Vakatekivu 27
27
Sa Vosavakalougatataki o Jekope
1Ena gauna a qase sara kina o Aisake, sa buwawa na matana, ka sega ni raica rawa e dua na ka; sa qai kacivi Iso mai na luvena ulumatua ka kaya vua, “Na luvequ,” sa kaya o Iso,
“Oi au oqo tamaqu.”
2Sa kaya vua o Aisake, “Raica, au sa qase mai, ka'u sa sega ni kila na siga au na mate kina. 3Mo kauta na nomu i yaya ni vakasasa, na taga ni gasau kei na nomu dakaititi, ka lako yani i veikau mo vakasasa manumanu mai me kequ. 4Mo qai mai vakarautaka e dua na kakana vinaka sara me vaka na kena au dau taleitaka, ka kauta mai me'u kania, me'u na qai vosa vakalougatataki iko ni bera ni'u mate.”
5E a vakarorogo tu o Repeka ena gauna e vosa tiko kina o Aisake vei Iso na luvena. Ia ena gauna sa lako yani kina o Iso me la'ki vakasasa manumanu, 6sa qai kaya o Repeka vei Jekope, “Au sa rogoca na ka sa kaya o tamamu vei Iso, 7‘Mo la'ki kauta mai e dua na manumanu ka cakava e dua na kakana au dau taleitaka me kequ; me'u kania, au na qai vakalougatataki iko ena mata i Jiova ni bera ni'u mate.’ 8Ia oqo na luvequ, mo muria na noqu vosa ka cakava na ka au sa kaya oqo vei iko. 9Mo lako ki na qele ni manumanu ka kauta mai kina e rua na luve ni me urouro vinaka; au na mai vakasaqara e dua na kakana vinaka sara me kei tamamu, me vaka e dau taleitaka o koya. 10Ia o na qai kauta vei tamamu me kania, ka me vosa vakalougatataki iko ni bera ni mate.”
11Sa qai kaya o Jekope vei Repeka na tinana, “O sa kila vinaka ni o Iso e tamata yago vutivutia, ia sa sega ni vutivutia na yagoqu. 12De na qai tarai au o tamaqu, ka qai kila ni'u lawakitaki koya, ka na qai vakatauca kina vei au na cudru, ka segai na kalougata.”
13A qai mani kaya o tinana, “Na luvequ, me qai tau vei au na nomu cudruvi; ia mo muria ga na noqu vosa, ka la'ki kauta mai e rua na luve ni me.” 14A sa lako yani o Jekope ka kauta mai e rua na luve ni me vei tinana; a sa mai vakarautaka yani o Repeka na kakana me vaka na kena e dau taleitaka o tamana. 15A kauta mai o Repeka na i sulu vinaka i Iso ka tu e vale ka mai vakasulumi Jekope kina na luvena gone. 16A sa vakaisulutaka ena kuli ni me na ligana kei na tiki ni domona e sega ni vutivutia. 17Sa qai solia yani vua na kakana vinaka sa vakarautaka kei na madrai e sa vavia.
18A sa lako yani o Jekope vei tamana ka kaya, “I Tamaqu!”
A sauma mai o tamana, “Io, na luvequ! O cei vei rau na luvequ o iko?”
19A sa kaya o Jekope vei tamana, “Oi au o Iso na nomu ulumatua, au sa la'ki cakava mai na ka o sa kaya vei au. Yalovinaka mo duri mai ka kania eso na lewe ni manumanu ni noqu vakasasa ka'u sa kauta mai oqo me kemu, ka mo qai vosa vakalougatataki au.”
20A sa kaya o Aisake, “A yaco vakacava mo kunea totolo kina, na luvequ?”
A sauma o Jekope ka kaya, “Sa vukei au o Jiova na nomu Kalou me'u kunea vakatotolo mai.”
21Sa qai kaya o Aisake vei Jekope, “Toro voleka mada mai na luvequ, ka me'u tarai iko. Sai iko dina li o Iso?” 22A toro voleka sara o Jekope vei tamana, ia ni sa tarai koya o tamana, a sa kaya, “Na i rogorogo ni domomu e sa vaka ga na domo i Jekope, ia na ligamu sa liga i Iso.” 23A sa sega ni kilai Jekope rawa o koya, baleta ni sa vutivutia talega na ligana me vakataki Iso. Ni sa vakarau vakalougatataki koya, 24a sa qai tarogi koya tale, “O iko dina na luvequ o Iso, se segai?”
A sauma o koya, “Io, sai au ga.”
