Vakatekivu 30
30
1Ia ni sa raica o Raijeli ni se sega ga ni vakasucuma rawa e dua na gone vei Jekope, a sa vuvutaki Lia na tuakana, ka kaya vei Jekope, “Solia mada vei au na gone, de'u qai mate.”
2A sa cudruvi Raijeli o Jekope ka kaya vua, “E sega ni rawa vei au me'u taura na nona i tutu na Kalou. O koya ga sa tarovi iko tiko mo kua ni vakaluveni.”
3Sa qai kaya o Raijeli, “Oqo na noqu bobula o Pila; mo la'ki mocevata kaya, me rawa ni vakasucuma e dua na gone me'u mai susuga, ka me'u vakadewa kawa kina mai vua.” 4A sa qai soli Pila yani vua na watina, ka sa mocevata kaya. 5A sa bukete o Pila ka vakasucuma vei Jekope e dua na luvena tagane. 6Sa qai kaya o Raijeli, “Na Kalou sa lewa ena vukuqu. Sa rogoca o koya na noqu masu ka sa solia vei au e dua na gonetagane”; a sa vakatoka kina me yacana o Tani.#30.6 Tani: Na yaca oqo e balebale vaka na “sa lewa” ena vosa vakaiperiu. 7A sa bukete tale o Pila ka vakasucuma vei Jekope na i karua ni luvena tagane. 8A sa kaya o Raijeli, “Sa dua na veivala kaukauwa keirau sa kitaka oqo kei tuakaqu, ia ka'u sa qaqa”; ka sa vakatoka kina me yacana o Navitalai.#30.8 Navitalai: Na vosa oqo e balebale vaka na “veivala” ena vosa vakaiperiu.
9Ia ni sa raica o Lia ni sa oti na nona vakaluveni, a sa soli Silipa na nona yalewa bobula vei Jekope me watina. 10A sa vakasucuma o Silipa vei Jekope e dua na luvena tagane. 11Sa qai kaya o Lia, “Ia oqo au sa qai sotava e dua na ka vinaka”; ka sa vakatoka kina me yacana o Kata.#30.11 Kata: Na yaca oqo e balebale vaka na “ka vinaka” (luck, good fortune) ena vosa vakaiperiu. 12A sa vakasucuma tale o Silipa vei Jekope na i karua ni luvena tagane. 13A sa kaya o Lia, “Sa dua tani noqu marau! Ia oqo era sa na vakatokai au na yalewa me o marau.” A sa vakatoka kina me yacana o Aseri.#30.13 Aseri: Na yaca oqo e balebale vaka na “marau” ena vosa vakaiperiu.
14Ena gauna ni tamusuki witi, a sa lako yani ki veikau o Rupeni, ka mani kunea eso na kau ni vakaluveni,#30.14 kau ni vakaluveni: Na kau na ‘medureke’ ka vakabauti ni dau vukea na vakaluveni, ka sa vakayagataki me vakatagarogaroya na veidomoni. ka mani kauta yani vei Lia na tinana. A sa qai kaya vei Lia o Raijeli, “Au kerea mo solia mada vei au eso na kau ni vakaluveni nei luvemu.”
15Sa qai kaya o Lia, “E sega beka ni se rauti iko na nomu kauta tani na watiqu? Ia oqo o sa via kauta tani talega na kau ni vakaluveni nei luvequ.”
A sa kaya o Raijeli, “Kevaka o na solia vei au na kau ni vakaluveni nei luvemu, ena rawa mo drau na la'ki mocevata kei Jekope ena bogi edaidai.”
16Ni sa lesu mai o Jekope mai veikau ena yakavi, sa la'ki tavaki koya o Lia ka kaya vua, “O na mocevata kei au ena bogi edaidai, baleta ni'u a sa saumi iko oti ena kau ni vakaluveni sa kauta mai na luvequ.” E rau a mani veiyacovi ena bogi o ya.
17A sa rogoca na masu i Lia na Kalou, ka sa bukete, ka vakasucuma vei Jekope na i kalima ni luvena tagane. 18A sa kaya o Lia, “Na Kalou sa solia vei au na noqu i cocovi, baleta ni'u sa solia na noqu yalewa bobula vua na watiqu;” a sa vakatoka kina me yacana o Isakari.#30.18 Isakari: Na yaca oqo e balebale vaka na “sa saumi na tagane” kei na “ai cocovi” ena vosa vakaiperiu. 19A sa bukete tale o Lia ka vakasucuma vei Jekope na i kaono ni luvena tagane. 20Sa qai kaya, “Na Kalou sa solia vei au e dua na i loloma talei. Ia oqo, sa na qai dokai au ka ciqomi au tale o watiqu, baleta ni'u sa vakasucuma vua e ono na luvena tagane”; a sa vakatoka kina me yacana o Sevuloni.#30.20 Sevuloni: Na yaca oqo e balebale vaka na “ciqomi” kei na “ai loloma” ena vosa vakaiperiu. 21Ia e muri, sa qai vakasucuma e dua na luvena yalewa, ka vakatoka me yacana o Taina.
