Luke 24

Na Tucake Tale

(Maciu 28.1-10; Mari 16.1-8; Joni 20.1-10)

1Ena mataka caca sara ni Siga Tabu, e ratou sa lako yani na yalewa ki na i bulubulu, ka kauta tiko na i saluwaki boi vinaka e ratou sa vakarautaka oti tu. 2E ratou sa kunea ni sa vaqiqici tani tu na vatu mai na i bulubulu, 3ka ratou mani curu ki loma; ia e ratou a sega ga ni kunea na yago ni Turaga o Jisu. 4Ni ratou se kurabuitaka tu ga na ka oqo, e vakasauri ni rau sa tu e yasadratou e lewe rua na tamata e rau vakaisulu tu ena i sulu ramase ka lumilumisa. 5E ratou sa rere vakalevu na yalewa, ka cuva sobu ki na qele ena vakarokoroko. E rau sa qai kaya na tamata o ya vei iratou, “Na cava dou sa vakasaqarai koya kina sa bula ena kedra maliwa na mate? 6O koya sa sega eke; sa tucake tale! Dou nanuma na nona vosa vei kemudou ni se tiko voli kei kemudou mai Kalili,#Maciu 16.21; 17.22,23; 20.18,19; Mari 8.31; 9.31; 10.33,34; Luke 9.22; 18.31-33 7ni sa kaya, ‘Ena soli yani na Luve ni Tamata ki na ligadra na tamata ca, ka na lauvako ena kauveilatai, ka tucake tale ena i katolu ni siga.’

8E ratou sa qai nanuma na nona vosa; 9ka ratou sa lako tani mai na i bulubulu ka tukuna na veika kece o ya vei iratou na lewe tinikadua, kei ira na kena vo. 10O iratou ka a la'ki tukuna na veika o ya vei iratou na i apositolo sai iratou o Maria na yalewa ni Makitala, kei Joana, kei Maria na tina i Jemesa, kei iratou tale eso ka ra tiko vata voli. 11Ia sa vaka e i tukuni walega vei iratou na i apositolo na i tukutuku o ya mai vei iratou na yalewa, ka ratou a sega kina ni vakadinata. 12Ia sa qai tu cake o Pita ka cici ki na i bulubulu; sa cuva sobu ka rai ki loma, ka raica na i sole lineni ni sa koto walega. A sa lesu tale ki na koro, ka sa kurabuitaka na veika sa yaco.

Na i Lakolako ki Emeo

(Mari 16.12-13)

13Ena siga vata tikoga o ya, e rau a lako tiko kina e lewe rua ka dau muri Jisu voli ki na koro o Emeo, ka rauta e tinakadua na kilomita mai Jerusalemi, 14rau a veitalanoataka tiko na veika kecega ka se qai yaco oti. 15Ena gauna e rau veitalanoa ka veisoli vakasama tiko kina, sa toro voleka vei rau o Jisu ka mai lako vata sara yani kei rau; 16e rau a raici koya, ia e rau a sega ga ni tauri koya vinaka ka kilai koya sara. 17Sa qai kaya vei rau o koya, “Na cava o drau veitalanoataka tiko, ena nomudrau taubale tiko oqo?”

E rau sa mani tu vakadua, ka sa rarawa vakalevu na matadrau. 18Sa qai tarogi koya e dua vei rau, o Kaliopasa na yacana, ka kaya, “O iko duadua beka li na vulagi e Jerusalemi ka sega ni se bau kila na veika e se qai yaco walega oqo ena vica na siga sa oti?”

19Sa qai kaya vei rau o koya, “Na veika cava soti?”

E rau sa qai kaya vua, “Na veika me baleti Jisu na kai Nasareci. O koya e dua na parofita, a tamata kaukauwa ena cakacaka kei na vosa ena mata ni Kalou kei na matadra kecega na tamata. 20Era a soli koya na bete levu kei ira na neimami turaga me la'ki lewai me mate, ka ra a mani vakota ki na kauveilatai. 21Ia keimami a nuitaka tu ni sai koya sara ga ena mai sereki Isireli. Sa i koya talega oqo na i katolu ni siga mai na kena a yaco na veika koya. 22Ia keimami a kurabuitaka vakalevu ena ka e ratou a mai tukuna eso vei ira na neimami yalewa. E ratou a tiko mai na i bulubulu ena mataka caca, 23ia e ratou a sega ni kunea kina na yagona. E ratou sa qai lesu tale mai, ka mai kaya ni ratou a raica votu eso na agilosi, ka ra kaya vei iratou ni sa bula tiko o koya. 24Sa qai lako ki na i bulubulu eso vei ira keimami tiko vata ka ra vakadinadinataka na veika kece sara ga e ratou sa tukuna oti na yalewa, ia e ratou a sega ga ni raici koya.”

