Lucas 6

Jamay junaqpaq Jesús munayyuq kashqan

Mateo 12.1-8; Marcos 2.23-28

1Jamay junaqchömi discïpulunkunawan Jesús päsaykäyarqan trïgu poquraykaq chakrakunapa. Saypa päsarmi discïpulunkuna trïguta palar kupa kupaskir uchuyarqan. 2Sayta rikarmi fariseukuna niyarqan: <<¿Imanirtaq jamay junaq kaykaptin leyninsita mana cäsukur trïguta palaykäyanki?>>

3Saymi Jesús nirqan: <<¿Manaku imaypis liyiyashkanki yanapaqninkunawan David mikanar imata rurashqantapis? 4Davidshi Tayta Diospa wayinman yaykur Diospaq churayashqan tantata mikunaq.#1Sam. 21.1-6. Saynölashi yanapaqninkunatapis qaranaq. Say tanta manami David ni paywan kaykaq runakuna mikuyänanpaqsu karqan, saypa trukanqa cürakunalapaqmi>>.#Lev. 24.9.

5Nirkur Jesús nirqan: <<Runapa Surinqa jamay junaqpaqpis munayyuqmi kaykan>>.

Makin wanush runata jamay junaqcho Jesús aliyäsishqan

Mateo 12.9-14; Marcos 3.1-6

6Saypita juk jamay junaqmi sinagögaman yaykur Jesús yachasirqan. Saychömi aluq kaq makin wanush runapis kaykarqan. 7Sayta rikarmi ley yachasiq runakunawan fariseukuna Jesústa rikapaykäyarqan jamay junaqcho aliyäsiptinqa say achäquila contran sharkuyänanpaq.

8Sayno yarpaykäyashqanta tantiyarmi makin wanush runata Jesús nirqan: <<Sharkur runakunapa puntanman ichiy>>.

Sayno niptinmi say runa ichirkurqan. 9Nirkurnami runakunata Jesús tapurqan: <<Kanan mä niyämay. Jamay junaqcho ¿ali kaqtaku o mana ali kaqtaku rurashwan? Runa mayinsita ¿salvashwanku o <wanukusunpis> nishwanku?>>

10Nirkurmi saycho kaykaq runakunata rikärishpan makin wanush runata nirqan: <<¡Makikita joqariy!>>

Joqarkuptinmi makin aliyaskirqan. 11Saypitanami fariseukuna fiyupa rabyakur Jesústa acusayänanpaq wilanakuyarqan.

Chunka ishkay apostolninkunata Jesús akrashqan

Mateo 10.1-4; Marcos 3.13-19

12Saypitanami jirkaman aywaykur Tayta Diosta manakuykar Jesús wararqan. 13Pasa wararkuptinnami discïpulunkunata qayaykur chunka ishkayta akrarqan apostolninkuna kayänanpaq. 14Paykunami kayarqan Simón (paytami jutinta churaparqan Pedro jutin kananpaq), Simónpa wawqin Andrés, Santiago, Juan, Felipe, Bartolomé, 15Mateo, Tomás, Alfeupa surin Santiago, Zelote nishqan Simón, 16Santiagupa surin Judas y Judas Iscariote. Paymi Jesústa rantikurqan.

Askaq runakunata Jesús aliyäsishqan

Mateo 4.23-25

17Apostolninkunawan jirkapita Jesús urämurnami pampacho tarirqan aska discïpulunkunawan saysika runakuna juntaraykäyaqta. Say runakunami shayämush kayarqan intëru Judea provinciapita, Jerusalénpita y lamar kuchuncho kaykaq Tiro y Sidón markakunapitapis. Paykuna juntakäyarqan Jesús yachasishqanta wiyayta munar y qeshyankunapita aliyayta munarmi. 18Saychömi supay nakasishqan runakunatapis Jesús kachakäsirqan. 19Lapan runakunata munayninwan aliyäsiptinmi pïmaypis Jesústa yataylapis yatayta munayarqan.

Kushikuyänanpaq y lakikuyänanpaq Jesús wilashqan

Mateo 5.1-12

20Discïpulunkunata rikärirmi Jesús nirqan: <<Pobrikuna, kushishqami kawayanki. Qamkunapaqmi Tayta Dios mandaykashqan kaykan.

21<<Malaqaqkuna, kushishqami kawayanki. Qamkunaqa manami malaqäyankinasu.

<<Waqaqkuna, kushishqami kawayanki. Qamkunaqa manami lakikuyankinasu.

22<<Kushishqami kawayanki Runapa Surinta chaskikuyashqaykipita chikiyäshuptikipis qarquyäshuptikipis, ashliyäshuptikipis y manakaqman churayäshuptikipis. 23Sayno kaptinpis kushikuyay. Qamkunata gloriacho maynami premiuta Tayta Dios shuyaraykäsiyäshunki. Qamkunatanömi chikishuqnikikunapa unay ayllunkunapis Tayta Diospa profëtankunata nakasiyarqan>>.

24<<¡Wawalaw, rïcukuna! Qamkunaqa kay pasalachömi kushikuykäyanki.

25<<¡Wawalaw, pacha junta kawaqkuna! Qamkuna malaqäyankimi.

<<¡Wawalaw, kay pasacho kushishla kawaqkuna! Qamkuna fiyupa lakikurmi waqayanki.

26<<¡Wawalaw, lapan runakunapita alabash kaqkuna! Qamkunatanölami lula profëtakunatapis unay aylluykikuna alabayarqan.