22A sa qai nanumi Raijeli na Kalou; a sa rogoca na nona masu ka vakatara vua me vakaluveni rawa. 23A sa bukete ka vakasucuma e dua na gonetagane. Sa qai kaya, “Na Kalou sa kauta tani na noqu madua ni sa solia vei au e dua na gonetagane. 24Ia me solia e dua tale mada na luvequ tagane o Jiova”; ka sa vakatoka kina me yacana o Iosefo.#30.24 Iosefo: Na yaca oqo e balebale vaka na “me solia e dua tale” kei na “sa kauta tani” ena vosa vakaiperiu.
Na i Sau kei Jekope
25Ni sa sucu oti o Iosefo, sa qai kaya o Jekope vei Lepani. “Mo laivi au mada me'u lako, ka me'u sa lesu tale i vale, ki na noqu vanua. 26Mo soli rau na watiqu vei au kei ira na luvequ ka'u sa cakacaka kina vei iko, ka'u sa na lako. O sa kila vakavinaka sara na levu ni veiqaravi au sa vakayacora vei iko.”
27Sa qai kaya vua o Lepani. “Mo vakadonuya mada me'u kaya na ka oqo; Au sa raica rawa ni sa vakalougatataki au o Jiova ena vukumu. 28Tukuna mai vei au na kemu i sau, ka'u na sauma vei iko.”
29Sa qai kaya o Jekope, “O sa kila vinaka na ka au sa cakava vei iko, kei na kena sa tiko vinaka na nomu manumanu ena noqu veiqaravi. 30Era a lewe lailai voli ga ena gauna au a yaco mai kina, ia oqo sa tubu cake sara na kedra i wiliwili, ka sa vakalougatataki iko o Jiova ena veivanua kece sara au lako kina. Sa kena gauna oqo me'u sa qarava kina na veika e baleti au.”
31Sa qai kaya o Lepani, “A cava me'u solia vei iko?”
A sa sauma o Jekope ka kaya, “Au sega ni vinakata e dua na kequ i sau. Au na qarava tikoga na nomu manumanu kevaka o na vakadonuya na noqu vakatutu oqo. 32Mo vakadonuya mada me'u la'ki raici ira na nomu qele ni manumanu kece edaidai, ka kauta tani mai vei ira na sipi tavukadiridiri se tavutonotono, kei na luve ni sipi loaloa, kei na luve ni me tavukadiridiri se tavutonotono. Sai koya ga o ya na i sau ni noqu cakacaka au vinakata. 33E muri, o na kila vakarawarawa ni kevaka au cakacaka vakadodonu se segai. Ni o sa lako mai mo raica na kequ i sau, ia kevaka o sa raica e dua na me sa sega ni tavukadiridiri se tavutonotono, se e dua na luve ni sipi sa sega ni loaloa, o na qai kila kina ni sa butakoci mai.”
34Sa qai kaya o Lepani, “Au sa vakadonuya. Me daru vakayacora sara me vaka na nomu vosa.” 35Ia ena siga o ya, a sa kauta ira tani o Lepani na me tagane volakoso se tavutonotono, kei na me yalewa tavukadiridiri se tavutonotono, se vulavula e dua na tikina; sa wasei ira tani talega na sipi loaloa kece sara. Sa qai soli ira vei iratou na luvena tagane me ratou qarava. 36A sa qai lako tani yani kei ira na nona manumanu ki na dua na vanua yawa sara mai vei Jekope; a kena yawa e rawa ni lakovi ena loma ni tolu na siga. Ia o Jekope sa vakatawana tikoga na vo ni manumanu i Lepani.
37Sa qai taura o Jekope eso na taba ni popila drokadroka, kei na taba ni amodi, kei na taba ni ivi ni vavalagi; a sa karia laivi vakatikina na kulina, ka me rawa ni laurai na vulavula veivolavolai. 38Sa qai la'ki vakaduri ira na tabanikau oqo ena nodra i gunugunu kece sara na manumanu. A sa biuti ira na tabanikau e kea baleta ni ra dau mai veiyacovi e kea na manumanu ena gauna era mai gunu kina. 39Ia ni ra sa kunekune na manumanu ena mata ni tabanikau, era sa vakasucuma na manumanu era veivolavolai, ka tavukadiridiri, ka tavutonotono.
40A sa tawasei ira tani na sipi o Jekope mai vei ira na me, ka sa vagolei ira yani me ra vakanamata vei ira na manumanu veivolavolai kei na manumanu loaloa kecega i Lepani. Ena sala oqo sa vakatubura cake kina o Jekope na nona qele ni manumanu ka tawasei ira tani mai na manumanu i Lepani.
41Ena gauna era dau veiyacovi kina na manumanu bulabula, a sa biuta o Jekope na tabanikau e matadra me ra raica ena nodra i gunugunu, me rawa ni ra veiyacovi ena maliwa ni tabanikau. 42Ia sa sega ga ni biuta na tabanikau e matadra na manumanu malumalumu. Oqo sa vakavuna me taukena kina o Lepani na manumanu malumalumu kecega, ka taukena o Jekope na manumanu bulabula. 43A sa yaco me vutuniyau vakalevu sara o Jekope, ka sa levu na nona manumanu, na nona bobula, na nona kameli, kei na asa.
Currently Selected:
Vakatekivu 30: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.