25Sa qai kaya vei rau o Jisu, “Drau sa sesewa dina, ka berabera ni vakabauta na veika kece era sa tukuna na parofita! 26E sega li ni sa dodonu ga me sota kaya mada na veika rarawa oqo na Mesaia, ka me qai curu ki na nona i serau?” 27Sa qai vakamacalataka vei rau o Jisu na veika e tukuni tu me baleti koya ena i Vola Tabu taucoko, me tekivu mai na i vola i Mosese eso kei na kedra i na nodra i vola na parofita kece sara.

28Ia ni ratou sa volekata yani na koro e ratou lako tiko kina, sa qai lako siviti rau o Jisu me vaka beka ni se yawa sara tiko na vanua me lakova. 29Ia e rau sa qai tarovi koya, ka kaya, “Mo tiko ga eke vata kei keirau; ni sa kala sobu na matanisiga ka sa voleka mai na butobuto.” A sa mani lako ka tiko vata kei rau. 30Ni ratou sa tiko me ratou kana, sa qai taura na madrai o koya, ka cavuta na vosa ni vakalougatataki; sa qai dovia ka solia vei rau. 31Sa qai dolavi na matadrau ka rau sa qai kilai koya sara, ia sa yali vakasauri tale o koya ena kedrau maliwa. 32E rau sa qai veikayaka vakai rau, “E sega li ni a katakata na lomadaru ena gauna sa vosa tiko vei kedaru mai gaunisala kei na nona vakamacalataka tiko vei kedaru na i Vola Tabu?”

33E rau sa qai tu cake ena tiki na gauna vata ga o ya ka lesu tale ki Jerusalemi. E rau a kunei iratou na lewe tinikadua ni ratou soqoni tiko kei ira eso ka ra dau tiko vata kei iratou, 34ka kaya voli, “Sa tucake dina sara na Turaga! Sa rairai oti vei Saimoni o koya!”

35E rau sa qai vakamacalataka vei ira na ka sa yaco ena gaunisala, kei na nodrau sa qai kila rawa na Turaga ni sa dovia na madrai.

Sa Rairai o Jisu Vei Iratou na Nona Tisaipeli

(Maciu 28.16-20; Mari 16.14-18; Joni 20.19-23; Caka 1.6-8)

36Ia ni rau sa vosa tikoga vaka o ya, sa tu sara o Jisu ena kedra maliwa, ka sa kaya vei ira, “Dou vakacegu.”

37Eratou sa qai kidroa ka rere, ka nanuma ga ni ratou sa raica e dua na yalo. 38Sa qai kaya vei iratou o koya, “A cava o dou taqaya kina, ka tubu kina na vakatitiqa e lomamudou? 39Dou raica na ligaqu kei na yavaqu, ka raica ni sai au dina ga. Tarai au, ka dou na raica ni sa sega ni vakalewe se vakasui na yalo, me vaka dou sa raica oqo vei au.”

40Ni sa kaya oti oqo, sa qai vakaraitaka vei iratou na ligana kei na yavana. 41E ratou a se sega tikoga ni vakabauta ni ratou sa vakasinaiti ena reki kei na lomatarotaro; sa qai mani tarogi iratou kina o koya, “E tiko vei kemudou eso na kakana me laukana?” 42E ratou sa qai solia vua e dua na tiki ni ika tavu. 43Sa qai taura ka kania sara e matadratou.

44Sa qai kaya vei iratou o koya, “Oqo ga na veika ka'u a dau kaya ni'u a se tiko vata voli kei kemudou: sa qai yaco vakaidina na veika kecega sa volai tu me baleti au ena Lawa i Mosese, kei na nodra i vola na parofita, kei na Same.”

45Sa qai dolava na nodratou vakasama me ratou kila na i Vola Tabu, 46ka kaya vei iratou, “Sa volai tu vakaoqo, ni sa kena dodonu me sota kaya na rarawa na Mesaia, ka me qai tu cake tale mai na mate ena i katolu ni siga, 47ka me vunautaki na veivutuni kei na bokoci ni valavala ca ena yacana ki na veimatanitu kecega, me tekivu e Jerusalemi. 48Dou sai vakadinadina ni veika oqo oi kemudou. 49Dou kila, au sa vakarau tala vei kemudou na ka sa yalataka o Tamaqu; ia dou tiko mada ga ena koro oqo, me yacova ni dou sa vakasulumi ena kaukauwa mai cake.”#Caka 1.4

Sa Kau Cake o Jisu ki Lomalagi

(Mari 16.19-20; Caka 1.9-11)

50Sa qai kauti iratou tani mai Jerusalemi ka yaco sara ki Pecani, ka sa dodoka cake kina na ligana ka vosa vakalougatataki iratou.#Caka 1.9-11 51Ia ni sa vosa vakalougatataki iratou tikoga, sa takali sara mai vei iratou ka sa kau cake ki lomalagi.#Sr 50.20 52Eratou sa qai vakarokoroko vua ka lesu tale ena marau levu ki Jerusalemi, 53ka ratou sa dau la'ki tiko ga ena Valenisoro me ratou vakavinavinaka tiko kina vua na Kalou.

Currently Selected:

Luke 24: FNVDC12

Highlight

Copy