Lucas 8

Jesústa yanapaq warmikuna

1Saypitanami chunka ishkay discïpulunkunawan markan markan Jesús purir Tayta Dios mandaykashqanpa ali wilakuyninta wilakurqan. 2Paykunawanmi aywayarqan supaypa munayninpita jorqushqan warmikuna y qeshyankunapita aliyäsishqan warmikunapis. Saynöpis aywarqan Magdalena niyashqan María. Paypitami qanchis supaykunata Jesús qarqurqan. 3Saynöpis aywayarqan Herodespa yanapaqnin Chuzapa warmin Juana, Susana y wakin warmikunapis. Paykunami Jesústa y discïpulunkunata gastunkunapaq kamaripäyarqan.

Diospa wilakuyninta muruman Jesús tinkusishqan

Mateo 13.1-9; Marcos 4.1-9

4Maysay markakunapita aska runakuna shuntakäyaptinmi Jesús wilapar nirqan: 5<<Juk runashi trïgu muruq aywanaq. Muruta shikaptinshi näniman wakin shikwanaq. Saytashi runakuna jarukuyänaq y pishqukunapis upshakurkuyänaq. 6Wakin kaq murushi shalaman shikwanaq. Saycho jeqamurpis alpa mana kaptinshi sakikäkunaq. 7Wakin kaq murushi kashakuna chawpinman shikwanaq. Jeqamurpis kashakuna nitiptinshi qarwashtaykälar wanunaq. 8Wakin kaq murunashi isanqa ali alpaman shikwanaq. Saykunaqa jeqamurshi cada espïgacho pachak (100) trïguta wayunaq>>.

Sayno yacharkasirmi Jesús sinchipa nirqan: <<¡Rinriyuq kaqkunaqa nishqäkunata wiyakuyäsun!>>

Tinkusiypa imanir Jesús yachasishqan

Mateo 13.10-15; Marcos 4.10-12

9Saypitanami discïpulunkuna Jesústa tapur niyarqan: <<Taytay, ¿ima ninantaq say tinkusiyta yachasishqayki?>>

10Saymi Jesús nirqan: <<Qamkunataqa Tayta Dios mandaykashqan imano kashqantapis shumaqmi tantiyasiyäshayki. Wakinkunatami isanqa imamanpis tinkusiypa wilapaykä. Saymi rikaykarpis cuentata qokuyansu y wiyaykarpis tantiyayansu>>.#Isa. 6.9-10.

Muruman tinkusishqanta Jesús tantiyasishqan

Mateo 13.18-23; Marcos 4.13-20

11<<Tinkusiypa wilapashqäta kanan tantiyasiyäshayki. Trïgu muruqa Tayta Diospa wilakuyninmi.

12<<Wakin runakunaqa chukru näninömi kaykan. Tayta Diospa wilakuyninta wiyayaptinpis diablu shamurmi wiyayashlantapis qonqaykasin. Saymi mana criyiyashpan salvakuyansu.

13<<Wakin runakunaqa shalanömi kaykäyan. Saymi Tayta Diospa wilakuyninta wiyar kushish chaskikurpis jaqwäkuyta mana puëdiq jachano kar nakaykunaman chäyashpan qepaman kutikuyan.

14<<Wakin runakunaqa kasha kasha chakranömi kaykäyan. Saymi Tayta Diospa wilakuyninta wiyarpis yarpachakuyan imanöpis kawayänalanpaq, rïcu kayänalanpaq y kikinkuna munashqanno kawayänalanpaq. Sayno karmi mana wayuq trïguno kaykäyan.

15<<Wakin runakunami isanqa ali alpano kaykäyan. Saymi Tayta Diospa wilakuyninta lapan shonqunwan kushish chaskikur Tayta Dios munashqanno kawayan. Ali alpacho muru winarkamur seqaypa wayushqannömi imaypis kawayan>>.

Wilakuyninta aksiman Jesús tinkusishqan

Marcos 4.21-25

16<<Manami pipis aksita sarirkasir manka rurinman ni kawitu rurinman churansu, saypa trukanqa wayiman yaykuqkuna rikayänanpaq alayrinninmanmi churan.#Mat. 5.15; Mar. 4.21. 17Saynömi yachasishqäkuna kanan pakaraykaqno karpis musyakanqa. Kanan mana tantiyakarpis waraykunaqa tantiyakanqami.#Mar. 4.22. 18Sayno kaptinqa shumaq wiyayämay. Yachasishqäta cäsukuqkunaqa masmi tantiyakuyanqa. Mana cäsukuqkunami isanqa tantiyayashlantapis qonqaykuyanqa>>.#Mat. 13.12; 25.29; Mar. 4.25.

