Vakatekivu 16
16
O Eka kei Isimeli
1A sega sara ni vakasucuma o Serai vei Eparama e dua na luvena. Ia e dua tiko na yalewa bobula ni Ijipita, na dauveiqaravi i Serai, na yacana o Eka. 2A qai kaya o Serai vei Eparama, “Raica, sa tarova o Jiova me'u kakua ni vakaluveni; mo drau la'ki tiko vata kei na noqu dauveiqaravi, de na qai rawa e dua na luvequ mai vua.” A sa mani vakadonuya o Eparama na ka e a tukuna o Serai. 3Ni oti e tini na yabaki na tiko i Eparama mai Kenani, a qai soli Eka na nona dauveiqaravi ka yalewa ni Ijipita o Serai vei Eparama me dua na watina lailai. 4E rau tiko vata o Eparama kei Eka, ka mani bukete o Eka. Ia ni sa kila o Eka ni sa bukete, a qai yaco me beci Serai na nona marama.
5A sa kaya vei Eparama o Serai, “Sa baleti iko na nona beci au o Eka. Oi au ga ka solia na noqu yalewa bobula oqo vei iko, ia ena gauna sa kila kina o koya ni sa bukete, sa qai beci au sara. Me qai lewa na Kalou se o cei e dodonu vei kedaru!”
6A sa kaya o Eparama, “Raica, o Eka sa nomu bobula ka sa tu ga e ligamu na lewa me baleti koya; ia mo cakava ga na ka o vinakata vua.” A qai vakayacora vua o Serai na i tovo kaukauwa, ka mani dro tani kina o Eka.
7A qai kunei koya e dua na agilosi i Jiova ena dua na mata ni wai ena vanua lala ena sala vaka ki Suri, 8a kaya vua, “I Eka, na dauveiqaravi i Serai, o sa lako mai vei? O sa lako tiko ki vei?” A sauma o Eka ka kaya, “Au sa dro tani mai vua na noqu marama o Serai.”
9A sa kaya vua na agilosi, “Mo lesu tale vua na nomu marama ka la'ki vakarorogo vua.” 10A sa kaya tale na agilosi “Au na vakalewevuqataka na nomu kawa me na sega ni wiliki rawa. Raica o sa bukete tiko, 11o na vakasucuma e dua na gonetagane. Mo vakatoka me yacana o Isimeli,#16.11 Isimeli: Na yaca vakaiperiu oqo e kena i balebale, “Sa rogoca na Kalou”. baleta ni sa rogoca o Jiova na nomu rarawa. 12Ia na luvemu ena vaka na asa kila; ena saqati ira na tamata kecega, ka ra na saqati koya na tamata kecega, ka tawasei koya tani mai vei ira na wekana.”
13A sa kaya e lomana o Eka, “Au sa raica dina li na Kalou, o koya ka sa dau raici au tiko?” A sa vakatoka me yaca ni Kalou ka a vosa vua me o Jiova roi.#16.13 Jiova roi: E kena i balebale Na Kalou o ni sa raica se Na Kalou sa dauvakararai se Na Kalou sa rai tikoga. 14O ya na vuna era vakatoka kina na tamata na i keliwai ena kedrau veimama o Katesi kei Pereti, “Na i Keliwai nei Koya sa bula ka raici au.”#16.14 Vakaiperiu (Hb) Pieri Leai Roi
15A vakasucuma o Eka vei Eparama e dua na luvena tagane, a vakatoka me yacana o Isimeli.#Kala 4.22 16A sa 86 na yabaki i Eparama ni a vakasucumi Isimeli o Eka.
Currently Selected:
Vakatekivu 16: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.
