Lucas 7
7
Capitanpa ashmayninta Jesús aliyäsishqan
Mateo 8.5-13; Juan 4.43-54
1Runakunata sayno parlapayta ushaskirmi Capernaúm markaman Jesús aywarqan. 2Saychömi Roma capitanpa kuyay ashmaynin pasaypa ansa qeshyar wanunaykarqan. 3Say capitanmi Jesúspaq parlayashqanta mayaykur Israel mayor runakunata kachakurqan shamur ashmayninta aliyäsinanpaq.
4Saymi paykuna chaykur Jesústa ruwakur niyarqan: <<Capitanpa ashmayninta aliyäsinaykipaq aywaykuläshun, taytay. Capitanqa ali runa karmi 5marka mayinsikunatapis ali rikan y sinagögansitapis sharkasipämashkansi>>.
6Sayno ruwakuyaptinmi paykunawan Jesús aywaykarqan. Wayiman chänanpaqna kaykaptinmi amïgunkunata capitán kacharqan Jesústa niyänanpaq: <<Amashi afanakunkinasu, taytay. Mana Israel runa kaptinshi wayinmanpis yaykunkimansu. 7Sayshi kikin shamushsu. Ashmaynin aliyänanpaq kaylapitashi niykunki. 8Paypis mandaqninpa munayninchöshi kaykan. Saynöshi paypa munaynincho soldädunkunapis kaykäyan. Sayshi mayqantapis <ayway> niptin aywan, <shamuy> niptin shamun y ashmayninta <kayta ruray> niptinpis ruran>>.
9Sayno wilayaptinmi Jesús kushikur paywan aywaykaq runakunata nirqan: <<Noqa kaynömi nï: Sayjinanpa yärakamaq runataqa manami ni Israel runakunachöpis tarishkäsu>>.
10Capitanpa kachankuna kutiykurnami ashmay aliyashtana tariyarqan.
Viüdapa wawanta Jesús kawarisimushqan
11Saypitanami discïpulunkunawan Jesús aywarqan Naín markaman. Paykunawanmi aska runakuna aywayarqan. 12Markaman yaykuykarnami Jesús tinkurqan aska runakuna ayata apaykäyaqwan. Say ayaqa viüdapa juklayla maqta wawanmi karqan. 13Viüda waqaykaqta rikarmi kuyapashpan Jesús nirqan: <<Ama waqaysu>>.
14Sayno nishpan kirmata yataykuptinmi aya apaqkuna ichiskiyarqan. Saynami Jesús nirqan: <<¡Maqta, sharkuy!>>
15Sayno niptinmi kawarirkamur parlar qalaykurqan. Saymi viüdata Jesús nirqan: <<¡Wawayki kawarimushnami!>>
16Sayta rikaykurmi lapan runakuna kushikuyashpan Tayta Diosta alabar niyarqan: <<¡Munayyuq profëtami noqansiman chämush! ¡Tayta Diosmi kuyashqan runakunaman shamush!>>
17Saymi intëru Judeacho y nawpan markakunachöpis Jesús rurashqankunata musyayarqan.
Bautizaq Juanpa discïpulunkuna Jesúsman tapuq aywayashqan
Mateo 11.2-6
18Jesús rurashqankunata musyaykurmi Bautizaq Juanta discïpulunkuna wilayarqan. Saymi ishkay discïpulunkunata qayaykur 19Señor Jesústa tapuyämunanpaq kachar nirqan: <<¿Qamkush kaykanki Tayta Dios kachamushqan Cristo o juktaraqkush shuyakuyäshaq?>>
20Jesúsman chaykurnami niyarqan: <<Taytay, Bautizaq Juanmi musyayta munaykan. ¿Qamkush kaykanki shamunanpaq kaq Cristo o juktaraqkush shuyakuyäshaq?>>
21Tapuq chashqan hörami Jesús aliyaykäsirqan aska qeshyaykaqkunata, nakaykaqkunata, supay nakasishqankunata y aska qaprakunatapis.
22Saymi Jesús nirqan: <<Kutir Juanta wilayay rikayashqaykita y wiyayashqaykita. Qaprakuna rikayannami. Makllukuna puriyannami. Leprawan qeshyaqkuna aliyashnami. Upakuna wiyayannami. Wanushkuna kawariyämushnami. Muchuqkunapis Tayta Diospa ali wilakuyninta wiyaykäyannami. 23Yarpäyashqanno mana ruraptïpis mana ajayaypa noqaman yärakamaq runaqa kushishqami kawanqa>>.
Bautizaq Juan Diospa profëtan kashqan
Mateo 11.7-15
24Juanpa discïpulunkuna kutiskiyaptinnami runakunata Jesús nirqan: <<¿Imata rikaqtaq sunyaq jirkaman aywayarqayki? ¿Shoqushta wayra kuyusiqta rikayänaykipaqku? 25Manasayqa ¿ima rikaqtaq aywayarqayki? ¿Ali mödanash runata rikaqku aywayarqayki? Musyayashqaykinöpis reypa wayincho taq rïcu runakunalami ali mödanan jatish kaykäyan. 26Sayno kaptinqa ¿ima rikaqtaq aywayarqayki? ¿Profëta rikaqku? Aw, profëta rikaqmi. Noqa kaynömi nï: Paynöqa manami mayqan profëtapis kashsu. 27Juanta kachamunanpaqmi kayno qelqaraykan: <Nänita pisaq japuy runakunata kamarikasinanpaqmi wilakuqnïta puntaykita kachashaq>.#Mal. 3.1.
