Joni 18
18
Sa Bukiveretaki ka Vesu o Jisu
(Maciu 26.47-56; Mari 14.43-50; Luke 22.47-53)
1Ni sa cavuta oti na masu o ya o Jisu, sa qai lako kei iratou na nona tisaipeli ki na tai kadua ni wai o Kitironi. E tiko kina e dua na i teitei, ka a la'ki curu kina o koya kei iratou na nona tisaipeli. 2E kila tu o Jutasa, na tisaipeli ka a qai bukiveretaki Jisu, na vanua o ya, baleta ni ratou a dau la'ki soqoni vakawasoma kina o Jisu kei iratou na nona tisaipeli. 3A sa qai lako yani kina o Jutasa, ka sa kauti ira tiko yani na matasotia vata eso na ovisa era sa talai mai vei ira na bete levu kei na Farisi. Era a vakaiyaragi ka ra kau cina tabucagi tiko yani kei na cina tutuvaki. 4Ia o Jisu, ni sa kila na veika kece ena vakarau yaco vua, sa qai lako yani ka kaya vei ira, “O cei beka o ni sa vakasaqara tiko?”
5Era sa kaya, “O Jisu na kai Nasareci.” Sa qai kaya vei ira o koya, “Sa i au sara ga oqo.”
A sa tiko talega ena kedra maliwa o Jutasa, o koya ka bukiveretaki Jisu. 6Ia ni sa kaya vei ira o Jisu, “Sa i au sara ga oqo,” era sa qai vakasukasuka ka bale sobu ki na qele. 7Sa qai tarogi ira tale o koya ka kaya, “O cei o ni sa vakasaqara?” Era sa kaya tale, “O Jisu na kai Nasareci.”
8A sauma tale o Jisu, ka kaya, “Au sa tukuna oti vei kemuni ni sai au sara ga o ni vakasaqara tiko. Ia, kevaka sai au o ni vakasaqara tiko, ia mo ni laivi iratou na kena vo oqo me ratou lako.” 9(A sa vosa vakaoqo me vakayacori kina na vosa ka sa tukuna oti, “I Tamaqu, au sa sega ni vakayalia e dua vei iratou o ni a solia mai vei au.”)
10Sa qai ucuna mai o Saimoni Pita na i seleiwau ka tiko vua, ka taya kina na tamata ni Bete Levu, ka taya laivi sara na daligana i matau. Na yaca ni tamata o ya o Maliko. 11Sa qai kaya kina vei Pita o Jisu, “Daramaka na nomu i seleiwau ki na kena taga, me'u sa na kakua li ni gunuva na bilo ka solia vei au o Tamaqu?”#Maciu 26.39; Mari 14.36; Luke 22.42
O Jisu ena Mata i Anasa
12Era sa qai vesuki Jisu o ira na mata sotia, kei na nodra turaganivalu, kei ira na nodra ovisa yadra na Jiu, 13ka ra kauti koya taumada vei Anasa; ka ni vugoi Kaiava o koya; ia o Kaiava e Bete Levu ena yabaki o ya. 14#Joni 11.49,50O Kaiava oqo ka a vakasalataki ira na Jiu, ni sa ganita me mate e dua na tamata ena vukudra na tamata.
Sa Cakitaki Jisu o Pita
(Maciu 26.69-70; Mari 14.66-68; Luke 22.55-57)
15E rau a muri Jisu tiko o Pita kei na dua tale na tisaipeli. E kilai koya vinaka na tisaipeli o ya na Bete Levu, ka a mani curu vata kina kei Jisu o koya ki na loma ni bai ni vale ni Bete Levu; 16ia o Pita sa la'ki tu cake tu ga ena taudaku ni katuba. A mani curu tale mai kina ki tuba na tisaipeli kadua, o koya ka kilai koya tiko na Bete Levu, ka vosa vua na yalewa ka vakatawa tiko na katuba, ka vakacurumi Pita yani ki loma. 17Sa qai kaya vei Pita na vada sa vakatawa tiko na katuba, “O iko talega e dua vei iratou na nona tisaipeli na tamata oqo?”
A qai sauma o Pita ka kaya, “Sega, e sega ni o au.”
18Era sa mani vakawaqa buka o ira na dauveiqaravi kei na yadra ni sa batabata na vanua, ka ra tucake wavolita na buka me vakatakatari ira. Sa mani gole yani o Pita ka tucake tu vata kei ira, ka vakatakatari koya.
Vaqaqai Jisu na Bete Levu
(Maciu 26.59-66; Mari 14.55-64; Luke 22.66-71)
19E a qai vakatarogi Jisu na Bete Levu me baleti ira na nona tisaipeli, kei na nona i vakavuvuli talega. 20A sauma vua o Jisu, ka kaya, “Au a sa dau vosa oti ena matana levu; au a dau veivakatavulici tiko ena veivalenilotu kei na Valenisoro, na vanua era dau soqoni vata kina o ira kece na Jiu. Au a sega ni kaya vakavuni e dua na ka. 21A cava tale o qai vakatarogi au kina? Tarogi ira ga ka ra a sa rogoca oti, se cava soti au a dau kaya vei ira: era kila tu na ka au a dau kaya.”