Jesúspa maman y wawqinkuna pï kayashqanpis

Mateo 12.46-50; Marcos 3.31-35

19Saypitanami Jesúspa maman y wawqinkuna chäyarqan Jesús kaykashqan wayiman. Aska runakuna kayaptinmi yaykuyta kamäpakuyarqansu. 20Saymi juk runa Jesústa wilarqan: <<Mamaykiwan wawqikikunami punkucho shuyaraykäyäshunki>> nir.

21Sayno niptinmi Jesús nirqan: <<Pipis Tayta Diospa wilakuyninta wiyar cäsukuq kaqmi mamäqa y wawqïkunaqa kaykäyan>>.

Wayrapaqpis yakupaqpis Jesús munayyuq kashqan

Mateo 8.23-27; Marcos 4.35-41

22Juk junaqmi discïpulunkunawan büquiman wisarkur Jesús nirqan: <<Wak simpaman päsashun>>.

Sayno niptinmi büquiwan aywayarqan. 23Qochata simpaykäyaptinmi Jesús punukäkurqan. Sayyaqmi fiyupa wayrawan yaku pulchaqyar büquita talpukäsinanpaqna kaykarqan. 24Saymi Jesústa rikchasiyarqan: <<¡Rabí, rabí! ¡Talpukaykansinami!>> nir.

Sayno niyaptinmi Jesús sharkurkur wayratawan yakuta olqutuparqan. Olqutupaskiptinmi wayrapis yakupis chawaskirqan. 25Saypitanami discïpulunkunata nirqan: <<¿Imanirtaq yärakuynikikuna kansu?>>

Saymi kikinpura mansakash ninakuyarqan: <<Yakupis wayrapis sayno cäsunanpaqqa ¡pinataq kay runaqa!>>

Supaykuna löcuyäsiyashqan runata Jesús kachakäsishqan

Mateo 8.28-34; Marcos 5.1-20

26Saypitanami Gerasa#8.26 Wakin griego copiakunachöqa Gadara niyanmi. Wakinnami Gergesa niyan. niyashqan partiman chäyarqan. Say kaykan Galileapa simpanchömi. 27Büquipita Jesús urarpuptinmi supaykuna löcuyäsiyashqan runa shamurqan. Say runa unaypita pasami qarapächula purikuq. Wayicho tänanpa trukanqa panteonlachömi tarqanpis. 28Jesústa rikaykurmi fiyupa qaparashpan puntanman lätakuykur sinchipa nirqan: <<¡Munayyuq Diospa Surin Jesús! ¡Imatataq noqawan munanki! ¡Ama nakaykasilämaysu!>>

29(Sayno supay nirqan runapita yarqunanpaq Jesús nish kaptinmi. Aska kutimi say runata munashqanta supay rurasirqan. Saymi makipita chakipita cadinawan watayaptinpis rachirir sunyaq jirkaman aywakuq.)

30Saypitanami Jesús tapurqan: <<¿Imataq jutiki?>> nir.

Tapuptinmi nirqan: <<Legión>>.#8.30 Legión ninanqa aska waranqa ninanmi.

(Sayno nirqan aska supaykuna payman yaykush kayaptinmi.)

31Say supaykunami Jesústa yaparir yaparir ruwakuyarqan yanawyaykaq sakayman mana qarpuriykunanpaq. 32Washalänin lömachömi saysika kuchikunata misiykäyarqan. Saymi supaykuna Jesústa ruwakuyarqan kuchikunaman yaykuyänanpaq. Ruwakuyashqanta Jesús awniptinmi 33supaykuna runapita yarquskir say kuchikunaman yaykukuykuyarqan. Saymi kuchikuna löcutäyashpan tunapa cörrir qochaman jeqakurpuyarqan. Saychömi shenqaypa wanuyarqan.

34Sayta rikaykurmi kuchi misiqkuna cörrila aywar markacho y cercancho taq runakunata wilayarqan. 35Wilayaptinmi runakuna shayämurqan ima kashqantapis rikayänanpaq. Jesús kaykashqanman chäyashpanmi say löcuyash runata tariyarqan mödanan jatish juiciunchöna Jesúspa puntancho jamaraykaqta. Sayta rikaykurmi fiyupa mansakäyarqan.