25A sa kaya o Aisake, “Kauta mai vei au na lewe ni manumanu o sa toboka mai me'u mai kania, au na qai vosa vakalougatataki iko.” A sa kauta mai vua na kakana o Jekope, ka kauta talega mai eso na waini me gunuva. 26Ia sa qai kaya vua o tamana, “Toro voleka mai ka reguci au, na luvequ.” 27Ia ni sa toro mai me reguci koya, sa boica na i boi ni nona i sulu o Aisake, sa qai vosa vakalougatataki koya ka kaya, “Na boi vinaka kei luvequ sa vaka na i boi ni vanua sa vakalougatataka o Jiova.#Ipe 11.20 28Me solia vei iko na Kalou na tegu ni lomalagi ka vakabulabulataka na nomu vanua, Me vakalevutaka vei iko o koya na sila kei na waini. 29Me ra qaravi iko na lewenivanua, ka cuva vei iko na veimatanitu. Mo liutaki ira na wekamu, ka me ra cuva vei iko na kawa i tinamu. Ena cudruvi o ira sa cudruvi iko, ka vakalougatataki o ira sa vosa vakalougatataki iko.”#Vteki 12.3
Vakamamasu o Iso me Vakalougatataki
30Ni sa solia oti na nona vosa ni veivakalougatataki o Aisake, ka sa lako yani o Jekope, a sa qai lesu mai o Iso ena vakasasa manumanu. 31A sa cakava talega e dua na kakana vinaka sara, ka kauta vei tamana. A sa kaya vua, “I Tamaqu, au kerea mo duri cake mada ka kania eso na lewe ni manumanu au sa rawata mai, ka mo qai vosa vakalougatataki au.”
32A tarogi koya o Aisake, “O cei o iko”
A sauma o Iso ka kaya, “Oi au o Iso, na nomu ulumatua tagane.”
33A sa sautaninini vakalevu o Aisake ka kaya, “Ia o cei ga sa vakamate manumanu ka kauta mai vei au? Au a se qai kania oti sara toka ga oqo ni bera ni o yaco mai. Au sa vosa vakalougatataki koya oti, ka sa nona kece vakadua na veivakalougatataki.”
34Ia ni sa rogoca na ka oqo o Iso, a sa tagi ena domoilevu kei na rarawa bibi, ka kaya, “Mo vosa vakalougatataki au, o au talega, i tamaqu!”
35A sauma o Aisake ka kaya, “Sa lako oti mai o tacimu ka lawakitaki au. Sa kauta yani o koya na nomu veivakalougatataki.”
36Sa qai kaya o Iso, “Oqo sai karua ni gauna me veidabuitaki au kina o koya. Sa rauta me yacana o Jekope.#27.36 Jekope: Na yaca oqo e rogorogo vaka na “veidabui” ena vosa vakaiperiu. Sa taura mada na noqu i tutu vakaulumatua, ia oqo sa mai taura tale na noqu i votavota ni veivakalougatataki. O sega li ni vakavotaka tiko e dua na vosa ni veivakalougatataki me noqu?”#Vteki 25.29-34
37A sa kaya o Aisake, “Au sa qisi koya oti me turaga vei iko, ka'u sa soli ira kecega na wekana me ra nona dauveiqaravi. Au sa solia vua na sila kei na waini. Sa sega tale ni qai vo e dua na ka me'u solia vei iko, na luvequ!”
38A sa cikevi tamana tikoga o Iso, ka kaya, “Sa duabau ga li na nomu vosa ni veivakalougatataki, i tamaqu? Mo vakalougatataki au talega, tamaqu!” A sa tabalaka na domona o Iso ka tagi.#Ipe 12.17
39Sa qai kaya vua o Aisake,#Ipe 11.20
“E segai na tegu mai lomalagi vei iko,
E segai na vanua bulabula ka sautu me nomu.
40O na bula ena nomu i seleiwau,#Vteki 36.8; 2Tui 8.20
Ia o na qaravi koya na tacimu.
Ni kevaka o saqati koya,
O na tamusuki tani mai na nona veiliutaki.”
41A sa cati Jekope sara vakalevu o Iso, baleta ni sa solia vua o tamana na veivakalougatataki. A sa kaya e lomana, “Sa voleka na gauna me na tagicaki kina na mate i tamaqu; au na qai vakamatei Jekope ni oti o ya.”
42Ni sa rogoca o Repeka na i tuvatuva i Iso, sa qai kacivi Jekope ka kaya vua, “Sa nakita o tuakamu me na vakamatei iko.#Ym 10.10 43Ia oqo, na luvequ, mo muria na noqu vosa. Mo lako sara ga vakatotolo oqo vei ganequ o Lepani mai Karana, 44ka la'ki tiko vua vakalailai mai kea, me yacova na gauna sa malumu kina na cudru i tuakamu, 45ka na qai guilecava na ka o sa cakava vua. Au na qai tala yani e dua me la'ki kauti iko lesu mai. Baleta na cava me'u vakayali kemudrau ruarua kina na luvequ ena dua ga na siga?”
Talai Jekope o Aisake
46A sa kaya o Repeka vei Aisake, “Sa leqa vakalevu na noqu bula vei rau na yalewa tani na wati Iso. Kevaka e qai vakawati tale o Jekope vei ira na Itaiti me vakaoqo, sa vinaka cake ga vei au me'u mate yani.”
Currently Selected:
Vakatekivu 27: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.