22Ia ni sa vosa oti vaka o ya, sa qai sabici koya e dua vei ira na ovisa, ka kaya, “E vaka tu oqori na nomu sauma na nona vosa na Bete Levu?”
23A sauma vua o Jisu, ka kaya, “Kevaka au sa tukuna e dua na ka ca, tukuna mai vei ira kece era tu oqo se na cava o ya. Ia kevaka ka'u sa dina tiko me baleta na veika au sa tukuna, ia na cava na vuna o sa sabici au kina?”
24Ni oti o ya sa qai vakauti Jisu sara o Anasa vei Kaiava na Bete Levu; ka se vesu tu ga na ligana.
Sa Cakitaki Jisu Tale o Pita
(Maciu 26.71-75; Mari 14.69-72; Luke 22.58-62)
25A se tu cake tu ga o Pita ka vakatakatari koya tiko. Era sa qai kaya vua, o ira ka tu vata kaya, “E sega li ni o dua talega vei iratou na nona tisaipeli o iko?”
A qai cakitaka o koya, ka kaya, “E sega ni oi au!”
26Sa qai kaya vua e dua na tamata ni Bete Levu, e dua ka weka i koya ka a taya laivi na daligana o Pita, “E sega beka ni'u a raici kemudrau vata ena i teitei?”
27Sa qai cakitaka tale o Pita, ka sa tagi sara na toa.
O Jisu ena Mata i Pailato
(Maciu 27.1-2,11-14; Mari 15.1-5; Luke 23.1-5)
28Ena mataka caca ni siga ka tarava era sa qai kauti Jisu tani mai vei Kaiava ki na i tikotiko ni kovana, de ra na vakadukadukalitaki kina, ka na qai sega kina ni rawa me ra kania na kakana ni Lakosivia. 29Sa qai curu vei ira ki tautuba o Pailato, ka kaya, “A cala cava o ni beitaka vua na tamata oqo?”
30Era a qai sauma ka kaya vua, “Kevaka sa sega na cala e cakava na tamata oqo, ke keimami a sega ni kauti koya mai vei kemuni.”
31Sa qai kaya vei ira o Pailato, “Ni kauti koya, ka la'ki veilewaitaki koya ga me vaka na nomuni lawa.”
Era sa qai kaya vua o ira na Jiu, “E sega ni tara vei keimami me keimami vakamatea e dua na tamata.” 32(O ya me vakayacori sara kina na vosa i Jisu ka a cavuta me vakatakila kina na i tovo ni mate ena mate kina.)#Joni 3.14; 12.32
33Sa qai curu tale ki na valeniveilewai o Pailato, ka kacivi Jisu, ka kaya vua, “O iko li na nodra Tui na Jiu?”
34A sauma o Jisu, ka kaya, “Oqori li na ka o kaya vakataki iko ga, se ra tukuna vei iko o ira na tani me baleti au?”
35Sa qai kaya tale o Pailato, “O nanuma beka ni'u sa dua vei ira na Jiu oi au? O ira ga na kai nomu kei ira na bete levu era sa soli iko mai oqo kivei au. Na cava o cakava?”
36Sa qai sauma o Jisu, ka kaya, “Na noqu matanitu e sega ni matanitu ni vuravura oqo; kevaka e ka ni vuravura oqo, ke ra na vala na noqu tamata, me'u kakua kina ni soli vei ira na Jiu. Sega, e sega ni wili eke na noqu matanitu.”
37Sa qai tarogi kaya o Pailato, “O iko bagi e dua na tui?”
A sauma o Jisu ka kaya, “O sa kaya ni'u sa dua na tui. Au sa sucu ka lako mai ki vuravura oqo ena duabulu ga na i naki, o ya me'u mai tukuna na ka dina. O koya ga sa vakabauta na ka dina sa dau rogoca na noqu vosa.”
38Sa qai kaya vua o Pailato, “A cava na dina?”
Sa Tauci na Lewa me Mate o Jisu
(Maciu 27.15-31; Mari 15.6-20; Luke 23.13-25)
Ni sa vosa oti vaka o ya o Pailato, sa qai curu tale ki tautuba kivei ira na Jiu, ka kaya vei ira, “Au sa sega ni kunea e dua na nona cala. 39Ia e dua tiko na nomuni i vakarau, o ya me'u sereka e dua na kaivesu vei kemuni ena gauna ni Lakosivia. Dou sa vinakata li me'u sereka vei kemuni na nodra Tui na Jiu?”
40Era sa qai sauma mai ena qoqolou, “E segai, me kakua ni tamata oqo! Keimami vinakati Parapa ga!” (Ia o Parapa oqo e dua na tamata dauvakacaca.)
Currently Selected:
Joni 18: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.
