VAKATEKIVU 13
13
Rau Veitawasei o Eparama kei Loti
1A sa lako cake mai Ijipita o Eparama ka lako vaka ki na vualiku kei na watina, kei na nona i yau kecega. A sa lako vata kei koya o Loti. 2Sa vutuniyau sara o Eparama ena sipi, kei na me, kei na bulumakau, ka vakakina na siliva kei na koula. 3A sa qai biuta na vanua o ya ka lako mai na dua na vanua ki na dua tale me la'ki yaco sara yani ki Peceli, na vanua sa tiko kina e liu na nona valelaca, ena kedrau veimama o Peceli kei Ai, 4ena vanua ka a tara kina na i cabocabonisoro. A sa sokalou mai kea vei Jiova o Eparama.
5Ia o Loti talega sa levu na nona sipi, na me, na bulumakau, ka vakakina na nona vuvale kei na nona dauveiqaravi. 6A sa sega ni qai rauti rau na vanua me rau tiko ruarua kina, baleta ni sa rui levu na nodrau manumanu. 7Ena ka oqo era sa dauveivala kina na i vakatawa ni manumanu nei Eparama kei na i vakatawa ni manumanu nei Loti. (Ena gauna o ya era a se tiko ga kina na kai Kenani kei na kai Perisaiti ena vanua o ya.)
8A sa qai kaya vei Loti o Eparama, “Me kakua ni dua na veivala me tubu vei kedaru, se vei ira na nodaru tamata ka ni daru sa veiwekani ga. 9Digitaka me nomu na vanua o vinakata, ka me daru sa na tawase; kevaka o lako ki na i mawi au na lako ki na i matau, ia kevaka o lako ki na i matau au na lako ki na i mawi.”
10A sa veiraiyaki o Loti ka raica ni vanua suasua vinaka taucoko sa volita na Buca na Joritani me yaco sara ki Soa, ka sa vaka na i Teitei i Jiova#13.10 Teitei i Jiova: Oqo e dusia na i Teitei o Iteni. se na vanua o Ijipita. (Oqo ena gauna a se bera ni vakarusai Sotoma kei Komora kina ko Jiova.)#Vteki 2.10 11A digitaka o Loti na vanua kece sa volita na Buca o Joritani ena yasana vaka ki na tokalau. Sa vaka o ya na nodrau veitawasei. 12A tiko ga o Eparama ena vanua o Kenani, ia o Loti sa la'ki tiko ena veimama ni veikoro ena buca volekati Sotoma. 13O ira na kai Sotoma era tamata i vakarau ca ka i valavala ca ena mata i Jiova.
Sa Lako ki Epironi o Eparama
14Ni biuti Eparama oti o Loti, a qai vosa ko Jiova vei Eparama ka kaya, “Mo tacake ka veiraiyaki ki na veiyasana kecega ena vanua o tu kina. 15Au na solia na vanua kecega o sa raica kivei iko kei ira na nomu kawa#13.15 Vakaiperiu (Hb) “na itei” (seed), ka me nomu vakadua.#Caka 7.5 16Au na vakalewevuqataka na nomu kawa me vaka na kuvu ni soso. Kevaka e wiliki rawa na kuvu ni soso, ena qai wiliki rawa talega na nomu kawa. 17Mo cavutu ka lakova na loma ni vanua taucoko, ka ni'u na solia taucoko vei iko.” 18A sa cavuta na nona valelaca o Eparama ka la'ki vakaitikotiko volekata na veikau tabu mai Mamire e Epironi. A sa tara mai kea e dua na i cabocabonisoro vei Jiova.
Currently Selected:
VAKATEKIVU 13: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.