Chikimaqninsita kuyanansipaq Jesús yachasishqan

Mateo 5.38-48; 7.12

27<<Wiyamaqkuna, qamkunatami nï: Chikishuqnikikunata kuyayanki. Mana ali rikayäshuptikipis ali rikayanki. 28Ashliyäshuptikipis ali shimilaykipa parlapäyanki. Manakaqta tumpayäshuptikipis paykunapaq Tayta Diosta manakuyanki. 29Laqyayäshuptiki jukaq qaqlaykitapis kamapäyanki. Punchuykita qechuyäshuptiki chompaykitapis kachapariykuyanki. 30Imata manakuyäshuptikipis qoykuyanki. Imaykita qechuyäshuptikipis kachapariykuyanki. 31Imanömi runa mayiki rikayäshunaykita munayanki, saynöla qamkunapis runa mayikita ali rikayanki.

32<<Kuyanakuyashlaykiwan kuyanakurqa ¿ima alitataq ruraykäyanki? Jusasapa runakunapis kuyanakuyashlanwanqa kuyanakuyanmi. 33Ali kaqkunalawan ali kawarqa ¿ima alitataq ruraykäyanki? Jusasapa runakunapis saynölaqa kawayanmi. 34Gänayänayki kashla imatapis manarqa ¿alitasuraq ruraykäyanki? Jusasapa runakunapis gänayänan raykulaqa imatapis manaykuyanmi.

35<<Qamkunaqa chikishuqnikikunata kuyayay. Paykunawan ali kawayay. Imatapis manarqa ama cobrayaysu. Sayno kawayashqaykipitami Tayta Dios premiuta qoshunki. Mal agradecïdu runakunata y fiyu runakunatapis pay kuyapanmi. Saymi qamkunapis kuyapäkuq karqa munayyuq Tayta Diospa wamran kaykäyanki. 36Taytayki kuyapäkuq kashqanno qamkunapis kuyapäkuq kayay.

Runa mayinsita mana jamuränansipaq Jesús nishqan

Mateo 7.1-5, 17-20; 12.34-35

37<<Tayta Dios mana juzgayäshunaykipaq runa mayikita ama juzgayaysu. Saynöpis manakaqman mana churayäshunaykipaq manakaqman ama churayaysu. Runa mayikita perdonayaptikiqa qamkunatapis Tayta Dios perdonayäshunkimi. 38Ali runa kayaptikiqa Tayta Dios qamkunatapis jichay jichayta lipay lipaytami qarayäshunki. Melqaynikiman juntatami milqaparkuyäshunki. Runa mayikita imanöpis yanapäyashqaykiman tupumi qamkunatapis Tayta Dios yanapäyäshunki>>.#Mat. 7.2.

39Saynöpis tinkusiypa yachasirmi Jesús nirqan: <<¿Qapra runa qapra mayinta pushanmansuraq? Pushanakurqa ¿manasuraq pözuman ishkan jeqakurpuyanman?#6.39 Jesucristo sayno nirqan jamurpäkuq runata qapraman tinkusishpanmi. 40Mayqan yachakuqpis manami yachasiqninpita mastaqa yachansu. Sayno kaptinpis yachakurkurqa yachasiqninnönami yachanqa.#6.40 Sayno yachasirmi Jesucristo nirqan: Yachasishuqniki jamurpäkuq kaptinqa qampis jamurpäkuq kaytami yachakunki.

41<<Nawikikunacho jatunkaray qeru jatiraykaptinqa ¿imanirtaq runa mayikikunapa nawincho ichiknayla shuka jatiraykaqta rikapäyanki? 42Nawikikunacho jatunkaray qeru jatiraykaptinqa ¿imanöparaq niyankiman: <Nawikipita shukata jorqapäshayki>? ¡Ishkay cära runakuna! Puntata nawikikunacho kaykaq qerutaraq jorquyay. Sayraqmi shumaq rikayanki runa mayikipa nawinpita shukata jorqupäyänaykipaq.#6.42 Kay textuchömi runa mayinsipa jusankunata tinkusin nawincho kaykaq shukaman. Kikinsipa jusansitanami tinkusin nawinsicho kaykaq qeruman. Nawinsipita qeruta jorqunansipaq nirqa jusalikuyta kacharinansipaqmi nikan. Saynöpami tantiyasimansi jukta jamurpänansipa trukan kikinsipa jusansita kacharinansipaq kashqanta.

43<<Ali jachaqa manami mana alita wayunsu. Saynölami mana ali jachapis alitaqa wayunsu. 44Wayuyninpami ima jachatapis reqinsi. Manami kashakunapitasu hïgusta palansi ni shirakakunapitasu üvata palansi. 45Ali runaqa shonqun alita yarpashqantami parlan y fiyu runaqa shonqun mana alita yarpashqantami parlan. Runaqa shonqun yarpashqantami alitapis o mana alitapis parlan.

Cäsukuq runa y mana cäsukuq runa imano kashqanpis

Mateo 7.24-27

46<<Yachasikuynïkunata mana cäsukuykarqa ¿imanirtaq <Patronnïmi kanki> niyämanki? 47Nishqäkunata wiyakamaqkuna imano kayashqantapis kanan tantiyasiyäshayki. 48Juk runashi wayita sharkasinanpaq qaqata tarishqanyaq oqtiykur cimientuta perqanaq. Qaqa janancho shumaq perqash kaptinshi mayu jakashpan jaytarpis say wayita juchusinaqsu. 49Juk runanashi cimientuta mana perqaylapa aqusha janalancho wayita sharkasinaq. Sayno kaptinshi mayu jakar jaytaptin say wayi jukla juchunaq. Sayshi pasaypa kuyapaypaq kanaq. Saynömi nishqäkunata mana wiyakamaq runapis kanqa>>.

Currently Selected:

Lucas 6: qvhB

Highlight

Copy