VAKATEKIVU 10
10
Na Nodratou Kawa na Luve i Noa
(1Vei 1.5-23)
1Sai ira oqo na nodratou kawa na luve i Noa: o Semi, kei Ame, kei Jefeca. Era a sucu na luvedratou ni sa oti na waluvu.
2Oqo o iratou na luve i Jefeca tagane: o Komera, Mekoki, Metai, Javana, Tupali, Meseki, kei Tairasa. 3Sai iratou oqo na luve i Komera: o Asikenasi, o Refaca, vata kei Tokama. 4Oqo o iratou na luve i Javana: o Ilaisa, o Tasisi, o Kitimi, vata kei Totenimi. 5O ya na nodra i tubutubu na tamata era a vakaitikotiko ena baravi kei na veiyanuyanu. Sai ira oqo na kawa i Jefeca era sa dui vakaitikotiko ena nodra mataqali kei na vanua, ka sa vosataka na nodra duivosavosa ni nodra wasewase.
6Sai iratou oqo na luve i Ame tagane: o Kusa, o Ijipita, o Libiya, kei Kenani - ka tubudra na kawa tamata era sa vakayacani vata kaya. 7Ia na luve i Kusa o Sepa, o Avila, o Sapita, o Reama kei Sapiteka; ia na luve i Reama o Sepa kei Titana. 8A dua ga na luve i Kusa tagane, na yacana o Nimiroti, a sa yaco me i sevu ni tamata qaqa e vuravura. 9Ena veivuke ni Kalou, a sa yaco kina o koya me tamata dauvakasasa rogo levu; ka ra dau tukuna kina na tamata, “Me vakataki Nimiroti, na dauvakasasa rogo levu ena mata ni Kalou.” 10Na i tekivu ni nona matanitu e okati kina o Papiloni, kei Ireki, kei Akata, ka ratou tiko kece na veivanua oqo e Papilonia. 11A qai lako yani ki na vanua o Asiria ka la'ki tara kina na veikoro lelevu o Ninive, kei Riopaca, kei Kala, 12kei na koro levu o Risini, ka koto ena kedrau veimama o Ninive kei Kala.
13O ira na kawa i Ijipita sai ira na kai Lidia, kei Anami, kei Leapi, kei Nefitu, 14kei Pacirusi, kei Kasilu (sa tubu mai kina na kai Filisitia), kei ira mai Kiriti.
15Oqo o ira na kawa i Kenani; na nona ulumatua tagane o Saitoni ka tarava o Eri. 16O Kenani e tamadra talega na Jepusaiti, na Amoraiti, na Kakesaiti, 17na Aivaiti, na Akaiti, na Sainaite, 18na Avataiti, na Semaraiti, kei ira na Amataiti.
E muri era sa qai talabusese na kawa i Kenani. 19Ia na nodra i yalayala ni vanua na kai Kenani sa vakatekivu mai Saitoni me yaco sara i Qasa, o ya mai na muana e gole vaka i Kira; ka yaco sara i Lesa, o ya mai na muana e gole vaka i Sotoma, kei Komora, kei Atima, kei Sepoimi. 20Sai ira oqori na kawa i Ame, ka ra sa tiko ena nodra dui yavusa ena nodra vanua, ka ra sa dui vosataka na nodra dui vosa.
21O Semi na tuakai Jefeca, sa nodra qase kecega na kawa tamata na Iperiu. 22O ira na luve i Semi, oqo o Ilama, kei Asura, kei Afakisate, kei Luti, kei Erami, era sa nodra qase na tamata kece era okati ena dui yacadratou. 23O ira na kawa i Erami: o Usu, kei Uli, kei Keceri, kei Masi. 24A luve i Afakisate o Sela, a qai luve i Sela o Iperi. 25A sa rua na luve i Iperi; e dua na yacana o Peleki,#10.25 Peleki: Na yaca oqo e balebale vaka na “tawase” ena vosa vakaiperiu. baleta ni ra a tawase tu na tamata e vuravura ka donuya na gauna o ya; kei na yaca i tacina o Jokitani. 26Sai ira oqo na luve i Jokitani; o Alimotati, o Selefi, o Esamaveci, o Jera, 27o Atorami, o Usali, o Tikila, 28o Opali, o Apimeeli, o Sepa, 29o Oferi, o Avila, kei Jopapa. Oqo o ira kece sara na luve i Jokitani. 30Na i yalayala ni vanua era tiko kina sa vakatekivu mai Mesa, ka muria na sala e gole vaka i Sefari, me yaco sara ki na veiulunivanua ki na tokalau. 31Sai ira o ya na kawa i Semi, era a tiko ena nodra dui yavusa ena nodra vanua, ka ra dui vosataka talega na nodra vosa.
32Sai ira kece oqori na yavusa tamata era kawa i Noa, ena wasewasei ni veivanua, me vaka na i tuvatuva ni nodra kawa. Ni oti na luvuci ni vuravura, na veimatanitu kece e rukui vuravura era kawa kece ni luve i Noa tagane.
Currently Selected:
VAKATEKIVU 10: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