36Jesús kachakäsishqanta rikaqkunanami sayman chaqkunata wilayarqan imano kachakashqantapis. 37Saymi say particho taq runakuna seqaypa mansakäyashpan Jesústa ruwakuyarqan saypita aywakunanpaq. Sayno ruwakuyaptinmi büquiman wisarkur discïpulunkunawan Jesús aywakurqan.

38Manaraq aywakuyaptinmi aliyaq runa Jesústa ruwakurqan paywan aywakunanpaq. Saymi Jesús nirqan: 39<<Wayikipa kutir Tayta Dios kachakäsishushqaykita wilakuy>>.

Sayno niptinmi aywar pïmaytapis wilaparqan Jesús kachakäsishqanta.

Jairupa surinta kawarisimushqan y warmita aliyäsishqan

Mateo 9.18-26; Marcos 5.21-43

40Qocha wak simpanman Jesús kutiptinmi shuyaraykaq aska runakuna kushish chaskikuyarqan. 41Saymanmi charqan sinagögacho mandaq Jairo jutiyuq runa. Paymi Jesúspa puntanman qonqurpakuykur ruwakurqan wamranta aliyäsiq wayinman aywananpaq 42Say wamranqa chunka ishkay watayuqno juklayla warmi surinmi karqan. Paymi pasaypa ansa qeshyar wanuykarqanna.

Jairupa wayinman Jesús aywaptinmi saysika runakuna kichkiyparaq qatiräyarqan. 43Say runakunawanmi chunka ishkay watana yawar apaywan qeshyaykaq warmipis aywaykarqan. [Jampikunanpaqmi imaykantapis rantikur usharqan.] Manami ni pï jampiptinpis aliyarqansu. 44Say warmi Jesúspa qepalanpa yaykuykur mödananpa kuchunta yataykuptinmi jinan höra yawar apaynin chawaskirqan. 45Saymi Jesús nirqan: <<¿Pitaq yataykamash?>>

Niptinmi lapanpis niyarqan: <<Manami noqa yatashkäsu>>.

Saymi Pedro nirqan: <<Kayläya kichkimi aywaykansi, taytay. [¿Imanöparaq musyayäman mayqan yataykushushqaykitapis?]>>

46Sayno niptinpis Jesús yapaymi nirqan: <<Pï karpis yatamashqami. Munaynï yarqushqantami mayashkä>>.

47Yatashqanta tantiyaptinmi say warmi mansariywan suksukyaykar Jesúspa puntanman qonqurpakuykurqan. Nirkurmi lapan runakunapa nawpancho wilarqan imanir yataykushqanta y jinan höra aliyashqantapis. 48Saymi Jesús nirqan: <<Hïja, yärakamashqaykipitami aliyashkanki. Kananqa kushishna aywakuy>>.

49Jesús sayno parlaykaptinraqmi Jairupa wayinpita wilakuq taripaykur nirqan: <<Taytay, suriki wanuskishnami. Amana Jesústa afanakasiynasu>>.

50Sayno niqta wiyaykurmi Jesús nirqan: <<Ama lakikuysu. Tayta Diosman yärakuy. Suriki kawarimunqami>>.

51Wayiman chaykurmi Jesús yaykasirqan Pedruta, Juanta, Santiaguta y Jairutapis warmintinta. Wakin kaq runakuna yaykuyänantami isanqa munarqansu. 52Wamra wanush kaptinmi waqtacho runakuna fiyupa waqaykäyarqan. Saymi Jesús nirqan: <<Ama waqayaysu. Manami wanushsu, sinöqa punuykanlami>>.

53Sayno niptinmi wanush kaykashqanta musyar Jesústa asipäyarqan. 54Saypitanami ayata makinpita sarirkur Jesús nirqan: <<¡Wamra, sharkuy!>>

55Sayno niptinmi jinan höra kawarirkamur sharkarkamurqan. Saymi Jesús nirqan: <<Kay wamrata pachan qarayay>>.

56Wamra kawarimushqanta rikaykurmi mamanwan taytan seqaypa espantakuyarqan. Isanqa kawarisimushqanta pitapis mana wilakuyänanpaqmi Jesús albirtirqan.

Currently Selected:

Lucas 8: qvhB

Highlight

Copy