28<<Noqa kaynömi nï: Lapan profëtakunapitapis Bautizaq Juanqa mas tantiyakuqmi. Sayno kaptinpis Tayta Dios mandaykashqanman sayraq yaykuqkuna Juanpitapis mas tantiyayan>>.
29(Juan wilakushqanta wiyaykurmi impuestuta cobraqkunapis Tayta Diosta cäsukur Juan bautizananpaq aywayarqan. 30Fariseukunawan ley yachasiqkunami isanqa Diosta mana cäsukur bautizakuyarqansu.)
Bautizaq Juanpaq y Jesúspaq runakuna parlayashqan
Mateo 11.16-19
31Mastapis Jesús nirqan: <<Kanan tiempu runakunata ¿imamanraq tinkusïman? ¿Imanötaq kaykäyan? 32Paykunaqa pläzacho puklaq wamrakunanölami kaykäyan. Say wamrakunami qayarar niyan: <Pinkulluta tukayaptïpis manami tushuyankisu. Aya apay cantata cantayaptïpis manami waqayankisu>. Say wamrakunanölami kanan tiempu runakunapis kaykäyan. 33Bautizaq Juan tantata mana mikuptin y vïnuta mana upuptinmi nikäyanki: <¡Payqa supaypa munayninchömi kaykan!> 34Runapa Surin mikuptin y upuptinmi nikäyanki: <¡Kay runaqa mikular upular purikun! ¡Impuestu cobraqkunawan y jusasapa runakunawanmi shuntakan!> 35Sayno niyaptikipis discïpulükuna Tayta Dios munashqanno kawayaptinmi Juanta y noqata Tayta Dios kachayämashqan tantiyakaykan>>.
Jusasapakuna perdonash kar Tayta Diosta mas kuyayashqan
36Saypitanami fariseo runa Jesústa pusharqan wayincho mikuyänanpaq. Chaykurnami mësaman Jesús jamaykurqan. 37Fariseupa wayincho Jesús mikuykashqanta musyaykurmi prostitüta warmi alabastro rumipita rurash pömuwan perfümin aptash charqan. 38Jesúspa qepanman qonqurpakuykur waqaptinmi chakinman weqin juturqan. Say jutushqantanami aqsanwan pisapaskir Jesúspa chakinta musaykushpan apashqan perfümita winaparqan.#7.38 Say wisanmi runakuna pasaman wequkuykur mikuyaq. Sayno mikuyaptinmi Jesúspa chakinman perfümita winaparqan.
39Sayta rikaykurmi wayinman pushaq fariseo kayno yarparqan: <<Kay runa Diospa profëtan karqa tantiyanmanmi jusasapa warmi yataykashqanta>> nir.
40Saynami Jesús nirqan: <<Simón, jukta nishayki>>.
Niptinmi nirqan: <<Mä nimay, rabí>>.
41Saymi Jesús nirqan: <<Ishkay runakunashi juk runapa jaqan kayänaq. Jukninshi pisqa pachak (500) junaq arur gänashqanno jaqan kanaq. Jukaqnashi pisqa chunka (50) junaq arur gänashqanno jaqan kanaq. 42Imanöpapis pägayta mana puëdiyaptinshi ishkantapis cobranaqnasu. Kanan mä nimay. ¿Mayqan kaqtaq say qellayyuq runata mas kuyanqa?>>
43Saymi Simón nirqan: <<Mas aypala jaqan kaq runachir, taytay>>.
Niptinmi Jesús nirqan: <<Alimi tantiyashkanki>>.
44Sayno nirmi warmita rikärir Simónta nirqan: <<Kay warmi rurashqanta ¿rikashkankiku? Wayikiman yaykamuptï chakïta awikunäpaq manami yakuta puestupämashkankisu. Kay warmimi isanqa weqinwan chakïta ushmarkasir aqsanwan sakisipämash. 45Qamqa manami winchikamar musamashkankisu. Paymi isanqa yaykamushqanpita pasa mana kachaypa chakïta musash. 46Umämanpis manami aceitita winapämashkankisu. Paymi isanqa chakïman perfümita winapämash. 47Saymi nï: Kay warmiqa aska jusankunata perdonaptïmi fiyupa kuyamar sayno rurash. Wakinmi isanqa jusaynaq kayashqanta yarpar janan shonqula kuyayäman>>.
48Nirkurmi say warmita nirqan: <<Lapan jusaykikunatami perdonä>>.
49Saymi mësacho jamaraykaq runakuna kikinpura parlayarqan: <<¡Pinataq payqa runapa jusanta perdonananpaqqa!>>
50Jesúsnami say warmita nirqan: <<Yärakamashqaykipitami salvash kaykanki. Kananqa kushishna aywakuy>>.
Currently Selected:
Lucas 7: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
