yo'ojë caye'ni caquë. 37Se̱ina, i̱te quëahuë. Ja̱roja̱'a Jesús Nazaret aquëpi daina, yo'ojë cayë. 38Cajëna, ja̱ maca asani cuipi:

“Jesús, David mamaquë yë'ëre oijë̱'ë. Ai yo'oyë.”

39Ja̱je cuiquëna, yecohua'ipi du'ru saicohua'ipi i̱te cahuë, cuima'ë pa'ijë̱'ë. Ja̱ cajëta'are i̱pi ai jerepa ja̱ yë'ta'api cuipi:

“David mamaquë yë'ëre oijë̱'ë. ¡Ai yo'oyë!”

40Caquëna, asani Jesús nëcaja̱ni, quërëja̱ni dajë̱'ë caquë jëjo saopi, te'ire. Dasi maca i̱te se̱ji'i:

41“¿Me nejaquë cuasaquë'ni, më'ë yë'ëre?”

Caquëna, ñama'quëpi sehuopi:

“Ëjaë, ñaco ca̱re de'huacaijë̱'ë. Ñasi'i, yë'ë.”

42Caquëna, Jesupi capi, i̱te:

“¡Ñaquë pa'ijë̱'ë! Më'ë nequë api cuasaquë ca do'ipi.”

43Ja̱je ca macapi, tsoe ñaquë paji'i, ñama'quë pa'isiquëpi. Ja̱ maca Jesure tuji'i, Maija'quëre sihuaquë. Cui'ne si'aye iye yo'oye ñasicohua'ije̱ Maija'quëre ai sihuahuë.

Currently Selected:

Lucas 18: sey

Highlight

Copy