Vakatekivu 11
11
Na Vale Cere i Cake mai Pepeli
1Ena gauna taumada, a duabau ga na nodra vosa na tamata kecega e vuravura. 2Ni ra veitosoyaki voli na tamata ena Tokalau ni vanua, era yaco sara ki na dua na vanua bucabuca e Papilonia, ka vakaitikotiko kina.
3Era a veivosaki ka kaya, “Me da buli biriki mada ka vavia ena buka.” Sa rawa na biriki me tara kina na vale kei na qele dregadregata me dregati ira vata. 4Era a kaya, “Me da tara mada e dua na koro kei na dua na vale cere i cake, me yaco sara ki lomalagi na dokana. Me da cakava me rogo kina na yacada, ka me da kakua ni veiseyaki kina ena dela i vuravura.”
5A lako sobu mai lomalagi o Jiova me raica na koro kei na vale cere i cake era a tara na tamata, 6ka kaya, “Era sa dua ga na matatamata, ka dua ga na nodra vosa. Sai koya oqo na i tekivu ni ka era na cakava; e muri, sa na rawa me'ra cakava na ka ga era vinakata. 7Me datou lako sobu ka vakasesea na nodra vosa me ra kakua ni veikilai vosa.” 8A sa vakasavi ira mai kea o Jiova, ka ra sa veiseyaki ena dela i vuravura, a sa mudu talega e kea na tara ni koro. 9A sa vakatokai na koro o ya me yacana o Pepeli,#11.9 Pepeli: se Papiloni; Na yaca oqo e balebale vaka na “vakasesea” ena vosa vakaiperiu. baleta ni a vakasesea kina na nodra vosa kecega na tamata o Jiova, ka vakasavi ira yani ki na veiyasa i vuravura.
Na Kawa i Semi
(1Vei 1.24-27)
10Sai ira oqo na kawa i Semi. Ni oti e rua na yabaki ena kena a luvuci o vuravura, ni sa yabaki 100 o Semi, a sa sucu na luvena tagane, o Afakisate na yacana. 11Ni sucu oti o Afakisate, a sa bula voli o Semi me 500 tale na yabaki, ka sucu tale eso na luvena.
12Ni sa yabaki 35 o Afakisate, a sa sucu na luvena tagane, o Sela na yacana. 13Ni sucu oti o Sela, a sa bula voli o Afakisate me 403 tale na yabaki, ka sucu tale eso na luvena.
14Ni sa yabaki 30 o Sela, a sa sucu na luvena tagane, o Iperi na yacana; 15ka sa bula voli o Sela me 403 tale na yabaki, ka sucu tale eso na luvena.
16Ni sa yabaki 34 o Iperi, a sa sucu na luvena tagane, o Peleki na yacana; 17ka sa bula voli o Iperi me 430 tale na yabaki, ka sucu tale eso na luvena.
18Ni sa yabaki 30 o Peleki, a sa sucu na luvena tagane, o Reu na yacana; 19ka sa bula voli o Peleki me 209 tale na yabaki, ka sucu tale eso na luvena.
20Ni sa yabaki 32 o Reu, a sa sucu na luvena tagane, o Seruki na yacana; 21ka sa bula voli o Reu me 207 tale na yabaki, ka sucu tale eso na luvena.
22Ni sa yabaki 30 o Seruki, a sa sucu na luvena tagane, o Neori na yacana; 23ka sa bula voli o Seruki me 200 tale na yabaki, ka sucu tale eso na luvena.
24Ni sa yabaki 29 o Neori, a sa sucu na luvena tagane, o Tira na yacana; 25ka sa bula voli o Neori me 119 tale na yabaki, ka sucu tale eso na luvena.
26Ni sa yabaki 70 o Tira, sa qai sucu o iratou na luvena o Eparama, kei Neori, kei Erani.
Na Kawa i Tira
27Oqo o ira na kawa i Tira, o koya na tamadratou o Eparama, kei Neori, kei Erani. O Erani oqo na tama i Loti, 28ka sa mate o Erani ena nona koro o Uri mai Papilonia, ni se bula tiko o tamana. 29E rau sa vakawati o Eparama kei Neori; na yaca i wati Eparama o Serai, ka yaca i wati Neori o Milika, na luve i Erani, o koya na tama i Milika kei Isika. 30A sa sega ni vakaluveni rawa o Serai.
31A sa kauti Eparama o Tira na tamana, kei na makubuna o Loti, o koya na luve i Erani, kei Sera na vugona, o koya na wati Eparama na luvena; ka biuta na koro levu o Uri mai Papilonia me ratou lako ki na vanua o Kenani. Ia e ratou a yaco ga e Karana ena nodratou i lakolako, ka mani tiko kina. 32E a mate mai kea o Tira ni sa yacova na yabaki 205.
Currently Selected:
Vakatekivu 11: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.
